‘No Ken Sori Tumas Olsem Ol Arapela’
YU BIN lukim wanpela plaua em bikpela win na ren i sakim nabaut na het bilong en i go daun? Yumi sori long en, a? Taim dispela bikpela ren i kam daun, ating ol man na ol animal—em ol i strongpela samting, winim plaua—ol i ranawe na abrusim. Tasol plaua i sanap i stap na karim dispela hevi. Nau em i stap yet—het i go daun, tasol i no bruk—maski i olsem em i no gat strong. Yu lukim dispela plaua na kirap nogut long en na ating yu tingting olsem: Bihain bai em i kisim bek strong olsem bipo na apim gen het bilong en?
Em wankain tu long ol man. Yumi stap long taim bilong planti hevi na i olsem bikpela win na ren i sakim yumi nabaut. Yumi gat hevi long mani, na sampela taim yumi save bel hevi, o yumi gat sik, o wanpela long famili bilong yumi i dai. Sampela taim yumi no inap ranawe na abrusim hevi, olsem plaua i no inap abrusim bikpela win na ren. Yumi save amamas tru long lukim sampela man i olsem ol i no gat strong, tasol ol i sanap strong na karim ol dispela hevi. Ol i mekim olsem wanem? Bilip em i as bilong strong bilong sampela. Jems, em brata bilong Krais Jisas, em i tok: “Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.”—Jems 1:3.
Na sapos man i wetim gutpela samting, dispela tu inap strongim em, olsem long taim wanpela famili bilong em i dai. Aposel Pol i tokim ol Kristen long Tesalonaika: “Mipela i laik bai yupela i ken save gut long wanem ol samting bai i kamap long ol manmeri i dai pinis. Nogut yupela i sori tumas, olsem ol arapela manmeri i no bilip long God na i no wetim taim bilong kirap bek long matmat.” (1 Tesalonaika 4:13) Taim wanpela famili bilong Kristen i dai, Kristen i save sori, tasol bel bilong em i no pas olgeta, long wanem, em i save long ol samting i save painim man i dai pinis na em i wetim dispela man i kirap bek.—Jon 5:28, 29; Aposel 24:15.
Dispela save i mekim na ol Kristen i wetim gutpela samting, na ol i no sori tumas. Na dispela i helpim ol long sanap strong na karim dispela hevi, na ol narapela hevi tu. Na olsem dispela plaua, bihain bai ol inap apim gen het na amamas long ol i stap yet.