Strongpela Bilip Bilong Ol Brata Long Ruanda
BIHAIN liklik long kirap bilong 1994 ol man bilong olgeta hap i kirap nogut long ol ripot i kamap long ol i bagarapim planti man long Ruanda, em wanpela kantri bilong Afrika. Wanpela bikpela pait nogut tru i bin kirap—as bilong en, em pasin birua i bin i stap planti handet yia namel long tupela lain.
Ol man i mekim nabaut na i olsem i no gat lo moa i bosim kantri, olsem na ol Witnes Bilong Jehova long Ruanda, ol inap olsem 2,000 samting, ol i mas ranawe, nogut ol i bagarap. Inap 1,300 samting ol i go i stap long sampela kem bilong ol refyuji long Saier na Tansania, tasol sampela i no inap ranawe hariap. Sori tru, mipela i mas tokaut olsem 400 samting brata sista bilong yumi—ol man, meri, pikinini—ol i bagarap long dispela pait, em ol man i longlong nabaut na bagarapim nating ol man. Ol Kristen long olgeta hap ol i bel hevi stret long ol dispela brata sista i bagarap, em ol i gat strongpela bel na ol i stap gut long God. Tasol ol i tingim tok promis bilong Baibel long ol man i dai pinis bai kirap bek.—Jon 11:25.
Olsem wanem long ol brata sista Ruanda ol i stap yet? Sosaiti i salim sampela elda bilong ol narapela kantri i go bilong kisim save long dispela samting. Wanpela ripot i tok, ol brata Ruanda i strongim bel na ol i sanap strong. Samting ol i singaut long en pastaim, em sampela buk na nius bilong Baibel. Na dispela ripot i tok, ‘Ol i gat bikpela tingting long kisim ol kaikai bilong spirit, winim ol samting bilong skin, maski ol i sot tru long planti samting.’ Ol kem i no gat ol samting bilong helpim sindaun bilong ol man, tasol ‘ples ol brata bilong yumi i sindaun long en, em i klin tru, winim ol narapela hap bilong kem.’
Sosaiti Was Taua i givim mani bilong baim kaikai, blanket, klos, su, marasin. Ol brata long Frans i givim planti samting tru, na inap long mun Jun ol i bin salim klostu tupela ton kaikai laplap samting i go long ol brata long Ruanda.
Ol man i lukim dispela pasin bilong ol Witnes long helpim ol brata bilong ol long Ruanda na ol i kirap nogut na ol i pilim tru dispela gutpela pasin bilong ol Witnes. Na ol brata inap helpim tu ol narapela man long ol dispela samting ol i bin kisim. Sampela i tok, long ol dispela kem ol Witnes tasol i gat sampela wanbilip i bin i kam lukim ol—ol narapela lotu nogat.
Dispela bikpela hevi i bin painim ol brata long Ruanda i kirapim yumi long tingim dispela “taim bilong las de” ol man bai “pait” na “bagarapim ol man nabaut.” (2 Timoti 3:1-5) Tru, Jehova i no tok promis olsem em bai wokim ol mirakel bilong lukautim lain bilong em na ol i no ken kisim bagarap, tasol em i tok promis long lukautim ol long spirit na bai ol i ken pas gut wantaim em, na insait long Taim Bilong Wan Tausen Yia bilong Krais i bosim graun, em bai kirapim bek ol dispela manmeri nau ol i dai. (Song 91:1-10) Yumi mas wok yet long beten askim Jehova long strongim na helpim ol brata bilong yumi long Ruanda long dispela taim bilong bikpela hevi.—Song 46:1.