Helpim Ol Wanbilip Bilong Yumi Long Bosnia
OL WITNES BILONG JEHOVA i no save insait long ol pait politik. (Jon 17:16) Ol i save bihainim tok bilong aposel Pol long mekim gutpela pasin long ol man na mekim moa yet long “ol famili wanbilip.” Olsem na ol i amamas long helpim ol wanwok Kristen i stap long ol hap i gat pait. (Galesia 6:10, Baibel Beck) Klostu long taim bilong kol long yia 1993-1994 ol Witnes long Ostria na Kroesia i redi long lusim laip bilong ol bilong helpim ol wanbilip long Bosnia. Ol i stori olsem:
Kirap long Mas i go inap long Oktoba 1993 mipela i no inap salim kaikai na klos samting i go long Bosnia. Tasol long kirap bilong Oktoba ol bikman bilong gavman i ting mipela inap kisim ol samting i go. Long olgeta hap bilong Bosnia i gat bikpela pait, olsem na ol brata i kisim ol samting i go, ol inap kisim bagarap.
Tasol long Tunde, Oktoba 26, 1993, ol trak bilong mipela i lusim Viena na kisim 16 ton kaikai na paiawut i go long ol wanwok Kristen long Bosnia. Mipela i pasim kat bilong kibung distrik bambai ol man i ken luksave long mipela.
Taim mipela i kamap long boda bilong Kroesia na Bosnia, ol i bringim mipela i go long hetkota bilong ami na ol i glasim gut ol trak. Mipela askim ol inap mipela i ken bihainim rot long hap bilong Serbia o nogat. Tasol ol i no larim mipela i mekim olsem. Mipela inap bihainim rot long sentral Bosnia tasol—em hap stret bilong bikpela pait!
Bai Mipela Inap?
Ol soldia i kisim mipela i go long ol ples ol i save pasim ol man, na mipela harim strongpela pairap bilong ol bikpela gan. Long nait mipela raun long bus na tupela strongpela ka i gat bikpela gan ol i kolim tenk na wanpela jip i go wantaim mipela. Long ol hap i gat bikpela pait ol trak bilong mipela i go isi isi! Ol samting i wok stret, tasol long moningtaim ol i sutim sampela katres i kam long mipela, olsem na mipela i go hait long wanpela liklik maunten. Bihain pairap bilong gan i pinis na mipela go moa.
Mipela i kamap long wanpela kem na man bilong bosim ol soldia i laik save, mipela i husat na mipela i laik mekim wanem. Taim mipela i stori pinis long ol samting mipela i laik mekim, em i tok: “Yupela i no inap mekim ol samting yupela i laik mekim. Yupela i no inap lusim dispela kem na go inap sampela mita, long wanem, long dispela kantri i gat bikpela hangre na ol man bai kirapim pait na stilim ol kago bilong yupela.” Em i strong long mipela i mas go bek gen.
Olsem wanem? Mipela inap go? Bai mipela inap lukautim kago na laip bilong mipela taim mipela i bihainim rot long hap bilong pait na hap ol man i hangre? Mipela i mas tingting gut. Mipela i harim pinis bikpela pairap bilong ol gan na bom. Taim mipela i stap wantaim ol soldia long nait mipela i lukim ol i redi long pait. Ol i pasim sampela kain klos bilong pasim ol katres na bai ol i no inap dai. Na ol i gat planti gan tu. Na man bilong kukim kaikai em tu i karim gan long baksait bilong em. Tasol mipela pasim siot na nektai na kat bilong kibung! I gutpela mipela i go yet, o nogat?
Mipela Kamap Long Travnik
I gat wanpela rot tasol bilong mipela—mipela i mas toktok wantaim wanpela lain i insait long dispela pait. Long narapela moning mipela i askim wanpela yangpela meri, em i save hetkota bilong dispela lain i stap we? Em i tok: “I no longwe. Yu wokabaut tasol long bus na yu kamap long wanpela haus bipo em i haus sik.” Kwiktaim mipela i go. Ol soldia i kirap nogut long mipela i lusim kem na mipela i no holim gan samting.
Haus hia i bagarap pinis, tasol wanpela soldia i stap. Em i tok em bai helpim mipela long toktok wantaim hetman bilong ami pastaim. Em i kisim mipela long ka nogut bilong em na long ol hap bilong pait em i spit i go. Mipela i kamap long wanpela haus na hetman bilong ami i orait long toktok wantaim mipela long wanpela rum i tudak.
Em i tok: “Asde long nait mipela i laik sutim yupela. Yupela i laikim wanem?”
“Mipela ol Witnes Bilong Jehova na mipela laik kisim kaikai samting i go long ol brata bilong mipela i sot.”
Em i kirap nogut, long wanem, inap planti wik i no gat wanpela lain i laik kisim kaikai samting i go insait long Bosnia. Ol i glasim gut mipela na ol i givim wanpela pepa bilong tok orait long mipela. Asde long nait mipela i ting bai mipela i no inap kisim ol samting i go long ol brata, na nau ol i orait long mipela i mekim, na no gat sampela soldia i go wantaim mipela.
Mipela raun long bus na kamap long ol ples ol soldia i save pasim ol man, na sampela taim mipela i raun long ol hap i gat bikpela pait. Planti birua inap painim mipela, tasol mipela i kamap gut long Travnik. Wanpela soldia i ran i go long haus em ol brata i bung long en na singaut: “Ol lain bilong yupela i kamap wantaim ol trak.” Ol brata i amamas tru. Mipela karim kaikai i go long haus na stori liklik wantaim ol brata, tasol bihain mipela i mas lusim ol gen. Tudak i laik kamap na mipela mas go yet inap 32 kilomita long ol ples nogut.
Go Long Senisa
Wanpela ka i soim rot long mipela na mipela spit i go brukim hap bilong bus. Sampela i tok mipela i no inap kamap long Senisa, tasol mipela i kamap. Mipela pilim olsem tingting bilong ol man bilong taun i stap nogut na bel i pas—ol i tingim bagarap i laik painim ol. No gat lait long taun na i no gat wanpela ka i raun long rot. Ol birua i banisim taun pinis na ol man i bel hevi tru na i gat bikpela hangre.
Taim mipela i raun long rot mipela i kirap nogut long samting mipela i lukim—tupela sista Kristen i autim tok! Ol i tokim mipela, long laspela miting ol brata i pasim tok long ol i mas go painim kaikai long bus, long wanem, olgeta kaikai i pinis. Mipela kamap long taim stret! Long 4 klok moningtaim mipela rausim kaikai long wanpela trak taim i no gat man long rot.
Long de bihain mipela go lukim wanpela jeneral bilong ami. Em i kirap nogut long mipela i kamap pinis long Senisa. Nau mipela i askim em olsem wanem long rot i go long Sarayevo?
Jeneral i tok: “Inap planti mun i no gat wanpela trak i go long dispela hap.” Em i tok orait long mipela i go long rot bilong ol maunten, tasol em i givim tok lukaut olsem: “Mi tokim yupela, em bai hatwok tru. Mi no save ol trak bilong yupela i strong o nogat.”
Na jeneral i no tok nating. Mipela kamap klostu long Sarayevo olsem 40 kilomita na mipela mas lusim dispela rot na bihainim narapela rot inap 140 kilomita moa bilong kamap long Sarayevo. Planti taim mipela ran isi isi, olsem 5-pela kilomita long wanpela wanpela aua inap 3-pela de na 2-pela nait. Man! Mipela i no inap lusim tingting long dispela raun bilong mipela, kirap long Senisa i go long Sarayevo na bihain kamap long Jablanisa. Ol strongpela ka i gat bikpela gan i mekim na rot i bagarap stret na i gat ol bikpela ston na hul long rot. Planti taim mipela i no inap opim lait, na tupela taim ka i laik pundaun long maunten nogut. Ka bilong ami i bihainim mipela em i opim lait liklik taim tasol na wantu ol i sutim katres i go long en. Sampela taim mipela i mas stretim ol bris i bagarap na ol taia bilong ka.
Taim mipela i kamap klostu long Sarayevo, mipela tokim sampela mipela laik toktok wantaim jeneral i bosim dispela ples. Taim mipela wetim jeneral mipela lukim wanpela trak i karim skin bilong 10-pela man i dai pinis na wanpela bek em ol het i pulap long en. Ol soldia i toktok long givim ol dispela bodi i go bek long lain bilong ol. Em samting nogut tru mipela i lukim, olsem na mipela i gat laik tru long taim i no gat pait moa bai kamap.—Aisaia 2:4.
Long 10 klok moningtaim ol i larim wanpela bilong mipela i go lukim jeneral na ol ofisa bilong em long wanpela rum i tudak, na lait bilong wanpela kandel tasol i stap.
Jeneral i askim mipela: “Yupela husat?”
“Mipela ol Witnes Bilong Jehova na mipela laik kisim kaikai i go long ol wanlotu bilong mipela long Sarayevo.”
“Yu save i gat planti Witnes Bilong Jehova long Sarayevo?”
“Yesa, dispela em i as na mipela i kam long hia.”
Bihain jeneral i kolim nem bilong wanpela Witnes. “Yu save long em?”
“Yesa, em pren bilong mipela.”
Jeneral i tok, “Em pren bilong mi tu. Bipo mipela i wanskul. Em i kamap Witnes na dispela i mekim na mi laikim em moa yet. Em i helpim planti ol lain bilong yupela. Plis, yu inap stori moa long ol Witnes?”
Nau mipela toktok inap wanpela aua na mipela tilim olsem 15 nius na buklet. Bihain mipela bung gen na jeneral i redi long opim rot long mipela i ken kisim ol samting i go long ol brata long Sarayevo.
Dispela i no liklik wok. Inap 30 brata na sampela narapela man i kisim ol karamap, hevi bilong olgeta wan wan i olsem 27 kilo. Long tupela nait ol i wok long 8 klok nait i go inap long 5 klok moningtaim—inap 18 aua olgeta. Wanpela elda i tok ol man i stap klostu ol i kirap nogut na ol i amamas tru na ol i brukim skru wantaim ol brata na tenkyu long Jehova! Ol tu i kisim sampela kaikai.
Tingim bikpela amamas bilong ol brata taim ol i kisim 11,000 kilo kaikai samting! Ol i stap nogut tru. Bilong baim wanpela kilo plaua ol i mas tromoi K300 i go inap K660, na bilong wanpela bek paiawut K260 samting, na bilong wanpela lita disel K20.
Mipela i pilim olsem Jehova i blesim mipela long olgeta hatwok i bin kamap long rot. Mipela i amamas tru long lukim amamas bilong ol brata taim ol i kisim ol samting. Ol brata—na mipela tu—bai mipela i no inap lusim tingting long ol gutpela samting i bin kamap. Tasol nau mipela i mas kirap tingim rot bilong go bek.
Go Bek
Mipela i askim jeneral: “Bai mipela i go bek long wanem rot?”
Em i tok: “Long wankain rot tasol.”
Skin bilong mipela i les tru na no gat planti disel na no gat spe-taia. Ren i kirap na mipela i no inap draivim ka long graun malumalum. Mipela i askim jeneral, inap mipela ken bihainim rot long hap bilong saut o nogat.
Em i tok: “Long dispela hap i gat bikpela pait. I no gat tru wanpela man inap raun long dispela hap na i no kisim bagarap.” Tasol bihain em i tingting gen na tok: “Yu bin kamap long hia, olsem na traim tasol.”
Mipela mas lusim wanpela trak na putim disel bilong en long 3-pela narapela trak. Long biknait tru mipela i lusim ples na mipela i bihainim rot i go long bus.
Taim mipela i go bek ol kain kain birua i painim mipela long rot. Wanpela trak bilong ami i bin kapsait na i pasim bris mipela i mas ran long en. Mipela i ting, sapos mipela i rausim wanpela wil bai mipela inap go.
Mipela askim wanpela soldia i karim gan: “Mipela inap rausim wil na brukim bris na bihain mipela putim wil gen?”
Soldia i makim gan long mipela na tok: “Sapos yu holim wil bai mi sutim yu.”
Mipela i ting gutpela sapos mipela i wokim kopi na givim wanpela kap long soldia. Inap sampela aua mipela i stori long em long ol kibung intenesenel i bin kamap long 1991, olsem kibung i bin kamap long Sagrep. Bihain em i no birua moa na em i larim mipela i rausim wil.
Long Jablanisa wanpela bilong mipela i tokim jeneral long rot mipela i laik bihainim. Em i kirap nogut tru long dispela. “Yupela i laik bihainim rot long ples daun Neretva?”
I gat as na em i kirap nogut, long wanem, ol narapela narapela lain ami i stap long ol liklik maunten long arere bilong ples daun Neretva. Na long olgeta taim ol i save sut i go i kam. Inap 16 kilomita rot i nogut tru. Jeneral i tok: “Rot i nogut tru, tasol yupela laik go yet?”
Jeneral i tingting gut na em i tok mipela inap go, tasol sampela man i gat namba i mas go wantaim mipela. Tasol ol i no laik! Bihain mipela i askim ol long salim tok long ples ol i save pasim ol man na toksave long mipela bai kam. Na long moningtaim bai mipela yet i bihainim dispela rot.
Long bikpela rait mipela i raitim toksave long trak olsem mipela i lain bilong helpim ol man. Mipela beten na ran i go long rot i go long ples daun. Mipela i pasim tok olsem sapos ol i sutim katres i kam long mipela bai mipela i no ken kirap na spit i go, nogut ol i ting mipela i paitman.
Mipela go long bris i brukim wara na ran i go long narapela ples daun. Taim mipela i ran mipela i lukim skin bilong sampela animal i dai pinis na ol trak na tenk i bagarap. Wantu mipela lukim sampela bom long rot, olsem na mipela i no inap go moa. Mipela bengim hon bilong trak na bihain sampela soldia i stap baksait long wanpela ston ol i lukluk i kam. Ol i tok: “Yupela husat? Yupela i mekim wanem?”
Mipela i tokim ol long mipela husat na askim ol long rausim ol bom, na ol i mekim olsem. Bihain mipela i kamap long hapsait bilong ples daun.
Ol soldia i kirap nogut taim ol i lukim mipela. Isi isi ol i lusim ples hait bilong ol, na taim ol i kamap long trak ol i holim gan na makim stret mipela. Mipela i soim ol pepa na laisens-plet long ol, em mipela i bin rausim taim mipela i raun long hap bilong pait na ol soldia i no ken lukim.
Wanpela soldia i tok: “Mipela i no save bai yupela i kam. Olsem wanem na yupela i kamap?”
Olgeta dispela ples ol soldia i save pasim ol man i no bin kisim toksave long mipela bai kam, olsem mipela i bin askim ol soldia long mekim. Soldia i tok moa: “Mipela i holim gan na klostu mipela i laik kirap na sutim yupela.”
Mipela i askim ol bilong wanem ol i no mekim.
Soldia i bekim olsem: “Mipela i no save. Ating God i makim pinis samting bai painim yupela. Tasol taim mipela i lukim yupela long kompas bilong lukluk longwe, mipela i lukim rait ‘bilong helpim ol man’ na mipela i no save bai mipela i mekim wanem long yupela. Na nau yupela i kamap pinis.” Bihain mipela i beten na tenkyu tru long Jehova long em i lukautim mipela.
Maski sindaun long dispela ples i nogut tru, tasol long samting bilong spirit ol brata sista long Bosnia i stap gutpela. Narapela i helpim narapela long ol samting em i holim bilong skin, na narapela i givim gutpela tok long narapela bilong strongim bilip bilong em. I gat 40 Witnes i save autim tok long Senisa, na tupela painia salim, na 11-pela painia haptaim, na 14 nupela man i kisim baptais. Ol 65 Witnes na 4-pela painia haptaim i stap yet long Sarayevo i save mekim 134 Baibel-stadi. Na ol Witnes i autim tok inap olsem 20 aua long olgeta mun bilong tokim ol narapela long gutnius bilong Kingdom bilong God.
Tru tumas, ol Witnes Bilong Jehova i olsem wanpela famili wanbilip i stap long olgeta hap. Ol i redi long lusim laip bilong ol bilong helpim ol wanbilip—maski ol i no bin lukim sampela bipo. Bilong wanem ol i mekim olsem? Long wanem ol i laikim tru ol. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Na dispela samting i kamap tru long famili wanbilip bilong mipela long Bosnia.
[Mep/Ol Piksa long pes 24]
(Bilong save ol dispela rait i stap we long pes, lukim buk o magasin)
Solwara Edriatik
OSTRIA
SLOVENIA
HANGARI
KROESIA
BOSNIA
Travnik
Senisa
Sarayevo
SERBIA
[Ol Piksa]
Bringim ol samting i go long Bosnia na Hetsagovina
[Piksa long pes 26]
Ol i laik abrusim trak i bin kapsait