“Mi No Bin Lukim Kain Samting Olsem!”

LONG 1993 ol i bin singautim brens-ofis bilong Sosaiti Was Taua long Ajentina long salim wan tausen manmeri i go long “God i Skulim Yumi” Kibung Distrik bilong ol Witnes Bilong Jehova long Santiago, Sili, em bai stap inap 4-pela de. Em i namba wan taim ol i bin singautim planti Witnes bilong Ajentina long i go wantaim long wanpela kibung i kamap long narapela kantri.a Olsem na inap 8,500 brata sista ol i salim pepa bilong toksave olsem ol i laik i go, na Sosaiti i makim 1,039 bilong ol long i go.

Ol i sata long 14 bas bilong kisim ol i go long kibung. Kirap long Buenos Aires i go long Santiago em 1,400 kilomita. Ol bas i ran inap 26 aua na ol brata sista i lukim ol naispela naispela ples na maunten samting. Taim ol i wok long brukim ol maunten Andis, ol i go klostu long maunten Akonkagua, em i go antap inap 6,960 mita. Em i antap moa, winim olgeta narapela maunten long hap bilong Wes. Nau ol bas i mas bihainim rot i go daun moa na i baut baut namel long ol maunten na kamap long Sili. Ating ol i no inap lusim tingting long dispela rot. Taim bas i go daun pinis, ol pasindia i mekim save paitim han bilong tenkyu long ol draiva, em ol i bin stiaim gut ol bas long dispela hap nogut em rot i baut baut long ples maunten!

Tasol nambawan gutpela samting ol i lukim, em i stap long dispela kibung yet. Nau long olgeta hap bilong graun, narapela lain i birua long narapela lain, tasol long dispela kibung ol i lukim bikpela lain tru, inap 80 tausen, em ol i kam long 24 kantri, ol i bung wantaim na i stap wanbel​—⁠em wanpela bikpela lain brata bilong olgeta hap! Ol draiva bilong ol bas i lukim dispela pasin wanbel i stap namel long ol dispela lain bilong kibung, na sampela i tokaut olsem ol i laik kisim sampela save moa long ol Witnes Bilong Jehova. Wanpela i tok: “Mi no bin lukim kain samting olsem!”

[Ol Futnot]