Em Asua Bilong Husat?
NAMBA wan man, Adam, em i kirapim pasin bilong putim asua i go long narapela. Taim em i mekim rong pinis, em i tokim God: “Dispela meri yu bin givim mi . . . em tasol i givim mi pikinini bilong dispela diwai na mi kaikai.” I olsem em i tok: “I no asua bilong mi!” Namba wan meri, Iv, em tu i mekim olsem. Em i tok: “Snek i grisim mi na mi kaikai.”—Stat 3:12, 13.
Em nau, long gaden Iden dispela pasin i kamap bilong putim asua i go long ol narapela man. Yu bin mekim olsem? Taim wanpela hevi i kamap, yu save putim asua bilong en i go long ol narapela? O yu save skelim gut ol samting i bin kamap na bai yu ken save, em asua bilong husat tru? Taim yumi popaia, i no hatwok long yumi sutim tok long ol narapela na tok, “I no asua bilong mi!” Orait nau yumi ken stori long sampela samting i save kamap na ol samting sampela man i save mekim. Na bikpela samting tru, em yu ken tingim samting yu yet bai mekim sapos dispela samting i painim yu.
Sot Long Mani
Taim mani bilong sampela i pinis, ol i save tok: “Em i no asua bilong mi—nau mani i no gat strong moa; ol man bilong bisnis i mekim pasin giaman; pe bilong ol samting i go antap tru.” Tasol tru ol dispela samting i mekim na ol i no gat mani o ol i no inap bekim dinau? Ating sampela hevi bilong mani i kamap na ol i bin go insait long sampela kain bisnis samting ol i no save gut long en. Sampela man i save mangal long mani na ol i ting dispela i rot bilong kisim kwik bikpela mani. Na tu, ol man bilong giaman ol inap giamanim ol long go insait long sampela bisnis samting na bai ol inap kisim kwik bikpela winmani. Ol i laik kisim tingting bilong ol man, tasol ol tok i gutpela long yau bilong ol, ol i laik bihainim dispela tasol. Tasol taim mani bilong ol i lus nating long dispela bisnis na bikpela hevi i painim ol, ol i laik putim asua bilong en i go long narapela man. Sampela taim dispela samting i save kamap insait long kongrigesen Kristen tu.
Sampela i bin go insait long bisnis giaman, olsem baim ol ston daimon samting, tasol i no gat daimon i stap; o ol i putim mani long sampela program bilong televisen em kampani i tok ol man i save laikim moa, tasol ol i giaman; orait kampani i pinisim program na mani i lus nating; o ol i go insait long bisnis bilong baim haus o graun na bisnis i bagarap. Ating ol i mangal long mani na ol i no tingim tok bilong Baibel olsem: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus . . . na ol i karim bikpela hevi moa.”—1 Timoti 6:9, 10.
Na sapos man i tromoi nabaut mani long kain kain samting, dispela tu inap rabisim em. Sampela i laik kamap wankain olsem ol man na meri ol i lukim long ol buk samting, em ol i putim ol klos i gat stail; o ol i save go malolo long sampela hap i gat gutpela haus pasindia samting na ol i mas baim long bikpela mani, o oltaim ol i save go long ol haus kaikai i gat nem, na ol i baim ol samting bilong amamas, olsem gutpela bot, nupela kain kamera, masin sterio, na kain samting olsem. Tru, ating sampela i bin bungim mani na nau ol inap baim ol dispela samting. Tasol ol man i laik baim kwik, bai ol i gat bikpela dinau tru bilong bekim. Sapos ol i mekim olsem, em asua bilong husat? Yumi save, ol i bin givim baksait long tok bilong Sindaun 13:18, i tok: “Sapos man i no larim ol arapela man i stretim em, em bai i stap rabis na i sem nogut tru.”
Ol i Gat Hevi Long Pikinini
Sampela papamama i save tok: “Em asua bilong ol elda na ol pikinini bilong mi i lusim tok i tru. Ol i no bin helpim gut ol pikinini bilong mi.”
Tru, ol elda i gat wok long was long ol sipsip na lukautim ol, tasol olsem wanem long ol papamama yet? Ol i stap olsem gutpela piksa tru long bihainim ol pasin em spirit bilong God i save kamapim? Ol i bin mekim Baibel-stadi long famili long olgeta taim? Papamama i bin givim bel long mekim wok bilong Jehova na helpim ol pikinini na bai ol tu inap mekim? Ol i bin was gut long ol poroman bilong ol pikinini bilong ol?
Na tu, i no hatwok long papamama i sutim tok long tisa na tok: “Em asua bilong ol tisa na pikinini bilong mi i no kisim gutpela mak long skul. Ol i no laikim em. Na dispela skul i no gat gutpela nem long skulim gut ol pikinini.” Tasol olsem wanem? Papa o mama i save toktok gut wantaim ol tisa? Em i save long ol wok na stadi pikinini i mas mekim long skul? Em i bin makim taim bilong pikinini i mas mekim homwok? Na sapos pikinini i hatwok long mekim, em i bin helpim pikinini? Ating pikinini o papamama i les na i no laik mekim?
Nogut papamama i putim asua i go long skul; gutpela sapos ol yet i kirap na helpim ol pikinini long kisim stretpela tingting long skul na givim bel long lain gut long ol samting.
Ol i No Kamap Strong Long Spirit
Sampela taim yumi harim sampela i tok: “Tru mi no strong tumas long ol samting bilong spirit, tasol i no asua bilong mi. Ol elda i no save tingting tumas long helpim mi. Mi no gat sampela poroman. Spirit bilong Jehova i no stap long dispela kongrigesen.” Tasol sampela long kongrigesen i gat ol poroman, na ol i stap amamas, na ol i kamap strong long ol samting bilong spirit; na Jehova i mekim gut long kongrigesen na em i go bikpela na i kamap strong. Orait, olsem wanem na sampela i gat ol dispela hevi?
Ol man i no laik poroman wantaim man i save toktok planti long ol samting. Sapos maus bilong man i sap tumas na oltaim em i toktok planti long ol samting, dispela inap mekim ol narapela i bel hevi. Ol i no laik slek long ol samting bilong spirit, olsem na ating sampela i no laik bung tumas wantaim em. Em nau, ating em bai ting kongrigesen i givim baksait long em. Olsem na em bai go long ol narapela narapela kongrigesen. Ol dispela kain man ol i mekim olsem sampela bikpela lain animal long Afrika, oltaim ol i save raun raun bilong painim grinpela gras i swit long ol. Tasol ol inap i stap amamas sapos ol i wok long lukim ol gutpela pasin bilong ol man na wok strong long kisim ol gutpela pasin em spirit bilong God i save kamapim!—Galesia 5:22, 23.
Bilong mekim olsem, sampela i save toktok wantaim ol narapela narapela long ol miting long Haus Kingdom na mekim gutpela tok long em long wanpela gutpela samting ol i bin lukim, olsem ol pikinini bilong em i save bihainim gutpela pasin long miting, o em i no save lusim ol miting, o em i bekim gut tok long Stadi Wastaua, o em i larim kongrigesen i mekim Buk-Stadi na bung bilong autim tok long haus bilong em, na kain samting olsem. Olsem na yu mas wok strong long lukim ol gutpela pasin bilong ol brata sista Kristen, ating ol liklik pasin kranki bilong ol i karamapim na pastaim yu no bin lukim. Olsem na ol bai laikim yu tru, na bai yu gat planti gutpela pren ol bai stap pren tru bilong yu.
Narapela Tok Ol i Mekim
“Em laik bilong God.” “Em asua bilong Satan.” Em nau, taim sampela i popaia ol i putim asua i go long God o Satan. Tru, God o Satan i save stiaim sampela samting i painim yumi, tasol sampela i ting, olgeta wan wan samting i save painim ol—ol gutpela samting na ol samting nogut—em God o Satan yet i bin mekim na dispela samting i kamap. I olsem ol i ting i no gat wanpela samting i painim ol em ol yet i bin mekim na i kamap. Na sampela i tok: “Sapos God i laik bai mi kisim dispela nupela ka, em bai wokim rot na mi inap kisim.”
Sampela i save mekim nating tasol long ol samting bilong mani na ol narapela samting tu, na ol i ting God yet bai lukautim ol na hevi i no ken painim ol long dispela. Na sapos ol pasin kranki ol i mekim long wok bisnis o ol narapela wok i kamapim bikpela hevi bilong mani o narapela hevi long ol, ol i save tok, em asua bilong Satan. Tasol sapos yumi kirap na mekim nating wanpela wok samting na yumi no skelim gut pastaim, na bihain yumi putim asua i go long Satan, o yumi ting Jehova i mas helpim yumi na bai hevi i no ken painim yumi long dispela, dispela pasin i no gutpela, na em i no stret wantaim tok bilong Baibel.—Luk 14:28, 29.
Satan i laik bai Jisas i kisim dispela kain tingting. Matyu 4:5-7 i stori long namba 2 traim bilong Jisas olsem: “Satan i kisim em i go long Jerusalem, taun bilong God, na i putim em antap tru long tempel. Na Satan i tokim em olsem, ‘Sapos i tru yu Pikinini Bilong God, orait yu kalap i go daun. Long wanem, buk bilong God i gat tok olsem, “Em bai i tokim ol ensel bilong en long ol i mas was long yu.” Na “Ol bai i karim yu long han bilong ol, nogut wanpela ston i sutim lek bilong yu.” ’ ” Tasol Jisas i save, sapos em i mekim pasin longlong olsem, o em i mekim samting em inap kisim bagarap long en, em i no ken ting Jehova i mas helpim em na bai hevi i no ken painim em. Olsem na em i tokim Satan: “Buk bilong God i tok moa olsem, ‘Yu no ken traim strong bilong God, Bikpela bilong yu.’ ”
Ol man i mekim kranki ol samting na ol i tok em asua bilong Satan o God, ol i wankain olsem ol man i save lukluk long ol sta—taim hevi i painim ol, ol i tok ol sta yet i mekim. Ol i ting, klostu olgeta samting i painim ol, ol yet i no inap bosim ol dispela samting. Tasol ol i lusim tingting long tok bilong Galesia 6:7, i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.”
Kisim Stretpela Tingting
Olgeta man i save, yumi ol man bilong dispela graun i no gutpela tumas. Ol dispela hevi nau yumi bin kamapim, ol i save painim tru yumi. Sampela man i save giaman na paulim mani bilong yumi. Sampela bos i no mekim stretpela pasin long yumi. Sampela poroman inap stiaim ol pikinini bilong yumi i go long rot nogut. Sampela tisa o skul i mas stretim sampela wok bilong ol. Sampela taim ol elda i no mekim pasin sori tumas o tingim gut yumi. Tasol yumi mas save long ol samting i save kamap long dispela sin i stap long yumi, na olsem Baibel i tok, “dispela graun olgeta em i stap aninit long strong bilong Satan.” Olsem na yumi no ken ting olgeta samting bai i gutpela tasol na i no gat wanpela hevi inap painim yumi.—1 Jon 5:19.
Na yumi save, yumi yet i no gutpela tumas, na planti hevi i painim yumi em i kamap long ol popaia bilong yumi yet. Pol i tokim ol Kristen long Rom: “Yupela i no ken ting save na pasin bilong yupela i winim ol arapela.” (Rom 12:3) Na dispela tok i sutim yumi ol man bilong nau tu. Taim sampela hevi i painim yumi, yumi no ken kirap kwik na bihainim pasin bilong tupela tumbuna bilong yumi na tok: “Em i no asua bilong mi.” Bai yumi askim skin bilong yumi: “Mi bin mekim wanem na dispela hevi i bin painim mi? Mi bin skelim gut ol samting pastaim na askim wanpela i gat gutpela tingting? Ol narapela i insait long dispela hevi, mi bin tingim ol i no gat asua long en na mi gat gutpela tingting tasol long ol?”
Sapos yumi bihainim ol lo bilong Baibel na bihainim gutpela tingting long skelim ol samting, bai yumi gat ol gutpela pren na yumi no gat planti hevi. Na bai yumi inap stretim planti hevi i save painim yumi long olgeta wan wan de. Bai yumi amamas long wok o mekim ol samting wantaim ol narapela na yumi no ken tingting planti na askim olsem: “Em asua bilong husat?”
[Ol Piksa long pes 28]
I gat planti samting papamama inap mekim bilong helpim ol pikinini long kamap strong long ol samting bilong spirit