Ol Yangpela i Laik Save . . .

Bilong Wanem Olgeta Taim Em Asua Bilong Mi?

“Skin bilong papa i no orait long planti samting na em i mas wok wantaim ol manmeri i save smok. Taim em i kamap long haus, sampela taim em i kros. Em i save lusim sampela samting na tok em asua bilong mi. Sapos mi tokim em, em i bin lusim dispela samting, em i save belhat na tokim mi i no stret mi tok olsem long em.”​—⁠Em tok bilong wanpela yangpela meri.

OLSEM WANEM? Sampela taim yu pilim olsem famili i save sutim tok nating long yu na tok yu yet yu mekim wanpela samting? Yu ting maski wanem hevi o popaia i save kamap, ol i tok em asua bilong yu? Joy i ting olsem. Em i gat 14 krismas na em i gat papa tasol. Planti taim em i mas lukautim ol yangpela brata susa bilong em. Joy i tok: “Sampela taim mi save stap long wanpela rum daunbilo taim ol i kirap na pait. Pasin bilong ol i longlong stret na ol i mekim olsem ol i bebi yet, tasol taim papa i kamap long haus, em i bikmaus long mi, long wanem, mi no stap wantaim ol na pasim pait.”

Sapos papamama i tok yu bikhet, o yu lesman, o yu no tingting gut na mekim wanpela samting, o ol i kolim ol narapela kain tok long yu i makim olsem ol pasin kranki bilong yu i olsem ol pasin nogut, ating long ai bilong yu i olsem sampela taim ol i laik bai ol wok bilong yu i pundaun. Famili bilong Ramon i bin kolim wanpela nem long em i makim olsem em i no inap tingim wanpela samting​—⁠em wanpela nem em i bel nogut tru long en. Ating yu tu yu bel nogut long wanpela nem o tok i save kamapim klia ol pasin kranki bilong yu, maski ol i kolim dispela nem o tok olsem tok pilai tasol. Dispela kain tok i no inap kirapim yu long stretim pasin bilong yu​—⁠em bai strongim tingting bilong yu olsem, maski wanem samting i kamap, em asua bilong yu tasol.

Sapos papamama i tok wanpela samting em asua bilong yu, dispela inap bagarapim bel bilong yu sapos as bilong dispela em pasin bilong ol long mekim gut long wanpela insait long famili na long yu nogat. Yangpela Frankie i tok: “Mi namba 2 pikinini bilong 3-pela pikinini long famili, na taim hevi o popaia i save kamap insait long famili, oltaim ol i save tok em asua bilong mi.” Ating yu pilim olsem papamama i ting ol brata susa bilong yu ol i no inap mekim wanpela rong, tasol taim hevi i kamap, wantu tasol papamama bai tok em asua bilong yu.

As na Papamama i Sutim Tok Long Pikinini

Em pasin bilong ol papamama long stretim pikinini bilong ol taim ol i popaia. Pasin bilong stretim gut pikinini i wanpela rot papamama Kristen i save mekim wok long en bilong “skulim ol [pikinini] long tok bilong Bikpela.” (Efesus 6:⁠4) Tasol sampela taim, ol gutpela papamama tu i save strong tumas long stretim pikinini o ol i kisim kwik tingting kranki long wanpela samting. Tingim wanpela samting i bin kamap taim Jisas i yangpela. Wanpela taim em i lus. Papamama i painim em long haus bilong God na em i wok long stori wantaim ol tisa long tok bilong Baibel. Tasol maski em i mekim olsem, taim papamama i painim em, mama bilong em i tok: “Pikinini, bilong wanem yu mekim dispela pasin long mitupela? Bel bilong mitupela papa bilong yu i hevi tumas na mitupela i wok long painim yu.”​—⁠Luk 2:⁠48.

Jisas em i nambawan olgeta, olsem na papamama i no ting em i insait long wanpela pasin nogut. Tasol olsem olgeta gutpela papamama, mama bilong Jisas i pilim tru wok bilong em long lukautim pikinini bilong em na em i strong long mekim olsem. Ating em i pret, nogut hevi i laik painim pikinini bilong em. Na i wankain tu long papamama bilong yu, ating sampela taim ol i strong tumas long stretim yu tasol i no olsem ol i laik nogutim yu, nogat; ol i mekim, long wanem, ol i tingim yu tru.

Na yu mas save, yumi stap long ‘taim bilong planti hevi nogut tru.’ (2 Timoti 3:⁠1) Wok na ol samting papamama i mekim bilong lukautim haus i save putim hevi long ol na ating bel bilong ol i no stap isi; dispela inap mekim na ating sampela taim ol i no mekim gutpela pasin long yu. (Skelim wantaim Saveman 7:⁠7.) Wanpela meri i save helpim ol man i gat hevi long tingting, em i tok: “Long sampela famili i gat bikpela hevi, papamama inap belhat na pasim tok kwiktaim long wanpela samting, maski dispela i no pasin tru bilong ol.”

Planti papa o mama i stap wanpis ol i save bel hevi na tingting planti, na ating dispela i mekim na ol i save hatim pikinini, long wanem, ol i no gat poroman inap long ol i ken kamapim tingting bilong ol long em. Tru, taim papa o mama i bel hevi i no gutpela sapos ol i givim hevi long pikinini long dispela. Lucy, em i gat 17 krismas, em i tok: “Sapos mi mekim wanpela samting na i stret mi kisim strafe long en, mi orait long dispela. Tasol taim mama i no amamas na long dispela as tasol mi kisim strafe, dispela i no stret.”

Na narapela samting i kamapim hevi, em pasin bilong mekim gut long wanpela, winim ol narapela. Papa na mama i save laikim olgeta pikinini bilong ol, tasol sampela taim i gat wanpela pikinini em papa o mama i save laikim moa yet.a (Skelim wantaim Stat 37:⁠3.) Bel bilong yu inap bagarap sapos yu pilim olsem papamama i no laikim yu olsem ol i laikim ol narapela pikinini bilong ol. Tasol sapos i olsem papamama i no inapim ol samting yu sot long en, o taim ol brata susa bilong yu i mekim rong na papamama i tok em asua bilong yu, bihain bai yu bel nogut. Yangpela Roxanne i tok: “Mi gat wanpela brata, nem bilong em Darren. Mama i ting em i no inap tru mekim wanpela rong. Olgeta taim mama i save tok em asua bilong mi​—⁠Darren nogat.”

Ol Famili i Gat Hevi

Pasin bilong putim asua long wanpela na i no stret ol i mekim olsem, em i save kamap sampela taim long ol gutpela famili tu. Tasol long ol famili i gat hevi, ating planti taim papamama i putim asua long pikinini, na semim em, na daunim em. Na sampela taim papamama i save “bel nogut na kros na belhat na bikmaus na tok bilas” taim ol i putim asua long pikinini.​—⁠Efesus 4:⁠31.

Olsem wanem? Em asua bilong yangpela taim papamama i bikmaus na tok bilas olsem? Tru, taim pikinini man o pikinini meri i bikhet, em inap skrapim bel bilong papa o mama. (Sindaun 17:25) Tasol Baibel i tok long papamama taim em i tok: “Yupela i no ken . . . mekim ol i belhat long yupela.” (Efesus 6:⁠4) Papa o mama i mas bihainim wankain pasin olgeta Kristen i mas bihainim na bosim gut bel, na “daunim belhat.” (2 Timoti 2:24) Olsem na taim papa o mama i no bosim gut bel, em i no inap tok pasin kranki bilong pikinini i asua bilong dispela.

Sapos papa o mama i toknogutim pikinini, ating dispela i makim olsem tingting na bel bilong papa o mama i no stap isi, o em i bel hevi, o em i pilim olsem em i no inap mekim wanpela gutpela wok. Na em inap makim olsem em i gat hevi long poroman marit o em i save dring oltaim. Wanpela lain i tok, sapos papa o mama i kalabus long wanpela pasin nogut, planti taim bai em i putim asua bilong dispela hevi long pikinini. “Long ai bilong ol i olsem pikinini i no inap mekim stret wanpela samting. Ating papamama bai kolim ol ‘longlong,’ ‘nogut,’ ‘pikinini bilong tingim em yet tasol,’ na sampela kain tok moa. Orait, nau ol narapela insait long famili bai tingim dispela pikinini olsem em i as bilong ‘hevi,’ na dispela i pulim tingting bilong ol na ol i no tingim hevi bilong ol yet.”

Rot Bilong Karim Dispela Hevi

Dokta Kathleen McCoy i tok: ‘Pasin bilong kolim kain kain nem long pikinini, na sutim tok long em na daunim em, dispela inap mekim na yangpela i no amamas long em yet, na em i bel hevi, na em i no laik toktok.’ O olsem Baibel i tok, pasin bilong mekim nogut long pikinini inap ‘skrapim bel’ bilong em, olsem mekim em i kros, na pikinini bai pilim olsem em i “no inap mekim wanpela gutpela wok.” (Kolosi 3:21) Yu inap pilim olsem yu samting nating tasol na yu no inap mekim wanpela gutpela samting. Na yu inap kisim tingting kranki long papamama. Yu inap ting i no gat wanpela samting yu inap mekim bilong amamasim ol, olsem na maski long traim​—⁠wok bilong yu bai lus nating tasol. Em nau, ating bai yu belhat na bel nogut long papamama, na dispela inap mekim na yu sakim olgeta samting papamama i mekim bilong stretim yu​—⁠maski em gutpela tok bilong helpim yu.​—⁠Skelim wantaim Sindaun 5:⁠12.

Taim kain hevi olsem i kamap, yu ken mekim wanem? Ating yu mas skelim gut hevi bilong yu pastaim. Tingim as tru bilong hevi. Olsem: Tru, olgeta taim papamama i putim asua long yu? O sampela taim papamama i kros liklik na ol i mekim tok kranki? Baibel i tok: “Planti taim yumi . . . save popaia,” na papamama tu. (Jems 3:⁠2) Olsem na sapos sampela taim papamama i kros kros, yu ting yu tu i mas mekim olsem? Ating tok bilong Baibel long Kolosi 3:13 i stret long yupela: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”

Sapos yu sori na pilim hevi bilong papamama, dispela inap helpim yu long mekim olsem. Sindaun 19:11 i tok: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Sapos papa i no stap isi taim em i lusim wok na kam long haus, na em i putim asua long yu long wanpela samting yu no bin mekim, yu ting yu mas toktok planti long dispela samting? Sapos yu tingim skin bilong papa, olsem em i no i stap isi na skin i les, dispela inap helpim yu na bai yu no ‘tingim rong em i mekim long yu.’

Tasol olsem wanem sapos dispela pasin bilong putim nating asua long yu em i save kamap long olgeta taim na i no long wan wan taim tasol? Narapela Kirap! bihain bai stori long sampela samting yu inap mekim bilong helpim sindaun bilong yu.

[Futnot]

[Piksa long pes 13]

Sapos pikinini i mekim wanpela samting i no stret, i no gat rong sapos papa o mama i mas givim tok long em bilong stretim em