Ol Tisa Bilong Lotu i Paul Long Sampela Tok
“DISPELA tok olsem ol man i gat tewel i no save dai, na narapela tok olsem ol man i dai pinis bai kirap bek . . . ol i narapela narapela kain, na yumi mas makim wanem tok bai yumi bilip long en; yumi no inap bilip long tupela tok wantaim.” Em nau, dispela tok bilong Philippe Menoud i kamapim stret tingting bilong ol tisa bilong lotu Talatala na lotu Katolik, em tingting bilong ol i paul tru long ol man i dai pinis ol i stap olsem wanem. Baibel i tok, ol man i dai pinis bai kirap bek “long las de.” (Jon 6:39, 40, 44, 54) Tasol wanpela tisa bilong lotu, em Gisbert Greshake, em i tok, “planti bilipman i bilip olsem ol man i gat wanpela tewel i no save dai, na taim ol i dai dispela tewel i save lusim bodi na i go bek long God; tasol klostu olgeta man i lusim pinis dispela bilip olsem ol man i dai pinis bai kirap bek.”
Bernard Sesboüé i tok, wanpela hevi i kamap long dispela tok, olsem: “Ol man i dai pinis ol i stap olsem wanem “namel” long taim ol i dai na taim ol i kirap bek?” I olsem dispela askim i bin kamapim bikpela tok namel long ol tisa bilong lotu nau long dispela taim. Wanem samting i mekim na dispela tok i kamap? Na bikpela samting moa em olsem: Wanem samting tru bai painim ol man i dai pinis?
Tok Ol i Paul Long En i Bin Kirap Olsem Wanem
Ol Kristen bilong pastaim i no paul long dispela tok—tingting bilong ol i klia tru long en. Ol i save long tok bilong Baibel i tok, ol man i dai pinis ol i no save long wanpela samting, long wanem, Olpela Testamen i tok: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” (Saveman 9:5, 10) Ol dispela Kristen i bilip olsem ol man i dai pinis bai kirap bek long taim bihain, “taim Bikpela i kam bek.” (1 Tesalonaika 4:13-17) Ol i no ting, taim ol i dai pinis ol bai stap laip yet long wanpela hap na wetim dispela taim bilong kirap bek, nogat. Joseph Ratzinger, em wanpela bikman bilong misin Katolik long Vatiken (Vatican Congregation for the Doctrine of the Faith), em i tok: ‘Long lotu Kristen bilong pastaim, i no gat dispela bilip olsem ol man i gat wanpela tewel i no save dai.’
Tasol wanpela buk bilong lotu (Nuovo dizionario di teologia) i tok, taim yumi kaunim tok bilong ol tisa bilong lotu bilong bipo, olsem Ogastin o Ambros, “yumi pilim olsem wanpela nupela samting i kamap insait long ol bilip bilong Baibel ol man i bin holim—em wanpela bilip bilong ol Grik long ol samting bai painim ol man i dai pinis, na em i narapela kain long bilip bilong ol Kristen bilong lain Juda.” As bilong dispela nupela bilip, em dispela tok long “ol man i gat wanpela tewel i no save dai, na taim wanpela man i dai, wantu bai em i kamap long kot na kisim gutpela pe o kisim strafe.” Olsem na askim i kamap long samting i painim man long dispela taim “namel”: Taim man i dai pinis, sapos i gat wanpela tewel i stap laip yet, wanem samting i painim bodi taim em i wetim dispela taim bilong kirap bek “long las de”? Ol tisa bilong lotu i hatwok tru long stretim dispela tok.
Pop Gregori Namba 1 i bin i stap namel long yia 540 na 604, na em i tok, taim man i dai, wantu tewel bilong em i save go long ples God i makim bilong em. Na Pop Jon Namba 22, em i bin i stap olsem 600 yia bipo, em i bilip olsem ol man i dai pinis ol bai kisim pe bilong ol long De Bilong Kot. Tasol Pop Benedik Namba 12 i no wanbel long dispela tok. Long wanpela pepa i kamapim ol lo bilong pop (Benedictus Deus, bilong yia 1336), em i raitim wanpela bilip olsem: “Taim man i dai, wantu tewel bilong em i save lusim em na i go long gutpela ples bilong i stap amamas [heven], o long ples bilong klinim em [klinpaia], o long ples bilong kisim strafe [bikpaia]; orait, long las de bilong dispela graun, bodi bilong em bai kirap bek na nau tewel bai bung gen wantaim bodi bilong em.”
Maski planti tok pait i bin kamap long dispela bilip, ol misin bilong graun i gat nem Kristen ol i holim dispela bilip inap planti handet yia. Tasol ol misin Talatala na Otodoks i no save bilip long klinpaia. Tasol kirap long yia 1900 samting, planti saveman bilong lotu i tokaut olsem Baibel i no as bilong dispela bilip olsem ol man i gat wanpela tewel i no save dai, olsem na ‘ol tisa bilong lotu long nau ol i laik ting olsem i no gat tupela hap bilong man—em i olsem wanpela tasol, na taim em i dai, em i pinis tru.’ (Buk The Encyclopedia of Religion) Olsem na ol saveman bilong Baibel i hatwok long bilip olsem i gat wanpela taim i stap “namel” long taim tewel bilong man i lusim em na taim bodi bilong em i kirap bek. Orait yumi laik save, Baibel i toktok long dispela samting o em i toktok long narapela samting i wetim ol man i dai pinis?
Yu Ting Pol i Bilip Long “Wanpela Taim i Stap Namel”?
Wanpela buk lotu bilong misin Katolik (Catechism of the Catholic Church) i tok: “Bilong kirap bek wantaim Krais, yumi mas i dai wantaim Krais. Yumi mas ‘lusim dispela bodi hia na i go sindaun gut wantaim Bikpela, na ples em i stap long en, em bai i kamap ples tru bilong yumi.’ [2 Korin 5:8] Taim yumi ‘go,’ olsem taim yumi dai, tewel i save lusim bodi. [Filipai 1:23] Em bai bung gen wantaim bodi long taim bilong kirapim bek ol man i dai pinis.” Tasol long ol dispela hap bilong Baibel em buk i kolim, yu ting aposel Pol i tok, taim man i dai pinis wanpela tewel i save lusim em na i wetim taim bilong “Laspela Kot” i kamap na bihain tewel i bung gen wantaim bodi?
Long 2 Korin 5:1, taim Pol i toktok long “dispela haus sel bilong graun” em i “bagarap,” em i toktok long i dai bilong em. Tasol olsem wanem? Pol i toktok long dispela bodi em tewel i lusim pinis? Nogat. Pol i no bilip olsem man i gat wanpela tewel. Em i bilip olsem man i gat laip. (Stat 2:7; 1 Korin 15:45) Pol em i wanpela Kristen God i bin makim long spirit holi na em i wet long kisim wankain samting olsem ol brata Kristen long taim bilong em ol i wet long kisim, olsem laip “i stap long heven.” (Kolosi 1:5; Rom 8:14-18) Pol i “laikim tumas” long kirap bek long matmat long taim God i makim na i go antap long heven olsem wanpela spirit i no save dai. (2 Korin 5:2-4) Em i tok: “Bai yumi olgeta i senis na i kamap narakain . . . long taim bilong las biugel i krai. Yes, biugel bai i krai, na ol man i dai pinis bai i kirap, na ol i no inap bagarap moa. Na . . . yumi bai i senis na i kamap narakain.”—1 Korin 15:51, 52.
Long 2 Korin 5:8, Pol i tok: “Bel bilong yumi i stap strong, na yumi laikim tumas long lusim dispela bodi hia na i go sindaun gut wantaim Bikpela, na ples em i stap long en, em bai i kamap ples tru bilong yumi.” Sampela i ting dispela tok i makim wanpela taim i stap namel na ol i mas wet i stap. Na ol i tingim tok bilong Jisas tu, em i tok promis long ol gutpela disaipel long em bai go redim ples bilong ol na bai em i ‘kisim ol i go i stap wantaim em.’ Tasol dispela samting bai kamap long wanem taim? Krais i tok, dispela bai kamap long taim em “i kam bek” long taim bihain. (Jon 14:1-3) Na long 2 Korin 5:1-10, Pol i tok, ol Kristen God i bin makim long spirit holi ol i gat tingting long i go i stap long heven. Tasol i no olsem ol i gat wanpela tewel i no save dai na dispela tewel yet bai go long heven, nogat; ol bai kirap bek long matmat long taim Krais “i kam bek,” na long dispela rot ol bai go i stap long heven. (1 Korin 15:23, 42-44) Wanpela man bilong kamapim insait bilong sampela tok bilong Baibel, em Charles Masson, em i tok, tok bilong 2 Korin 5:1-10 “i klia na yumi inap kisim gut, na yumi no gat wok long toktok nating long ‘wanpela taim i stap namel’ na bai yumi ken kamapim klia dispela tok.”
Long Filipai 1:21, 23, Pol i tok: “Tingting bilong mi em i olsem. Sapos mi stap laip, orait mi stap wantaim Krais. Na sapos mi dai, orait mi bai kisim gutpela samting tru. Mi gat tupela bel long dispela. Mi laik tru long i go i stap wantaim Krais. Em bai i gutpela moa.” Tasol olsem wanem? Pol i toktok long “wanpela taim i stap namel”? Sampela i ting olsem. Tasol Pol i tok em i gat tupela rot—i stap laip o i dai. Na nau em i kolim namba 3 rot, em i tok: “Mi laik tru long i go i stap wantaim Krais. Em bai i gutpela moa.” Tasol olsem wanem? Pol i ting taim em i dai, wantu em bai go i stap wantaim Krais? Olsem yumi tok pinis, Pol i bilip olsem ol Kristen God i bin makim long spirit holi ol bai kirap bek long taim Krais “i kam bek.” Olsem na yumi ken save, em i tingim ol samting bai kamap long dispela taim.
Dispela samting i kamap klia long tok bilong Pol long Filipai 3:20, 21 na 1 Tesalonaika 4:16. Em bai “go” antap long taim Krais Jisas “i kam bek,” olsem na em inap kisim dispela gutpela pe God i bin redim bilong em. Dispela bilip bilong Pol i kamap klia long tok em i bin givim long yangpela man Timoti, em i tok: “Nau prais bilong man i winim resis em i redi na i wetim mi i stap . . . na long De bilong bikpela kot bilong em, em bai i givim dispela prais long mi. Na em bai i no givim long mi wanpela tasol. Nogat. Em bai i givim long olgeta man i laikim tumas long lukim em na i wetim em i kamap ples klia.”—2 Timoti 4:8.
Kirap Bek Long Matmat—Gutpela Tok i Tru Bilong Baibel
Ol Kristen bilong pastaim i tingim dispela kirap bek em bai kirap long taim Krais “i kam bek,” na dispela gutpela tok i tru bilong Baibel i strongim ol na mekim gut bel bilong ol. (Matyu 24:3; Jon 5:28, 29; 11:24, 25; 1 Korin 15:19, 20; 1 Tesalonaika 4:13) Ol i no les—ol i wetim dispela amamas ol bai kisim bihain, na ol i sakim bilip giaman bilong ol man i lusim bilip, em ol i tok yumi gat wanpela tewel i no save dai.—Aposel 20:28-30; 2 Timoti 4:3, 4; 2 Pita 2:1-3.
Tru, i no ol Kristen God i makim bilong i go long heven ol tasol bai kirap bek long matmat, nogat. (1 Pita 1:3-5) Abraham na ol narapela wokboi bilong God long bipo yet ol i bin bilip olsem Jehova em inap tru long kirapim bek ol man i dai pinis na bai ol i stap laip gen long graun. (Jop 14:14, 15; Daniel 12:2; Luk 20:37, 38; Hibru 11:19, 35) Na ol dispela bilion bilion manmeri i dai pinis bipo na ol i no bin save long God, ol i gat rot long kirap bek na i stap long Paradais long graun, long wanem, “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15; Luk 23:42, 43, Nupela Testamen bilong 1978) Man! Em gutpela samting tru bilong wet long en, a?
Jehova i no laik bai yumi bilip olsem hevi na pen na dai bai stap oltaim; em i tokaut long wanpela taim bai kamap na “em bai i pinisim dai,” na ol man i stap gut long God ol bai i stap oltaim oltaim long Paradais em bai kamap bek long graun. (1 Korin 15:26; Jon 3:16; 2 Pita 3:13) Em bai gutpela tru taim yumi bungim gen ol famili bilong yumi i kirap bek pinis! Dispela em i samting tru yumi ken wet long en, winim tru dispela tok nating olsem yumi gat wanpela tewel i no save dai, em wanpela bilip Baibel i no as bilong en—tok nating bilong ol Grik i as bilong en. Sapos tok promis tru bilong God i as bilong samting yu wet long en, orait yu tu inap bilip tru olsem klostu nau na “ol manmeri bai i no i dai moa”!—KTH 21:3-5.
[Piksa long pes 31]
Dispela tok long ol man i dai pinis bai kirap bek, em wanpela gutpela tok i tru bilong Baibel