Ol Witnes Bilong Jehova Long Olgeta Hap—Sambia
TINGIM wanpela bikpela hap graun tru i stap antap inap 1,200 mita na i olsem stretpela ples. Dispela bikpela hap graun em kantri Sambia, em i stap long namel bilong saut-sentral Afrika. Long hap bilong not-is, ol maunten ol i kolim Musinga ol i go antap inap 2,100 mita. Na traipela wara Sambisi i ran i go na i kalap i go daun wantaim bikpela pairap—ol i kolim dispela bikpela wara kalap olsem Viktoria Fols, em planti man long olgeta hap ol i save long en. Dispela traipela wara kalap i op tru na em i kamap olsem bikpela hap boda bilong dispela kantri long hap bilong saut. Long kantri Sambia i gat kain kain lain, winim 70. I gat 8-pela bikpela tok ples, tasol i gat planti tok ples moa i stap.
Long yia 1911 i gat narapela kain tok ples i kamap long Sambia, na dispela tok ples i wok long i go bikpela. Sampela man ol i bin kam bilong lukim dispela kantri na ol i karim sampela buk (Studies in the Scriptures) i kam, na kirap long dispela taim ol Witnes Bilong Jehova i wok strong long helpim planti man bilong Sambia long lainim ‘gutpela tok ples,’ em tok i tru bilong Baibel. (Sefanaia 3:9) Dispela em bikpela wok ol i mas mekim, long wanem, ol man i holim wanpela bilip long ol man i dai pinis ol i stap olsem wanem, na dispela bilip i no stap long Baibel. Tasol taim ol man i kisim save long tok i tru bilong Baibel na ol i save pinis olsem ol bilip giaman bilong ol tumbuna i bin kalabusim ol, nau ol i pilim olsem ol i stap fri!—Jon 8:32.
Wanpela sista i stori olsem: “Taim kandere bilong mi i dai wantu tasol, mama bilong mi, em bilong Yunaitet Sios Bilong Sambia, em i tingting planti. Inap wanpela wik olgeta ol i mekim ol pasin bilong planim man, na bihain long en mi go bek long ples bambai mi ken save, mama i stap olsem wanem. Orait, mi kamap long haus na mi lukim wanpela lapun man i stap. Taim em i go pinis, mi askim lapun bubu meri, dispela man em i husat. Em i tok, em i wanpela glasman. Mama i laik baim em bilong bekim rong bilong man i bin bagarapim brata bilong em; olsem bai tewel bilong em i ken i stap isi na malolo. Mama i ting, nau tewel bilong em ‘i go nabaut nabaut.’
“Bubu bilong mi i tok, gutpela tru mi kam lukim famili, long wanem, ol i laik painim mani bilong baim dispela glasman. Em i laik bai mi putim sampela mani, tasol long pasin isi mi tokim em, mi wanpela Kristen, olsem na mi no inap insait long dispela wok. Mi soim em long tok bilong Song 146:4 i tok, ol man i dai pinis ol i no inap mekim wanpela samting—olsemna ol i no gat wanpela tewel ‘i go nabaut nabaut.’ Na mi soim em tu long tok bilong Rom 12:19 i tok, em wok bilong God long bekim rong bilong man, na i no wok bilong yumi. Bihain mi tokim mama long tok bilong Jisas long ol man i dai pinis bai kirap bek, olsem Jon 5:28, 29 i stori long en. Em i pilim tru strongpela bilip bilong mi long ol tok promis bilong God. I no longtaim na em i kirap stadi wantaim wanpela Witnes na em i wok long kamap strong hariap. Em i lusim olpela lotu bilong em na em i kisim baptais bilong makim olsem em i dediket pinis long God. Nau em i wanpela Witnes Bilong Jehova.”
Narapela sista i stori olsem: “Mi bin i go long bung bilong planim meri bilong kandere bilong mi. Taim mi kamap, mi lukim olsem kandere na kasen bilong mi i laik bagarap long hangre. Kirap long de meri bilong kandere i dai, tupela i no bin kaikai i kam inap long nau. Mi askim ol long as bilong dispela samting na ol i tok, ol i bihainim lo bilong ol tumbuna i tok, i tambu long wokim paia bilong kukim kaikai. Mi tokim tupela, mi ken kukim kaikai bilong ol, tasol sampela bilong famili i pret, nogut mi sakim dispela pasin haiden na olgeta wantaim bai kamap longlong!
“Mi tokim ol, mi wanpela Witnes Bilong Jehova na mi bilip long tok bilong Baibel long Wok Pris 18:30 na mi no save bihainim ol tok bilong ol tumbuna i no stret wantaim tok bilong Baibel. Orait nau mi soim ol long buk Tewel Bilong Ol Daiman. Orait nau bel bilong ol i stap isi, na mi kirap na kukim sampela kaikai bilong kandere na ol narapela manmeri. Ol wanblut bilong dispela meri i dai pinis ol i lukim olsem mi gat strongpela bel na mi no pret, na ol i pilim tru na ol i orait long stadi long Baibel. Nau ol i kamap pinis olsem pablisa i no baptais yet, na olgeta long famili i tingting long kisim baptais liklik taim bihain.”
Yumi amamas tru taim ‘gutpela tok ples,’ olsem tok i tru bilong Baibel, i daunim ol bilip giaman i save paulim tingting bilong ol man, na ol dispela strongpela bilip bilong ol tumbuna i save kalabusim tru ol man na ol i stap nogut! Jehova i mekim gut long dispela wok, olsem na nau dispela ‘gutpela tok ples’ i wok long i go bikpela tru long Sambia, wankain olsem em i mekim long olgeta hap bilong graun.—2 Korin 10:4.
[Blok long pes 9]
OL SAMTING BILONG KANTRI
Yia Bilong Wok Bilong 1994
HAMAS OL I AUTIM TOK: 82,926
SKELIM OLSEM: 1 Witnes insait long 107 man
HAMAS I BUNG LONG MEMORIAL: 363,372
HAMAS PAINIA, AVERES: 10,713
HAMAS BAIBEL-STADI, AVERES: 108,948
HAMAS I BAPTAIS: 3,552
HAMAS KONGRIGESEN: 2,027
BRENS-OFIS: LUSAKA
[Piksa long pes 9]
Brens-ofis bilong Sosaiti Was Taua long Lusaka
[Piksa long pes 9]
Ol i autim tok long Simabala, long hap saut bilong Lusaka