Stori Bilong Wanpela Man

Lain Brata i Stap Long Olgeta Hap i Strongim Mi

STORI BILONG THOMSON KANGALE

Long Epril 24, 1993, ol i singautim mi long go long bung bilong dediketim nupela brens-ofis i gat 13 haus long en long Lusaka, Sambia. Mi no inap wokabaut gut, olsem na wanpela sista Kristen i kisim mipela i go raun long lukim ol samting insait long brens-ofis i askim mi, “Yu laik bai mi kisim wanpela sia bilong yu na bai yu ken sindaun na malolo long en sampela taim?” Mi blakskin na em i waitskin, tasol dispela i no bikpela samting long em. Mi pilim tru gutpela pasin bilong em, na mi tok tenkyu long em, long wanem, dispela i bin helpim mi na mi inap lukim olgeta hap bilong brens-ofis.

INSAIT long planti yia, ol samting olsem i painim mi i bin mekim gut bel bilong mi, na i strongim bilip bilong mi olsem namel long ol Witnes Bilong Jehova, i gat pasin bilong laikim tru narapela olsem Jisas i bin tok long ol disaipel tru bilong em bai mekim. (Jon 13:35; 1 Pita 2:​17) Pastaim mi laik stori long yu long olsem wanem mi bin kisim save long ol dispela Kristen long 1931, em yia ol i bin tokaut long laik bilong ol long ol man i ken kolim ol olsem ol Witnes Bilong Jehova, olsem i stap long Baibel.​​—⁠Aisaia 43:⁠12.

Wok Bilong Mi Long Afrika

Long Novemba 1931, mi gat 22 krismas na mi stap long Kitwe, em i stap long hap Copperbelt bilong Noten Rodisia (nau ol i kolim Sambia). Mi bungim ol Witnes long rot bilong wanpela pren bilong mi em mitupela i save pilai soka wantaim. Mi go long sampela miting bilong ol na mi rait i go long brens-ofis long Cape Town, long Saut Afrika, na mi askim ol long salim wanpela buk bilong stadi long Baibel em The Harp of God.a Dispela buk ol i wokim long tok Inglis, na mi hatwok long kisim gut save long ol tok bilong en, long wanem, mi no save gut long dispela tok ples.

Dispela hap Copperbelt, em i stap longwe inap 240 kilomita long saut-wes bilong raunwara Bangweulu, em klostu long ples mi kamap bikpela long en. I gat planti manmeri bilong ol narapela provins i wok long ol kopa main. Sampela grup bilong ol Witnes i bung bilong stadi long Baibel long olgeta taim. Bihain liklik, mi lusim Kitwe na go long wanpela taun klostu long en, em Ndola, na mi kirap long bung wantaim sampela Witnes long dispela hap. Long dispela taim, mi stap kepten bilong wanpela tim bilong pilai soka, nem bilong en Prince of Wales. Mi wok tu olsem wanpela wokboi long haus bilong wanpela waitskin em maneja bilong wanpela kampani (African Lakes Corporation), em dispela kampani i gat planti stua long sentral Afrika.

Mi no bin kisim gutpela skul, tasol mi kisim liklik save long tok Inglis long ol waitskin em mi wok long haus bilong ol. Tasol mi gat laik long kisim sampela skul moa, olsem na mi raitim aplikesen bilong go skul long Plumtree long Sauten Rodisia (nau em Simbabwe). Tasol taim mi wet i stap, mi rait namba tu taim i go long brens-ofis long Cape Town. Mi toksave long ol olsem mi kisim pinis buk The Harp of God na mi laik mekim wok bilong Jehova fultaim.

Mi kirap nogut taim ol i bekim pas bilong mi na ol i tok: “Mipela i tok amamas long yu gat laik long mekim wok bilong Jehova. Mipela i laik strongim yu long beten long dispela samting, na bai Jehova i helpim yu long kisim gut save long tok i tru, na em bai i opim rot na yu inap mekim wok bilong em.” Bihain long mi ritim dispela pas inap planti taim, mi askim sampela Witnes long ol samting mi mas mekim. Ol i tok: “Sapos yu gat laik tru long mekim wok bilong Jehova, orait yu kirap nau long mekim.”

Long wanpela wik olgeta, mi beten long dispela samting na bihain mi pasim tok long bel long stadi yet long Baibel wantaim ol Witnes na no ken go long skul. Long yia antap, long Janueri 1932, mi kisim baptais long wara bilong makim mi dediket pinis long God Jehova. Bihain long mi lusim Ndola na i go stap long Luanshya em wanpela taun klostu long en, mi bungim Jeanette, em wanpela wanbilip, na mitupela i marit long Septemba 1934. Taim mipela i marit, Jeanette i gat pinis wanpela pikinini man na pikinini meri.

Isi isi mi kamap strong long ol samting bilong spirit, na long 1937, mi kirap autim tok fultaim. Bihain liklik ol i makim mi long mekim wok olsem wasman raun, nau ol i kolim wasman sekit. Ol wasman raun i save go lukim ol kongrigesen bilong ol Witnes Bilong Jehova bilong strongim ol long ol samting bilong spirit.

Wok Autim Tok Long Bipo

Long Janueri 1938, ol i askim mi long go lukim wanpela hetman bilong Afrika nem bilong em Sokontwe, em i bin askim ol Witnes Bilong Jehova long kam lukim em. Mi ron long baiskol inap 3-pela de bilong kamap long dispela ples. Taim mi tokim em olsem ol i bin salim mi i kam, long wanem, em i bin raitim pas i go long ofis bilong mipela long Cape Town, em i amamas tru.

Mi go long olgeta haus kunai i stap namel long lain bilong em na mi singautim ol long i kam long insaka (haus bung). Taim ol i bung pinis, mi toktok long ol. Na long dispela rot, mi kirapim planti Baibel-stadi. Dispela hetman na kuskus bilong em, ol i namba wan lain long kamap wasman bilong kongrigesen long dispela hap. Long nau, winim 50 kongrigesen i stap long dispela hap, nau ol i kolim distrik Samfya.

Long 1942 i go 1947, mi mekim wok long hap bilong raunwara Bangweulu. Mi stap 10-pela de wantaim olgeta wan wan kongrigesen. I no gat planti wokman i insait long wok bilong bungim kaikai i mau, olsem na mipela i pilim wankain olsem Bikpela bilong yumi Jisas Krais, taim em i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Matyu 9:​36-​38) Wok bilong raun long bipo em i hatwok, olsem na planti taim Jeanette i save stap long Luanshya wantaim ol pikinini taim mi raun long lukim ol kongrigesen. Long dispela taim, mi na Jeanette i kamapim tupela pikinini moa, tasol wanpela i dai taim em i gat 10-pela mun.

I no gat planti ka long dispela taim, olsem na i no gat planti rot tu. Wanpela taim, mi kalap long baiskol bilong Jeanette na raun inap 200 kilomita. Sampela taim mi brukim wara, mi putim baiskol long sol bilong mi, na long wanpela han mi holim baiskol na long narapela han mi subim wara. Namba bilong ol Witnes i kamap bikpela tru long Luanshya, na long 1946, inap 1,850 i go long Memorial bilong tingim indai bilong Krais.

Ol i Birua Long Wok Autim Tok

Wanpela taim long Namba Tu Pait, distrik komisina long Kawambwa i singautim mi na i tok: “Yu no ken yusim moa ol buk bilong Sosaiti Was Taua, long wanem, ol i tambuim ol dispela buk. Tasol mi ken givim yu sampela buk samting em yu ken yusim bilong helpim yu long raitim ol narapela buk bilong mekim wok long en long wok bilong yu.”

Mi tokim em olsem: “Mi laikim ol buk na nius bilong mipela. Ol inap long mi.”

Em i tok: “Yu no save long ol Amerika, (ol i bin prinim ol buk na nius bilong mipela long Amerika). Ol bai paulim yu.”

Mi tokim em olsem: “Nogat, ol lain mi bung wantaim ol i no inap mekim olsem.”

Em i askim mi: “Inap yu tokim kongrigesen bilong yu long givim mani bilong helpim pait olsem ol narapela lotu i wok long mekim?”

Mi bekim tok olsem: “Em wok bilong ol wokman bilong gavman.”

Em i tok: “Gutpela sapos yu go long haus na tingting pastaim long dispela samting.”

Mi tokim em: “Long Kisim Bek 20:13 na 2 Timoti 2:​24, Baibel i tokim yumi long no ken kilim i dai man na no ken pait.”

Maski em i larim mi go, bihain distrik komisina long Fort Rosebery, em wanpela taun nau ol i kolim Mansa, i singautim mi. Em i tok: “Mi singautim yu i kam bilong toksave long yu olsem, gavman i tambuim ol buk bilong yupela.”

Mi tok: “Yes. Mi bin harim.”

Em i tok: “Olsem na yu mas go long olgeta kongrigesen bilong yupela na tokim olgeta wanlotu bilong yu long karim olgeta buk i kam long hia. Yu kisim gut tok bilong mi?”

Mi tokim em olsem: “Em i no wok bilong mi. Em wok bilong ol wokman bilong gavman.”

Autim Tok i Karim Gutpela Kaikai

Bihain long woa, mipela i wok yet long autim tok. Long 1947, mi pinisim wok bilong mi long wanpela kongrigesen long ples Mwanza, na mi askim ol man long ples bilong baim kap ti. Ol i soim mi rot i go long haus bilong Mista Nkonde, em i gat wanpela haus kaikai. Mista Nkonde na meri bilong em i amamas long bungim mi. Taim mi wok long dring ti, mi askim Mista Nkonde sapos em i ken ritim wanpela sapta (“Hell, a Place of Rest in Hope”) long buk “Let God Be True.”

Taim mi pinisim ti bilong mi, mi askim em: “Yu gat wanem tingting long hel?” Em i kirap nogut long samting em i ritim, na em i kirap stadi long Baibel wantaim ol Witnes na bihain em wantaim meri bilong em i kisim baptais. Maski em i no stap moa olsem wanpela Witnes, meri bilong em na planti pikinini bilong em i stap yet olsem ol Witnes. Wanpela pikinini bilong em, Pilney, em i wok yet long brens-ofis bilong ol Witnes Bilong Jehova long Sambia. Na maski mama bilong Pilney em i lapun nau, em i stap yet olsem wanpela strongpela Witnes.

Stap Liklik Taim Long Is Afrika

Brens-ofis bilong mipela long Noten Rodisia, em ol i kamapim long kirap bilong 1948 long Lusaka, i salim mi i go long Tanganyika (nau em Tansania). Narapela Witnes i poromanim mi na meri bilong mi taim mipela i wokabaut i go long ples maunten. Mipela i wokabaut inap 3-pela de na skin bilong mipela i les tru. Mi karim ol buk, na meri bilong mi i karim ol klos bilong mipela, na dispela Witnes i karim ol samting bilong slip.

Taim mipela i kamap long Mbeya long Mas 1948, i gat planti wok long mekim bilong helpim ol brata long stretim sampela pasin bilong ol na bai pasin bilong ol i stret moa wantaim tok bilong Baibel. Ol manmeri long dispela ples ol i kolim mipela olsem ol manmeri bilong Wastaua. Maski ol brata i amamas long dispela nem ol Witnes Bilong Jehova, planti manmeri i no save yet long dispela nem. Na tu, sampela Witnes i mas lusim sampela pasin tumbuna i givim biknem long ol man i dai pinis. Tasol ating wanpela bikpela hatwok em planti i mekim, em ol i mas rejistaim marit bilong ol wantaim gavman, na bai marit i ken stap klin.​​—⁠Hibru 13:⁠4.

Bihain, mi bin mekim wok long ol narapela hap long Is Afrika, na long Yuganda tu. Mi stap inap 6-pela wik long Entebbe na Kampala, long dispela hap planti man i kisim save long tok i tru bilong Baibel.

Ol i Singautim Mi Long Go Long New York City

Taim mi bin mekim wok long Yuganda inap sampela taim pinis, long kirap bilong 1956, mi go long Dar es Salaam, em biktaun bilong Tanganyika. Long dispela hap wanpela pas i kam long hetkota bilong ol Witnes Bilong Jehova i wetim mi. Long pas i gat tok long redim ol samting bilong kam long New York long kibung intenesenel bai kamap long Julai 27 i go inap Ogas 3, 1958. Mi amamas tru long dispela samting.

Taim i kamap, olsem na mi na Luka Mwango, em narapela wasman raun, i kalap long balus na lusim Ndola na go long Salisbury (nau em Harare), long Sauten Rodisia, na bihain mipela i go long Nairobi, Kenya. Long dispela hap mipela i kisim balus i go long London, Inglan, na ol brata i amamas long bungim mipela. Taim mipela i laik go slip long dispela nait mipela i bin kamap long Inglan, mipela i amamas na stori long gutpela pasin ol waitskin i mekim long mipela ol Afrika. Dispela samting i strongim tru mipela.

Orait, bihain mipela i kamap long New York, we kibung bai kamap long en. Long wanpela de long taim bilong kibung, mi givim ripot long wok bilong ol Witnes Bilong Jehova long Noten Rodisia. Long dispela de klostu 200,000 manmeri i bung long Polo Grounds na Yankee Stadium long New York City. Mi no inap slip long nait, long wanem, mi wok long tingim ol gutpela samting i painim mi na mi amamas long en.

I no longtaim na kibung i pinis na mipela i mas go bek long ples. Taim mipela i go bek long ples, ol brata sista long Inglan i lukautim gen mipela. Pasin wanbel i stap namel long lain bilong Jehova, maski ol i bilong wanem skin o lain, i bin kamap ples klia taim mipela i raun na mipela i no inap lusim tingting long en!

Mekim Yet Wok na Ol Traim

Long 1967, ol i bin makim mi long kamap wasman distrik​​—⁠wanpela wasman i raun long lukim ol wan wan sekit. Long dispela taim namba bilong ol Witnes long Sambia i go bikpela winim 35,000. Bihain, ol i makim mi long mekim wok wasman sekit long Copperbelt, long wanem, skin bilong mi i no strong tumas. Bihain Jeanette i kisim sik, tasol em i stap gut long Jehova na long Disemba 1984 em i dai.

Bihain long em i dai, mi bel hevi stret taim famili bilong em i no bilip ol i sutim tok olsem mi bin mekim pasin marila bilong kilim em i dai. Tasol i gat sampela long famili i save long sik bilong Jeanette na ol i bin toktok wantaim dokta bilong em, olsem na ol i stori long ol dispela wanblut long as tru bilong indai bilong em. Tasol narapela traim i kamap. Sampela wanblut i laik bai mi insait long wanpela pasin tumbuna ol i kolim ukupyanika. Long ples bilong mi, taim poroman marit i dai, poroman i stap laip yet i mas go na mekim maritpasin wantaim wanpela wanblut bilong poroman i dai pinis. Mi tok nogat long dispela.

Bihain, ol wanblut i no subim mi moa. Mi amamas long Jehova i bin helpim mi long sanap strong. Wanpela mun bihain long mipela i planim meri bilong mi, wanpela brata i kam long mi na i tokim mi: “Brata Kangale, pasin yu bin mekim long taim meri bilong yu i dai i bin strongim mipela tru, yu no bin insait liklik long wanpela pasin tumbuna. Mipela i laik tenkyu tru long yu.”

Wok i Karim Bikpela Kaikai

Mi kirap mekim wok fultaim olsem wanpela Witnes Bilong Jehova inap 65 yia i go pinis. Mi bin kisim bikpela amamas tru long ol dispela yia long lukim planti handet kongrigesen i kamap na ol i wokim planti Haus Kingdom long ol ples mi bin wok long en olsem wanpela wasman raun! Long 1943 i gat 2,800 Witnes, tasol nau namba i go bikpela na winim 122,000 man bilong autim tok bilong Kingdom i stap long Sambia. Tru tumas, long yia i go pinis winim 514,000 i bin go long Memorial long dispela kantri, namba bilong ol manmeri long dispela kantri i no winim 11 milion.

Jehova i wok long lukautim mi gut. Taim mi mas lukim dokta, wanpela brata Kristen i save kisim mi go long haus sik. Ol kongrigesen i wok yet long singautim mi long mekim ol pablik-tok, na long dispela rot mi kisim ol samting i save strongim mi. Kongrigesen mi go long en i stretim rot bambai ol sista Kristen i ken klinim haus bilong mi, na ol brata i volantia long kisim mi i go long ol miting long olgeta wik. Mi save olsem ol narapela i no inap mekim gutpela pasin olsem long mi, sapos mi no mekim wok bilong Jehova. Mi tenkyu long Jehova long em i mekim yet wok long mi bilong mekim wok fultaim na ol narapela wok em mi bin mekim i kam inap long nau.

Mi no inap lukluk gut moa, na taim mi wokabaut i go long Haus Kingdom, mi mas malolo planti taim long rot. Long nau, mi pilim olsem bek bilong karim ol buk long en i hevi moa, olsem na mi rausim sampela buk em mi no inap yusim long taim bilong miting na bai bek i no hevi tumas. Bilong mekim wok autim tok, mi save mekim Baibel-stadi wantaim ol man i save kam long haus. Tasol mi amamas long lukluk i go bek long ol yia i go pinis na tingim namba bilong ol Witnes i go bikpela tru! Mi bin autim tok long ol ples em bikpela truim bilong tok bilong Jehova i stap long Aisaia 60:22 i kamap long en. Em i tok: “Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” Tru tumas, mi bin stap na lukim dispela samting i kamap long Sambia na long olgeta hap bilong graun.b

[Ol Futnot]

[Ol Piksa long pes 24]

Thomson na brens-ofis bilong Sambia i stap long baksait

[Piksa long pes 26]

Brens-ofis bilong Sambia long nau