Singapo i Daunim Pasin Bilong i Stap Fri Long Mekim Lotu

LONG apinun bilong Februeri 24, 1995, ol polis i go insait long 4-pela haus long biktaun Singapo na ol i holim 69 manmeri.a Namel long ol i gat wanpela meri em i gat 71 krismas, na tupela yangpela meri ol i gat 15 krismas. Bilong wanem ol polis i holim ol? Ol i bin mekim pasin raskol o ol i laik daunim gavman? Nogat. I no gat wanpela namel long ol i mekim wanpela pasin nogut olsem ol i laik bagarapim man, o mekim pasin pamuk samting, o bagarapim sindaun bilong ol man. Gavman i no ken pret long ol bai bagarapim gutpela pasin bilong ol manmeri bilong Singapo o mekim nogut long ol. Tasol taim ol polis i glasim olgeta samting i stap insait long ol dispela haus, ol i kisim ol dispela 69 manmeri i go long polis-tesin, em ol i bin kam bung wantaim bilong stadi long Baibel na kisim amamas wantaim. Ol i stap long rum gat i go inap long de bihain, na ol polis i sutim planti askim long ol, na kisim mak bilong pinga, na kisim piksa bilong ol​—⁠ol i mekim long ol olsem ol i raskol samting! Ol i stap long ples nogut inap 18 aua olgeta, na ol polis i no larim ol i kisim wanpela loya bilong helpim ol, na ol i tambuim ol long ring long telefon na toksave long famili bilong ol long ol i stap we. Yumi ken save, dispela pasin ol polis i bin mekim wantu tasol em i bagarapim tru bel bilong ol dispela manmeri i save stap isi tru na bihainim gut ol lo bilong gavman!

Dispela pasin i wankain olsem ol samting i bin kamap long taim nogut bilong gavman Natsi long Jemani bipo, na long taim gavman Komyunis i bin bosim Soviet Yunion na Isten Yurop. Ating ol man i save kam raun long Singapo ol i no ting kain samting olsem inap kamap long dispela klinpela biktaun tru i gat ol gutpela gutpela samting long en. Long nau Singapo i gat nem long ol samting bilong wok bisnis na sindaun bilong ol man i kamap gutpela tru, na ol narapela kantri i kirap nogut long en. Em i gat gavman demokratik, na konstitusen bilong en i tokaut olsem ol manmeri bilong kantri ol i stap fri long mekim ol samting i stret long ol man i ken mekim, na ol i stap fri long mekim tok o mekim lotu na bung wantaim.

Tasol ol polis i bin holim dispela lain long Februeri, long wanem, ol i Witnes Bilong Jehova na ol i bung wantaim bilong stadi long Baibel na bung wantaim ol narapela Kristen. Ol polis i tok, ol i “bung long miting bilong wanpela lain em lo bilong gavman i tambuim.”

Kirap long 1972, gavman bilong Singapo i no orait moa long ol Witnes Bilong Jehova i rejista long gavman. Long yia 1972 ol i rausim nem bilong Kongrigesen Singapo long buk bilong gavman, na gavman i tambuim ol buk na nius na Baibel em Sosaiti Was Taua i wokim. Gavman i no givim rot long ol long stretim tok bilong dispela samting gavman i bin mekim. Nau long dispela taim ol i kamapim tok bilong dispela samting long ol haus kot long Singapo, taim ol i putim 4-pela Witnes long kot long Februeri 1994, long wanem, ol i holim sampela buk na nius bilong Baibel em gavman i tambuim. Ol dispela Witnes i apil na kot bilong ol i kamap long Ogas 1994, tasol ol i lus long kot. Long mun bihain long en, Nambawan Jas Yong Pung How bilong Sprim-Kot i tokaut long tingting bilong em. Em i tok, ol polis i no bin kalapim lo bilong gavman i tok ol man i stap fri long mekim lotu, na i stret ol i kot, long wanem, ol Witnes Bilong Jehova i no save insait long ami, na dispela inap bagarapim wok bilong gavman long lukautim gut kantri. Long Februeri 17, 1995, dispela 4-pela Witnes i laik kisim tok orait long ol i ken apil long Kot Bilong Apil Bilong Singapo. Tasol kot i no orait long en.

Orait, wanpela nius bilong Singapo em gavman i bosim, em i kamapim stori bilong dispela laspela tok bilong jas. Yumi ken ting, dispela tok ol i pasim long Sprim-Kot na stori bilong en i bin kamap long nius, dispela i olsem piksa bilong samting bai kamap bihain. Long wik antap ol i holim dispela 69 Witnes. Bihain ol i mekim dai kot bilong 4-pela bilong ol, em ol i bilong Briten na Frans na Laksambek. Tasol dispela samting ol polis i mekim long ol i nogutim ol tru. Wanpela man namel long ol i bin sindaun long Singapo na mekim wok inap planti yia wantaim meri bilong em. Nau bos i rausim ol long wok, na ol i mas lusim haus ol i bin baim long mun, na ol i mas tok gutbai long ol gutpela pren bilong ol.

Kot i sutim tok long ol narapela 63 manmeri i bikpela pinis olsem ol i bilong wanpela lain em gavman i tambuim, na sampela i kot long ol i gat sampela buk samting gavman i tambuim. Sapos ol i lus long kot, ol inap kisim 3-pela yia long kalabus o ol i mas baim kalabus inap K2,100, o ol i mas mekim tupela samting wantaim. Tupela yangpela meri i gat 15 krismas ol i kamap long kot bilong ol yangpela, tasol ol i no kot wantaim.

Ol i No Inap Nogutim Kantri

Long olgeta hap bilong graun, long 200 kantri ol Witnes Bilong Jehova i stap long en, ol i gat nem long bihainim pasin i stret na bihainim lo bilong gavman. Ol man i save, ol i nolaik tru long insait long olkain wok samting bilong daunim gavman​—⁠em ol pasin i no Kristen​—⁠na sapos ol i mekim, bai ol i mas raus long lain Witnes Bilong Jehova. Tru tumas, gavman bilong Singapo i no ken pret long ol. Ol i no inap bagarapim wok bilong gavman bilong Singapo long lukautim gut kantri, o brukim ol man na ol i no stap wanbel aninit long gavman, nogat. (Rom 13:​1-7) Dispela i kamap klia long wanpela pas bilong Mas 21, 1995, em Milton G. Henschel, em presiden bilong Sosaiti Was Taua, i bin salim long Praim-Minista Goh Chok Tong bilong Singapo. Mipela i kamapim ol tok bilong dispela pas long hia na bai ol man bilong kaunim dispela nius ol i ken save long en.

Ol man bilong bisnis na gavman na ol narapela man i laikim pasin bilong i stap fri ol bai wet long lukim wanem ol samting bai kamap long Singapo long dispela samting. Olsem wanem? Gavman bilong Singapo bai mekim ol samting i stret wantaim konstitusen bilong em yet na bilong intenesenel komyuniti bilong ol kantri long ol man i ken i stap fri long mekim ol samting i stret long ol i ken mekim? Ol Witnes Bilong Jehova long olgeta hap ol i tingting planti long i stap bilong ol wanlotu bilong ol long Singapo. Ol i save tingim ol long beten bilong ol, na ol i save tingting long tok bilong Baibel i tok: “God i laikim tumas stretpela pasin. Em i no inap larim ol manmeri bilong en i lus.”​—⁠Song 37:⁠28.

[Ol Futnot]

[Blok long pes 30]

Mas 21, 1995

Goh Chok Tong

Prime Minister

Istana Annexe

Singapore 0923

Republic of Singapore

Lee Kuan Yew

Senior Minister

Prime Minister’s Office

460 Alexandra Road

37-00 PSA Bldg

Singapore 0511

Republic of Singapore

Yes Ol Minista:

Mipela i tingting planti long tok i kamap long wanpela nius long Singapo, bilong Februeri 25, 1995. Nius i tok, taim ol Witnes Bilong Jehova i mekim miting bilong Baibel-stadi, ol polis i kam na ol i holim 69 manmeri. Dispela ripot i kamap long nius i stiaim tingting bilong ol man long olgeta kantri i go long ol Witnes Bilong Jehova ol i stap long Singapo, em gavman i bin tambuim wok bilong ol na ol buk samting bilong ol inap 20 yia pinis.

Singapo em wanpela kantri i tok em i bihainim lo demokratik, olsem na mipela i no save, bilong wanem Singapo i tambuim wok bilong wanpela oganaisesen lotu i save mekim wok bilong en long ples klia long planti kantri, winim 200, na lo bilong ol dispela kantri i orait olgeta long en. Na tu, mipela i tingting planti long dispela hevi i kamap, long wanem, lo konstitusen bilong Singapo i tok, olgeta manmeri bilong kantri ol i stap fri long mekim lotu bilong ol.

Long olgeta hap, i no gat wanpela taim ol Witnes Bilong Jehova i bin mekim wanpela pasin inap bagarapim wok bilong gavman long lukautim gut kantri, nogat. Long olgeta hap ol i gat nem long i stap isi wantaim ol man, na wok strong, na bihainim stretpela pasin, na bihainim lo bilong gavman​—⁠em ol pasin yu laik kirapim ol manmeri long bihainim long kantri bilong yu, a?

Tru, pasin bilong ol Witnes, em ol i strong long bihainim ol lo bilong Baibel em i bilong ol Kristen i bihainim, olsem na sampela taim ol man i kisim tingting kranki long ol, o sutim sampela tok giaman long ol. Tasol ol i bin mekim olsem tu long man i bin kamapim lotu Kristen, a? Ol i tok, em i birua long “Sisar,” olsem gavman i stap long taim bilong em. Ol Witnes Bilong Jehova i save bihainim pasin bilong Jisas na ol Kristen bilong pastaim. Ol i save daun long gavman bilong kantri ol i stap long en, na ol i save tromoi takis, na ol i wok long kirapim ol man long bihainim ol gutpela pasin. Ol i save wok strong na bihainim stretpela pasin. I no gat wanpela taim ol Witnes Bilong Jehova i bin insait long pasin bilong daunim gavman bilong wanpela kantri, na mi ken tok tru olsem ol Witnes long Singapo i no inap bagarapim wok bilong yu long lukautim gut kantri bilong yu.

Ol nius i kamapim stori bilong ol samting gavman bilong yu i bin mekim long ol Witnes Bilong Jehova, olsem na long nau planti man i save long dispela samting. Na ol 12 milion pren bilong ol long olgeta hap bilong graun ol i tingting planti long dispela samting i bin kamap. Mi laik askim yu long mekim wok long bikpela namba bilong yu long stretim dispela hevi na larim ol Witnes Bilong Jehova long kantri bilong yu i stap fri long mekim lotu na bihainim tok bilong bel, olsem Konstitusen i tok ol man inap mekim.

Mi ting sapos yu ken toktok wantaim sampela Witnes Bilong Jehova, dispela bai kliaim tingting bilong yu long pasin na wok bilong oganaisesen bilong mipela, na bai yu inap save, gavman bilong Singapo i no ken pret long ol Witnes Bilong Jehova bai nogutim kantri. Bai mi amamas long stretim rot na bai yu inap bung na toktok wantaim ol.

Bai mi wetim pas bilong yu.

Mi Milton G. Henschel

Presiden

[Piksa Kredit Lain long pes 31]

Nik Wheeler/H. Armstrong Roberts