Jehova i Givim Blesing na Wok i Go Bikpela

WANPELA program bilong dediket long apinun bilong Septemba 18, 1995, i kamapim long ples klia olsem God Jehova i blesim tru wok bilong ol Witnes bilong em long hap bilong nambawan ofis bilong ol long Bruklin, Nu Yok.

Winim 6,000 manmeri i harim program bilong dediket. Ol i bung long Bruklin, em long hap ol i wokim program, na long sampela narapela hap, olsem long ol bikpela haus bilong ol Witnes Bilong Jehova long Patesen na Walkil, Nu Yok, na long brens-ofis bilong ol long Toronto, Kanada. Ol manmeri i no stap long Bruklin, ol i harim program long rot bilong telefon.

Wanpela Gutpela Program

Winim 16,400 manmeri i mekim wok volantia long ol Betel long olgeta hap bilong graun, na bikpela hap lain bilong ol i harim dispela program. Ol dispela 16,400 i save mekim wok long 100 kantri samting, em long ol kantri ol i wokim ol buk na nius bilong Baibel na ol i mekim wok bilong helpim ol 78,600 kongrigesen bilong ol Witnes Bilong Jehova long olgeta hap.

Ol brata sista i amamas tru taim program i kirap long 6:30 long apinun long wanpela singsing, na bihain Karl Klein i mekim beten. Siaman bilong program, em Lloyd Barry, em i tok amamas long ol manmeri na em i kamapim sampela liklik tok bilong tokaut long as bilong dispela bung. Brata Albert Schroeder i mekim rivyu long Stadi Wastaua bilong dispela wik, na bihain Daniel Sydlik i mekim tok, nem bilong en “Wok Bilong God Yumi Mekim Long Betel.” Ol brata i mekim ol dispela tok, em ol brata bilong Lain Bilong Bosim Ol Witnes Bilong Jehova.

Tupela narapela tok bilong program​—⁠“Wokim Ol Nupela Haus Slip, 1974-1995,” na “Ol Bikpela Samting Bilong Stretim na Wokim Ol Haus Bilong Betel Long Bruklin”​—⁠i stori long ol bikpela samting bilong wokim o baim ol haus na ol i dediketim. Na ol i stori planti long wanpela nupela haus slip em nau tasol ol i pinisim, na inap olsem 1,000 brata sista bilong Betel i save slip long en. Longpela bilong dispela haus long 90 Sends Strit i go antap inap 115 mita na i stap klostu long ol haus faktori.

Na hap bilong program em Milton Henschel i mekim, em presiden bilong Sosaiti Was Taua, em tok bilong dediket. Em i kamapim sampela stori bilong Baibel taim ol i bin dediketim sampela haus bilong mekim wok bilong Jehova long ol. Ol i mekim wanpela singsing na Carey Barber i pinisim program long beten, em tu i wanpela bilong Lain Bilong Bosim Ol Witnes. Tasol wanem sampela bikpela samting bilong dispela program?

Ol i Dediketim Ol Haus

George Couch, em i lukautim haus Betel, em i stori olsem long Me 2, 1969, em laspela taim ol i bin dediketim wanpela haus slip bilong Betel, na kirap long dispela taim i kam inap long nau ol i wokim 17 nupela haus slip.a Sampela bilong ol, ol i bin wokim nupela na sampela ol i bin baim na stretim. Ol i dediketim ol dispela 17 haus, na tupela liklik haus​—⁠ol i bin baim long 1940 samting, tasol ol i bin stretim na ol i kamap haus slip​—⁠na haus faktori na ol haus ofis, em ol i bin wokim o baim bihain long taim ol i bin dediketim ol haus ofis bilong ol Witnes Bilong Jehova long Mas 15, 1982.b

Nambawan bikpela haus ol i bin dediketim i stap long 360 Feman Strit. Pastaim ol i bin wokim dispela haus long 1928, na ol Witnes Bilong Jehova i baim long Mas 15, 1983, na ol i stretim olgeta samting bilong en. Bikpela bilong en inap olsem 93,000 skwe mita, o klostu 9-pela hekta. Sampela narapela haus ol i bin dediketim, em haus faktori long 175 Pel Strit na ol bikpela haus bilong putim ol ka, em ol i bin wokim long sampela yia i go pinis.

Sampela Haus Slip Moa

Long 1969, taim ol i dediketim laspela haus slip bilong Betel long Bruklin, inap olsem 1,336,112 Witnes i bin autim tok long Kingdom bilong God long olgeta hap. Tasol long 1995 inap olsem 5,199,895 i autim tok, winim namba bilong ol pablisa long 1969 inap 3 na hap taim! Olsem na bilong wokim planti buk samting bilong Baibel, famili bilong Betel long Bruklin i go bikpela tru. Long 1969 inap olsem 1,042 brata sista i wok long Betel, tasol long nau ol i winim 3,360 na ol i slip long 22 haus slip!

George Couch i stori long olsem wanem ol i bin inapim ol ples slip long 1974 i go 1995. Long 1971 samting ol Witnes Bilong Jehova i bin rentim sampela plua long wanpela hotel i stap klostu, em Tauas Hotel, na sampela bilong famili bilong Betel i bin slip long dispela hap. Long Disemba 1973, Nathan Knorr, long dispela taim em i presiden bilong Sosaiti Was Taua, em i bin raitim pas long Betel Ofis na long ol man i bosim Tauas Hotel, na em i tokim ol olsem Sosaiti i tingting long ‘lusim Tauas Hotel long Oktoba 1, 1974.’

Brata Couch i tok em i bin kirap nogut, long wanem, i no gat narapela ples slip bilong ol brata sista i slip long Tauas i ken slip long en. Ol man i bosim Tauas Hotel, ol tu i bin kirap nogut, long wanem, ol i mas kisim mani bilong Sosaiti bilong bekim dinau bilong ol. Olsem na ol man i bosim Tauas i bin strong long ol Witnes Bilong Jehova i baim dispela hotel. Ol i tok: “Kirap long taim mipela i kam long dispela hap i kam inap nau, lain bilong yupela i go bikpela, olsem na gutpela yupela i baim dispela haus, yupela i gat wok long en.”

Ol brata bilong Sosaiti i tokim ol: “Tasol planti man i no Witnes i sindaun long hotel. Sapos mipela i baim, mipela i laik putim lain bilong mipela yet long en.”

Ol man i bosim Tauas i tok: “Mipela bai rausim ol dispela man.” I no longtaim bihain na ol Witnes Bilong Jehova i baim Tauas Hotel, na ol i no bin tromoi bikpela mani tumas. Ol brata sista i harim dispela tok i amamas tru, na Brata Couch i askim ol: “Bilong wanem Brata Knorr i bin raitim dispela pas? Ating em yet i no save, tasol long dispela rot ol i baim Tauas Hotel i go long Sosaiti Was Taua.”

Brata Couch i stori tu long olsem wanem ol Witnes Bilong Jehova i bin baim hap graun bilong 97 Kolambia Haits, em bipo Magret Hotel i stap long en, em long hapsait bilong rot bilong olpela haus Betel. Em gutpela hap stret, long wanem, i no hatwok long wokim wanpela liklik rot insait long graun bilong skruim nupela haus long olpela haus Betel. Long Februeri 1980, taim ol i wok long stretim dispela haus, paia i bagarapim haus. Nau papa bilong hotel i gat hevi long wokim nupela hotel long dispela hap, olsem na em i baim hap graun i go long ol Witnes Bilong Jehova.

Brata Couch i tok: “Klostu olgeta dispela haus i gat wanpela gutpela stori bilong en i kamapim long ples klia wanpela samting​—⁠God Jehova i bin stiaim oganaisesen bilong em long graun long baim ol dispela haus.”

Stori Bilong 90 Sends

Nambawan bikpela na nupela haus slip em long 90 Sends Strit. Taim ol Witnes Bilong Jehova i baim dispela hap graun long Disemba 1986, i gat wanpela bikpela haus faktori long 160 Jei Strit.c Ol i bin brukim haus faktori, na long Ogas 30, 1990, ol i bin toksave long famili bilong Betel olsem ol i bin kisim orait long wokim wanpela nupela haus slip i gat 30 plua long dispela hap graun.

Theodore Jaracz bilong Lain Bilong Bosim Ol Witnes, em i toktok wantaim Max Larson, em i save lukautim faktori bilong Sosaiti long Bruklin, na Brata Larson i stori long olsem wanem ol i kisim tok orait long wokim dispela haus slip long 90 Sends Strit. Em i tok, samting i bin kamap long 1965 i bikpela samting.

Long dispela taim Sosaiti i laik wokim wanpela haus faktori i gat 10-pela plua long wanpela hap graun klostu long ol narapela haus faktori, tasol long dispela hap graun lo i tok ol i ken wokim wanpela haus i gat 2-pela plua tasol. Wanpela akitek i orait long wokim ol piksa bilong nupela haus faktori ol i laik wokim, tasol em i tok: “Mi no laik kisim ol piksa i go long lain bilong tok orait long wokim ol haus, nogut mi sem.” Em i bilip strong olsem dispela lain (Board of Standards and Appeals) i no inap tru long senisim lo bilong ol long wokim longpela haus long dispela hap graun. Taim dispela lain i orait long ol piksa bilong dispela haus faktori, em i kirap nogut na em i tok: “Olaman! Olsem wanem na yupela i kisim tok orait.”

Brata Larson i tok moa, taim ol i makim dispela hap graun bilong wokim haus faktori i gat 10-pela plua, lo bilong wokim ol haus samting long ol hap graun i stap klostu i senis, na lo bilong hap graun long 160 Jei Strit tu i senis. Ol i makim dispela hap graun bilong wokim wanpela hotel long en. Na Larson i tok, i no gat wanpela i bin tingim dispela samting inap 25 yia bihain, taim mipela i laik painim wanpela ples bilong wokim nupela haus Betel.

Brata Larson i stori long samting i bin kamap, na em i tok: “Taim mipela wokim ol piksa bilong wanpela haus slip i gat 30 plua, na mipela kisim i go long dipatmen bilong wokim ol haus, ol i tokim mipela: ‘Yupela i no inap wokim wanpela haus slip long dispela hap. Em ples bilong wokim ol haus faktori, na ol i no inap senisim lo na makim dispela hap graun bilong wokim haus slip long en.’

“Mipela i tokim ol: ‘Ol i no mas senisim lo bilong wokim haus slip long hia. Ol i bin makim pinis dispela hap graun bilong wokim hotel long en.’ Taim ol i lukim ol pepa, ol i kirap nogut long dispela! Em nau, long dispela rot mipela i kisim dispela haus slip i gat 30 plua.” Brata Larson i tok olsem bilong pinisim tok bilong em.

Jehova i Blesim Wok

Man bilong raitim Song long Baibel i tok: “Sapos Bikpela i no wokim haus, ol kamda i wok nating.” (Song 127:⁠1) Tru tumas, Jehova i bin blesim wok bilong ol Witnes Bilong Jehova long wokim ol haus slip na ol haus faktori, bilong helpim ol long autim tok na skulim ol man olsem Jisas i tokim lain bilong em long mekim.​—⁠Matyu 24:14; 28:​19, 20.

Ol manmeri i harim dispela program long Septemba 18, 1995, ol i amamas tru long save olsem Jehova i blesim wok bilong ol long wokim ol nupela haus long hetkota bilong lain bilong em. Lain bilong Jehova i ken bilip tru olsem Jehova bai blesim yet wok bilong ol, taim ol i bihainim yet ol lo bilong em.

[Ol Futnot]

[Piksa long pes 23]

90 Sends Strit • 1995

[Ol Piksa long pes 24, 25]

Sampela narapela haus slip ol i bin dediketim

97 Kolambia Haits • 1986

Bosat Hotel, 98 Montagu Strit • 1983

34 Orens Strit • 1945

Stendis Hotel, 169 Kolambia Haits • 1981

67 Livingston Strit • 1989

108 Joralemon Strit • 1988

Tauas Hotel, 79-​99 Wilo Strit • 1975

[Ol Piksa long pes 26]

175 Pel Strit • 1983

69 Adams Strit • 1991

360 Feman Strit • 1983