“Em i Wok Bilong Jehova”

Em het-tok bilong wanpela stori i stap insait long nius El Norte bilong biktaun Montere long Meksiko. Dispela stori em i toktok long nupela Haus Kibung bilong ol Witnes Bilong Jehova.

Montere em wanpela biktaun i gat 2,300,000 manmeri long en (ol liklik stesin i stap klostu long taun i insait long dispela namba) long hap not bilong Meksiko, na i gat 19,200 manmeri i save autim tok. Klostu inap olsem wanpela yia na hap, ol Witnes i bin wok strong wantaim long wokim wanpela Haus Kibung em i gutpela na naispela tru, em i gat 3,000 gutpela sia na i gat samting bilong mekim Haus Kibung i kamap kol. Ol Witnes bilong dispela hap i amamas tru taim wanpela brata bilong Lain Bilong Bosim Ol Witnes i mekim tok bilong dediketim dispela Haus Kibung. Program i bin kamapim sotpela stori long wok bilong Kingdom long Montere long bipo, na ol i toktok tu wantaim sampela em ol i bin helpim wok bilong wokim Haus Kibung. Bihain ol dispela 4,500 manmeri i bin bung ol i amamas long harim tok bilong dediketim dispela Haus Kibung.

Dispela em namba tri Haus Kibung ol i bin wokim long Meksiko i no longtaim i go pinis na em i insait long wanpela bikpela wok ol i tok em bilong kamapim “Planti Moa Bikpela na Gutpela Haus Kingdom na Haus Kibung.”

Namba bilong ol pablisa long Meksiko i winim 443,000 na long 1995 inap 1,492,500 manmeri i bin bung long Memorial bilong tingim i dai bilong Jisas, olsem na ol nupela Haus Kibung olsem dispela i stap long Montere, bai inap tru long mekim wok bilong Jehova.