“Jehova i Harim Beten Bilong Mi!”

LONG olgeta hap bilong graun ol Witnes Bilong Jehova i mekim klostu 5 milion Baibel-stadi wantaim ol man i gat laik long kisim stretpela save long God na ol gutpela samting em i laik mekim long ol man. Namel long ol dispela Witnes Bilong Jehova, ol pikinini tu i mekim dispela wok. Tingim wanpela manki nem bilong em Joel. Em i dediket long Jehova na kisim baptais long taim em i gat 9-pela krismas. Long yia bihain em i kisim dispela ekspiriens:

“Long taim bilong autim tok, mi bungim wanpela meri nem bilong em Candy. Mi soim em buklet ‘Harim! Mi Mekim Olgeta Samting i Kamap Nupela!’ Em i kisim pinis wanpela, olsem na mi soim em buk Yu Inap i Stap Oltaim Long Paradais Long Graun, tasol em i gat dispela buk tu. Nau mi tingting, ‘Bai mi tokim em, mi laik stadi wantaim em long Baibel.’ Em i orait long stadi!

“Sista bilong Candy i gat sik kensa, olsem na em i kam i stap wantaim Candy. Long dispela taim Candy i stadi long kamap nes, olsem na em i no stadi moa long Baibel inap sampela mun. Mi na papamama bilong mi i save go lukim em na lusim sampela nius wantaim em o man bilong em, Dick. Man bilong em i tokim mipela olsem Candy i save putim ol nius arere long bet bilong em, na em i save kaunim long nait.

“Bihain sista bilong Candy i dai. Mi na papamama bilong mi i toktok wantaim Candy long ol samting i painim ol man i dai pinis na em i laik long stadi gen long Baibel. Long narapela de mipela i askim Dick sapos em i laik sindaun wantaim Candy na stadi long Baibel, olsem famili-stadi. Em i ting olsem dispela em gutpela tingting, olsem na nau mi na papa bilong mi i stadi wantaim Dick na Candy. Ol i wok long kamap strong na ol i tok ol i amamas long stadi long Baibel.

“Mi bin wok long beten long kisim wanpela Baibel-stadi na Jehova i harim beten bilong mi!”