Japan i Orait Long Ol i Stap Fri Long Lotu

INAP planti yia long Japan, wanpela traim i wok long painim ol yangpela sumatin em ol i Witnes Bilong Jehova, olsem: Bai ol i bihainim maus bilong bel em Baibel i skulim pinis, o bai ol i insait long wanpela wok bilong skul em bai bagarapim maus bilong bel? Bilong wanem dispela traim i save kamap? Em i kamap, long wanem, ol spot bilong skulim ol man long pait, olsem judo na kendo, i insait long ol klas bilong spot long skul. Ol yangpela Witnes i pilim olsem ol dispela kain spot i no stret wantaim ol lo bilong Baibel, em wanpela lo i stap long Aisaia sapta 2, ves 4. Dispela skripsa i tok: “Na bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”

Ol yangpela Witnes Kristen i no laik lain long ol pasin bilong pait na bai ol i bagarapim narapela man, olsem na ol i tokim ol tisa bilong ol, ol i no inap insait long ol dispela spot na sakim maus bilong bel. Pastaim ol tisa i wok long subim ol Witnes long insait long ol dispela spot, tasol bihain sampela i pilim tingting bilong ol sumatin Witnes na ol i orait long ol i ken bihainim maus bilong bel, na tisa i makim sampela narapela wok bilong skul ol inap mekim.

Tasol sampela tisa i kros, na sampela skul i no larim ol Witnes i winim mak long klas bilong spot. Long 1993, ol i pasim 9-pela Witnes samting long go long narapela gret, na ol i subim ol long lusim skul o rausim ol long skul, long wanem, ol i no laik insait long ol spot judo samting.

Em nau, taim i kamap pinis bilong mekim sampela samting bilong helpim ol yangpela Kristen em ol i laik skul, tasol ol i no laik bai maus bilong bel i gat tok. Orait 5-pela sumatin bilong wanpela bikpela skul koles (Kobe Municipal Industrial Technical College), sotpela nem bilong en Kobe Tek na em dispela skul i bin pasim ol long lusim gret 1 na i go long gret 2, ol i kotim skul.

I Gat Wanem Bikpela Tok?

Long Epril 1990 taim dispela faipela sumatin i bin go long Kobe Tek, ol i tokim ol tisa olsem ol i no inap insait long spot kendo (pasin bilong ol Japan long pait long bainat), long wanem, dispela i no stret wantaim bilip bilong ol em Baibel i as bilong en. Ol tisa bilong spot long skul i birua stret long ol, na ol i no larim ol i mekim narapela samting olsem senis bilong kendo na bai ol inap winim mak long klas bilong spot. Bihain, ol sumatin i lus long winim mak long dispela klas, na long dispela as ol i mas mekim gen gret 1 (namba wan yia bilong kos long koles). Long Epril 1991 ol i kotim skul long Kot Bilong Distrik Kobe na ol i tok, dispela pasin skul i bin mekim i no stret long lo konstitusen, em i tok olgeta man inap bihainim wanem wanem lotu em i laik bihainim.a

Skul i tok, sapos ol i makim narapela spot olsem senis bilong spot kendo, bai i olsem ol i tingim moa wanpela lotu na bai skul i no bihainim pasin bilong tingim lotu bilong olgeta sumatin i wankain tasol. Na tu, ol i tok ol i sot long tisa o ol samting bilong mekim narapela spot olsem senis bilong kendo.

Kot Bilong Distrik i Pasim Tok​—⁠Ol i Apil

Taim ol i wok yet long harim kot bilong ol, tupela bilong ol faipela sumatin i lus gen long winim mak long klas bilong spot, na tripela narapela klostu ol i no winim mak, tasol ol i winim na ol inap go long narapela gret. Lo bilong skul i tok, ol sumatin i no kisim ol gutpela mak long skul na ol i wokim gen wankain gret insait long 2-pela yia, skul inap rausim ol. Wanpela bilong dispela tupela sumatin i tingim dispela samting na em i tok em bai lusim skul paslain long ol i rausim em, tasol narapela sumatin, em Kunihito Kobayashi, em i no laik lusim skul. Olsem na ol i rausim em. Tasol long olgeta klas bilong em, Kunihito i save kisim mak (averes) olsem 90.2 long 100​—⁠long klas bilong spot tu​—⁠tasol bihain em i lus long winim mak long dispela klas, long wanem, ol i givim mak long em olsem 48 tasol. Klas bilong em i gat 42 sumatin, tasol em i stap namba wan long klas.

Long Februeri 22, 1993, Kot Bilong Distrik Kobe i tok, Kobe Tek i winim kot, na ol i tok olsem: “Pasin skul i bin mekim i no brukim lo konstitusen,” tasol kot i tok, ol i save olsem “lo bilong skul long ol man i mas mekim spot kendo, dispela i mekim na ol sumatin i no stap fri olgeta long bihainim lotu bilong ol.”

Olsem aposel Pol i bin mekim bipo, ol sumatin i pasim tok long ol bai apil long narapela kot i gat bikpela namba moa. (Aposel 25:​11, 12) Orait ol i go long Nambawan Kot Bilong Osaka.

Ol Sumatin i No Tingim Ol Yet Tasol

Wanpela saveman bilong lo i gat nem, em Profesa Tetsuo Shimomura bilong Yunivesiti Sukuba, em i orait long tokaut olsem wanpela witnes long Nambawan Kot Bilong Osaka. Em i gat bikpela save long edukesen na lo, na em i kamapim klia olsem pasin em skul i bin mekim long ol dispela sumatin i soim olsem skul i no tingim ol. Kunihito Kobayashi i kamapim tingting bilong em long kot, na gutpela pasin bilong em, em i bilip tru long samting em i mekim, dispela i mekim na ol man long kot i pilim tru ol tok bilong em. Bihain, long Februeri 22, 1994, lain loya bilong Kobe (Kobe Bar Association) i tokaut olsem, dispela pasin skul i bin mekim long rausim Kunihito long skul i olsem ol i laik pasim em long bihainim lotu bilong em na long kisim skul​—⁠i stret long em i ken kisim​—⁠na ol i tok skul i mas kisim em bek.

De i wok long kam klostu bilong Nambawan Kot Bilong Osaka i pasim tok, na long dispela taim olgeta yangpela Kristen i bin insait long dispela hevi, ol i gat laik long sanap strong i go inap long kot bilong ol i pinis. Ol i pilim olsem ol i mekim dispela kot bilong helpim planti tausen yangpela Witnes i karim wankain hevi long ol skul long olgeta hap bilong Japan. Tasol skul hia i no bin rausim ol dispela narapela 4-pela sumatin Witnes, olsem na ol i ting ol bai i no winim kot bilong ol. Na tu, ol i pilim olsem, sapos ol i mekim dai kot bilong ol, dispela pasin i no stret em skul i bin mekim long rausim Kunihito, em bai kamap ples klia. Olsem na ol narapela sumatin i lusim kot bilong ol na kot bilong Kunihito tasol i stap.

Long Disemba 22, 1994, Nambawan Jas Reisuke Shimada bilong Nambawan Kot Bilong Osaka i pasim tok long kot, na dispela i senisim tok em Kot Bilong Distrik Kobe i bin pasim. Kot i tok, Kunihito i bilip tru olsem i gat gutpela as na em i no laik insait long spot kendo​—⁠em i bihainim bilip bilong em na em i no mekim​—⁠olsem na hevi em i karim long dispela em i bikpela tumas. Na dispela jas i tok, i stret sapos skul i bin makim narapela spot em i ken mekim. Ol man em ol i laik tru bai olgeta man i ken mekim ol samting i stret long ol i ken mekim, ol i wanbel long dispela gutpela tok bilong jas. Tasol skul hia i mekim apil long Sprim-Kot Bilong Japan, na dispela i pasim Kunihito long skul inap narapela yia samting.

Ol i Go Long Sprim-Kot

Bihain wanpela stori long nius Kobe Shimbun i tok: “Long dispela taim stret [taim Nambawan Kot Bilong Osaka i pasim tok pinis], gutpela sapos lain bilong bosim ol skul bilong Kobe (Kobe City School Board) na dispela skul hia, ol i kisim bek Mista Kobayashi long skul. . . . Pasin ol i mekim, em ol i strong tumas long sakim bilip bilong sumatin, dispela i pasim em long skul​—⁠em bikpela samting man i mas kisim long dispela hap taim em i stap yangpela.” Tasol Kobe Tek i strong yet long pasim em. Long dispela as, bikpela tok i kamap long dispela samting long olgeta nius bilong Japan. Ol tisa na ol lain bos bilong ol skul long kantri ol i tingim dispela stori, na ol i wet long harim wanem tok nambawan kot bilong kantri bai pasim, long wanem, bihain dispela tok bai stiaim tingting bilong ol jas moa yet taim ol i harim ol wankain kot.

Long Janueri 17, 1995, em wanpela wik bihain long skul i mekim apil long Sprim-Kot, bikpela guria i kamap long Kobe na i bagarapim Asiya Siti, em ples bilong Kunihito na famili bilong em. Long 5:​30 long moningtaim, em sampela minit paslain long dispela guria i kamap long ples bilong em, Kunihito i lusim haus bilong em bilong i go long ples wok, em i save wok haptaim. Em i kikim wilwil i go long wanpela rot em i ran aninit long wanpela bikpela rot i stap antap (Hanshin Expressway), na em i laik ran aninit long wanpela hap bilong dispela bikpela rot, tasol long dispela taim stret guria i kamap na dispela hap bilong rot i bruk na i pundaun. Kwiktaim em i go bek long haus bilong em na em i lukim olsem namba wan plua bilong haus i bagarap olgeta. Kunihito i save, klostu em inap bagarap long dispela guria, na em i tenkyu long Jehova i bin larim em i abrusim bagarap. Sapos em i bin dai, ating ol bai pinisim dispela kot long spot kendo na Sprim-Kot i no pasim wanpela tok long en.

Sprim-Kot long Japan i save bihainim pasin olsem: Ol i save lukim ol apil long pepa tasol, na skelim tok em kot bilong provins i bin pasim​—⁠tok i stret o nogat. Sapos i no gat gutpela as tru bilong senisim tok bilong kot bilong provins, ol i no save harim kot. Sprim-Kot i no save toksave long ol man i kot long wanem de ol bai pasim tok long kot bilong ol. Olsem na long moningtaim bilong Mas 8, 1996, Kunihito i kirap nogut taim em i kisim toksave olsem ol bai pasim tok long dispela moning yet. Taim em i kisim save olsem Sprim-Kot i wanbel long tok em Nambawan Kot Bilong Osaka i bin pasim, em i amamas nogut tru.

Fopela jas wantaim Jas Shinichi Kawai olsem siaman, ol i wanbel long tok olsem, ‘ol samting skul i bin mekim i no stret liklik wantaim ol pasin em ol man i ting i stret long mekim, na skul i mekim samting lo yet i no tok orait long en, olsem na ol i brukim lo.’ Kot i ting i gat gutpela as na Kunihito i no laik mekim spot kendo, na jas i tok: ‘As na sumatin hia i no laik insait long spot kendo i olsem em i bilip tru i no stret long em i mekim, na lotu bilong em i as tru bilong dispela tingting.’ Sprim-Kot i tok, skul inap makim narapela wok bilong sumatin i mekim olsem senis bilong spot kendo, na i stret skul i mas mekim olsem, na long dispela rot ol bai tingim gut bilip bilong sumatin.

Tok Bilong Kot Bai Helpim Planti

Ating dispela tok kot i pasim bai helpim tru pasin bilong i stap fri long lotu long ol skul. Nius Japan Times i tok: “Em namba wan taim Sprim-Kot i bin pasim wanpela tok long dispela bikpela tok bilong edukesen na pasin bilong i stap fri long lotu.” Tasol dispela tok kot i pasim, i no makim olsem ol wan wan sumatin i no gat wok moa long sanap strong na tokaut long bilip bilong em yet taim traim i painim em.

Profesa Masayuki Uchino bilong Yunivesiti Sukuba i tok, wanpela samting i bin kirapim ol jas long helpim Kunihito long winim kot i olsem: Kunihito em “wanpela gutpela sumatin i save kisim ol gutpela mak tru long skul.” Baibel i tokim ol Kristen em traim i painim ol olsem: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.” (1 Pita 2:12) Taim ol gutpela yangpela Kristen i bihainim ol lo bilong Baibel long olgeta wokabaut bilong ol, dispela inap helpim ol man long tingim tru pasin ol i mekim long sanap strong long traim na holimpas tok bilong Baibel.

Taim Sprim-Kot i pasim tok pinis, Kobe Tek i kisim bek Kunihito Kobayashi. Klostu olgeta sumatin i bin kirap skul long wankain taim olsem Kunihito long bipo, ol i winim skul pinis. Nau Kunihito i skul wantaim ol sumatin em krismas bilong ol i aninit long krismas bilong em inap faipela yia. Long tingting bilong planti manmeri bilong dispela graun, faipela bikpela yia bilong em long skul i olsem i lus nating. Tasol, long tingting bilong God Jehova, pasin bilong Kunihito long holimpas bilip em i bikpela samting tru, na dispela ol yia em i bin lusim i no lus nating.

[Futnot]

[Ol Piksa long pes 20]

Han kais: Haus bilong Kunihito taim guria i kamap pinis

Daunbilo: Kunihito long nau