God i Laik Yumi Mas Mekim Wanem?
“Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 JON 5:3.
“LOTU bilong mi em inap long mi!” Planti taim ol man i save tokim yumi olsem, a? Tasol mobeta ol i askim olsem: “Lotu bilong mi i gutpela long ai bilong God?” Tru tumas, God i makim sampela samting yumi mas mekim sapos yumi laik lotu long em long pasin em i laikim. Olsem wanem? Yumi ken kirap nogut long dispela tok? Nogat, a? Sapos yu gat wanpela naispela haus, na nau tasol yu bin tromoi bikpela mani bilong stretim dispela haus, yu orait long ol man nabaut i ken i stap long en? Nogat, a? Man i laik stap long dispela haus em i mas inapim sampela lo yu putim.
2 Olsem tasol, God Jehova i bin givim dispela graun long ol manmeri. Aninit long wok bos bilong Kingdom bilong em, klostu nau em bai stretim dispela graun—em bai kamap wanpela naispela paradais. Jehova bai mekim dispela samting i kamap. Tasol bilong mekim olsem em i bin givim bikpela pe, em i givim Pikinini bilong em. Tru tumas, God i mas makim sampela samting ol man i mas mekim bilong i stap long dispela ples!—Song 115:16; Matyu 6:9, 10; Jon 3:16.
3 Olsem wanem yumi ken save long ol samting God i laik yumi mas mekim? Long rot bilong spirit holi Jehova i kirapim King Solomon long tokaut long samting Em i laik yumi mas mekim. Taim Solomon i tingim pinis olgeta samting em i bin mekim—olsem kisim planti mani, wokim ol kain kain haus, wokim musik, na laikim ol meri—nau Solomon i kisim save olsem: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”—Saveman 12:13.
“Ol Lo Bilong En i No Givim Hevi Long Yumi”
4 “Bihainim ol lo bilong em.” Em nau, God i laik bai yumi mas mekim olsem. Olsem wanem? Em i askim yumi long mekim bikpela wok tumas? Nogat tru. Aposel Jon i tokim yumi long wanpela gutpela samting tru long ol lo bilong God, o ol samting em i laik yumi mas mekim. Em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jon 5:3.
5 Tok Grik ol i tanim olsem “hevi” i makim samting i “hevi long karim” o i hatwok long inapim o truim. Matyu 23:4 i mekim wok long dispela tok Grik bilong stori long “karamap i hevi tumas,” em i makim ol lo na pasin tumbuna ol man yet i kamapim na ol Farisi na saveman i putim antap long ol man. Yu klia gut long as bilong tok lapun aposel Jon i mekim? Ol lo bilong God i no wanpela hevi yumi mas karim, na tu, ol i no hatwok tumas long bihainim. (Skelim wantaim Lo 30:11.) Sapos yumi laikim God yumi amamas long mekim ol samting em i laik yumi mas mekim. Em gutpela rot bilong yumi long kamapim klia olsem yumi laikim Jehova.
6 Bilong mekim olsem yumi mas save gut long ol samting God i laik yumi mas mekim. Nau yumi ken stori long 5-pela samting God i laik yumi mas mekim, na taim yumi mekim olsem, tingim tok bilong Jon: ‘Ol lo bilong God i no givim hevi long yumi.’
Kisim Save Long God
7 Namba wan samting God i laik yumi mas mekim, em olsem, yumi mas kisim save long God. Tingim tok bilong Jisas long Jon sapta 17. Em laspela nait bilong Jisas long stap laip olsem man. Long dispela nait Jisas i bin lusim planti aua bilong toktok wantaim ol aposel, long wanem, em bai lusim ol. Jisas i tingting planti long ol samting bai painim ol long bihain—olsem ol bai kisim laip oltaim oltaim o nogat. Em i lukluk i go antap na em i beten bilong helpim ol. Long ves 3, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” Yes, bilong kisim laip oltaim ol i mas kisim “save” long God na Krais. Yumi tu i mas mekim olsem. Bilong kisim laip oltaim yumi mas kisim dispela save.
8 Tasol wanem insait bilong dispela tok kisim “save” long God? Tok Grik ol man i bin tanim olsem “ol i save long yu” i makim “kisim save, luksave” o “save gut tru” long en. Tingim tu, long tok Grik dispela tok i makim man i “wok long kisim save” olsem em i mekim i go i go. Olsem na insait bilong dispela tok “kisim save long God” em i olsem: Man i mas kisim save long em, na em i no ken kisim hap save tasol, nogat, em i mas save gut tru long God—em i mas wok long kamap gutpela pren bilong em. Sapos yumi stap pren bilong God inap oltaim dispela bai helpim yumi long save moa yet long em. Dispela pasin bilong kisim save long God i ken i stap inap oltaim, long wanem, i no gat wanpela taim yumi ken tok yumi save pinis long olgeta samting bilong Jehova.—Rom 11:33.
9 Olsem wanem yumi ken kisim save long God? I gat tupela buk bilong helpim yumi. Wanpela em “buk bilong ol samting God i bin wokim.” Ol samting Jehova i bin wokim—ol samting i stap laip na ol samting i no stap laip—ol i helpim yumi long save long pasin bilong em. (Rom 1:20) Tingim sampela samting olsem: Pairap bilong wanpela bikpela wara kalap, strong bilong solwara i bruk long nambis long taim bilong bikpela win, ol gutpela sta yumi lukim long nait taim skai i klia—ol dispela samting i lainim yumi olsem Jehova em i God “i gat olgeta strong.” (Aisaia 40:26) Tingim tu: Lap bilong wanpela pikinini taim em i lukim wanpela liklik dok i wok long ranim tel bilong em yet o wanpela liklik pusi i pilai long bal koten—dispela i givim tingting long yumi olsem Jehova em i God bilong amamas na em inap wokim samting i pani, a? (1 Timoti 1:11) Swit bilong gutpela kaikai, gutpela smel bilong ol plaua i kamap namel long gras, ol gutpela gutpela kala bilong wanpela bataplai, singsing bilong ol pisin long taim bilong san i laik kamap, wanpela gutpela pren i holim yumi—ol dispela samting i helpim yumi long save olsem, Man bilong wokim yumi em i God bilong pasin sori, na em i laik yumi ken i stap amamas, a?—1 Jon 4:8.
10 Tasol yumi no inap kisim save long olgeta samting bilong Jehova long dispela “buk bilong ol samting God i bin wokim.” Olsem: Wanem nem bilong God? Bilong wanem em i wokim graun na putim man long en? Bilong wanem God i larim pasin nogut i stap? Wanem samting bai kamap long bihain? Bilong bekim ol dispela kain askim yumi mas lukim narapela buk i kamapim save bilong God—em Baibel. Long Baibel, Jehova i kamapim planti samting bilong em yet, olsem nem bilong em, pasin bilong em, na laik bilong em—yumi no inap kisim save long ol dispela samting long narapela rot.—Kisim Bek 34:6, 7; Song 83:18, NW; Amos 3:7.
11 Na tu, long rot bilong Baibel Jehova i givim save long yumi long sampela narapela man em yumi mas save long ol. Olsem: Krais Jisas em i husat, na em i mekim wanem wok bilong kamapim laik bilong Jehova? (Aposel 4:12) Satan em i husat? Em i paulim ol man long wanem ol rot? Yumi ken mekim wanem bambai em i no ken paulim yumi? (1 Pita 5:8) Bekim bilong ol dispela askim i stap long Baibel tasol—na ol i ken helpim yumi long abrusim bagarap.
12 Olsem wanem? Em i hatwok tumas long kisim dispela kain save long God na long laik bilong em? Nogat tru! Yu inap tingim yet namba wan taim yu bin lain olsem nem bilong God em Jehova, na Kingdom bilong em bai kamapim bek Paradais long graun, na Jehova i givim Pikinini bilong em olsem ofa bilong baim bek yumi long sin, na ol narapela gutpela tok i tru? Long dispela taim yu bin pilim olsem wanem? Ating i olsem yu rausim wanpela laplap i bin pasim tingting bilong yu long kisim save, na nau long namba wan taim yu save gut long ol samting. Kisim save long God em i no givim hevi long yumi, nogat. Em i samting bilong amamas!—Song 1:1-3; 119:97.
Mekim Pasin i Stret Long Ai Bilong God
13 Taim yumi kisim save long God, bai yumi save yumi mas senisim sampela pasin bilong yumi. Orait, yumi ken stori long namba 2 samting God i laik yumi mas mekim: Pasin bilong yumi i mas stret long ai bilong God na yumi mas bihainim tok i tru bilong em. Tok i tru em i wanem samting? Olsem wanem? Ol samting yumi mekim na bilip long en, em i bikpela samting long God? Planti man long nau ol i no ting olsem. Long 1995, Sios Bilong Inglan i bin kamapim wanpela ripot i tok, sapos man na meri i stap nating wantaim, na ol i no marit, ol narapela i no ken ting em i wanpela sin. Wanpela bisop bilong sios i tok: “Dispela tok ‘stap nating wantaim em i sin’ i save semim ol man na i no helpim ol.”
14 Olsem wanem? “Stap nating wantaim” em i no wanpela sin moa? Jehova i tokaut klia long tingting bilong em long dispela pasin. Baibel i tok: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.” (Hibru 13:4) Maski sampela pris pasto na ol man i go lotu i ting i no gat rong sapos man na meri i no marit ol i slip wantaim, tasol long ai bilong God em i wanpela bikpela sin! Na em i gat dispela tingting tu long pasin bilong bagarapim marit, na mekim maritpasin wantaim wanblut, na long pasin sodom. (Wok Pris 18:6; 1 Korin 6:9, 10) God i tok yumi no ken mekim kain pasin olsem, em i ting ol dispela pasin i pasin doti.
15 Sapos yumi klia long ol pasin God i tok em i sin, dispela tasol em i no inap. God i laik yumi mas mekim gutpela pasin long ol narapela tu. Insait long famili, em i laik man na meri i mas laikim na tingim gut narapela. God i laik ol papamama i mas lukautim ol pikinini long ol samting bilong skin, na spirit, na tingting na bel. Em i tokim ol pikinini long harim tok bilong papamama. (Sindaun 22:6; Kolosi 3:18-21) Na olsem wanem long bilip bilong yumi? God Jehova i laik yumi mas klia long ol bilip na pasin bilong ples i no stret long ol tok i tru i stap long Baibel o ol lotu giaman i as bilong en.—Lo 18:9-13; 2 Korin 6:14-17.
16 Olsem wanem? Em i wanpela hevi sapos yumi mas mekim pasin i stret long ai bilong God na bihainim tok i tru bilong em? Nogat! Tingim ol gutpela samting i kamap, olsem: Insait long marit, man i laikim meri na meri i laikim man na narapela i bilip long narapela na marit i no bruk, long wanem, wanpela i pamuk. Ol pikinini i pilim olsem papamama i laikim ol—ol i no ting olsem papamama i no tingim na laikim ol. Ol i gat klinpela bel na ol i no save kisim sik, long wanem, sik AIDS na ol narapela sik bilong pamuk i bagarapim ol, na bel i no kotim ol. Tru tumas, ol samting Jehova i laik yumi mas mekim i no tekewe wanpela gutpela samting yumi mas kisim bilong i stap amamas!—Lo 10:12, 13.
Tingim Gut Laip na Blut
17 Taim yu stretim sindaun na pasin bilong yu bambai i stret long lo bilong God, bai yu pilim tru olsem laip em i bikpela samting tru. Nau yumi ken stori long namba 3 samting God i laik yumi mas mekim. Yumi mas tingim gut laip na blut. Laip i holi long ai bilong God. Dispela i stret, long wanem, em i As bilong laip. (Song 36:9) Na Jehova i save tingim laip bilong bebi i stap long bel bilong mama i bikpela samting tu. (Kisim Bek 21:22, 23, NW) Blut i olsem laip. Olsem na blut tu em i samting holi long ai bilong God. (Wok Pris 17:14) Na yumi no kirap nogut taim yumi lain olsem God i laik yumi mas tingim gut laip na blut olsem em yet i save tingim.
18 Yumi mas mekim wanem bilong tingim gut laip na blut? Yumi ol Kristen i no ken insait long sampela kain amamas em inap bagarapim skin bilong yumi. Yumi save was gut, nogut bagarap i painim yumi o ol narapela, olsem na yumi stretim gut ol samting long ka na haus bilong yumi. (Lo 22:8) Yumi no smok, kaikai buai, o kisim ol drak i bagarapim tingting bilong yumi o i kalabusim yumi. (2 Korin 7:1) Yumi bihainim tok bilong God, em i tok yumi mas abrusim blut, olsem na yumi no orait long ol i givim blut long yumi. (Aposel 15:28, 29) Tru yumi amamas long i stap laip, tasol bai yumi no brukim lo bilong God bilong lukautim laip bilong yumi long nau, na bihain bai yumi no inap kisim laip oltaim!—Matyu 16:25.
19 Taim yumi tingim gut laip na blut, dispela i givim hevi long yumi? Nogat tru! Tingim dispela samting. Em i wanpela hevi sapos yumi no kisim sik kensa long wetlewa, long wanem, yumi no save smok? Em i wanpela hevi sapos tingting na bodi bilong yumi i no kalabus long drak nogut? Em i wanpela hevi sapos yumi no kisim sik AIDS, o hepataitis, o narapela sik ol man i kisim long rot bilong blut? Yumi abrusim ol dispela kain pasin, na tru tumas, dispela i lukautim yumi gut tru.—Aisaia 48:17.
20 Skelim samting i bin kamap sampela yia i go pinis. Wanpela meri Witnes i gat bel inap tripela mun na hap. Wanpela nait em i lusim planti blut na ol i bringim em hariap long haus sik. Dokta i skelim em pinis na meri i harim dokta i tokim wanpela nes olsem ol i mas rausim pikinini long bel bilong em. Meri Witnes i save long tingting bilong Jehova long pikinini i stap yet long bel na em i no laik tru long ol i rausim pikinini long bel. Em i tokim dokta: “Sapos em i stap laip, no ken rausim!” Sampela taim em i lusim blut gen, tasol sampela mun bihain—maski i no taim yet bilong karim—em i karim wanpela pikinini man i no gat sik, na nau dispela manki i gat 17 krismas. Em i tok: “Mipela i bin stori long ol dispela samting long pikinini bilong mipela, na em i tok, em i amamas mipela i no bin larim ol i rausim em. Em i save em i stap laip tasol, long wanem, mipela i mekim wok bilong Jehova.” Tru tumas, kisim wankain tingting long laip olsem God em i no bin givim hevi long dispela famili!
Wok Wantaim Lain Bilong Jehova
21 Yumi no stap wanpis taim yumi senisim pasin bilong yumi bambai em i stret wantaim ol lo bilong God. Jehova i gat wanpela lain hia long graun, na em i laik yumi mas bung wantaim ol taim yumi mekim wok bilong em. Olsem na nau yumi ken stori long namba 4 samting God i laik yumi mas mekim. Yumi mas mekim wok bilong Jehova wantaim oganaisesen bilong em, em spirit bilong em i save bosim.
22 Tasol olsem wanem yumi ken save husat ol i lain bilong God? Olsem ol lo i stap long Baibel i makim, pasin sori tru i stap namel long ol, na ol i save daun tru long tok bilong Baibel, na ol i litimapim nem bilong God, na ol i autim tok long Kingdom bilong em, na ol i no insait long pasin nogut bilong dispela graun. (Matyu 6:9; 24:14; Jon 13:34, 35; 17:16, 17) I gat wanpela lotu tasol long dispela graun em inapim olgeta dispela mak bilong ol trupela Kristen—em ol Witnes Bilong Jehova!
23 Olsem wanem? Sapos yumi mekim wok bilong God wantaim lain bilong em, dispela i givim hevi long yumi? Nogat tru! Ol brata sista bilong yumi long olgeta hap ol i sori long yumi na helpim yumi—em wanpela gutpela samting tru! (1 Pita 2:17) Tingim wanpela samting olsem: Wanpela sip i kisim bagarap na i go daun. Yu stap insait long wara na yu hatwok tru long trip antap. Taim yu pilim olsem yu no gat strong moa wanpela man i pulim yu i kam antap long wanpela bot. Gutpela tru, sampela moa i bin abrusim bagarap! Taim yu stap long bot, yu na ol narapela i senis senis bilong pul i go long nambis, na taim yupela i pul i go yupela i painim sampela man moa na yupela i kisim ol tu.
24 Kain samting olsem i painim yumi! Ol i bin helpim yumi long lusim “wara” i laik bagarapim yumi—em dispela graun i gat pasin nogut long en, na yumi go insait long “bot” olsem oganaisesen bilong Jehova long graun. Insait long en yumi wok gut wantaim bilong i go long “nambis” bilong nupela taim. Sapos ol hevi bilong nau i mekim na yumi les long i go yet, yumi amamas, long wanem, ol trupela pren Kristen i strongim na helpim yumi!—Sindaun 17:17.
25 Tasol olsem wanem long ol narapela—em ol man i gat gutpela bel, tasol ol i stap yet long “wara”? Yumi gat wok long helpim ol long kam insait long oganaisesen bilong Jehova, a? (1 Timoti 2:3, 4) Yumi mas helpim ol long kisim save long ol samting God i laik yumi mas mekim. Olsem na yumi ken stori long namba 5 samting God i laik yumi mas mekim. Yumi mas stap gut long wok bilong autim tok bilong Kingdom bilong God. Long stori i kamap bihain long dispela yumi ken stori long ol samting yumi mas mekim bilong insait long dispela wok.
Yu Inap Tingim?
◻ Bilong wanem ol lo bilong God i no givim hevi long yumi?
◻ Olsem wanem yumi ken kisim save long God?
◻ Bilong wanem em i no wanpela hevi long mekim pasin i stret long ai bilong God na bihainim tok i tru bilong em?
◻ Yumi save long tingting bilong God long laip na blut, olsem na yumi mas mekim wanem?
◻ God i laik yumi mas wok wantaim husat taim yumi mekim wok bilong em, na olsem wanem yumi ken save long ol?
[Askim Bilong Stadi]
1, 2. God i makim ol samting ol man i mas mekim sapos ol i laik lotu long em long pasin em i laikim. Bilong wanem yumi no ken kirap nogut long dispela samting?
3. Taim Solomon i pinisim tok bilong em, em i tok God i laik yumi mas mekim wanem?
4-6. (a) Tok Grik ol i tanim olsem “hevi” em i makim wanem samting? (b) Bilong wanem yumi ken tok olsem ol lo bilong God i no givim hevi long yumi?
7. Yumi mas mekim wanem samting bilong kisim laip oltaim?
8. Wanem insait bilong dispela tok kisim “save” long God?
9. “Buk bilong ol samting God i bin wokim,” em i lainim yumi long wanem ol samting bilong Jehova?
10, 11. (a) Yumi no inap kisim save long wanem ol samting bilong Jehova na long laik bilong em long “buk bilong ol samting God i bin wokim”? (b) Bekim bilong wanem ol askim yumi inap painim long Baibel tasol?
12. Bilong wanem em i no wanpela hevi long kisim save long God na long laik bilong em? Stori long dispela.
13, 14. (a) Taim yumi kisim save long God yumi mas kisim wanem pasin? (b) God i laik yumi mas lusim wanem ol pasin i no klin?
15. Ol samting yumi mekim long ol narapela na ol samting yumi bilip long en, olsem wanem dispela i insait long ol samting God i laik yumi mas mekim?
16. Bilong wanem em i no wanpela hevi long mekim pasin i stret long ai bilong God na bihainim tok i tru bilong em? Stori long dispela.
17. Jehova i gat wanem tingting long laip na blut?
18. Yumi save long tingting bilong Jehova long laip na blut, olsem na yumi mas mekim wanem?
19. Taim yumi tingim gut laip na blut, dispela i helpim yumi olsem wanem? Stori long dispela.
20. Wanpela famili i bihainim tingting bilong God long laip na dispela i bin helpim ol olsem wanem?
21, 22. (a) Jehova i laik yumi mas wok wantaim husat taim yumi mekim wok bilong em? (b) Olsem wanem yumi ken save husat i lain bilong God?
23, 24. Yumi ken mekim wanem tok piksa bilong makim olsem em i no wanpela hevi long mekim wok bilong Jehova wantaim lain bilong em?
25. (a) Yumi mas mekim wanem long ol narapela man i stap yet long “wara” bilong dispela graun nogut? (b) Long stori i kamap bihain long dispela bai yumi stori long wanem samting God i laik yumi mas mekim?
[Ol Piksa long pes 18]
Yumi kisim save long Jehova long “buk bilong ol samting God i bin wokim” na long Baibel
[Ol Kredit Lain]
Pukpuk: Kisim long Australian International Public Relations; bea: Safari-Zoo bilong Ramat-Gan, Tel Aviv