Askim

Sampela ripot long ol nius i tok, long sampela haus sik, taim meri i karim pinis pikinini ol i no save tromoi bilum na rop bilong pikinini—ol i save putim i stap bilong kisim sampela samting long blut i stap long en. Olsem wanem? Ol Kristen i mas tingim dispela samting?

Long planti haus sik ol i no save mekim dispela kain pasin, olsem na ol Kristen i no ken tingting planti long en. Sapos i gat as na Kristen i ting ol i save mekim pasin olsem long haus sik em bai karim pikinini long en, orait i stret sapos em i ken tokim dokta, taim em i karim pinis, dokta i mas tromoi bilum na rop bilong pikinini, na em i no ken mekim wanpela wok long en.

Ol dokta i bin kisim kain kain marasin long bodi bilong sampela animal o man. Olsem: Ol i bin kisim marasin homon long pispis bilong ol hos meri i gat bel. Ol i bin kisim wanpela marasin long blut bilong ol hos bilong pasim sik tetanus, na inap longtaim pinis ol i bin kisim marasin gama globulin long blut i stap long bilum bilong pikinini taim mama i karim pinis. Sampela haus sik ol i bin kisim ol dispela bilum na putim long frisa na bihain ol lain bilong wokim marasin ol i kam kisim. Blut i stap long dispela bilum i gat marasin bilong sakim sampela sik, na ol i kamautim dispela blut bilong kisim gama globulin long en.

Long nau sampela saveman i tok ol i bin mekim wok long blut i stap long bilum bilong pikinini bilong stretim wanpela kain sik lukimia, na dispela wok i kamap gutpela; na ol i ting dispela kain blut i gutpela bilong stretim sampela kain sik moa, o ol inap mekim wok long en olsem senis bilong gris bilong bun ol i save kisim na putim insait long skin bilong narapela man. Olsem na sampela tok i kamap long sampela papamama i laik bai ol dokta i kisim blut bilong bilum taim mama i karim pikinini pinis na putim i stap long frisa, na bihain sapos pikinini i gat wanpela sik na em i mas kisim dispela samting bilong oraitim em, ol inap givim long em.

Dispela pasin bilong wokim bisnis long blut i stap long bilum bilong pikinini, ol Kristen tru i save surik long en, long wanem, ol i larim lo bilong God i stiaim tingting bilong ol, em lo i stret olgeta. Man bilong wokim yumi em i tingim blut em samting i holi, na em i olsem laip God i bin givim long ol man. I gat wanpela wok tasol God i tok long mekim long blut​—⁠em bilong putim long alta long taim bilong mekim ofa long ol animal. (Wok Pris 17:​10-​12; skelim wantaim Rom 3:​25; 5:8; Efesus 1:⁠7.) Sapos ol i no gat wok long mekim olsem, orait taim ol i rausim blut long wanpela animal samting, ol i mas kapsaitim long graun, olsem tromoi olgeta.​—⁠Wok Pris 17:13; Lo 12:​15, 16.

Taim ol Kristen i raunim abus long bus o ol i kilim wanpela kakaruk o pik, ol i save rausim blut bilong en na tromoi. Tasol i no olsem ol i mas kapsaitim stret long graun​—⁠bikpela samting em ol i save tromoi dispela blut na i no mekim wanpela wok long en.

Ol Kristen i slip long haus sik ol i ting olsem ol samting dokta i rausim long bodi bilong ol, em i save tromoi, maski ol dispela samting i pekpek, o pispis, o hap skin i gat sik, o blut. Tru, sampela taim dokta i laik glasim gut ol dispela samting pastaim, olsem glasim pispis, o hap skin i gat sik, nogut em i gat kensa long en, o em i laik glasim blut. Tasol taim ol dispela wok i pinis, dokta i save tromoi ol dispela samting na em i mekim long pasin em lo bilong dispela ples i makim. Sikman i no gat wok long tokim dokta long tromoi ol dispela samting, long wanem, em i stret na em i pasin bilong gutpela tingting long rausim ol samting ol i kisim long bodi bilong man. Sapos i gat as na sikman i ting ol i no gat tingting long tromoi ol dispela samting, em i ken kamapim long dokta, na em i ken tokim dokta olsem em i tingim bilip bilong em na long dispela as em i laik bai dokta i tromoi ol dispela samting.

Tasol olsem yumi tok pinis, klostu olgeta sikman i no gat wok long tingim tumas dispela samting, long wanem, long planti hap ol haus sik i no gat tingting long kisim bilum na rop bilong pikinini o ol narapela samting olsem na putim i stap na mekim wok long en bihain, na ol i no save mekim tu olsem wanpela hap wok bilong ol.

Stori i kamap long “Wastaua” bilong Janueri 1, 1997, “Yumi Mas Nolaik Tru Long Pasin Nogut,” i olsem em i mekim bikpela tok long ol man i mekim pasin sem long ol pikinini. Em i makim wanem kain pasin?

Wanpela buk dikseneri (Webster’s Ninth New Collegiate Dictionary) i tok, em i ‘narapela kain pasin pamuk, em ol i laik mekim long ol pikinini tasol.’ Lo 23:​17, 18 (NW) i tambuim ol kain pasin olsem. Long dispela skripsa, God i tok ol i no ken kamap pamukman bilong haus lotu (‘o, wanpela manki ol i putim long haus lotu bilong ol man i ken mekim narapela kain pasin pamuk long em,’ lukim sta daunbilo). Na ol dispela ves i tambuim man long bringim pe bilong “wanpela dok” i kam insait long “haus bilong Jehova” (“dok” em i ‘makim man i save mekim narapela kain maritpasin, olsem putim sem bilong em long as bilong narapela, na em i laik moa long mekim long ol manki,’ lukim sta daunbilo). Ol dispela tok bilong Baibel na ol buk bilong graun i kamapim klia olsem dispela Wastaua i toktok long man i bikpela pinis em i mekim pasin sem long ol pikinini, olsem mekim maritpasin long em o pilai long sem bilong em.