Sapta 20
Laip na Blut—Yu Tingim Em i Samting Holi?
TINGTING bilong God long laip i narapela kain long tingting bilong ol man bilong dispela graun. Yumi no ken kirap nogut long dispela samting. Long ai bilong God laip bilong man i samting holi. Yu gat wankain tingting? “Em yet i save givim laip na win na olgeta samting long olgeta man.” (Ap. 17:25-28; Sam 36:9) Sapos yumi gat wankain tingting olsem bilong God, bai yumi lukautim gut laip bilong yumi. Tasol bai yumi no kalapim lo bilong God bambai yumi ken lukautim laip bilong yumi long nau. Yumi tingim tru tok promis bilong God, em i tok em bai givim laip i stap oltaim long ol manmeri i bilip tru long Pikinini bilong em.—Mt. 16:25, 26; Jon 6:40; Jut 21.
2 Tasol Jisas i tok, Seten, em bos bilong dispela graun, long “bipo yet em i man bilong kilim man i dai.” (Jon 8:44; 12:31) Seten i kirap mekim pasin bikhet na long dispela rot i dai i painim ol man. Ol manmeri bilong dispela graun i bihainim pasin bilong em na ol i mekim pait na kilim man i dai. Tasol Seten inap giaman olsem em i tingim gut laip bilong man. Olsem na ol man i bihainim tingting bilong em ol i save tok: Yumi ken lotu long God, tasol taim laip bilong yumi i laik lus, yumi mas bihainim tok bilong ol, long wanem ol i gat “save,” na yumi no ken kolim ol tok bilong Baibel. (Lukim 2 Korin 11:14, 15.) Sapos wanpela bagarap i painim yu na yu ting nau bai yu dai, orait bel bilong yu bai kirapim yu long mekim wanem? Yumi laik mekim pasin i stret long ai bilong Jehova, a?
3 Baibel i stori long laip na blut na i bungim tupela wantaim na i tok: “Laip bilong skin em i stap long blut.” Laip em i samting holi na olsem tasol God i tok blut tu em i samting holi. Blut em i bilong God na yumi mas mekim wok long en long pasin God i orait long en tasol. (Lev. 17:3, 4, 11, NW; Diu. 12:23) Olsem na yumi mas skelim gut ol samting God i tok yumi mas mekim long blut.
Kaunim Jenesis 9:3-6
I gat wanem ol pasin long hap bilong yu na yu mas was gut, nogut yu kaikai blut bilong animal?
Lukim tok bilong Ge 9 ves 4 long blut bilong animal na yu ting olsem wanem long dring blut bilong man olsem ol Rom i bin mekim bipo taim ol i pait long bainat samting, olsem pilai spot, na ol i kilim man i dai.
Man i kilim i dai narapela man, em i gat kot long ai bilong husat tru, olsem Ge 9 ves 5 na 6 i tok?
Kaunim Aposel 15:28, 29
Dispela tok i makim olsem lo bilong blut i bilong i stap liklik taim tasol na i pinis o olsem wanem? Yumi aninit long dispela lo?
Taim yu skelim dispela tok, yu ting em i tok long blut bilong animal tasol na i no tok long blut bilong man?
Tok bilong ol dispela ves i makim olsem sapos hevi i kamap, yumi ken kalapim dispela lo o olsem wanem?
4 Tru yumi no kilim man i dai, tasol i no dispela samting tasol yumi mas abrusim na bai yumi no gat asua long blut. Baibel i tok, sapos yumi insait long wanpela lain o oganaisesen i gat asua long blut long ai bilong God, orait yumi mas lusim olgeta. Sapos nogat, bai yumi tu i gat asua; yumi poroman wantaim ol long sin bilong ol. (Re. 18:4, 24; Mai. 4:3) Yumi mas lusim ol hariap.
5 God i bin givim wok long ol wokboi bilong em bilong toksave long ol man long bikpela bagarap bai kamap long taim bilong bikpela hevi tru. Orait, sapos ol i no stap gut long dispela wok bilong ol, bai ol i gat asua long blut. (Lukim Esikiel 3:17-21.) God i givim wok long Pol bilong autim tok na Pol i pilim olsem em i gat dinau long helpim olgeta kain man bambai ol i no ken bagarap. Taim em i autim tok pinis long ol samting God i mekim bilong kisim bek ol, nau em i pilim olsem sapos ol i lus i no asua bilong em. (Rom 1:14, 15; Ap. 18:5, 6; 20:26, 27) Yu tu yu save wok strong long autim tok, long wanem yu pilim tru dispela bikpela wok olgeta Witnes Bilong Jehova i mas mekim?
6 Na yumi mas was gut, nogut samting yumi mekim i bagarapim narapela man na em i dai. Long Lo bilong Moses, sapos man i popaia na kilim i dai narapela man, orait em i gat asua. Na em i mas kisim strafe. (Eks. 21:29, 30; Diu. 22:8; Nam. 35:22-25) Sapos yumi pilim tru as bilong dispela Lo bai yumi was gut taim yumi holim stia bilong ka, nogut yumi kilim man i dai. Na bai yumi no mekim nabaut o mekim pasin longlong, na yumi no larim samting i stap long haus o long ples wok em inap bagarapim man. Olsem wanem? Tingting bilong yu long ol dispela samting i kamapim ples klia olsem yu tingim laip bilong man i samting holi?
Olsem Wanem Long Wok Ol Dokta i Mekim Long Blut?
7 Bipo ol dokta i mekim wok long blut, tasol nau long taim bilong yumi ol i mekim bikpela wok long blut, na ol i tok em bilong helpim man long i stap laip. Ol i save givim blut o sampela hap bilong blut long ol sikman. Tasol taim ol i givim blut long sikman i no olsem dispela sikman i no ken i dai. Nogat. Sampela taim ol dokta i givim blut long man na man i dai. Tasol bikpela samting em olsem: Lo bilong Baibel i tok yumi mas ‘klia long blut.’ Orait olsem wanem? Dispela lo i tambuim tu dispela pasin bilong ol dokta long givim blut? Yes, em i tambuim! Sapos yumi putim blut bilong man o animal i go insait long skin bilong yumi, yumi kalapim lo bilong God. Yumi no tingim blut i samting holi. (Ap. 15:19, 20) Yumi no ken tok, dispela lo i tambuim tasol ol wok ol i mekim long blut long taim bilong ol aposel, na i no tambuim ol wok ol dokta i mekim long blut long nau. Nogat. Tingim lo bilong Baibel i tambuim yumi long kilim man i dai. Yumi no ken tok Baibel i tambuim tasol ol pasin ol i save mekim long taim bilong ol aposel long kilim man i dai, na sapos wanpela man long nau i holim gan na kilim i dai narapela man, em i no gat asua long wanem bipo ol i no gat gan olsem long nau. Yumi no ken tok olsem, a? Na yumi no ken tok, lo bilong Baibel i tambuim pasin bilong dring planti tumas, dispela lo i tambuim tasol wain samting bilong bipo na i no tambuim ol strongpela dring bilong nau. Olsem na ol manmeri i laik tru long mekim pasin God i laikim, ol i save tru long ol samting ol i mas mekim bilong bihainim dispela lo i tok yumi mas ‘klia long blut.’
8 Tasol ol dokta i save mekim kain kain pasin na ating yumi gat askim long sampela pasin ol i mekim. Orait yumi ken mekim wanem? Gutpela sapos yu tokim dokta long stori gut pastaim long ol samting em i laik mekim long yu. Na bihain yu ken beten na skelim gut dispela samting, i stret wantaim lo bilong Baibel o nogat. Olsem: Ating bai dokta i tok ol i laik kisim sampela blut bilong yu yet na putim i stap na bai ol i ken mekim wok long en taim ol i katim yu. Bai yu orait long dispela? Tasol lo God i givim long rot bilong Moses i tok, taim ol i kilim abus, ol i mas kapsaitim blut bilong en long graun. (Diu. 12:24) Tru yumi no aninit moa long Lo bilong Moses, tasol as bilong dispela tok bilong Lo i olsem blut em i samting holi na taim yumi rausim blut long wanpela abus, yumi mas kapsaitim long graun, olsem yumi bekim long God, long wanem graun em i olsem liklik sia bilong God i putim lek long en. (Skelim Matyu 5:34, 35.) Olsem na i no stret yumi kisim sampela blut bilong yumi na putim i stap (maski em bilong liklik taim tasol) na bihain yumi putim i go bek gen long skin bilong yumi, a? Tasol olsem wanem sapos dokta i tok, taim ol i katim yu bai blut bilong yu i ran i go insait long wanpela masin na i kam bek gen insait long skin bilong yu? Bai yu orait long dispela? Sampela i pilim olsem sapos ol dokta i putim wanpela kain wara long dispela masin bilong kirapim dispela wok, na ol i no putim blut, orait i no gat rong long dispela, na bel bilong ol i no gat tok long en. Ol i pilim olsem masin i kamap hap rot bilong blut tasol na i no gat rong. Tasol ol dokta i save mekim kain kain pasin, olsem na yu yet yu mas tingim wanem samting i stret yu mas mekim. Em samting bilong yumi wan wan. Tasol yumi mas mekim ol samting bambai bel bilong yumi i stap stret long ai bilong God.—1 Pi. 3:16; 1 Ti. 1:19.
9 Yu tingting pinis na yu laik ‘klia long blut,’ orait taim yu go nupela long hausik, yu mas toktok gut wantaim dokta long dispela tingting bilong yu. Sapos yu mas slip long hausik, orait raitim ol tok long pepa na tokim ol yu no laik kisim blut, na toktok long maus tu wantaim dokta long dispela samting. Tasol olsem wanem sapos wantu hevi i kamap? Yu ken toktok isi wantaim dokta na tokim em long mekim wok long save bilong em bilong helpim yu na tingim bilip Kristen bilong yu, bambai em i no ken mekim wanpela samting bel bilong yu i gat tok long en. Sapos yu mekim olsem, ating bai i no gat bikpela kros o tok pait. (Pro. 15:1; 16:21, 23) Tasol sapos ol dokta o nes i tingting long helpim yu na ol i strong long tokim yu, sapos yu no kisim blut bai yu dai, na ol i laik subim yu long kisim, orait yu ken mekim wanem? Yumi bilip olsem pasin bilong Jehova i stret, olsem na bai yumi sanap strong. Yumi laik i stap gut long Jehova, olsem na bai yumi sakim ol na holimpas bilip bilong yumi. Yumi laik bihainim tok bilong God; tok bilong ol man i nambatu tasol.—Ap. 5:29; lukim tu Jop 2:4; Pro. 27:11.
Em Bikpela Samting o Nogat?
10 Ol man i no save yet long Jehova, ating bai ol i mekim sampela tok bilong helpim pasin bilong kisim blut na i olsem ol i tingim laip i samting holi. Tasol yumi save, planti man i mekim kain tok olsem, ol i orait long meri i rausim bel na bagarapim laip bilong pikinini i stap long bel. Jehova i save moa yet long ol samting bilong laip na blut, i winim tru save bilong ol dokta. Olgeta lo na tambu bilong Jehova i save helpim yumi na lukautim laip bilong yumi bilong nau na bilong bihain tu. (Ais. 48:17; 1 Ti. 4:8) Orait, dispela lo i tok yumi mas ‘klia long blut,’ yu ting em i no helpim yumi?
11 Blut em i holi na yumi mas tingim gut dispela samting, olsem na Jehova i kolim wanpela wok tasol bilong blut. Em i tok: “Laip bilong skin em i stap long blut, na mi putim long alta bilong tekewe rong bilong yupela, long wanem, blut i gat laip i stap long en na em inap tekewe rong. Olsem na mi bin tokim ol Isrel olsem: ‘Yupela i no ken kaikai blut.’ ” (Lev. 17:11, 12, NW) Olgeta blut bilong animal ol i kapsaitim long ai bilong alta bilong Jehova i makim gutpela blut bilong Krais Jisas. (Hi. 9:11, 12; 1 Pi. 1:18, 19) Olsem na dispela lo bilong God i tambuim ol long mekim narapela wok long blut, dispela i kamapim ples klia olsem blut bilong Jisas i holi. Sapos yumi mekim narapela wok long blut i olsem yumi sakim tru ol samting Jehova i bin mekim bilong kisim bek yumi long rot bilong Pikinini bilong em.
12 Sapos wanpela bagarap i painim man na em i ting nau bai em i dai na em i givim baksait long lo bilong God long blut, dispela man i sot tru long gutpela tingting! Yumi pilim tru gutpela wok ol dokta i mekim, tasol yumi no laik sakim lo bilong God bambai yumi yet o wanpela famili bilong yumi i ken i stap laip inap sampela de o yia moa. Nogat tru. Yumi no ken ting laip bilong yumi long nau, dispela tasol i bikpela samting. Bikpela samting em olsem: Sapos yumi bilip long blut bilong Jisas, em i bin kapsaitim bilong helpim yumi, bai yumi inap kisim laip i stap oltaim oltaim. Yumi bilip tru olsem: Ol gutpela wokboi bilong God—maski ol i dai—bai ol i kisim gutpela pe, em laip i stap oltaim.—Jon 11:25; 1 Ti. 4:10.
STORI GEN LONG OL DISPELA TOK
● Wanem samting i mekim laip na blut i samting holi? Bilong wanem ol manmeri bilong dispela graun ol i gat narapela tingting long dispela samting?
● Yumi mas mekim wanem na bai yumi tingim blut bilong ol animal i samting holi?
● Yumi olgeta yumi mas mekim wanem ol samting bilong kamapim ples klia tingting bilong yumi, yumi tingim blut bilong man i samting holi? Em bikpela samting long yumi mas mekim olsem o nogat?
[Askim Bilong Stadi]
1. (a) God i ting olsem wanem long laip? (b) Yumi mas mekim wanem na bai yumi tenkyu long God long laip em i givim long yumi?
2. Ol manmeri bilong dispela graun ol i bihainim tingting bilong husat long laip? Na sampela taim dispela i kirapim ol long ting olsem wanem?
3. (a) Bilong wanem yumi mas tingim tru ol tok bilong Baibel long blut? (b) Kaunim Jenesis 9:3-6 na Aposel 15:28, 29 na bihain bekim ol askim hia.
4. Olsem yumi stori long dispela paragraf, Baibel i tok man i mas mekim wanem bambai em i no gat asua long blut?
5. Sapos yumi wok strong long autim tok, olsem wanem dispela i helpim yumi bambai yumi no gat asua long blut?
6. Sapos yumi was gut bambai yumi no mekim wanpela samting i bagarapim man, olsem wanem dispela i makim yumi i tingim gut laip bilong man?
7. (a) Sapos ol i putim hap blut bilong man i go insait long skin bilong narapela man, yu ting ol i tingim blut i samting holi? (b) Olsem wanem na i no stret yumi tok ol pasin planti man i mekim long blut long taim bilong ol aposel, dispela tasol i tambu?
8. (a) Olsem wanem yu inap save wanpela samting ol dokta i laik mekim long yu i orait long Kristen o nogat? (b) Sapos dokta i laik kisim sampela blut bilong yu na putim i stap bilong mekim wok long en taim em i katim yu, i gat wanem ol tok bilong Baibel inap helpim yu long tingim gut dispela samting? (c) Man inap ting olsem wanem sapos dokta i laik mekim wok long masin na bai blut i ran i go insait long masin na i kam bek gen insait long skin?
9. (a) Yu mas mekim wanem bambai ol dokta i ken tingim gut laik bilong yu long ‘klia long blut’? (b) Sapos wantu hevi i kamap, yu ken mekim wanem na bai i no gat bikpela kros o tok pait? (c) Sapos dokta o kot i laik subim yu long kisim blut, bai yu mekim wanem?
10. Maski ol i tok yumi mas kisim blut bambai yumi no ken i dai, tasol bilong wanem dispela i no inap senisim tingting bilong yumi?
11. (a) Jehova i orait long ol Isrel i mekim wanem wok tasol long blut? (b) Bilong wanem dispela i bikpela samting long yumi ol Kristen?
12. Sapos i dai i laik painim Kristen tru, bilong wanem em i no ken mekim nabaut long blut bilong helpim em long i stap laip?