Helpim Ol Kalabus Long Kamap Fri Long Samting Bilong Spirit

“MIPELA i bin wetim yupela.” “Inap sampela nait pinis, mi bin driman olsem yupela bai kam.” “Tenkyu tru long makim wanpela man i kam lukim mipela long olgeta taim.” “Mipela laik tok tenkyu long olgeta wan wan blesing em mipela i save kisim long marimari bilong Jehova na long oganaisesen bilong em, na long ol kaikai bilong spirit em mipela bin kisim long taim stret bilong en.”

I gat wanem as na ol i tok tenkyu olsem? Ol dispela tok tenkyu i bilong ol man i stap long ol narapela narapela kalabus long Meksiko. Ol i amamas tru long ol wok ol Witnes Bilong Jehova i save mekim bilong helpim ol, em dispela wok i bin helpim ol long kamap fri long ol samting bilong spirit maski ol i stap yet long kalabus. Long Meksiko i gat 42 kalabus ol Witnes Bilong Jehova i save go long en bilong helpim ol kalabusman long ol samting bilong spirit ol i sot long en. Ol i kolim ol dispela ples olsem Centro Readaptación Social (Senta Bilong Stretim Pasin Bilong Man). Long sampela kalabus olsem, ol i save mekim ol miting Kristen tu, na ol gutpela samting i kamap long dispela. Olsem: Long wanpela taim, inap 380 man i bin kam long ol miting long ol dispela ples. Long dispela taim ol Witnes i bin mekim 350 Baibel-stadi. Inap 37 ol inapim mak bilong mekim wok autim tok, na 32 i dediketim pinis laip bilong ol long Jehova na kisim baptais long wara bilong makim dispela samting.

Rot Bilong Mekim Dispela Wok

Ol Witnes Bilong Jehova i mekim wok autim tok bilong ol long ol dispela ples olsem wanem? Pastaim ol i go lukim ol bikman bilong kalabus na askim ol long wokim pepa i tok orait long ol i ken go insait long kalabus, na ol i tokim ol long as na ol i laik lukim ol kalabusman​—⁠em bilong lainim ol kalabusman long pasin bilong kamap gutpela man moa na long mekim wok bilong God long rot God yet em i laikim.

Ol dispela bikman i bin orait long ol i mekim olsem. Ol i pilim tru dispela wok ol Witnes Bilong Jehova i save mekim bilong skulim ol kalabusman long ol tok bilong Baibel. Ol i lukim pinis olsem ol Witnes Bilong Jehova i save bihainim ol lo bilong kalabus. Ol i bin larim ol Witnes long mekim wok long ol ofis na rum kaikai na woksop, long mekim ol miting bilong ol. Long wanpela kalabus ol i larim ol Witnes long wokim wanpela liklik Haus Kingdom, na wanpela wasman bilong raun long saut-is Meksiko em i stori long dispela long ekspiriens i kamap bihain.

“Long 1991 mipela i kirap long go lukim ol man long kalabus long Tewantepek, Wahaka, na mipela i kisim save olsem ol kalabusman ol i hangre tru long kisim ol samting bilong spirit. I no longtaim na mipela i kirapim 27 Baibel-stadi. Planti kalabusman i gat bikpela laik long harim tok, olsem na mipela i stretim rot bilong mekim 5-pela miting bilong kongrigesen. Wanpela kalabusman, em i bin kamapim klia olsem em i laikim tru Jehova, em i gat tingting long wokim wanpela liklik Haus Kingdom insait long banis bilong kalabus bambai mipela i gat ples bilong mekim ol miting. Em i go long dairekta bilong kalabus bilong kisim tok orait, na ol bikman bilong kalabus ol i helpim gut mipela. Long kirap bilong Disemba 1992, sikspela kalabusman i winim mak pinis long kamap pablisa bilong gutnius. Planti ol i wok long kamap strong, olsem na mipela i stretim rot bilong mekim Memorial insait long kalabus. Mipela i askim dairekta long em i ken orait long bret na wain bilong mekim Memorial i ken kam insait long kalabus. Taim mipela i toktok wantaim em inap 4-pela aua pinis, em i orait long dispela samting.

“Long Epril 3, 1993 (3-pela de paslain long Memorial), ol i lusim sampela kalabusman i go. Wanpela bilong ol em wanpela pablisa, na taim em i kisim pepa bilong larim em i lusim kalabus, em i tokim dairekta bilong kalabus olsem em i laik i stap long kalabus i go inap long taim ol i mekim pinis Memorial. Dairekta i kirap nogut long dispela askim, long wanem, i no planti man i kamapim kain askim olsem. Tasol em i save olsem dispela kalabusman i gat bikpela laik long i go long Memorial hia long kalabus, olsem na em i orait long dispela. Inap 53 i kam long Memorial, na long pinis bilong en, aiwara bilong amamas i pundaun long pes bilong ol. Mipela i wanbel long kolim dispela grup olsem ‘Sereso Fri,’ long wanem, ol i stap fri long ol samting bilong spirit.”

Ol man long ol dispela ples ol i pilim tru dispela wok em ol Witnes Bilong Jehova i save mekim. Long wanpela kalabus olsem, bos bilong en i save tokaut olsem ol miting bilong ol Witnes Bilong Jehova em i wanpela gutpela samting tru bilong helpim ol kalabusman long stretim kwik pasin bilong ol.

Ol i Stretim Gut Pasin Bilong Ol

Wok bilong ol Witnes Bilong Jehova i bin helpim planti kalabusman long stretim tru pasin bilong ol. Tru, planti man i kamap raskol gen taim ol i lusim kalabus, tasol ol man i kisim tru ol tok bilong God, ol i no save mekim olsem. Dispela i kirapim yumi long tingim tok bilong aposel Pol, em i tok: “Ol man i save mekim pasin pamuk, . . . na ol stilman, na ol man i save mangal long ol samting bilong ol arapela man, na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God. Na bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.”​—1 Korin 6:​9-​11.

Taim ol i kamapim tingting i stap long bel bilong ol, dispela i kamapim klia olsem ol i bin senisim tru pasin bilong ol. Miguel, em i stap long kalabus Kampeke long biktaun Kampeke, em i tok: “Nau mi amamas long tokaut olsem mi wanpela bilong ol narapela sipsip i save wetim dispela gutpela samting 2 Pita 3:​13 na Matyu 5:⁠5 i stori long en.” José, em i stap long kalabus long Koben, Kampeke, em i tok: “Tru, mi wanpela kalabusman na mi bin mekim bikpela rong, tasol mi save olsem Jehova em i God bilong marimari na em i save harim ol beten na ol singaut bilong mi. Em inap lusim ol rong bilong mi na givim rot long mi long autim gutnius bilong Kingdom bilong God long olgeta de mi stap laip. Mipela i tenkyu long ol elda ol i save lusim bikpela hap taim long kam lukim mipela long kalabus bambai mipela inap kisim ol gutpela samting bilong Kingdom em God i bin tok promis long en. Em ol gutpela blesing tru! Olsem wanem? Mi ken tok mi wanpela kalabusman? Nogat, long wanem, Jehova i bin helpim mi long kamap fri long ol samting bilong spirit.”

Ol kilman, ol man bilong reipim meri, ol man bilong kirapim paia na kukim haus samting, ol stilman, na sampela narapela, wanem samting i mekim na ol i lusim olpela pasin bilong ol na ol i kirap bihainim stretpela pasin Kristen? Ol dispela man i tok, samting i helpim ol long mekim olsem, em strong bilong Tok Bilong God na ol gutpela poroman em ol i strongpela Kristen. Ol samting i bin painim Tiburcio, em i stap long kalabus long Masatlan, Sinaloa, i kamapim klia olsem dispela wok bilong helpim ol kalabusman i bin kamapim gutpela samting. Taim em i stap long kalabus long Konkodia, Sinaloa, sampela hevi i painim em, long wanem, em i man bilong belhat. Meri bilong em i wanpela Witnes Bilong Jehova, na Tiburcio i bin mekim nogut tru long em, na long taim em i kam lukim em long kalabus tu. Tasol meri i no les kwik na em i wok yet long kam lukim em, olsem na Tiburcio i tokim em long bringim buk Yu Inap i Stap Oltaim Long Paradais Long Graun i kam, na em yet i kirap long stadim.a Bihain em i tok em i laik bai wanpela man i kam long kalabus na stadi wantaim em. Em i wok long kamap strong long ol samting bilong spirit, na em i wok long stap isi wantaim ol narapela. Bihain ol i putim em long kalabus long Masatlan na long dispela kalabus i gat wanpela grup i stadi long Baibel, na nau em i wanpela pablisa. Em i tok: “Mi tenkyu tru olsem nau long dispela ples, mi wantaim meri pikinini na ol wankalabus bilong mi, mipela inap harim ol tok i tru bilong Baibel, na mi wetim liklik taim na mi bai lusim kalabus na mi inap go long olgeta kibung na miting bilong kongrigesen.”

Na Conrado tu i bin senisim i stap bilong em, na em i tenkyu tru long em inap mekim olsem. Pastaim em i gat planti hevi insait long marit bilong em, olsem na meri bilong em i lusim em. Bilong daunim bel hevi bilong em, em i kirap na mekim wok long ol drak. Bihain moa em i maketim ol drak. Polis i holim em na kot i putim em long kalabus, long wanem, em i bin kisim drak mariwana na koken na salim i go long wanpela hap. Long kalabus i gat wanpela grup i stadi wantaim ol Witnes Bilong Jehova long Baibel, na ol i singautim em long kam stadi wantaim ol. Em i kamapim bel bilong em olsem: “Mi pilim pasin bilong ol long mekim gut ol miting, na pasin bilong ol long skelim ol hap bilong Baibel long rot bilong ol buk samting, na as bilong olgeta samting ol i lainim, em Baibel. Orait kwiktaim mi tokim ol mi laik stadi long Baibel, na mi kirap long go long ol miting.” Dispela samting i bin kamap long Janueri 1993. Nau Conrado i no stap moa long kalabus na em i wok yet long kamap strong insait long kongrigesen Kristen.

Islas Marias

Long Meksiko i gat wanpela kalabus ol man i pret long en na i stap long 4-pela ailan ol i kolim Islas Marias. Ol kalabusman inap raun nabaut long ol dispela ailan ol i kalabus long en. Sampela ol i sindaun long dispela hap wantaim meri pikinini bilong ol.

Wanpela liklik kongrigesen i kamap pinis long dispela hap. Wanpela taim long olgeta mun, tripela brata long Masatlan i save kam lukim dispela kongrigesen na helpim ol brata long lukautim ol miting, na ol i bringim ol buk na nius samting i kam, na ol i strongim bel bilong ol brata. Wasman sekit i save go lukim ol sampela taim. Inap 20 i go inap 25 i kam long ol miting. Fopela i baptais pinis na i gat tupela pablisa i no baptais yet. Wasman bilong raun i tok, “sampela i save wokabaut inap 17 kilomita bilong i go long ol miting long Sande, na ol i mas lusim kwik miting bambai ol inap kamap long rum kalabus long taim stret; nogut ol i no stap long taim bilong kolim nem bilong ol wan wan kalabusman. Maski ol i wokabaut hariap, ol i mas lusim tupela aua long wokabaut i kam bek.” I no longtaim i go pinis na wanpela brata i bin kisim save long tok i tru insait long dispela kalabus em i tok: “Bipo mi gat bikpela laik olsem liklik taim ol bai lusim mi i go, tasol nau mi orait long lusim kalabus long laik bilong Jehova, long wanem, i gat planti wok mi ken mekim hia long dispela ples.”

Ol man i gat gutpela bel, em ol i wok long painim rot bilong mekim ol pasin Jehova i laikim, mipela i amamas long lukim olsem strong bilong tok i tru i wok long mekim ol i kamap fri. Inap 12-pela bilong ol, em ol i kisim save long tok i tru taim ol i stap yet long kalabus, ol i lusim kalabus pinis, na kisim baptais, na nau ol i stap olsem wokboi bilong God na mekim ol gutpela wok, na sampela i kamap elda pinis insait long kongrigesen. Ol dispela stori i kamapim klia moa yet olsem Baibel i gat bikpela strong long oraitim bek bel bilong planti man na senisim pasin bilong ol. Ol dispela man i bin kalabus, long wanem, ol i bin mekim sampela rong, tasol taim ol i kirap bihainim lait bilong Tok Bilong God, ol i pilim pinis pasin bilong i stap fri tru em Jisas i bin tok promis long en olsem: “Yupela bai i save long tok tru, na tok tru bai i mekim yupela i kamap fri.”​—Jon 8:​32; Song 119:105.

[Futnot]

[Piksa long pes 23]

Planti man long kalabus i bin lainim ol tok i tru, na dispela i bin helpim ol