Hevi i Kamap Long Marit i Bin i Stap 403 Yia
LONG Swiden, inap 400 yia samting Misin na Gavman i bin amamas long pas gut wantaim. Nau marit bilong misin na gavman i no strong moa.
Long yia 1593 ol i mekim Misin Luteran i kamap olsem lotu bilong kantri, na olgeta manmeri bilong Swiden i mas baptais long en. Bihain, long yia 1850 samting ol i kamapim sampela senis. Ol Swiden i no mas kisim baptais, tasol ol i stap yet olsem memba bilong Misin Luteran. Na ol memba i mas baim 1 pesen bilong mani ol i kisim long wok bilong ol na ol i mas baim takis long en bilong helpim misin na bilong baim misin long sampela wok ol i mekim. I no longtaim i go pinis narapela senis i kamap. Kirap long 1952, ol manmeri bilong Swiden inap long rausim nem bilong ol long misin na long dispela rot ol i no inap baim bikpela hap bilong takis bilong misin.
Inap sampela yia nau, strong bilong Misin Luteran i wok long lus long Swiden. I no gat rot bilong abrusim dispela, long wanem, 10 pesen bilong ol man i stap long Swiden ol i no bilong Misin Luteran—ol i kam long narapela ples, na ol i bilong lotu Juda, Katolik, na Muslim. Olsem na long kirap bilong 1996, inap 86 pesen tasol bilong ol manmeri Swiden i bilong Misin Luteran, na namba i wok yet long go daun.
Pasin bilong les long lotu i go bikpela na dispela i mekim na Misin na Gavman i no pas gut wantaim. Ol i tokaut pinis, i no olsem King i mas insait long Misin Luteran, na ol nupela pikinini i kamap, em papa o mama bilong ol i bilong Misin Luteran, ol i no kamap memba bilong Misin Luteran wantu tasol. Niuspepa (The Dallas Morning News) i tok moa olsem, inap long yia 2000, “Misin Luteran long ol wan wan ples na gavman ol i mas makim pe bilong planti haus na hap graun samting na ol i mas tilim. Misin i save tromoi 1.68 bilion dola long olgeta yia na planti bilong ol dispela mani em gavman i save kisim long takis, tasol nau misin i no inap kisim moa bikpela mani olsem.” Bihain long yia 2000, misin yet bai makim ol bisop bilong en.
Ol man i les long lotu na namba bilong ol memba i go daun. Taim dispela hevi i painim ol lotu i holim nating nem Kristen, ol Witnes Bilong Jehova long Swiden i wok long kamap planti. Yiabuk bilong ol Witnes Bilong Jehova bilong 1997 i tok olsem i gat 24,487 pablisa bilong Kingdom bilong God long dispela kantri, na klostu 10 pesen bilong ol i autim tok olsem painia long olgeta de. Planti bilong ol i laik mekim bikpela wok moa. Olsem: Long kibung distrik bilong ol Witnes Bilong Jehova long 1995, twenti marit i putim pepa bilong i go long Wastaua Baibel Skul Bilong Gileat bilong kamap misineri. Long dispela taim, inap 75 brata sista bilong Swiden em ol i pinisim dispela skul bipo, ol i mekim wok misineri long ol narapela narapela hap bilong graun. Tru tumas, gutpela pasin bilong ol na ol gutpela pas bilong ol na ol i kam malolo long ples, ol dispela samting i kirapim ol brata sista i tingting nau long mekim dispela gutpela wok.
Maski planti milion manmeri bilong ol lotu i holim nating nem Kristen i lusim ol gutpela pasin, bel bilong ol Witnes Bilong Jehova ‘i pulap long amamas na ol i singim ol song bilong amamas.’—Aisaia 65:13, 14.
[Mep long pes 30]
Swiden