Yu Inap Bilip Long Ol Tok Promis Bilong Husat?
LONG 1893, inap olsem 74 man bilong wanpela lain em ol i save stori long ol samting i painim ol manmeri, ol i holim wanpela bung long Sikago (Chicago World’s Fair) bilong toktok long samting bai painim ol man long bihain. (Ples ol i bin bung i stap antap.) Ol i skelim ol samting bai kamap long 100 yia bihain, olsem long 1993, na sampela tingting bilong ol i olsem: “Planti manmeri bai stap laip inap 150 krismas.” “Namba bilong ol haus kalabus bai i go daun na bai i no gat wok long katim marit.” “Gavman bai i no inap mekim planti wok i hatwok long save long en, long wanem, taim kantri i kamap strong em i no mekim ol kain kain wok i hatwok long save long en.”
Long 1967 tu, wanpela buk i gat het-tok The Year 2000 i skelim ol samting bai kamap bihain na i tok: “Long yia 2000, ol bai wokim ol kompyuta i gat tingting na pasin olsem bilong ol man na ol bai mekim wankain wok olsem ol man i mekim, o bai ol i winim save bilong man, na ating bai ol i gat save long wokim ol gutpela gutpela samting olsem ol man i gat save long wokim.” “Yumi ken ting olsem long yia 2000, masin robot bai mekim planti wok bilong haus . . . na masin robot bai i no gat bikpela pe tumas.”
Ol man i no inap skelim ol samting bai kamap bihain, na dispela i narapela kain tru long save bilong God long skelim ol samting bai kamap bihain. Olsem: Skelim ol samting i kamap nau wantaim ol tok profet Baibel i mekim long 2,000 yia i go pinis long pasin bilong ol manmeri bilong taim bilong yumi: “Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.”—2 Timoti 3:1-5.
Dispela tok profet bilong Baibel long “taim bilong las de” em wanpela tasol bilong planti tok profet i bin kamap tru pinis long taim bilong yumi. Baibel i tok bai i gat bikpela pait, bikpela hangre, bikpela sik, guria, na ol bai autim gutnius bilong Kingdom bilong God long olgeta hap bilong graun, na dispela i olsem “mak” bilong Jisas i kam bek pinis.—Matyu 24:3-14; Luk 21:11.
Ol tok promis bilong God i save kamap tru olgeta na i no popaia liklik, na long bipo dispela i kirapim wanpela man bilong raitim Baibel long tok olsem: “Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14.
Yes, yumi mas save olsem klostu nau olgeta tok promis bilong God bai kamap tru. Kingdom bilong God bai pinisim olgeta sik, pasin raskol, pasin bilong kalabus long drak, hangre, na pait—graun olgeta bai kamap paradais. (Song 37:10, 11, 29; KTH 21:3, 4) Yu inap bilip olsem dispela tok promis bai kamap tru! Man bilong wokim yumi, em yet i mekim dispela tok promis, na “em i no save giaman.”—Taitus 1:2; skelim wantaim Hibru 6:13-19.
[Piksa Kredit Lain long pes 32]
Cleveland State University Archive