Yu Inap Bilip Long Wanpela God i Stap Tru?
“BILONG i stap Kristen i no olsem yu mas bilip long God . . . Nau yumi ol man i gat nupela tingting long ol samting bilong lotu, tasol bihain long yia 2000, misin bai i no gat wanpela God olsem ol tumbuna bilong ol i save bilip long en.” Wanpela pris bilong yunivesiti long Briten i bin mekim dispela tok. Em i insait long wanpela lain (Sea of Faith) i gat olsem wan handet pris bilong Briten i helpim dispela lain. Ol dispela “Kristen i no bilip long God” ol i tok, lotu em i wanpela samting ol man yet i bin kamapim, na wanpela man bilong dispela lain i tok, God i olsem wanpela “tingting” tasol bilong sampela man. Dispela bilip olsem i gat wanpela God i stap antap, em i no stret moa long tingting bilong ol.
Long ol yia olsem 1960 i go inap 1970 samting, planti man ol i mekim tok olsem “God i dai pinis.” Dispela i wankain olsem tingting bilong wanpela man bilong Jemani ol i kolim olsem saveman, em Friedrich Nietzsche, em i bin i stap olsem wan handet yia i go pinis. Dispela tingting i givim rot long planti yangpela long bihainim laik bilong ol yet, olsem ol yangpela man na meri singel i ken slip wantaim, na kisim ol drak, na i no gat sampela lo i pasim ol. Tasol yu ting dispela pasin i mekim na ol i stap amamas na belgut long ol wok ol i mekim?
Insait long dispela tenpela yia, wanpela bisop bilong Misin Angliken, em John A. T. Robinson, em i wokim wanpela buk (Honest to God) em planti man i gat tok long en. Planti pris long lotu bilong em ol i tok kros long em, long wanem, em i tingim God ‘i olsem samting i save painim yumi ol man bilong graun, na em i no wanpela Man tru.’ Orait wanpela profesa olsem tisa bilong lotu, em Keith Ward, em i mekim wanpela askim olsem: “Olsem wanem? Pasin bilong bilip long God em i olsem wanpela bilip nating bilong ol tumbuna tasol na ol saveman bilong nau i lusim pinis?” Em yet i bekim na em i tok: “Nambawan bikpela samting insait long lotu long nau, em bilong kisim bek save long tingting bilong ol tumbuna long God.”
Olsem Wanem Long Pen na Hevi?
Planti man i bilip long wanpela God i stap tru, ol i tingting planti long dispela bilip bilong ol taim ol i lukim ol bikpela bagarap na pen i save painim ol man. Olsem: Long Mas 1996, long hap bilong Danblen long Skotlan, wanpela man i sutim long gan 16 pikinini wantaim tisa bilong ol na kilim ol i dai. Wanpela meri bel bilong em i bagarap tru long dispela samting, em i tok, “Mi no klia liklik long laik bilong God.” Bel hevi bilong ol manmeri long dispela bagarap i bin kamap, em i kamap ples klia long wanpela kat ol i putim wantaim sampela plaua ausait long skul bilong ol dispela pikinini. Ol i raitim wanpela tok tasol long dispela kat, olsem: “BILONG WANEM?” Pasto bilong Haus Lotu Danblen i bekim dispela askim na em i tok: “Yumi no inap save long as bilong en. Yumi no inap save, bilong wanem dispela samting i bin kamap.”
Long dispela yia yet, long sampela mun bihain, ol i kilim i dai wanpela yangpela pasto bilong Sios Bilong Inglan, em planti man i save laikim em. Wanpela nius (Church Times) i tok, kongrigesen i kirap nogut taim ol i harim nambawan dikon bilong Livapul i toktok long “paitim strong dua bilong God na askim em, ‘Bilong wanem? Bilong wanem?’ ” Em nau, dispela pasto tu i no givim sampela gutpela tok bilong God long ol bilong mekim gut bel bilong ol.
Orait yumi mas bilip long wanem samting? Em i pasin bilong gutpela tingting sapos yumi bilip long wanpela God i stap tru. Dispela i helpim yumi long bekim ol askim ol i kamapim pinis long dispela stori. Mipela laik bai yu skelim dispela samting long stori i kamap bihain long dispela.
[Piksa long pes 3]
Kat i askim olsem: “Bilong wanem?”
[Kredit Lain]
NEWSTEAM No. 278468/Sipa Press