Olsem Wanem? Tupela Marit i Stap Nupela Man na Meri Long Olgeta Taim?
BILONG helpim dispela tok olsem taim Maria i marit long Josep em i stap nupela meri na em i no slip wantaim Josep, planti man bilong penim o sapim piksa, ol i wokim piksa bilong Josep olsem wanpela man i lapun. Ol i tok olsem Josep i lukautim tasol Maria olsem was bilong em na em i no stap tru olsem man bilong Maria. Tasol i no longtaim i go pinis, Pop John Paul Namba 2 i kamapim narapela tingting long dispela samting. Em i tok olsem Josep “i no lapun long dispela taim.” Tasol “bel bilong em i stap stret olgeta na dispela i olsem presen God i givim long em, na dispela pasin i mekim na maski Josep na Maria i stap olsem tupela marit, na Josep i laikim em, tasol tupela i no bin mekim maritpasin wantaim.”
Sapos Maria i laik i stap nupela meri i go i go, orait, bilong wanem em i marit? Pop i tok: “Yumi ken ting, long taim Josep na Maria i pasim tok long marit, ating ol i bin tingting long Maria bai stap olsem nupela meri.”
Tasol stori bilong Baibel long dispela samting i narapela kain. Matyu i stori olsem Josep “i no slip wantaim em i go inap long taim em i karim pikinini man.” (Matyu 1:25, New American Bible, em wanpela Baibel Katolik.) Bihain long taim Maria i karim Jisas, Josep na Maria i no stap olsem nupela man na meri moa. Wanpela samting i kamapim klia dispela samting em olsem, bihain dispela Gutnius i stori olsem Jisas i gat sampela brata na susa.—Matyu 13:55, 56.
Tru, Baibel i tok olsem Maria i no bin slip wantaim wanpela man na em i karim Jisas, tasol i no gat as tru na yumi ken tok olsem em i stap olsem nupela meri wantaim Josep i go i go inap long taim Josep i dai.