Skulim Ol Pikinini Long Bihainim Stretpela Pasin—Yumi Inap Mekim?
ROBERT Glossop, em i bilong wanpela bikpela skul, (Vanier Institute for the Family) long Otawa, Kanada, em i tok: “Nau yumi stap long taim ol man i bihainim kain kain pasin bilong ples na ol i gat ol narapela narapela kain tingting na pasin, na ol i no gat wankain lo bilong stretpela pasin ol i mas bihainim.” Na wanem samting i kamap? Wanpela ripot long nius (The Toronto Star) i tok: “Ol meri i karim pikinini taim ol i yangpela tru, ol pait i save kamap namel long ol yangpela, na ol yangpela i kilim i dai skin bilong ol yet, ol dispela hevi i wok long i go bikpela.”
Ol dispela hevi i no kamap long Not Amerika tasol—em i kamap long ol narapela hap tu. Dairekta bilong wanpela kain skul (Center for Human Development) long Yunivesiti Braun long Rod Ailan, Yunaitet Stets, em Bill Damon, em i bin skelim dispela hevi long Briten na ol narapela kantri long Yurop, na long Ostrelia, Israel, na Japan tu. Em i tok, long nau ol lotu, skul, na ol narapela lain i no save soim gutpela rot long ol yangpela. Em i tok, “long nau planti lain i no save long ol samting ol i ken mekim bilong skulim ol pikinini long bihainim stretpela pasin na mekim gut wok.” Damon i stori long tok bilong ol man ol i kolim olsem saveman bilong pasin bilong lukautim pikinini, em ol i save skulim ol papamama olsem “pasin bilong stretim pikinini inap bagarapim skin bilong pikinini na em i no stap belgut.” Tasol Damon i tok strong olsem dispela kain tok i olsem “tok bilong helpim ol man long kamapim ol pikinini bilong bikhet na sakim tok.”
Ol yangpela long nau i mas i gat wanem samting bilong helpim ol? Long pasin sori papamama i mas skulim ol long olgeta taim bilong stretim tingting na bel bilong ol. Ol yangpela i narapela narapela kain, olsem na i mas i gat narapela narapela kain pasin bilong stretim ol. Taim pasin sori i kirapim papamama long stretim ol pikinini bilong ol, planti taim papamama inap mekim long rot bilong toktok gut wantaim ol na bai ol i ken pilim dispela tok. Olsem na Sindaun 8:33 i tokim yumi olsem, yumi mas harim tok bilong skulim yumi. Tasol sampela pikinini, ‘sapos yu toktok tasol long ol, orait yu no inap stretim pasin bilong ol.’ Long kain pikinini olsem, taim ol i sakim tok, ol i mas kisim strafe i stret long pasin ol i mekim. (Sindaun 17:10; 23:13, 14; 29:19) Taim Baibel i mekim dispela tok, em i no tok papamama i mas paitim pikinini taim ol i belhat o paitim em nogut tru na bagarapim sampela hap skin bilong pikinini, nogat. (Sindaun 16:32) Pikinini i mas save bilong wanem papamama i stretim em, na em i mas save ol i laik helpim em.—Skelim wantaim Hibru 12:6, 11.
Ol tok bilong Baibel long ol gutpela rot bilong stretim ol pikinini i stap long buk The Secret of Family Happiness.