Ol i No Inap Slip Long Nait na Dispela i Bin Helpim Ol Man
SAMPELA taim ol king tu i no save slip long nait. Serksis em strongpela king i bin bosim Persia long yia 450 B.C.E. samting, na wanpela taim em tu i no inap slip long nait. Ating em i pilim olsem em i no bin mekim sampela wok em i mas mekim, olsem na em i askim ol long kaunim long em ol stori long dispela buk ol i save raitim tok bilong olgeta samting i bin kamap long kantri. Em i kisim save olsem wanpela gutpela wokboi, Mordekai, em i bin painimaut olsem sampela man i pasim tok pinis long kilim king i dai, tasol king i no bin givim wanpela presen long em. Serksis i laik stretim dispela samting hariap. Dispela samting em i mekim i bin helpim lain bilong God na dispela i makim olsem God yet i as na king i no inap slip long nait.—Esta 6:1-10.
I gat as tru na wanpela kongrigesen bilong ol Witnes Bilong Jehova long wanpela taun long nambis bilong Hemanus, long Saut Afrika, i tingim dispela hap bilong Baibel. Ol i save bung long wanpela haus bung em ol i save baim bilong bung long en. Inap planti yia ol i bin traim long baim hap graun bilong wokim Haus Kingdom bilong ol yet. Long 1991, Kaunsil Bilong Taun i makim hap graun bilong ol i ken baim.
Tasol sampela i no laik bai ol Witnes Bilong Jehova i baim dispela graun. Ol i pulim taim na sampela mun i lus, na ol i toksave long kongrigesen olsem ol i pasim wanpela lo na sapos ol lotu i laik baim graun, ol i mas wet inap tripela yia, na ol i rausim dispela tok orait ol i givim long kongrigesen long baim graun. Long Me 1993, kongrigesen i raitim pas gen na askim ol kaunsil long skelim gen lo ol i pasim. Ol i bekim pas bilong kongrigesen na i raitim liklik tok tasol olsem, ol bai bihainim yet lo ol i bin pasim.
Long mun Oktoba long dispela yia yet, wanpela meri insait long dispela kaunsil i no inap slip long nait. Olsem na em i wok long nait olgeta na skelim skelim ol ripot bilong ol miting ol i bin mekim pinis, nogut i gat sampela samting ol i no bin stretim yet. Em i lukim pas kongrigesen i bin raitim, em ol i askim kaunsil long skelim gen lo ol i bin pasim. Orait em i putim dispela samting long lista bilong ol samting ol bai toktok long en long narapela miting. Em i laik kamapim long miting olsem ol Witnes Bilong Jehova i bin askim long kisim graun paslain long taim kaunsil i bin putim lo long ol lotu i ken baim graun bihain long tripela yia.
Orait bihain ol i givim dispela graun long kongrigesen, em bipo kongrigesen i laik kisim long 1991! Dispela graun i stap long bikrot na i no hatwok long ol manmeri long kongrigesen na ol man i gat laik long harim tok ol i ken i go long en. Ol i wokim naispela Haus Kingdom tru, na ol i dediketim long Jehova long Oktoba 5, 1996.
Tru, kongrigesen i sori long dispela kaunsil-meri i no bin slip long nait, tasol ating stori bilong King Serksis olsem em i no bin slip long wanpela nait em inap mekim gut bel bilong dispela kaunsil-meri. Long dispela tupela stori i gat gutpela samting i bin kamap. Dispela kongrigesen long Hemanus i amamas long ol i gat Haus Kingdom bilong ol yet, em ples ol i ken lotu tru long God na lainim ol samting bilong God long dispela taun long nambis em planti man i save kam raun long en.—Hibru 10:24, 25.