Ol i ‘Baim Tok i Tru’!

“KISIM [olsem baim] save long ol pasin i tru . . . No ken tromoi.” (Sindaun 23:​23) Em tok bilong saveman Solomon. Dispela i stret long olgeta tok i tru, tasol i stret moa yet long tok i tru i stap long Baibel. Dispela kain tok i tru inap helpim man long kisim laip oltaim! (Jon 17:​3, 17) Tasol yumi no inap kisim nating tasol. I hatwok long ‘baim’ kain tok i tru olsem​—⁠man i mas redi long lusim sampela samting inap long em i ken kisim. (Skelim wantaim Matyu 13:​45, 46.) Planti man i no laik mekim olsem. Tasol long planti kantri, planti man em ol i gat strongpela bel, ol i wok long kisim tok i tru bilong Baibel maski ol i hatwok tru long mekim olsem.

Yumi ken tingim ol Witnes Bilong Jehova long Gana, em wanpela kantri long Wes Afrika. Long Jun 1989, winim 34,000 manmeri long dispela kantri ol i bilip long tok i tru bilong Baibel na ol i autim dispela tok long ol narapela man. Bihain, gavman i tambuim wok bilong autim tok. Tasol ol man i gat gutpela bel ol i bin wok yet long ‘baim tok i tru’ maski i gat tambu. Gavman i tekewe dispela tambu long Oktoba 31, 1991, na long namel bilong 1995, em 3 na hap yia bihain long dispela, lain Witnes Bilong Jehova i save autim tok long Gana i go bikpela inap olsem 46,104! Na long dispela yia namba i go bikpela inap olsem 52,800.

Wanem samting i mekim na ol man i laikim tok i tru bilong Baibel? Sampela i bin lusim wanem ol samting bambai ol i ken ‘baim tok i tru’? Bilong bekim ol dispela askim, yumi ken tingim stori bilong 3-pela Kristen bilong Gana.

Ol i Laikim Ol Tok Bilong Baibel

Pastaim yumi ken tingim wanpela meri i gat 23 krismas samting. Papa bilong em i wanpela pasto, tasol em i lusim lotu bilong papa bilong em. Wanem as na em i mekim olsem? Em i gat bikpela laik long tok i tru.

Em i bin stori olsem: “Taim ol Witnes i raun long olgeta haus, ol i save kam long haus bilong mipela. Mi bin toktok wantaim ol inap sampela taim, na bihain mi save olgeta tok ol i skulim ol man long en, em Baibel i as bilong en. Mi kamapim ol askim long olkain tok olsem God Triwan, bikpaia, ol man i gat tewel i no save dai, na pasin bilong oraitim sik long rot bilong bilip. Mi strong long bilip olsem Baibel i as bilong ol dispela bilip. Tasol ol Witnes i helpim mi long save, Baibel i no as bilong ol dispela bilip.”​—⁠Bilong save Baibel i tok wanem long ol dispela bilip, plis lukim Mak 13:32; Rom 6:23; Aposel 10:40; na 1 Korin 13:​8-10.

Dispela yangpela meri i tok moa: “Tasol famili bilong mi i birua long mi na papa i mekim moa yet. Papa i ting ol Witnes i giamanim mi. Tasol mi save, ol samting ol Witnes Bilong Jehova i skulim mi long en, em tok i tru. Mi traim long helpim papa long save long ol dispela samting i stap long Baibel, tasol em i no laik harim tok. Pasin birua i go bikpela moa.

“Tasol mi no larim dispela i pasim mi. Mi save, stretpela save tasol bai helpim man long kisim laip oltaim long Paradais, na mi strong long holimpas dispela save. Taim ol Witnes long hap bilong mi ol i harim stori long ol hevi i save painim mi, ol i mekim gutpela pasin long mi, na strongim mi, na sampela samting bilong skin mi mas kisim, ol i givim long mi. Dispela i helpim mi long tingim gut tok bilong Jisas long Jon 13:35: ‘Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.’ Nau mi bilip moa yet olsem ol Witnes Bilong Jehova i save bihainim lotu i tru. Bihain, taim papamama i lukim pasin bilong mi i senis na i gutpela moa, ol i amamas long dispela na tingting bilong ol long mi i senis olgeta, na papa i askim ol Witnes long stadi long Baibel wantaim bikbrata bilong mi!”

Yu Yet Mas Save Em Tok i Tru

I hatwok tu long sampela yangpela i bin go bikpela insait long famili Witnes long ol i ‘baim tok i tru.’ Sampela yangpela i ting tok i tru bilong Baibel em i samting nating. Sapos ol i no kisim ol dispela tok i tru olsem samting bilong ol yet, bilip bilong ol i no strong. (Skelim wantaim Matyu 13:​20, 21.) Nathaniel, em wanpela man bilong Gana i gat 35 krismas samting, em i stori long olsem wanem em i bin ‘baim tok i tru’ taim em i yangpela yet. Em i tok:

“Taim mi liklik pikinini papamama i skulim mi long Baibel. Taim mi wok long go bikpela mi go wantaim ol long autim tok, tasol mi yet i no pasim tok long bel long kamap Witnes. Bihain mi save, mi yet i mas skelim gut ol tok bilong Baibel.

“Pastaim mi laik save gut olsem Baibel em Tok Bilong God​—⁠ol narapela buk holi bilong lotu nogat. Mi stadi long Baibel na mi kisim save olsem, Baibel tasol em wanpela buk holi i kamapim klia planti planti tok profet em ol i bin kamap tru. Na mi kisim save olsem Baibel i gat planti tok i tru bilong saiens, olsem ‘graun i hangamap nating.’ (Jop 26:⁠7) Ol i bin raitim dispela tok inap planti tausen yia pastaim long ol saientis i save graun bilong yumi i stap insait long wanpela lain sta. God tasol inap kirapim ol man long raitim ol dispela samting!a

“Bihain, mi gat laik long painim lotu i save lainim ol man long ol tok i tru i stap long Baibel na i bihainim ol dispela tok. Klostu olgeta lotu i lainim ol man long bikpaia, God Triwan, na man i gat tewel i no save dai. Tasol mi pilim olsem ol dispela tok i no stret. Mi tingting: Sapos wanpela papa i putim han bilong pikinini insait long hatpela wara bilong strafim em, em i wanpela papa nogut. Orait, olsem wanem wanpela God bilong pasin sori em i ken putim ol pikinini bilong em long bikpaia na larim ol i kisim pen? Tasol ol tok em ol Witnes Bilong Jehova i skulim ol man long en i stret wantaim ol tok bilong Baibel olsem i stap long Rom 6:​23: ‘Sin i save givim pe long ol wokboi bilong en. Dispela pe em dai tasol’​—⁠bikpaia nogat. Mi ting dispela tok i stret.

“Na mi kisim save olsem ol Witnes Bilong Jehova i gat ol lo olsem, olgeta insait long lain bilong ol i mas bihainim ol lo bilong Baibel, na ol i save rausim ol man i mekim rong na i no tanim bel. Mi tingim ol dispela samting, na mi save ol Witnes Bilong Jehova i holim tok i tru, na mi yet mi ting long kamap wanpela Witnes. Mi wok strong bilong winim mak inap long mi ken kisim baptais olsem wanpela Witnes.”​—⁠1 Korin 5:​11-13.

Stori bilong Nathaniel i kamapim klia olsem maski ol yangpela i go bikpela long han bilong papamama Kristen, ol tu i mas ‘baim tok i tru.’ I no stret ol i sindaun nating long ol miting bilong kongrigesen. Olsem ol Beria bilong bipo, ol i mas ‘skelim tok i stap long buk bilong God bilong ol i ken save, em tok i tru o nogat.’ (Aposel 17:11) Bilong mekim olsem, ol i mas lusim bikpela hap taim na wok strong, tasol dispela bai helpim ol long kisim strongpela bilip.​—⁠Skelim wantaim Efesus 3:​17-19.

Em i Les Long Lotu Giaman

Wanpela man bilong Gana, nem bilong em Godwin, em i gat klostu 70 krismas taim em i lusim lotu Presbitirian na lain Meson. Godwin i tok: “I gat sampela pasin i kamap long misin em mi gat tok long en. Olsem: Planti kros pait i kamap namel long ol, na inap long nau ol i mekim yet. Sampela taim ol polis i mas kam bilong pinisim kros pait na helpim ol long stap gut na stap isi wantaim! Mi ting i no stret long lain bilong Krais i mekim kain pasin olsem. Orait nau wanpela hevi i kamap namel long mi na wanpela wanlotu Presbitirian. Kot bilong gavman i harim kot bilong mitupela na jas i tok wanlotu bilong mi i gat asua. Tasol pasto bilong misin em i mekim pasin i no stret na helpim dispela man, na long ai bilong ol wanlotu em i bin wok long putim asua i kam long mi! Mi krosim em na lusim haus lotu, na mi no go bek moa.

“Bihain liklik, ol Witnes Bilong Jehova i kam long haus bilong mi. Pastaim mi harim tok bilong ol, long wanem, mi no laik sakim ol man i toktok long God. Tasol bihain mi kisim save olsem, maski mi wanpela Presbitirian inap planti yia, i gat planti tok long Baibel mi no save long en. Olsem: Mi no save long tok bilong Baibel i tok ol man i ken stap oltaim long Paradais long graun.b Na taim mi kirap na go long ol miting bilong ol Witnes Bilong Jehova, gutpela pasin bilong ol, na klos na bilas bilong ol yangpela Witnes, i kirapim tru tingting bilong mi. Em ol manmeri i save bihainim tru ol lo bilong Baibel!”

Tasol Godwin i mas mekim sampela bikpela senis bilong ‘baim tok i tru.’ Godwin i tok: “Mi wanpela memba bilong wanpela lain Meson. Na maski ol memba bilong en i pas wantaim olsem lain brata na narapela i save helpim narapela, mi lukim sampela pasin ol i bin mekim long bun bilong het na ol narapela bun bilong man i dai pinis, na ol i singautim ol spirit tu. Ol i tok, sapos man i singautim ol dispela spirit, ol bai helpim em long kamap strong long ol samting bilong spirit.

“Mi stadi na dispela i helpim mi long save, God Jehova i nolaik tru long yumi insait long wok bilong ol spirit nogut, long wanem, dispela inap mekim na yumi kam aninit long strong bilong Satan na ol spirit nogut bilong em.c Olsem wanem? Bai mi stap yet olsem wanpela memba bilong lain Meson i gat ol pasin hait bilong en, o bai mi lusim na amamasim Jehova? Mi lusim. Ol samting mi holim bilong dispela lain​—⁠klos tu mi bin pasim taim mi go long ol miting bilong ol​—⁠mi rausim olgeta. Em nau, samting i painim mi pinis olsem Jisas i bin tok promis long en, olsem: ‘Tok tru bai i mekim yupela i kamap fri’! (Jon 8:32) Nau mi amamas long tokim ol man long ol samting mi bin kisim save long en. Mi no bel hevi long mi bin lusim sampela samting.”

Planti tausen man i gat gutpela bel, ol tu i bin lusim planti samting bilong ‘baim tok i tru.’ Olsem dispela 3-pela Kristen yumi stori pinis long ol, ol tu i no bel hevi long ol i bin senisim sampela pasin long i stap bilong ol. Tok i tru bilong Baibel i bin helpim ol long “bungim planti samting bilong helpim ol bihain, na ol bai i kisim dispela laip em i laip tru.” (1 Timoti 6:19) Yu tu inap kisim dispela “laip tru” na ol narapela blesing dispela kain laip bai kamapim sapos yu ‘baim tok i tru.’

[Ol Futnot]

[Piksa long pes 9]

Nathaniel

[Piksa long pes 9]

Godwin