Ol Dokta, Ol Jas, na Ol Witnes Bilong Jehova

LONG Mas 1995, ol Witnes Bilong Jehova i kamapim tupela bung long Brasil. Bilong wanem ol i kamapim dispela tupela bung? Ol i kamapim bambai ol dokta na ol kot i ken wok gut wantaim ol Witnes Bilong Jehova sapos wanpela i stap long haus sik na em i no laik kisim blut.​—⁠Aposel 15:⁠29.

Sori tru, sampela dokta i bin sakim laik bilong sampela Witnes na ol i kisim tok orait long kot bilong subim ol long kisim blut. Long kain taim olsem ol Witnes i mekim wok long kain kain rot bilong kot bilong lukautim ol yet. Tasol ol i laikim pasin bilong wok gut wantaim na ol i no laikim tok pait. Long dispela tupela bung ol i kamapim klia olsem i gat planti narapela marasin samting ol i ken kisim olsem senis bilong blut na ol Witnes Bilong Jehova i amamas long kisim dispela.a

Miting bilong wanpela lain saveman bilong Sau Paulo (Regional Council of Medicine) i bin wanbel long dispela tingting bilong ol Witnes. Long Janueri 1995 ol i pasim tok olsem sapos samting dokta i laik mekim bilong helpim sikman i no stret wantaim laik bilong sikman, orait i stret sikman inap sakim dispela samting na em i ken painim narapela dokta.

Long nau, long Brasil i gat planti handet dokta i mekim wok long planti haus sik em ol i amamas long givim ol marasin i olsem senis bilong blut long ol sikman taim ol i askim ol long kisim. Kirap long dispela tupela bung long Mas 1995, pasin bilong wok gut wantaim i kamap gutpela tru namel long ol dokta, ol jas, na ol Witnes Bilong Jehova long Brasil. Long 1997, wanpela nius bilong ol dokta long Brasil (Âmbito Hospitalar) i kamapim wanpela stori i tok strong long ol dokta i mas tingim laik bilong ol Witnes Bilong Jehova long ol samting bilong blut. Long nau planti man i wanbel long tok bilong tupela lain saveman (Regional Councils of Medicine) long provins Rio de Janero na Sau Paulo olsem, “wok bilong dokta long lukautim laip bilong sikman dispela i no ken givim rot long dokta na em i ken sakim laik bilong sikman.”

[Futnot]