Ol i Man “Wankain Olsem Yumi”
EM I wanpela king na wanpela profet, tasol em i wanpela gutpela papa tu. Wanpela long olgeta pikinini man bilong em i kamap man bilong hambak na i gat pasin antap. Bel bilong dispela pikinini man i strong long kisim wok king bilong papa bilong em, olsem na em i kirapim pait insait long kantri bilong kilim i dai papa bilong em. Tasol dispela pikinini man yet i dai long dispela pait. Taim papa i harim olsem pikinini man bilong em i dai pinis, em wanpis i go long wanpela rum antap long haus na em i krai na singaut olsem: “O tarangu pikinini bilong mi, Apsalom. Pikinini bilong mi, pikinini bilong mi, Apsalom. I gutpela sapos mi bin senisim yu na mi bin i dai. O Apsalom, pikinini bilong mi, pikinini bilong mi.” (2 Samuel 18:33) Dispela papa em King Devit. Olsem ol narapela profet bilong Jehova, em i “man wankain olsem yumi.”—Jems 5:17.
Long taim bilong ol man i bin raitim Baibel, ol man na ol meri i olsem maus bilong Jehova ol i man nating. Olsem yumi, ol i karim planti hevi na pen bilong ol sinman. Sampela long ol dispela profet i husat? Olsem wanem na ol i man wankain olsem yumi?
Moses—Man Bilong Hambak i Kamap Man i Gat Pasin Daun
Wanpela profet i gat namba paslain long taim bilong ol Kristen, em Moses. Maski em i gat 40 krismas, em i no redi yet long mekim wok olsem mausman bilong Jehova. Bilong wanem? Long taim King bilong Isip i daunim ol brata bilong Moses, em i kamap bikpela insait long haus bilong King na em i kamap “man bilong mekim ol strongpela toktok na ol kain kain strongpela wok.” Baibel i tokim yumi olsem: “Moses i ting ol brata bilong en bai i save olsem, God i laik helpim ol long han bilong en.” Em i hambak, olsem na em i paitim wanpela man bilong Isip na kilim em i dai bilong helpim wanpela wokman Hibru.—Aposel 7:22-25; Kisim Bek 2:11-14.
Moses i mas ranawe nau, na em i stap olsem wanpela wasman bilong sipsip long longwe ples Midian inap 40 yia. (Kisim Bek 2:15) Long pinis bilong dispela taim, Moses i gat 80 krismas nau na Jehova i givim wok olsem wanpela profet long em. Tasol long dispela taim Moses i no man bilong hambak moa. Em i ting em i no gat save inap tru long mekim wok olsem wanpela profet, olsem na em i askim Jehova olsem, “Mi wanem kain man na bai mi inap i go long king bilong Isip?” na tu, “Bai mi bekim wanem tok long ol?” (Kisim Bek 3:11, 13) Long pasin sori Jehova i helpim Moses na mekim gut bel bilong em, olsem na Moses inap mekim gut tru wok bilong em.
Olsem wanem? Pasin hambak i bin stiaim yu long mekim sampela samting o toktok long sampela samting i no stret olsem Moses i bin mekim? Sapos olsem, orait yu mas lain moa long mekim gut wok long pasin daun. O yu ting olsem yu no gat save inap long mekim sampela wok Kristen? Yu no ken tok yu no inap mekim olsem—mobeta yu kisim helpim bilong Jehova na oganaisesen bilong em. Dispela Man i bin helpim Moses em i ken helpim yu tu.
Elaija—Man Wankain Olsem Yumi Taim Em i Mas Stretim Ol Man
“Elaija em i man wankain olsem yumi. Na em i prea strong long God i no ken larim ren i kam daun, na ren i no kam daun long graun inap long tripela yia na 6-pela mun.” (Jems 5:17) Beten bilong Elaija i stret wantaim laik bilong God bilong stretim wanpela lain i bin givim baksait long Em. Tasol Elaija i save olsem dispela taim bilong biksan em i beten long en, em bai kamapim bikpela hevi long ol man. Klostu olgeta man long Israel i wok gaden, olsem na wara bilong nait na ren i bikpela samting long ol. Bikpela hevi tru bai kamap sapos taim bilong biksan i stap longtaim. Ol gras samting bai drai; ol gaden i no ken kamapim kaikai. Ol animal bilong mekim wok na bilong kaikai ol bai dai, na sampela famili inap i dai long bikpela hangre. Husat bai kisim bikpela hevi tru? Ol man nating. Bihain wanpela meri em man bilong em i dai pinis, i tokim Elaija olsem em i gat liklik plaua tasol na liklik hap wel. Em i ting olsem em na pikinini man bilong em klostu bai tupela i dai long hangre. (1 King 17:12) Bilong Elaija i ken mekim dispela beten, em i mas i gat strongpela bilip olsem Jehova bai lukautim ol wokman bilong Em, maski ol i maniman o rabisman, em ol i no bin lusim lotu i tru. Tru tumas, Jehova i bin mekim olsem.—1 King 17:13-16; 18:3-5.
Tripela yia bihain, taim Jehova i tok olsem klostu nau em bai mekim ren i kam daun, Elaija i kamapim klia olsem em i gat bikpela laik bai dispela taim bilong biksan i mas pinis—em i beten strong planti taim na em i “nildaun na putim het bilong en namel long tupela skru bilong en.” (1 King 18:42) Planti taim em i tokim wokman bilong em olsem: “Yu go long hap na lukluk i go long solwara” bilong lukim samting i makim olsem Jehova i harim ol beten bilong em. (1 King 18:43) Na em i amamas tru taim Jehova i harim ol beten bilong em na “skai i larim ren i kam daun na kaikai i kamap gen long ol gaden”!—Jems 5:18.
Sapos yu wanpela papa o mama o wanpela elda long kongrigesen Kristen, ating i hatwok long yu long stretim man. Tasol maski i hatwok olsem, yu mas bilip olsem sampela taim i stret long yu mas stretim man na sapos yu mekim long pasin sori, dispela bai kirapim man yu stretim long “mekim ol stretpela pasin, na bel bilong em bai i stap isi.” (Hibru 12:11) Gutpela samting tru bai kamap sapos man i bihainim ol lo bilong Jehova. Olsem Elaija i bin mekim, yumi tu mas givim bel long beten olsem ol bai bihainim ol dispela lo.
Jeremaia—Em i Strongim Bel Maski Em i Bel Hevi
Ating Jeremaia i bin kamapim planti tingting bilong em, winim ol narapela man i bin raitim Baibel. Taim em i yangpela, em i surik long kisim wok God i givim long em. (Jeremaia 1:6) Tasol bihain em i strongim bel na em i kirap long autim tok bilong God, tasol ol wanlain Israel bilong em—king na ol man nating—ol i mekim pasin birua tru long em. Sampela taim dispela kain pasin birua i mekim em i kros na krai. (Jeremaia 9:3; 18:20-23; 20:7-18) Na long sampela narapela taim ol i mekim nogut long em, na paitim em, na pasim hanlek bilong em na pasim wanpela ain long nek bilong em, na kalabusim em, na ol man i tok long kilim em i dai, na ol i lusim em bilong i dai long graun malumalum long as bilong wanpela hul wara i no gat wara long en. Na sampela taim ol tok bilong Jehova i mekim na Jeremaia i bel hevi, na dispela samting i kamap klia long toktok bilong em olsem: “Bel bilong mi i nogut tru. Mi no inap karim dispela bikpela pen.”—Jeremaia 4:19.
Tasol Jeremaia i laikim yet tok bilong Jehova na em i tok olsem: “Dispela tok bilong yu i mekim mi i amamas na belgut tru.” (Jeremaia 15:16) Tasol long dispela wankain taim, em i bel hevi na em i singaut long Jehova: “Yu no bin helpim mi. Mi olsem man i go long wara bilong dring, tasol em i lukim wara i drai na em i no inap dring.” (Jeremaia 15:18) Maski olsem, Jehova i save long ol narapela narapela tingting bilong em na em i wok yet long helpim em bambai em i ken inapim dispela wok bilong em.—Jeremaia 15:20; lukim tu 20:7-9.
Olsem Jeremaia, yu tu i save karim hevi na ol man i birua long yu taim yu mekim wok bilong God? Tingim Jehova bai strongim yu. Wok yet long bihainim olgeta tok Jehova i save stiaim yu long en, na em bai givim gutpela pe long yu tu long ol wok yu save mekim.
Jisas i Man Wankain Olsem Yumi
Nambawan profet i winim olgeta narapela profet em Pikinini Man bilong God yet, em Krais Jisas. Maski em man i nambawan olgeta, em i no daunim pasin bilong em long sori long ol man. Planti taim yumi kaunim samting i stori long Jisas i pilim olsem wanem—em i kamapim klia long pes bilong em na long ol samting em i mekim long ol narapela. Planti taim Jisas i “sori tru” long ol man, na em i mekim wok long dispela tok taim em i stori long ol man long ol tok piksa bilong em.—Mak 1:41; 6:34; Luk 10:33.
Ating Jisas i singaut strong taim em i rausim ol animal na ol man i mekim wok bisnis, na ol i lusim hap bilong tempel na i go, na em i tok olsem: “Kisim ol [dispela samting] bilong yupela i go!” (Jon 2:14-16) Na taim Pita i tok olsem, “Bikpela, nogat tru. Dispela samting i no inap kamap long yu,” Jisas i bekim strong olsem, “Satan, yu go baksait long mi!”—Matyu 16:22, 23.
Jisas i stap pren tru long sampela manmeri i pas gut long em. Baibel i stori long aposel Jon olsem “dispela disaipel Jisas i laikim tumas.” (Jon 21:7, 20) Na tu Baibel i tok: “Jisas i laikim tumas Marta wantaim susa bilong en na Lasarus.”—Jon 11:5.
Jisas i save kisim hevi long bel tu. Taim Lasarus i dai bel bilong Jisas i sori tru na “Jisas i krai.” (Jon 11:32-36) Taim Judas Iskariot i putim Jisas long han bilong ol birua, bel bilong Jisas i bagarap tru na em i kamapim tok bilong Buk Song olsem: “Man i kaikai bret wantaim mi, em i litimapim lek bilong krungutim mi.”—Jon 13:18; Song 41:9.
Na taim Jisas i kisim bikpela pen nogut tru long diwai pos, em i kamapim klia bikpela pasin sori bilong em. Long pasin isi em i putim mama bilong em long han bilong “dispela disaipel em i laikim tumas.” (Jon 19:26, 27) Taim Jisas i lukim olsem dispela man nogut i hangamap wantaim em i kamapim klia olsem em i tanim bel, long pasin sori em i tokim em olsem: “Bai yu stap wantaim mi long Paradais.” (Luk 23:43, NW) Yumi inap pilim bel hevi bilong em taim em i singaut strong olsem: “God bilong mi, God bilong mi, bilong wanem yu lusim mi?” (Matyu 27:46) Laspela tok bilong em paslain long em i dai, em kamapim klia bikpela pasin sori na bilip bilong em, taim em i singaut olsem: “Papa, mi putim spirit bilong mi long han bilong yu.”—Luk 23:46.
Ol dispela samting i mekim gut bel bilong yumi! “Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em [Jisas] bilong traim em tu. Tasol em i no mekim sin.”—Hibru 4:15.
Jehova i Bilip Long Ol
Jehova i no bel hevi long ol man em i bin makim olsem mausman bilong em. Em i save ol i stap gut long em, na long pasin sori em i no tingim ol pasin kranki bilong ol dispela man i gat sin. Tasol em i laik bai ol i inapim wok bilong ol. Long helpim bilong em, ol i bin mekim olsem.
Long pasin isi yumi mas kamapim klia olsem yumi bilip tru long ol brata sista. Long dispela taim, ol bai i stap olsem sinman yet, olsem yumi tu. Tasol maski olsem, yumi no ken skelim ol brata sista na tok olsem ol i no gutpela inap long yumi ken mekim pasin sori long ol na tingim ol. Pol i tok olsem: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol. Yumi no ken ting long helpim yumi yet tasol.”—Rom 15:1; Kolosi 3:13, 14.
Olsem yumi, olgeta profet bilong Jehova i gat ol kain kain tingting long bel. Maski olsem, ol i bilip tru long Jehova na Jehova i lukautim ol. Na tu, Jehova i givim sampela samting long ol bambai ol i ken amamas—maus bilong bel i no gat tok, na ol i luksave olsem God i amamas long ol, na ol i gat ol gutpela pren bilong strongim ol, na ol inap bilip tru olsem gutaim bai kamap bihain. (Hibru 12:1-3) Yumi tu mas pas gut wantaim Jehova na bilip tru long em na bihainim pasin bilong bilip bilong ol dispela profet bilong bipo, em ol i man “wankain olsem yumi.”