Bihainim Bilip Bilong Ol

ELAIJA i ran long taim ren i pundaun na ples i wok long i go tudak. Em i gat longpela hap rot i stap yet paslain long em i kamap long Jesril, na em i no yangpela man tumas. Tasol em i ran strong tru, long wanem, “strong bilong Bikpela” i stap long em. Dispela strong i stap long bodi bilong em i narapela kain tru, em samting em i no bin pilim bipo. Man! Em i ran siksti tru lusim ol lain hos i pulim karis bilong King Ahap!​—⁠1 King 18:⁠46.

Orait nau King Ahap i stap bihain tru long em, na Elaija i gat longpela hap rot i stap yet bilong i go long en. Piksaim long tingting olsem Elaija i ran na ren i paitim pes bilong em, na em i wok long tingim bek dispela de long laip bilong em we planti samting tru i bin kamap. Tasol ol samting i bin kamap i givim biknem tru long God bilong Elaija, em Jehova, na long lotu i tru. Maunten Kamel i stap baksait tru na Elaija i no inap lukim moa, long wanem, ren na klaut i karamapim dispela maunten we Jehova i bin yusim Elaija long wokim strongpela mirakel bilong daunim tru lotu bilong Bal. Jehova i kamapim long ples klia pasin giaman bilong planti handret profet bilong Bal, na i stret tru em i bagarapim ol. Orait nau Elaija i beten long Jehova long pinisim taim bilong bikpela san tru we i no gat ren inap 3 na hap yia. Ren i pundaun!a​—⁠1 King 18:​18-45.

Taim Elaija i ron long ren inap 30 kilomita i go long Jesril, ating em i pilim olsem ol samting bai senis, long wanem, Jehova i bagarapim pinis ol profet bilong Bal. Ahap i mas senisim pasin bilong em! Bihain long ol samting Ahap i lukim i kamap, em i mas lusim lotu bilong Bal, bosim gut kwin bilong em Jesebel, na stopim pasin bilong mekim nogut long ol wokboi bilong Jehova.

Taim yumi lukim ol samting i wok long kamap gut long wei yumi laikim, yumi save amamas. Ating yumi tingting tu olsem, ol samting long i stap bilong yumi bai i wok long kamap gutpela moa, na tu, ating yumi tingim olsem ol hevi i save painim yumi bai pinis olgeta. Yumi no kirap nogut sapos Elaija i kisim kain tingting olsem, long wanem, em i “man wankain olsem yumi.” (Jems 5:17) Tasol ol hevi bilong Elaija i no pinis. Sampela aua bihain, Elaija bai pret nogut tru, em bai pilim bikpela bel hevi tru, na em bai ting i gutpela em i mas i dai. Wanem samting i kamap? Olsem wanem Jehova i helpim profet bilong em long strongim bilip na kisim strongpela bel? Orait yumi ken stori long dispela samting.

Wantu Tasol Ol Samting i Senis

Taim Ahap i kamap long haus king bilong em long Jesril, yu ting em i kamapim klia olsem nau pasin bilong em i senis na em i kamap man bilong tingim ol samting bilong lotu i tru? Baibel i tok: “Ahap . . . i tokim meri bilong en, Kwin Jesebel, long olgeta samting Elaija i bin mekim. Na tu em i tokim em long Elaija i bin kilim i dai olgeta profet bilong Bal.” (1 King 19:⁠1) Yu ken lukim olsem taim Ahap i stori long ol samting i kamap long dispela de, em i no stori long God bilong Elaija, em Jehova. Ahap em man bilong tingim tasol ol samting bilong graun, em i lukim ol mirakel i kamap long dispela de na em i no tok olsem Jehova i mekim ol dispela samting i kamap, nogat, em i tok, “Elaija i bin mekim.” I klia tru olsem em i no gat pasin bilong rispek long God Jehova. Na Jesebel, dispela meri bilong bekim rong i mekim wanem taim em i harim dispela stori?

Em i belhat nogut tru! Pes bilong em i senis olgeta na em i salim tok long Elaija olsem: “Bai mi kilim yu i dai olsem yu bin kilim ol dispela profet bilong Bal. Tumora long wankain taim olsem nau, bai yu dai pinis. Sapos mi no mekim olsem, ol god i ken kilim mi yet i dai.” (1 King 19:⁠2) Dispela em i narakain tok bilong pretim tru man. Na Jesebel i tok tru antap olsem em yet i mas i dai sapos em i no kilim i dai Elaija insait long wanpela de bilong bekim bek indai bilong ol profet bilong Bal. Tingim, Elaija i mas slip long Jesril long dispela nait i gat ren, na em i kirap long slip bilong em bilong harim dispela tok nogut tru em wokboi bilong kwin i bringim long em. Em i pilim olsem wanem?

Bel Hevi na Pret i Daunim Em

Sapos Elaija i bin ting olsem dispela pait em i bin mekim long lotu bilong Bal i pinis, orait long dispela taim stret em i luksave olsem dispela tingting bilong em i no tru. Jesebel i no inap tru senisim tingting bilong em. Kwin i tok na ol i bin kilim i dai planti gutpela wanwok bilong Elaija na i luk olsem nau kwin bai kilim i dai Elaija. Baibel i tok: “Elaija i harim dispela tok, na em i pret.” Olsem wanem? Elaija i piksaim long tingting samting nogut tru Jesebel bai mekim bilong kilim em i dai? Sapos em i bin wok long tingim tingim dispela samting, ating dispela i as na em i pret tru na bel i no gat strong. Tasol maski wanem samting i kamap, Elaija i tingim laip bilong em na em “i pret na i ranawe.”​—⁠1 King 18:4; 19:⁠3.

I no Elaija wanpela tasol em man i gat bilip na bihain pret i daunim em, nogat. Bihain tru, aposel Pita tu i gat wankain hevi. Olsem, taim Jisas i tokim Pita long wokabaut wantaim Em antap long wara, dispela aposel i kirap lukluk long “traipela win.” Em i pret na i stat long sink. (Matyu 14:30) Pasin bilong Pita na Elaija i givim gutpela skul long yumi. Sapos yumi laik holimpas strongpela bel, orait yumi no ken tingting tumas long ol samting nogut i pretim yumi. Yumi mas lukluk i go long Man i As bilong ol gutpela samting yumi bilip na wetim i kamap bihain na Man i givim strong long yumi.

“Mi Inap Pinis!”

Elaija i pret na em i ranawe inap 150 kilomita i go long hap saut wes long Berseba, em wanpela taun i stap klostu long boda bilong Juda long hap saut. Long dispela hap, em i lusim wokman bilong em na em wanpela tasol i go long ples drai nating. Baibel i tok em i wokabaut long ples drai inap “wanpela de,” olsem na yumi inap piksaim long tingting olsem em i kirap wokabaut long moningtaim, na em i no kisim kaikai samting i go wantaim em. Em i bel hevi na pret, na em i no tingim ol hevi bai painim em long rot nogut em i wokabaut long en long traipela san. Taim san i wok long go daun na nait i wok long kam, strong bilong Elaija i pinis olgeta. Em i taiet tru na em i sindaun aninit long wanpela diwai, i no gat narapela samting em i ken hait long en long dispela ples dai nating.​—⁠1 King 19:⁠4.

Elaija i beten strong tru. Em i askim God long larim em i dai. Em i tok: “Mi no gutpela man. Nogat. Mi wankain olsem ol tumbuna bilong mi.” Em i save olsem ol tumbuna bilong em i dai pinis, na das na bun tasol bilong ol i stap long matmat, na ol i no inap mekim wanpela gutpela samting. (Saveman 9:10) Elaija i pilim olsem em i wankain olsem ol dispela daiman. Olsem na em i singaut: “Mi inap pinis!” I no gat as long mi stap laip yet!

Yu ting yumi mas kirap nogut taim yumi kisim save olsem bikpela bel hevi tru i daunim wanpela wokman bilong God? Nogat. Baibel i stori long sampela gutpela man na meri em ol i bin bel hevi tru na ol i tingting long i dai tasol​—⁠namel long ol em Rebeka, Jekop, Moses, na Jop.​—⁠Stat 27:46; 37:35; Namba 11:​13-15; Jop 14:⁠13.

Long nau, yumi stap long ‘taim nogut na dispela bai givim hatwok’ long ol man, olsem na yumi no ken kirap nogut long lukim planti manmeri, na ol wokman bilong God tu ol i bel hevi sampela taim. (2 Timoti 3:⁠1) Sapos yu yet i pilim kain bikpela bel hevi olsem, orait bihainim pasin bilong Elaija: Kamapim olgeta hevi bilong yu long Jehova, long wanem, em i “God bilong mekim isi bel bilong ol man.” (2 Korin 1:⁠3) Olsem wanem? God i bin mekim gut bel bilong Elaija?

Jehova i Lukautim Profet Bilong Em

Yu ting Jehova i pilim olsem wanem taim em i lukluk i kam daun na lukim gutpela profet bilong em i slip aninit long diwai long ples drai nating na em i gat laik long i dai tasol? Yumi save pinis long bekim bilong dispela askim. Taim Elaija i slip indai, Jehova i salim wanpela ensel i kam long em. Isi tasol ensel i holim Elaija na kirapim em, na i tok: “Yu kirap na kaikai.” Elaija i mekim olsem, long wanem, ensel i redim pinis naispela bret em ol i bin wokim nau tasol na wara. Yu ting em i bin tok tenkyu long ensel? Baibel i tok em i kaikai na dring, na bihain em i slip gen. Yu ting em i bel hevi na em i no laik toktok? Yumi no save, tasol ensel i kirapim em namba tu taim gen, ating long apinun. Em i tokim gen Elaija olsem, “Yu mas kirap na kaikai,” na em i tok moa, “sapos nogat, yu no inap wokabaut i go long longpela rot.”​—⁠1 King 19:​5-7.

God i givim narakain save long dispela ensel, olsem na em i save long Elaija i laik i go we. Ensel i save tu olsem rot i longpela tru na Elaija i no inap wokabaut long strong bilong em yet. Man! Em i gutpela samting tru long mekim wok bilong wanpela God husat i save gut tru long ol mak yumi laik winim na skel bilong yumi long mekim ol samting, winim save bilong yumi yet! (Song 103:​13, 14) Olsem wanem dispela kaikai i helpim Elaija?

Baibel i tok: “Elaija i kirap na i kaikai na dring gen. Na dispela kaikai i strongim bodi bilong en na em i wokabaut long san na long nait inap 40 de. Na bihain em i kamap long maunten Horep o Sainai, dispela maunten bilong God.” (1 King 19:⁠8) Olsem Moses husat i bin stap 600 yia samting paslain long em, na Jisas husat i bin stap klostu 1000 yia bihain long em​—⁠Elaija i no bin kisim kaikai inap 40 de na 40 nait. (Kisim Bek 34:28; Luk 4:​1, 2) Dispela kaikai i no pinisim olgeta hevi bilong em, tasol kaikai i strongim em long narapela kain rot. Tingim, inap planti de na wik, klostu wan na hap mun, dispela lapun man i wokabaut long ples drai nating we i no gat rot!

Jehova i save lukautim ol wokboi bilong em long nau tu. Tasol em i no mekim olsem long rot bilong wokim mirakel na givim kaikai tru long ol, nogat, em i mekim olsem long wanpela narapela rot i gutpela moa. Em i save givim planti gutpela tok long ol wokboi bilong em. (Matyu 4:⁠4) Taim yumi kisim save long God long rot bilong Baibel na ol buk na nius em Baibel i as bilong en, dispela i strongim tru yumi long ol samting bilong spirit. Ol gutpela tok yumi kisim bilong strongim yumi, ol i no pinisim olgeta hevi bilong yumi, tasol ol inap helpim yumi long sanap strong na karim ol hevi i hatwok long karim. Na tu, dispela save i bringim yumi i go long “laip oltaim.”​—⁠Jon 17:⁠3.

Elaija i wokabaut klostu 320 kilomita i go kamap long maunten Horep, we bipo God Jehova long rot bilong wanpela ensel i bin toktok wantaim Moses long wanpela liklik diwai i paia, na bihain Jehova i bin mekim kontrak bilong Lo wantaim lain Israel long dispela hap. Elaija i hait insait long keiv.

Jehova i Strongim na Mekim Gut Bel Bilong Profet Bilong Em

Long Horep, “tok” bilong Jehova​—⁠long rot bilong wanpela ensel​—⁠i givim dispela askim: “Elaija, bilong wanem yu stap hia?” Ating ensel i givim dispela askim long pasin isi, long wanem, dispela i kirapim Elaija long kamapim tru bel na tingting bilong em. Na em i autim tru olgeta tingting bilong em! Em i tok: “God, Bikpela I Gat Olgeta Strong, mi save wok strong long mekim olgeta manmeri bilong Israel i bihainim yu wanpela tasol. Tasol ol i givim baksait long yu na brukim dispela kontrak yu bin mekim wantaim ol. Na ol i bin brukim ol alta bilong yu, na kilim i dai olgeta profet bilong yu. Na mi wanpela tasol i stap, na nau ol i laik kilim mi tu i dai.” (1 King 19:​9, 10) Tok bilong Elaija i kamapim tripela as na em i bin pilim bikpela bel hevi.

Namba wan, Elaija i pilim olsem wok bilong em i lus nating. Maski inap planti yia Elaija i bin “wok strong” long mekim wok bilong Jehova, na putim nem holi na lotu bilong God i go pas long ol narapela samting, Elaija i lukim olsem ol hevi i wok long i go bikpela moa. Ol manmeri i wok yet long lusim bilip na bikhet, na pasin bilong lotuim ol god giaman i wok long i go bikpela. Namba tu, Elaija i pilim olsem em i stap wanpis. Em i tok: “Mi wanpela tasol i stap,” i olsem em i laspela man long kantri long mekim yet wok bilong Jehova. Namba tri, Elaija i pret. Ol man i bin kilim i dai planti profet​—⁠ol wanwok bilong em​—⁠na em i save olsem nau ol bai kilim em tu i dai. Ating i hatwok liklik long Elaija long kamapim samting em i pilim long bel, tasol em i no larim pasin antap o sem samting i pasim em, nogat. Em i beten na kamapim bel bilong em long God, na long dispela rot em i olsem gutpela piksa long ol manmeri husat i stap gut long God.​—⁠Song 62:⁠8.

Olsem wanem Jehova i stretim pret na bel hevi bilong Elaija? Ensel i tokim Elaija long sanap long maus bilong keiv. Elaija i bihainim tok, maski em i no save long samting bai kamap. Wantu wanpela strongpela win i kirap! Ating win i pairap strong tru, long wanem, bikpela strong bilong en i brukim ol maunten na ol ston. Piksaim long tingting olsem Elaija i traim long karamapim ai bilong em, na long wankain taim em i holim strong saket bilong em, em win i wok long sakim nabaut. Na tu, em i mas balensim gut em yet bambai em i ken sanap strong, long wanem, graun i guria! Taim em i pret yet i stap, bikpela paia i kamap na em i mas surik i go bek insait long keiv bilong hait long hat bilong paia.​—⁠1 King 19:​11, 12.

Long dispela tripela samting, stori i kirapim yumi long tingim olsem Jehova i no stap insait long ol dispela narakain strong bilong graun. Elaija i save olsem Jehova i no wanpela God i stap long ol strong bilong graun, olsem Bal, em ol man i save lotuim em na litimapim em olsem “Man Bilong Bosim Ol Klaut,” o man bilong bringim ren. Jehova em i As bilong ol bikpela strong i bosim graun, tasol strong bilong em i winim tru olgeta samting em i bin wokim. Ples antap i no bikpela inap long em i ken i stap long en. (1 King 8:27) Tasol olsem wanem olgeta dispela samting i helpim Elaija? Tingim pret bilong em. God Jehova i stap long sait bilong em, na Jehova i gat bikpela strong tru bilong mekim ol samting, olsem na Elaija i no gat wok long pret long Ahap na Jesebel!​—⁠Song 118:⁠6.

Taim paia i pinis, ples i no gat pairap na Elaija i harim “nois olsem man i toktok isi tru.” Dispela nek i kirapim Elaija long kamapim gen tingting bilong em, na em i mekim olsem namba tu taim.b Ating dispela i mekim gut moa bel bilong em. Tasol ating Elaija i pilim bel isi tru long samting dispela “nois olsem man i toktok isi tru” i tokim em bihain. Jehova i tokim Elaija olsem em i gutpela tru long ai bilong Em. Olsem wanem Jehova i mekim olsem? God i kamapim klia ol samting em i tingting pinis long mekim bilong pinisim tru lotu bilong Bal long Israel. I klia tru olsem hatwok bilong Elaija i no lus nating, long wanem, laik bilong God i wok long kamap na i no gat wanpela samting inap stopim. Na tu, Elaija i insait long dispela laik, long wanem, Jehova i salim em i go bek long wok na tokim em long ol samting em i mas mekim.​—⁠1 King 19:​12-17.

Tasol olsem wanem long tingting bilong Elaija olsem em i stap wanpis? Jehova i mekim tupela samting long dispela. Namba wan, Jehova i tokim Elaija long makim Elisa olsem profet husat bai kisim ples bilong em. Dispela yangpela man bai kamap poroman na helpim bilong Elaija inap sampela yia. Man! Dispela tok i mekim gut tru bel bilong Elaija! Namba tu, Jehova i tokim Elaija long gutpela nius olsem: “Bai mi larim 7,000 manmeri i stap long Israel. Em ol dispela manmeri i bin bihainim mi tasol, na ol i no bin brukim skru long giaman god Bal na givim kis long ol piksa bilong en na lotu long em.” (1 King 19:18) Elaija i no stap wanpis. Ating em i belgut tru long harim olsem dispela 7,000 gutpela manmeri i sakim lotu bilong Bal. Ol i laik Elaija i mas mekim yet wok bilong em na stap gutpela piksa long pasin bilong stap gut yet long Jehova long dispela taim nogut. Ating Elaija i pilim tru ol dispela tok em i harim long wokman bilong Jehova, em dispela “nois olsem man i toktok isi tru.”

Olsem Elaija, ating yumi kirap nogut tru long bikpela strong bilong graun olsem win na ren samting, na i stret yumi pilim olsem. Olgeta samting bilong heven na graun i kamapim klia tru bikpela strong bilong Man Bilong Wokim olgeta samting. (Rom 1:20) Jehova i amamas long yusim bikpela strong bilong em long helpim ol wokman bilong em. (2 Stori 16:⁠9) Tasol God i toktok gut wantaim yumi long rot bilong Baibel. (Aisaia 30:21) Baibel i olsem dispela “man i toktok isi tru” na em rot we Jehova i stiaim yumi long nau, stretim yumi, strongim yumi, na tokim yumi olsem em i laikim yumi.

Olsem wanem? Elaija i larim dispela gutpela tok bilong Jehova long maunten Horep i strongim em? Yes! I no longtaim na dispela gutpela profet i gat strongpela bel husat i bin sanap strong na sakim ol pasin nogut bilong lotu giaman, em i kirap gen long mekim wok. Sapos yumi tu i bihainim tok bilong God long Baibel, em ol tok bilong “mekim isi bel,” yumi bai bihainim bilip bilong Elaija.​—⁠Rom 15:⁠4.

[Ol Futnot]

[Piksa long pes 19]

Jehova i blesim tru Elaija, long gutpela taim na taim nogut

[Piksa long pes 20]

Taim Elaija i bel hevi tru, em i kamapim bel bilong em long Jehova

[Piksa long pes 21]

Jehova i yusim bikpela strong bilong em long strongim na mekim gut bel bilong Elaija