Bai Yu Stap Gut Long God Olsem Elaija?
“Pastaim bai mi salim profet Elaija i kam long yupela na bihain dispela De [bilong Jehova] bai i kamap.”—MALAKAI 4:5.
1. Taim ol Israel i sindaun long Ples Promis inap 500 yia pinis, wanem bikpela hevi i kamap?
“WANPELA bikpela graun i gat planti gris na ol kaikai i save kamap gutpela tumas.” (Kisim Bek 3:7, 8) Em dispela graun Jehova i bin givim long ol Israel taim em i kisim bek ol long kalabus long Isip, long yia 1513 B.C.E. Tasol faiv handet yia i go pinis, na nau bikpela hangre tru i kamap long hap bilong Israel i gat 10-pela lain long en. I hatwok tru long painim wanpela hap grinpela gras. Ol animal i wok long i dai, na i no gat ren i kam daun inap 3-pela yia hap. (1 King 18:5; Luk 4:25) Wanem samting i mekim na dispela bikpela hevi i kamap?
2. Wanem as bilong dispela bikpela hevi i painim lain Israel?
2 As bilong dispela bikpela hevi, em ol i bin givim baksait long Jehova na ol i lotuim narapela god. King Ahap i kalapim Lo bilong God na em i maritim Jesebel, em pikinini meri bilong wanpela king bilong ol Kenan, na em i larim dispela meri i kamapim pasin bilong lotuim Bal long Israel. Na samting nogut tru Ahap i mekim, em i wokim wanpela haus lotu bilong dispela god giaman long Samaria, em nambawan biktaun bilong 10-pela lain. Dispela meri i bin grisim ol Israel na ol i bilip olsem pasin bilong lotuim Bal bai helpim gaden bilong ol long kamapim planti kaikai! Tasol olsem Jehova i toksave pinis long ol, nau ol i laik ‘i dai long dispela gutpela kantri Bikpela i givim long ol.’—Lo 7:3, 4; 11:16, 17; 1 King 16:30-33.
Wanpela Traim Long Husat i God Tru
3. Elaija i tok wanem long as tru bilong dispela hevi i painim ol Israel?
3 Taim dispela bikpela hangre i kamap, gutpela profet bilong God, em Elaija, em i tokim King Ahap: “Mi wokman bilong God, Bikpela bilong yumi Israel. . . . Long nem bilong em, mi tokim yu stret, bai ren na wara bilong nait i no ken kam daun long graun inap long sampela yia. Na bai i stap olsem inap long taim mi tok.” (1 King 17:1) Taim king i lukim pinis truim bilong dispela toksave, king i sutim tok long Elaija olsem em yet i bin mekim na God i no orait moa long ol Israel. Tasol Elaija i tok, em asua bilong Ahap wantaim lain bilong papa bilong em, long wanem, ol i bin givim baksait long Jehova na ol i lotuim Bal. Orait, bilong stretim dispela bikpela tok i kamap, profet bilong Jehova i tokim Ahap long salim tok long olgeta manmeri bilong Israel na ol i mas bung long maunten Karmel wantaim dispela 450 profet bilong Bal na 400 profet bilong god meri Asera. Ahap wantaim lain bilong em ol i kam bung long dispela hap—ating ol i ting olsem dispela bai mekim na taim nogut bilong bikpela san bai i pinis. Tasol Elaija i tingim narapela samting i bikpela moa. Em i tok: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela [Jehova] em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.” Ol Israel i no bekim wanpela tok.—1 King 18:18-21.
4. Bilong stretim dispela bikpela tok long husat i God tru, Elaija i tok long mekim wanem?
4 Inap planti yia pinis ol Israel i wok long bungim lotu bilong Jehova wantaim lotu bilong Bal. Bilong stretim dispela tok long husat i God tru, nau Elaija i tokim ol long mekim wanpela samting olsem resis. Em bai kilim wanpela yangpela bulmakau man na redim bilong wokim ofa, na ol profet bilong Bal tu bai redim wanpela. Orait nau Elaija i tok: “Yupela i ken prea long god bilong yupela na mi bai prea long Bikpela [Jehova]. Na wanem god i harim prea na i salim paia i kam daun na i kukim dispela ofa, orait em tasol em i God tru.” (1 King 18:23, 24) Man! Tingim paia i kam daun long heven taim wanpela i beten pinis!
5. Wanem samting i kamap na dispela i kamapim klia olsem pasin bilong lotuim Bal i no inap helpim ol liklik?
5 Orait Elaija i singautim ol profet bilong Bal long go pas long redim ofa. Ol i kilim na redim wanpela bulmakau man bilong wokim ofa na ol i putim antap long alta. Orait nau ol i kalap kalap raunim dispela ofa na ol i beten olsem: “Bal, mipela i laik bai yu mas harim beten bilong mipela.” Ol i mekim olsem ‘kirap long moningtaim i go inap long belo.’ Elaija i tok bilas long ol olsem: “Traim beten strong moa.” Ating Bal i tingting long wanpela samting i stap na em i no harim ol, o ‘nogut em i slip i stap na ol i mas kirapim em’! Orait ol profet i singaut strong moa. Man! Lukim samting ol i mekim! Ol i kisim ol bainat na ol i kirap katim nabaut skin bilong ol na blut bilong ol i go daun. Na bikpela pairap nogut tru i kamap taim dispela 450 man i singaut strong moa yet! Tasol i no gat bekim long beten bilong ol.—1 King 18:26-29.
6. Elaija i mekim wanem bilong redim ol samting bilong dispela resis long husat i God tru?
6 Orait nau em i taim bilong Elaija. Em i wokim gen alta bilong Jehova na em i wokim bikpela baret i raunim alta, na nau em i putim ofa antap long en. Orait nau em i tokim ol manmeri long kapsaitim wara antap long paiawut na mit bilong ofa. Ol i kapsaitim 12-pela bikpela sospen wara antap long alta, na wara i pulap long dispela baret. Ating bel bilong ol man i no stap isi taim Elaija i beten olsem: “God [Jehova], Bikpela bilong Abraham na Aisak na Israel, nau mi laik bai yu soim ol manmeri olsem, yu tasol yu God bilong Israel. Na tu yu ken soim ol olsem, mi wokman bilong yu na mi bihainim tok bilong yu tasol na mi mekim olgeta dispela samting. Bikpela [Jehova], harim beten bilong mi na mekim olsem mi askim yu, na bai dispela ol manmeri i ken save, yu tasol yu God tru na yu wok long tanim bel bilong ol i kam bek long yu.”—1 King 18:30-37.
7, 8. (a) Jehova i harim beten bilong Elaija na i mekim wanem? (b) Ol dispela samting i kamap long maunten Karmel i mekim wanem gutpela wok?
7 Jehova i harim beten bilong Elaija na em “i salim paia i kam daun. Na paia i kukim tru dispela ofa na ol paiawut na ol ston bilong alta na graun long arere bilong alta. Na wara long baret tu i drai olgeta.” Ol manmeri i lukim dispela samting na ol i pundaun long pes bilong ol long graun na ol i tok: “Bikpela [Jehova] tasol em i God tru. Bikpela [Jehova] tasol em i God tru.” (1 King 18:38, 39) Orait nau Elaija i kirap na em i tokim ol: “Holimpas olgeta profet bilong Bal. Yupela i no ken larim wanpela i ranawe.” Na ol i kisim ol dispela profet i go daun long arere bilong wara Kison na kilim ol i dai. Orait nau blakpela smok bilong ren i wok long pasim ples antap, na bihain bikpela ren i kam daun. Em nau, dispela taim nogut bilong bikpela san i pinis!—1 King 18:40-45; skelim wantaim Lo 13:1-5.
8 Man! Em wanpela bikpela de tru, a? Jehova i win tru long dispela resis bilong save husat i God tru. Na tu, dispela samting i bin kamap em i kirapim planti Israel long tanim bel na kam bek long God. Long dispela rot na ol narapela rot tu, Elaija i kamapim long ples klia olsem em i wanpela profet tru, na wok em i mekim i olsem piksa bilong makim samting bai kamap bihain.
“Profet Elaija” Bihain Bai i Kam?
9 Bihain, long rot bilong Malakai, God i tok profet olsem: “Bai mi salim profet Elaija i kam long yupela na bihain dispela De [bilong Jehova] bai i kamap. Na bai em i mekim ol papa na ol pikinini i kamap wanbel, na bai mi no ken bagarapim kantri bilong yupela.” (Malakai 4:5, 6) Elaija i bin stap olsem 500 yia samting paslain long taim Jehova i bin mekim dispela tok. Dispela em i wanpela tok profet, olsem na ol Juda i stap long taim bilong ol aposel ol i wetim Elaija i kam bilong truim dispela tok profet.—Matyu 17:10.
10. Husat dispela Elaija i mas kam bihain? Yumi save olsem wanem?
10 Orait, husat dispela Elaija i mas kam bihain? Krais Jisas i kamapim klia dispela man taim em i tok: “Stat long taim Jon Bilong Baptais i autim tok na i kam inap nau, ol strongpela man . . . i bin wok strong long kisim kingdom bilong heven . . . Olgeta profet, na buk bilong lo tu, ol i bin autim tok bilong God inap long taim Jon i kamap. Na sapos yupela i laik harim, orait harim. Buk bilong God i tok olsem profet Elaija i mas i kam, em i tok long Jon tasol.” Tru tumas, Jon Bilong Baptais em dispela man Elaija i makim na Baibel i tok profet long em bai i kam. (Matyu 11:12-14; Mak 9:11-13) Wanpela ensel i bin tokim papa bilong Jon, em Sekaraia, olsem Jon bai kisim “pasin na strong bilong Elaija,” na em bai “redim ol man na ol i stap redi long Bikpela i kam.” (Luk 1:17) Baptais Jon i bin givim long ol man em i wanpela mak bilong kamapim long ples klia olsem man i tanim bel pinis na em i pilim tru ol rong em i bin mekim long Lo, em i bilong bringim ol Juda i kam long Krais. (Luk 3:3-6; Galesia 3:24) Olsem na dispela wok bilong Jon i “redim ol man na ol i stap redi long Bikpela i kam.”
11. Long Pentikos, Pita i tok wanem long De bilong Jehova? Em i bin kamap long wanem taim?
11 Wok bilong Jon Bilong Baptais olsem “Elaija” i kamapim klia olsem wanpela “bikpela De” bilong Jehova i kam klostu pinis. Aposel Pita tu i makim olsem de bilong God long bagarapim ol birua bilong em na lukautim lain bilong em bambai ol i no ken bagarap, dispela de i klostu pinis. Pita i tokaut olsem ol mirakel i bin kamap long de Pentikos bilong yia 33 C.E. i truim tok profet bilong Joel olsem God bai kapsaitim spirit bilong em i kam daun. Pita i kamapim klia olsem dispela samting bai kamap pastaim na bihain De bilong Jehova bai kamap. (Aposel 2:16-21; Joel 2:28-32) Orait, long yia 70 C.E. Jehova i truim Tok bilong em na em i kirapim ol ami bilong Rom long givim strafe bilong God long dispela lain i bin sakim Pikinini bilong em.—Daniel 9:24-27; Jon 19:15.
12. (a) Pol na Pita i tok wanem long wanpela De bilong Jehova bai kamap bihain? (b) Bilong wanem wanpela samting i mas kamap, olsem wok bilong Elaija i makim?
12 Tasol i gat narapela samting i mas kamap bihain long yia 70 C.E. Taim aposel Pol i toktok long De bilong Jehova bai kamap, em i toktok tu long taim Krais Jisas bai kam i stap. Na tu, aposel Pita i toktok long dispela de taim em i stori long “nupela skai na nupela graun” bihain bai kamap. (2 Tesalonaika 2:1, 2; 2 Pita 3:10-13) Yumi mas tingim dispela saming: Jon Bilong Baptais i bin mekim wankain wok olsem bilong Elaija paslain long taim De bilong Jehova i kamap long yia 70 C.E. Dispela olgeta samting wantaim i makim klia olsem wanpela samting moa i mas kamap, kain olsem dispela wok Elaija i bin mekim. Wanem dispela samting?
Ol i Gat Pasin Olsem Bilong Elaija
13, 14. (a) Ol wok bilong Elaija na wok bilong ol Kristen bilong nau em God i bin makim, ol i wankain olsem wanem? (b) Ol lotu i holim nating nem Kristen ol i bin mekim wanem?
13 Wok bilong Elaija i makim wok bilong Jon Bilong Baptais, na em i makim tu ol Kristen em God i bin makim ol long spirit holi na ol i stap nau long dispela taim bilong planti hevi, klostu long taim De bilong Jehova i laik kamap. (2 Timoti 3:1-5) Ol i gat pasin na strong olsem bilong Elaija, olsem na ol i strong long helpim lotu i tru. Na i bikpela samting tru long ol i bin mekim olsem! Bihain long taim ol aposel bilong Krais i dai pinis, sampela lain i lusim lotu Kristen tru na ol i kisim ol bilip giaman, olsem planti man long Israel i bin mekim long taim bilong Elaija, em ol i lotuim Bal. (2 Pita 2:1) Ol lain i tok ol i Kristen ol i bungim ol bilip bilong lotu Kristen wantaim ol bilip na pasin bilong ol lotu giaman. Olsem: Ol i kisim wanpela bilip haiden olsem yumi ol man i gat wanpela tewel i no save dai, na dispela bilip i no stap long Baibel. (Saveman 9:5, 10; Esekiel 18:4) Ol dispela lotu i holim nating nem Kristen ol i no kamapim moa nem bilong Jehova, em wanpela tasol i God tru. Ol i save lotuim wanpela God Triwan. Na tu, ol i kisim pasin olsem bilong ol lain bilong lotuim Bal—ol i brukim skru long ol piksa bilong Jisas na mama bilong em Maria. (Rom 1:23; 1 Jon 5:21) Na i no dispela samting tasol ol i mekim.
14 Bihain long yia 1800 samting, ol bikman bilong ol lotu i gat nem Kristen ol i tokaut olsem ol i gat tupela tingting long planti tok bilong Baibel. Olsem: Ol i sakim tok bilong Buk Stat i stori long taim God i bin wokim olgeta samting, na ol i litimapim tok bilong evolusen, olsem olgeta samting i kamap nating tasol, na ol i tok, dispela i “stret wantaim ol tok bilong saiens.” Dispela i pait wantaim tok bilong Krais Jisas na ol aposel bilong em. (Matyu 19:4, 5; 1 Korin 15:47) Tasol ol Kristen bilong nau em God i bin makim, ol i wankain olsem Jisas wantaim ol disaipel bilong em long bipo—ol i holim strong ol tok bilong Baibel olsem God i bin wokim olgeta samting.—Stat 1:27.
15, 16. Ol lain i holim nating nem Kristen ol i gat bikpela hangre bilong spirit, tasol wanem lain i save kisim kaikai bilong spirit long olgeta taim? Ol i save kisim long wanem rot?
15 Orait, “taim bilong las de” i kirap na long dispela taim wanpela bikpela hangre bilong spirit i kamap insait long ol lain i holim nating nem Kristen. (Daniel 12:4; Amos 8:11, 12) Tasol liklik lain Kristen em God i bin makim, oltaim ol i save kisim kaikai bilong spirit em God i givim long ol long taim stret, olsem Jehova i bin givim kaikai long Elaija taim bikpela hangre i bin kamap long taim bilong em. (Matyu 24:45; 1 King 17:6, 13-16) Bipo ol dispela gutpela wokboi bilong God ol i holim nem olsem Intenesenel Sumatin Bilong Baibel, tasol bihain ol i kisim nem i stap long Baibel, olsem Witnes Bilong Jehova.—Aisaia 43:10.
16 Elaija i bihainim pasin i stret long nem bilong em, insait bilong en i olsem “God Bilong Mi Em Jehova.” Wastaua, em nius bilong lain wokboi bilong Jehova long graun, oltaim em i bin kamapim nem bilong God. Namba tu Wastaua ol i bin wokim (Ogas 1879), i tokaut olsem Jehova i helpim dispela nius. Dispela nius na ol narapela buk samting bilong Sosaiti Wastaua i kamapim long ples klia ol bilip giaman bilong ol lotu i holim nating nem Kristen na ol narapela hap bilong Bikpela Babilon, em olgeta lotu giaman bilong graun, na ol dispela buk na nius i holim strong tok i tru bilong Baibel, em Tok Bilong God.—2 Timoti 3:16, 17; KTH 18:1-5.
Stap Gut Long God Long Taim Bilong Traim
17, 18. Taim ol i kilim i dai ol profet bilong Bal, Jesebel i mekim wanem? Tasol Elaija i kisim wanem helpim?
17 Taim ol bilip giaman bilong ol dispela lotu i kamap ples klia, ol pris pasto i mekim wankain samting olsem Jesebel i bin mekim taim em i harim olsem Elaija i bin kilim i dai ol profet bilong Bal. Jesebel i salim wanpela tok long dispela gutpela profet bilong Jehova, olsem em bai kilim i dai Elaija. Dispela i no wanpela tok nating—Jesebel i bin kilim i dai planti profet bilong God. Elaija i pret na em i ranawe i go long Berseba, long hap bilong saut-wes. Em i lusim wokboi bilong em i stap long dispela ples na em i wokabaut i go moa, long hap bilong ples drai, na em i beten long God i ken larim em i dai. Tasol God Jehova i no bin lusim profet bilong em. Wanpela ensel i kamap long Elaija bilong helpim em na bai em i ken redi long wokabaut longwe i go long maunten Horep. Ensel i givim kaikai long em na dispela i strongim em long wokabaut inap 40 de, inap olsem 300 kilomita samting. Long Horep, God i toktok wantaim Elaija taim Em i kamapim pinis bikpela strong bilong em insait long bikpela win, na guria, na paia. Jehova i no stap insait long ol dispela samting. Ol i olsem mak bilong kamapim klia spirit holi o strong bilong em. Orait nau Jehova i toktok wantaim profet bilong em. Ating dispela samting i bin kamap i strongim tru Elaija. (1 King 19:1-12) Na yumi tu, olsem wanem sapos ol birua bilong trupela lotu i tok long bagarapim yumi na yumi pret liklik, olsem Elaija i bin mekim? Ol samting i bin painim em i mas helpim yumi long save, Jehova i no save lusim lain bilong em.—1 Samuel 12:22.
18 God i kamapim klia olsem Elaija i gat sampela wok profet i stap yet. Na maski Elaija i ting olsem em wanpela tasol i save lotuim God tru long Israel, Jehova i soim em olsem i gat 7,000 man ol i no bin brukim skru long Bal. Orait nau God i salim Elaija i go bek long wok bilong em. (1 King 19:13-18) Olsem ol i bin mekim long Elaija, ol birua bilong trupela lotu ol inap raunim yumi. Ol man inap mekim nogut tru long yumi, olsem Jisas i tok profet long en. (Jon 15:17-20) Na sampela taim ating yumi tingting planti. Tasol yumi inap bihainim pasin bilong Elaija—God i bin givim tok long em bilong strongim em, na bihain em i stap gut long wok bilong Jehova na em i no lusim dispela wok.
19. Long taim bilong Namba Wan Pait, wanem samting i bin painim ol Kristen em God i bin makim?
19 Long taim bilong Namba Wan Pait, ol man i mekim nogut tru long ol Kristen God i bin makim, olsem na sampela Kristen ol i pret na lusim wok bilong autim tok. Ol i bin popaia na ting wok bilong ol long graun i pinis. Tasol Jehova i no rausim ol. Em i marimari long ol na lukautim ol long kaikai, olsem em i bin givim kaikai long Elaija. Olsem Elaija, ol Kristen i bin stap gut long God ol i kisim ol tok bilong em bilong stretim ol na ol i kamap strong gen. Ai bilong ol i klia na ol inap lukim gutpela wok tru ol i kisim bilong autim tok bilong Kingdom.
20. Long nau, ol man i stap gut long God olsem Elaija, ol i kisim wanem gutpela wok?
20 Taim Jisas i mekim tok profet long em bai kam i stap, em i kolim wanpela bikpela wok bai kamap long olgeta hap bilong graun, na dispela wok bai pinis pastaim na bihain dispela pasin nogut bilong nau bai pinis. (Matyu 24:14) Long nau ol Kristen God i bin makim ol i mekim dispela wok, na planti milion poroman bilong ol i helpim ol long mekim—em dispela lain ol i wet long kisim laip long Paradais bai kamap long graun. Ol man i stap gut long God olsem Elaija, ol tasol inap holim dispela gutpela wok bilong autim tok bilong Kingdom.
Stap Gut Long God Olsem Elaija
21, 22. (a) Ol Kristen God i bin makim ol i go pas long mekim wanem wok? (b) Ol i gat wanem helpim bilong mekim dispela wok? Bilong wanem ol i mas i gat dispela helpim?
21 Liklik hap lain Kristen tru em God i bin makim na ol i stap yet long graun, ol i wok strong olsem Elaija na ol i mekim gut wok bilong ol long lukautim ol wok samting bilong King Krais Jisas hia long graun. (Matyu 24:47) Na inap 60 yia pinis, God i bin mekim wok long dispela liklik lain na ol i go pas long wok bilong mekim ol manmeri i kamap disaipel—em ol manmeri God i bin givim gutpela tok promis long ol long laip i stap oltaim long Paradais bai kamap long graun. (Matyu 28:19, 20) Ol dispela planti milion manmeri ol i ken tenkyu tru olsem dispela liklik hap lain God i bin makim ol i wok strong na stap gut long wok bilong ol!
22 Ol man i mekim dispela wok bilong autim tok bilong Kingdom ol i gat sin long skin bilong ol, tasol ol i mekim dispela wok long strong Jehova i givim long ol man i beten na wet long em. “Elaija em i man wankain olsem yumi.” Disaipel Jems i bin tok olsem taim em i toktok long gutpela pasin bilong Elaija long beten—Jems i laik kamapim klia olsem taim stretpela man i beten, orait beten bilong em i gat bikpela strong. (Jems 5:16-18) Elaija i no bin autim tok profet o wokim ol mirakel long olgeta taim. Em i gat ol wankain tingting na laik bilong bel olsem yumi, na em i gat ol liklik pasin kranki olsem yumi, tasol em i bin stap gut long wok bilong God. Orait God i save helpim na strongim yumi tu, olsem na yumi inap i stap gut long wok bilong God olsem Elaija i bin mekim.
23. Olsem wanem i gat gutpela as na yumi mas stap gut long wok bilong God na tingim gutpela samting bai kamap?
23 I gat gutpela as na yumi mas i stap gut long wok bilong God na tingim gutpela samting bai kamap. Tingim Jon Bilong Baptais, em i bin mekim wanpela wok kain olsem wok bilong Elaija, paslain long taim “bikpela De” bilong Jehova i kamap long yia 70 C.E. Ol Kristen God i bin makim ol i kisim pasin na strong bilong Elaija, na God i givim wankain wok long ol na ol i bin mekim dispela wok long olgeta hap bilong graun. Dispela i kamapim long ples klia tru olsem “bikpela De” bilong Jehova i klostu pinis!
Bai Yu Bekim Olsem Wanem?
◻ Wanem samting i kamap long maunten Karmel na i kamapim long ples klia olsem Jehova em i God tru?
◻ Husat dispela “Elaija i mas i kam”? Em i bin mekim wanem?
◻ Olsem wanem ol Kristen God i bin makim ol i kamapim klia olsem ol i gat pasin bilong Elaija?
◻ Olsem wanem yumi inap i stap gut long wok bilong God olsem Elaija?
9. Wanem tok profet i stap long Malakai 4:5, 6?
[Blok long pes 15]
Elaija i Go Antap Long Wanem heven?
“TUPELA [elaija na elisa] i wok long toktok na wokabaut i go, na wantu wanpela paia i kamap namel long tupela. Insait long dispela paia, tupela i lukim ol hos i pulim wanpela karis. Orait na wanpela raunwin i kisim Elaija i go long heven.”—2 King 2:11.
Long dispela ves, dispela tok “heven” i makim wanem samting? Sampela taim em i makim ples spirit em God wantaim ol ensel i save stap long en. (Matyu 6:9; 18:10) Na “heven” inap makim skai. (Lo 4:19) Na sampela Baibel i kolim dispela nem bilong makim ples antap klostu long graun, em ol pisin i save raun long en na i gat win.—Song 78:26; Matyu 6:26.
Orait, profet Elaija i bin go antap long wanem heven? Yumi ken ting God i bin kisim em i go antap liklik klostu long graun na bringim em i go long narapela hap bilong graun. Sampela yia bihain long dispela, Elaija i stap yet long graun, long wanem, em i bin raitim wanpela pas i go long King Jehoram bilong Juda. (2 Stori 21:1, 12-15) Bihain Krais Jisas i strongim dispela tok olsem Elaija i no bin go antap long ples spirit em God Jehova i stap long en. Krais Jisas i tok: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun,” em Jisas yet. (Jon 3:13) Namba wan taim rot i op long ol man bilong graun inap i go long heven, em bihain long taim Krais Jisas i dai na kirap bek na go antap.—Jon 14:2, 3; Hibru 9:24; 10:19, 20.