Ol Man i Askim . . .

▪ Nogat. Baibel i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”​—⁠Aposel 10:​34, 35.

Tingting bilong God long dispela samting i narapela kain tru long tingting bilong ol man i gat sin. Planti i ting olsem wanpela lain (planti taim em lain bilong ol yet) i winim ol narapela lain. Dispela kain tingting em olsem tingting bilong Charles Darwin, em i tok: “Bihain, . . . ol gutpela man i gat save bai pinisim na senisim ol welman i no gat save.” Sori tru, planti man i kisim bagarap long han bilong ol man em ol i ting lain bilong ol i winim ol narapela lain.

I stret ol man i ting wanpela lain i winim ol narapela lain? Olsem wanem? Ol wok saiens i kamapim olsem jin bilong wanpela lain i winim jin bilong ol narapela lain? Nogat tru. Saveman na profesa bilong Oxford University, Bryan Sykes, i tok: “Taim yumi skelim jin bilong ol man, i no gat as na yumi ken ting olsem wanpela lain i winim ol narapela lain. . . . Planti taim ol i askim mi olsem i gat jin bilong ol man Grik o i gat jin bilong ol man Itali, tasol nogat. . . . Jin bilong olgeta manmeri i klostu wankain.”

Ol dispela wok painimaut i stret wantaim ol tok yumi ritim long Baibel. Baibel i skulim yumi olsem God i bin wokim wanpela man na wanpela meri, na olgeta narapela manmeri ol i pikinini bilong tupela. (Stat 3:20; Aposel 17:26) Olsem na long tingting bilong God, i gat wanpela lain manmeri tasol.

Jehova i no tingim olsem skin kala o lukluk bilong man i bikpela samting. Nogat. Samting Jehova i save tingim olsem bikpela samting, em bel na tingting bilong man. Em i tok: “Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:⁠7) Taim yumi tingim dispela, em inap strongim tru yumi. Olsem wanem em inap strongim yumi?

Maski yumi bilong wanem skin kala, planti bilong yumi i no amamas long sampela samting long lukluk bilong yumi, tasol yumi yet i no inap mekim wanpela samting bilong senisim dispela. Tasol yumi inap senisim ol samting i bikpela samting tru​—⁠em tingting na filings bilong bel bilong yumi. (Kolosi 3:​9-11) Sapos yumi skelim gut yumi yet, ating bai yumi luksave olsem sampela taim yumi pilim olsem yumi winim ol narapela lain, o ol narapela lain i winim yumi. Tasol tupela tingting wantaim i no stret wantaim tingting bilong God, olsem na yumi mas rausim dispela kain tingting long bel bilong yumi.​—⁠Song 139:​23, 24.

Taim yumi wok strong long kisim tingting bilong Jehova long yumi yet na ol narapela, yumi ken save tru olsem em bai helpim yumi. Baibel i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Stori 16:⁠9) Dispela em i tru, maski yumi bilong wanem lain.