Ol Yangpela i Laik Save . . .
Olsem Wanem Long Pasin Bilong Hambak Long Lain na Skin?
“Olgeta taim wanpela wanskul bilong mi i save toktok long skin na lain bilong ol narapela, long planti ol toktok bilong em, em i save tok em i winim ol narapela lain.”—Tanya i gat 17 krismas em i tok olsem.
EM PASIN bilong yumi ol man long litimapim famili bilong yumi, o pasin bilong ples, o tok ples, o as ples bilong yumi. Wanpela yangpela meri i gat 15 krismas, nem bilong em Phung, em i tok, “Mi bilong Vietnam, mi amamas tru long pasin bilong ples bilong mipela.”
Planti taim pasin bilong litimapim lain na ples i save kamapim pasin olsem lain bilong narapela skin i birua long lain bilong narapela skin. Olsem na dispela pasin bilong litimapim lain na ples inap kamap olsem wanpela samting nogut tru bilong bagarapim pasin bilong stap gut wantaim ol narapela lain, maski ol man i giaman long mekim gutpela pasin bilong haitim. Krais Jisas i tok: “Man em i save autim kain tingting i pulap long bel bilong en.” (Matyu 12:34) Planti taim, pasin bilong tingim wanpela lain i winim ol narapela lain—o pasin bilong no laik long narapela lain—dispela inap kamap ples klia na kamapim ol hevi.
Sampela taim pasin bilong litimapim lain o ples em inap kamapim pasin birua. Long nau dispela pasin i as bilong ol bikpela na ol liklik pait, na bilong “pasin bilong bagarapim na pinisim wanpela lain olgeta.” Tasol i no olsem yu mas lukim long ai bilong yu yet pasin bilong kilim ol man i dai bambai yu ken save long samting nogut pasin bilong litimapim lain o ples inap kamapim. Yu inap lukim dispela pasin long skul, long ples wok, o long hap yu stap long en? Wanpela yangpela Kristen nem bilong em Melissa, em i tok, “Tru tumas, yumi inap lukim. Sampela wanskul bilong mi i save tok bilas long ol narapela pikinini taim toktok bilong ol i narakain liklik na ol i tok ol i winim ol.” Na Tanya i tok: “Long skul mi bin harim ol pikinini i tok stret long ol narapela olsem, ‘Mi winim yu.’ ” Long wanpela stadi long Amerika, klostu 50 pesen bilong ol man ol i bin givim askim long ol, ol i tok long yia i go pinis sampela kain hevi bilong pasin bilong daunim ol narapela lain i bin painim ol. Wanpela yangpela nem bilong em Natasha, em i tok: “Long skul bilong mi, hevi bilong narapela lain i birua long narapela lain em i go bikpela.”
Sapos yu sindaun long wanpela hap em planti manmeri bilong ol narapela kantri i kam i stap long en na nau bikpela senis i wok long kamap long skul, o long ol hap klostu long yu, o long kongrigesen Kristen, orait olsem wanem, yu no amamas tumas long dispela samting? Sapos olsem, ating pasin bilong litimapim lain o ples em i bikpela samting long tingting bilong yu, maski yu no bin ting olsem.
Tingting i Stret na Tingting i No Stret
Olsem wanem? Dispela i makim olsem long olgeta taim pasin bilong litimapim lain na skin i no stret? Nogat, i no olsem. Baibel i kamapim olsem i gat taim bilong bihainim stretpela pasin bilong amamas long wanpela lain samting. Taim aposel Pol i raitim pas i go long ol Kristen long Tesalonaika, em i tok: “Taim mipela i go nabaut long ol sios bilong God, mipela i save litimapim nem bilong yupela.” (2 Tesalonaika 1:4) Na taim man i amamas long em yet inap long skel tasol, em i gutpela. (Rom 12:3) Olsem na i no gat rong sapos sampela taim man i litimapim lain, famili, tok ples, kala bilong skin, na ples bilong em. Tru tumas, God i no laik bai yumi sem long ol dispela samting. Taim ol man i ting aposel Pol em i wanpela man nogut bilong Isip, em i no pret long tok: “Mi man bilong lain Juda. Mi bilong taun Tarsus long distrik Silisia. Taun bilong mi em i gat biknem.”—Aposel 21:39.
Tasol taim man i litimapim tumas lain o ples bilong em o dispela i mekim na man i tingim ol narapela i olsem samting nating, dispela inap kamapim samting nogut. Baibel i tok: “Man i save aninit long Bikpela, em i no save laikim ol pasin nogut. Mi no laik tru long pasin bilong bikhet na pasin bilong man i litimapim nem bilong em yet na pasin bilong mekim olkain samting nogut na pasin bilong tok giaman.” (Sindaun 8:13) Na Sindaun 16:18 i tok: “Pasin bilong hambak na litimapim nem bilong yu yet bai i mekim yu i pundaun na bagarap.” Olsem na God i no laik tru long man i hambak na i tok lain bilong em i winim ol narapela lain.—Skelim wantaim Jems 4:16.
Dispela Pasin i Kamap Olsem Wanem?
Wanem samting i save mekim na ol man i save litimapim tumas lain o ples bilong ol? Wanpela buk (Black, White, Other), em Lise Funderburg i raitim, i tok: “Planti manmeri i kisim tingting long narapela lain na ples long namba wan taim (na em i stap longtaim) long papamama na famili bilong ol.” Sori tru, planti taim tingting ol yangpela i save kisim long sampela papamama i kranki o i no stret. Ol i save tokim stret ol yangpela olsem ol lain bilong ol yet i winim ol lain bilong narapela skin. Planti taim, ol yangpela i save lukim olsem papamama bilong ol i no save toktok o wok wantaim ol manmeri bilong narapela skin. Dispela pasin tu inap stiaim tru tingting bilong ol. Sampela stadi i kamapim klia olsem maski ol yangpela na papamama i gat narapela narapela tingting long ol samting bilong klos o musik, planti yangpela i gat wankain tingting olsem bilong ol papamama long ol lain bilong narapela skin na ples.
Man inap kisim tingting kranki tu long ol man bilong narapela lain sapos ol i bin mekim nogut long em. (Saveman 7:7) Ol tisa i bin kisim save olsem, ol pikinini i kamap long ol lain i no gat nem, planti taim ol i ting ol i samting nating. Bilong stretim dispela hevi, sampela tisa i bin kamapim ol buk bilong skulim ol pikinini long ol samting bilong lain bilong ol. Tasol sampela lain bilong skelim dispela samting ol i tok, dispela pasin bilong litimapim wanpela lain o skin em i save kamapim pasin birua.
Ol samting i bin painim man, dispela tu inap mekim na man i no gat stretpela tingting long ol man bilong narapela skin. Sapos wanpela man i kros o pait samting wantaim man bilong narapela skin, dispela inap mekim na em inap kisim tingting olsem olgeta man bilong dispela lain i nogut. Na tu, ol man inap kisim tingting nogut taim ol niusman i kamapim stori bilong pasin birua i kamap namel long ol lain bilong narapela narapela skin, o polis i paitim nogut wanpela man, o wanpela lain i mats bilong kamapim bel hevi samting, o taim ol i mekim ol tok bilong daunim ol narapela lain.
Wanpela Lain i Winim Narapela—Em Wanpela Stori Nating
Olsem wanem long tok bilong sampela olsem i stret lain bilong ol i stap nambawan na i winim ol narapela? Dispela tingting bilong ol man olsem yumi inap brukim ol manmeri i go long kain kain lain na skin em i no gat as bilong en. Wanpela stori bilong nius Newsweek i tok: ‘Ol saientis i bin skelim dispela samting, tasol ol i no save gut olsem wanem ol inap makim stret husat i insait long narapela narapela lain.’ Tru, yumi inap “lukim olsem kala bilong skin, gras, ai o nus bilong ol man i narapela narapela.” Tasol nius Newsweek i tok, ‘ol dispela samting i no mekim na ol man i narakain tru—maski ol saientis i wok strong, ol i no bin painim wanpela samting i makim stret olsem wanpela lain i narapela kain long narapela lain. . . . Planti saientis em ol i mekim wok bilong skelim dispela samting ol i ting, pasin bilong tilim ol man long narapela narapela lain, ol man i save mekim dispela samting long tingting bilong ol yet tasol—pasin bilong pret na tingting nogut long narapela lain na ol stori nating i as bilong en.’
Maski sapos ol saientis inap kamapim klia olsem wanem wanpela lain i narakain long narapela lain, dispela tingting olsem i gat wanpela lain i gutpela tru na ol man i insait long en ol i bilong dispela lain tasol, dispela tingting i no gat as bilong en. Buk The New Encyclopædia Britannica i tok: ‘I no gat wanpela lain ol i bilong dispela lain tasol, olgeta lain i stap long nau ol i olsem hapkas.’ Maski ol man i gat wanem wanem tingting, Baibel i skulim yumi olsem, “long wanpela tumbuna tasol [God] i bin mekim olgeta lain manmeri i kamap.” (Aposel 17:26) Maski yumi narapela narapela skin, gras, na pes, yumi olgeta i wanpela lain manmeri tasol. Yumi olgeta i wanblut, long wanem, yumi bin kamap long wanpela tumbuna, em Adam.
Ol Juda bilong bipo ol i save gut olsem olgeta lain i bin kamap long wanpela tumbuna tasol. Tasol maski ol i kamap Kristen pinis, sampela i bin holim yet tingting olsem ol i nambawan na winim ol manmeri i no bilong lain Juda—na ol Kristen i no bilong lain Juda tu! Aposel Pol i daunim tru dispela tingting taim em i kamapim tok i stap long Rom 3:9: “Sin i karamapim yumi olgeta, yumi Juda na Grik wantaim.” Olsem na no gat wanpela lain inap tok olsem ol i stap gutpela long ai bilong God winim ol narapela. Tru tumas, taim ol man i bilip long Krais Jisas, long dispela rot tasol ol inap i stap gut long ai bilong God. (Jon 17:3) Na em i laik bilong God long “kisim bek olgeta manmeri, bai ol i ken save long as bilong tok tru.”—1 Timoti 2:4.
Taim yu save olsem long ai bilong God olgeta lain i wankain, dispela inap senisim tru tingting bilong yu long yu yet na ol narapela. Dispela inap kirapim yu long tingim gut ol narapela na mekim gutpela pasin long ol, na amamas na laikim ol pasin samting bilong ol i narapela kain. Olsem: Yangpela Melissa, em pastaim yumi bin stori long em, em i no save bihainim ol wanskul bilong em taim ol i lap long ol yangpela i no kolim gut ol tok, long wanem, ol i bilong narapela kantri. Em i tok: “Mi save tingim ol lain i save mekim tupela tok ples olsem ol i gat bikpela save. Maski mi laik mekim narapela tok ples, mi inap mekim wanpela tok ples tasol.”
Tingim tu olsem, ating i gat planti samting ol lain long hap bilong yu inap amamas long en, olsem tasol ol narapela lain i gat planti samting ol inap amamas long en. Tru, i no gat rong long amamas long ol pasin bilong lain bilong yu na long ol samting ol tumbuna i bin mekim, tasol em i gutpela samting moa long yu ken amamas long ol samting yu yet i bin hatwok long mekim! (Saveman 2:24) I gat wanpela samting Baibel i kirapim yu long amamas long en. Long Jeremaia 9:24, God yet i tok: “Man i laik amamas, em i mas amamas long wanpela samting tasol. Em i amamas long em i save long mi, Bikpela.” Yu inap amamas long dispela samting?
[Piksa long pes 22]
Taim yumi save long tingting bilong God long kain kain lain na skin, dispela bai helpim yumi long amamas long i stap wantaim ol