Baibel i Tok Wanem?
Pasin Antap i Gat Rong?
OL MAN bilong bipo i save tok, pasin antap em i namba wan sin bilong 7-pela bikpela sin. Tasol planti man long nau, ol i ting dispela tingting i no stret moa long ol man bilong nau. Yumi stap klostu long yia 2000, na ol man i save ting olsem pasin antap em i samting bilong helpim ol, na i no wanpela sin.
Tasol taim Baibel i tok long pasin antap, planti taim em i kamapim olsem em i pasin nogut. Na Buk Sindaun long Baibel i gat planti tok i makim pasin antap i samting nogut. Sindaun 8:13 i tok: “Mi no laik tru long pasin bilong bikhet na pasin bilong man i litimapim nem bilong em yet.” Sindaun 16:5 i tok: “Bikpela i no laikim tru ol man i save hambak na litimapim nem bilong ol yet.” Na ves 18 i tok: “Pasin bilong hambak na litimapim nem bilong yu yet bai i mekim yu i pundaun na bagarap.”
Pasin Antap i Save Nogutim Man
Pasin antap em Baibel i no orait long en, em olsem: Man i pilim olsem em i gutpela tru, o em i ting olsem save, gutpela skin, mani kago, skul, namba, na kain samting olsem i mekim na em i winim tru ol narapela. Pasin antap inap kamap ples klia taim man i hambak, o litimapim nem bilong em yet, o bikhet nabaut. Taim man i hambak na ting olsem em i winim ol narapela, dispela inap mekim na em i no laik harim tok bilong stretim em, o em i no laik tokaut long rong bilong em na tok sori, o senisim wanpela tingting o wok em i mekim, o em i no laik kisim sem long ai bilong ol man, o em i bel hevi hariap long tok na pasin bilong narapela man.
Ol man i gat pasin antap, ating oltaim ol i strong long ol man i mas mekim ol samting i stret long laik bilong ol, na sapos ol narapela i no mekim olsem, ol i no ken mekim. Nogat tru. I no hatwok long save, kain tingting olsem bai mekim na dispela man bai i gat planti hevi wantaim ol narapela. Pasin bilong hambak long skin o ples i bin kamapim planti pait na kapsaitim blut bilong planti man. Baibel i kamapim olsem pasin antap i mekim na wanpela pikinini spirit bilong God em i bikhet, na em i kamap Satan. Pol i stori long ol mak ol elda Kristen i mas winim, olsem: “Nupela Kristen i no ken kamap wasman. Nogut em i ting em i gutpela man tru na i bikhet, na God i kotim em olsem em i bin kotim Satan.” (1 Timoti 3:6; skelim wantaim Esekiel 28:13-17.) Sapos pasin antap i save kamapim ol dispela samting, yumi ken save olsem God i nolaik tru long en. Tasol ating yu gat askim olsem: ‘I gat as na sampela taim man i ken hambak olsem amamas long wanpela samting?’
I Stret Yumi Ken Hambak Long Sampela Taim?
Long Ol Skripsa Grik, ol i tanim tok kau·khaʹo·mai olsem “pasin antap, amamas, hambak,” na sampela taim dispela tok i makim pasin bilong hambak na sampela taim pasin bilong amamas long wanpela samting. Pol i tok, ‘yumi sindaun gut wantaim God, na dispela i mekim yumi i amamas.’ Em i tok tu olsem: “Man i laik amamas, em i mas amamas long Bikpela.” (Rom 5:2; 2 Korin 10:17) Dispela i makim olsem yumi litimapim nem bilong yumi yet, long wanem, Jehova em i God bilong yumi, na dispela inap kirapim yumi long litimapim gutpela nem bilong em.
Olsem wanem? Yu ting i gat rong long mekim sampela tok bilong helpim man taim ol narapela i bagarapim gutpela nem bilong em? Nogat tru. Sapos ol man i mekim sampela tok nogut long famili bilong yu o long sampela narapela man em yu laikim ol tru, bai yu kros na mekim sampela tok bilong helpim ol, a? Baibel i tok: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting.” (Sindaun 22:1) Wanpela taim God i tok long king bilong Isip em i gat pasin antap, olsem: “Mi bin larim [yu] i stap olsem bai mi ken soim bikpela strong bilong mi long [yu], na bai ol manmeri i ken tokaut long biknem bilong mi long olgeta hap bilong graun.” (Kisim Bek 9:16) Olsem na God i amamas long gutnem bilong em, na em i strong long ol man i no ken bagarapim nem bilong em. Ating yumi tu i gat laik long mekim sampela tok bilong helpim gutnem bilong yumi, tasol yumi no ken hambak na litimapim nem bilong yumi yet.—Sindaun 16:18.
Bilong pas gut wantaim ol narapela, yumi mas daun long ol. Taim yumi no inap bilip moa long ol pren o ol man yumi mekim wok bisnis wantaim ol, bai yumi no stap gut wantaim ol. Olsem tasol, hevi bai kamap namel long wanpela lain i wok wantaim sapos wanpela bilong ol i mekim sampela samting bilong bagarapim nem bilong em yet na bilong lain em i wok wantaim ol. Bilong inapim ol wok—maski em i wanem kain wok—yumi mas lukautim gutnem bilong ol narapela na bilong yumi yet. Dispela em i wanpela as na ol wasman bilong kongrigesen Kristen ol i mas i gat “gutpela nem” long ai bilong ol man. (1 Timoti 3:7) Ol wasman i no laik winim dispela mak bambai ol i ken litimapim nem bilong ol yet, nogat; tasol ol i mausman bilong God, olsem na ol i mas mekim wok bilong ol long gutpela na stretpela pasin. Tru tumas, sapos wasman i no gat gutpela nem long ai bilong ol man, ol man i no inap bilip long em, a?
Olsem wanem long pasin bilong amamas long ol samting yumi yet i mekim? Tingim amamas bilong papamama taim pikinini bilong ol i kisim ol gutpela mak long skul. I stret ol i amamas long dispela samting. Taim Pol i raitim pas i go long ol Kristen long Tesalonaika, em i kamapim olsem em tu i amamas long samting ol narapela i mekim. Em i tok: “Ol brata, olgeta taim mipela i save tingting long yupela na tenkyu long God. I gutpela tru long mipela i mas mekim olsem, long wanem, bilip bilong yupela i kamap strong tru, na yupela olgeta wan wan i save givim bel bilong yupela long ol arapela, na dispela pasin i kamap moa yet. Long dispela as tasol, taim mipela i go nabaut long ol sios bilong God, mipela i save litimapim nem bilong yupela. Mipela i save tokim ol long olgeta pasin nogut ol birua i mekim long yupela, na long olgeta hevi i bin kamap long yupela. Na mipela i save tok olsem, ‘Ol Tesalonaika i save sanap strong na holimpas bilip bilong ol na karim olgeta dispela hevi na pen.’ ” (2 Tesalonaika 1:3, 4) Tru tumas, yumi save amamas taim wanpela man yumi laikim em, em i mekim sampela gutpela samting. Tasol olsem wanem yumi ken save long wanem taim i stret yumi amamas long wanpela samting, na long wanem taim i no stret long mekim olsem?
I stret yumi laik lukautim gutnem bilong yumi, na ol samting yumi mekim i kamap gutpela, na i stret yumi amamas long ol dispela samting. Tasol pasin bilong litimapim nem bilong yumi yet, na pasin antap, na pasin bilong hambak long ol samting yumi yet o narapela i mekim, em ol samting God i no laik tru long en. Em i no gutpela samting sapos wanpela bilong yumi i “litimapim nem” bilong em yet o em i ting olsem ‘save na pasin bilong em i winim ol narapela.’ Ol Kristen i no ken hambak long wanpela samting o litimapim nem bilong ol yet, long wanem ol i save gut long wanpela man i gat nem, nogat; ol i ken hambak o amamas long God Jehova tasol na long ol samting em i bin mekim bilong helpim ol. (1 Korin 4:6, 7; Rom 12:3) Profet Jeremaia i kolim wanpela gutpela lo yumi ken bihainim: “Man i laik amamas, em i mas amamas long wanpela samting tasol. Em i mas amamas long em i save long mi, Bikpela. Oltaim mi save laikim tumas olgeta manmeri bilong graun na mi save mekim gutpela na stretpela pasin long ol.”—Jeremaia 9:24.
[Piksa long pes 22]
“Pop Inosen Namba 10,” em piksa Don Diego Rodriges de Silva Velaskes i wokim
[Kredit Lain]
Scala/Art Resource, Nu Yok