Taim Ol Kain Kain Skin i Sindaun Gut Wantaim
BAIBEL i tok: “Long wanpela tumbuna tasol [God] i bin mekim olgeta lain manmeri i kamap . . . long olgeta hap bilong graun.” (Aposel 17:26) Em nau—Baibel i tok, olgeta lain manmeri i gat wanpela tumbuna tasol.
Olsem na maski ol lain man i stap we o ol i gat wanem kain skin na pasin, olgeta man i wanpela kain tasol. Na maski olgeta lain man i gat narapela narapela kain skin, pes, gras samting, yumi no inap tok sampela man i gat bikpela save, long wanem, ol i bilong wanpela lain o skin. Tingting bilong “olgeta lain manmeri” inap wok gut na ol inap mekim ol kain kain wok. Tru tumas, long ai bilong God olgeta man i wankain.—Aposel 10:34, 35.
Sapos tok bilong Baibel i stret, yumi save pasin bilong bel nogut na mekim pasin i no stret long ol man bilong narapela lain na skin inap pinis. Na tu, sapos Baibel i tok stret long ol lain man i kamap olsem wanem, em inap tokim yumi long olsem wanem olgeta man inap i stap wanbel wantaim na i stap bel isi.
Olsem wanem? Saiens i wanbel wantaim Baibel long ol narapela narapela lain i kamap olsem wanem?
Save Ol Man Bilong Saiens i Painim Pinis
Wanpela buk (The Races of Mankind) bilong R. Benedict na G. Weltfish i tok: ‘Ol saveman bilong saiens wantaim Baibel i makim olgeta lain man i wanpela lain tasol, ol i gat wanpela tumbuna tasol—em Adam na Iv—tupela i tumbuna papamama bilong olgeta man na meri. Sapos olgeta man i no gat wanpela tumbuna tasol, olgeta kain kain wok em skin bilong ol i mekim i no ken wankain.’
Wanpela liklik nius (Race and Biology) bilong L. C. Dunn, em wanpela profesa bilong Kalambia Yunivesiti, i tok: ‘Olgeta hap bilong skin bilong ol lain man i wankain, olsem na ol man inap marit long ol narapela narapela lain sapos ol i laik, na ol i save mekim olsem. Tasol olgeta man i narapela kain long sampela liklik samting, long wanem, strong bilong skin bilong papamama i narapela narapela, na ples ol i stap long en i narapela narapela.’
Ol samting saiens i painim pinis i helpim yumi long save i no gat wanpela lain i winim narapela lain, na i no gat wanpela lain i nambawan na narapela lain i pipia nating. Ol samting olsem kala bilong skin na gras na ai—em sampela man i ting ol dispela samting i bikpela samting—ol i no makim olsem tingting bilong sampela man i wok gut na ol inap kisim bikpela save, na sampela nogat. Ol i kisim wankain skin na gras na ai samting olsem bilong papamama bilong ol, em tasol.
Hampton L. Carson (long buk Heredity and Human Life) em i tok, long ol liklik samting tasol olgeta man i narapela narapela kain. ‘Long skin ol lain man i no wankain, tasol ol i wankain man tasol.’
Orait, sapos olgeta man i olsem wanpela famili tasol, bilong wanem narapela lain i birua long narapela lain?
As Bilong Dispela Hevi
Adam tupela Iv i bin bikhet long God na dispela i as bilong pait na kros namel long ol narapela narapela skin. Taim tupela i brukim lo bilong God tupela i kamap sinman na givim sin long yumi olgeta pikinini bilong tupela. (Rom 5:12) Olsem na sin i mekim na olgeta man i tingim ol yet tasol na ol i gat pasin antap. Dispela i as bilong pasin birua na kros namel long ol narapela narapela lain man.
I gat narapela as i stap na narapela lain i bel nogut na birua long narapela lain. Taim Adam na Iv i givim baksait long Jehova, tupela i no stap aninit moa long em. Wanpela ensel nogut i bosim tupela na Baibel i kolim dispela ensel nogut olsem Satan. Satan em “giaman god bilong dispela graun” na em i paulim tingting bilong olgeta man, olsem na sampela man i gat tingting nogut long man bilong narapela lain. (KTH 12:9; 2 Korin 4:4) Dispela tingting kranki olsem ol man bilong wanpela kain skin i winim ol narapela lain na ol i antap long ol, i no gat as. Tasol sori tru, planti milion man i bihainim dispela tingting na em i save kamapim bikpela hevi.
Ol sinman i larim Satan i bosim ol, ol yet i kamapim tingting kranki olsem wanpela kain skin i winim ol narapela lain na ol i mas antap long ol na bosim ol, na dispela tok giaman bilong ol i as bilong pasin birua ol i mekim long man bilong narapela skin.
Olsem na sapos olgeta man i laik i stap wanbel, ol i mas strong long bilip olsem yumi olgeta i wanpela famili tasol. Na ol i mas bilip olsem long ‘wanpela tumbuna tasol God i bin mekim olgeta lain manmeri i kamap.’ (Aposel 17:26) Na Satan i mas pinis sapos olgeta kain kain lain na skin i laik sindaun wantaim na i stap bel isi. Olsem wanem? I gat as na yumi ken bilip olsem ol dispela samting bai kamap?
Bel Nogut Bai Pinis
Jisas Krais i kamapim rot bilong pinisim pasin bilong bel nogut long narapela lain na skin taim em i tokim ol disaipel long “laikim tru ol arapela,” olsem em i bin laikim ol. (Jon 13:34, 35) Na wanpela disaipel bilong Jisas i tok: “Yupela i mas mekim gutpela pasin long olgeta man, na givim bel bilong yupela long ol arapela manmeri bilong God.” (1 Pita 2:17) Olsem na yumi save, yumi no ken laikim ol man bilong wanpela lain tasol, nogat; yumi mas laikim tru olgeta lain man.
Olsem wanem yumi ken kamapim dispela kain sori Kristen? Baibel i tok: “Yupela i mas strong long litimapim nem bilong ol arapela tasol.” (Rom 12:10) Tru tumas, taim narapela i litimapim nem bilong narapela, ol gutpela samting i kamap olsem: Maski man i gat narapela skin o em i bilong narapela lain, olgeta bai givim gutnem long narapela. Ol i no ken ting ol i antap long narapela na winim ol—ol i mas ‘ting pasin bilong ol arapela i winim pasin bilong ol.’ (Filipai 2:3) Taim dispela sori Kristen i stap namel long ol man, pasin bilong bel nogut na birua long narapela lain i pinis.
Sapos inap longpela taim ol man i gat dispela tingting long bel nogut long ol man bilong narapela lain o skin, ating ol i no inap rausim wantu dispela tingting nogut bilong Satan, a? Tasol ol inap mekim! Long taim bilong ol aposel, olgeta man i insait long kongrigesen Kristen ol i amamas long stap wanbel. Aposel Pol i tok: “I no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru.” (Galesia 3:28) Tru tumas, ol lain tru bilong Krais i bin amamas long stap olsem brata brata.
Tasol ating sampela bai tok: ‘Long nau dispela samting i no inap kamap.’ Tasol em i kamap pinis long lain Witnes Bilong Jehova—em lain i gat olsem 4 milion 500 tausen manmeri long en. Tru, yumi no ken tok, olgeta Witnes i lusim pinis pasin bilong bel nogut long man bilong narapela skin o lain, long wanem, taim ol i no Witnes yet ol i bin lain long dispela tingting nogut. Wanpela blakskin bilong Amerika em i wanpela Witnes, na em i stori long sampela waitskin Witnes olsem: ‘Mi lukim sampela i no lusim olgeta pasin bilong daunim man bilong narapela ples o narapela skin. Na sampela taim mi lukim sampela ol i no stap isi wantaim ol man bilong narapela skin.’
Tasol dispela blakskin i tok: ‘Tasol i no gat narapela lain long dispela graun i olsem ol Witnes Bilong Jehova. Lain Witnes i no tingim wanpela lain i winim narapela lain—ol i save mekim wankain pasin long ol manmeri bilong olgeta lain. Ol i save wok strong long laikim ol man, maski ol i bilong wanem lain o skin. Sampela taim bel bilong mi i pilim amamas na klostu mi krai, long wanem, ol waitskin Witnes i mekim gutpela pasin long mi olsem ol i laikim tru mi.’
Tru, pasin wanbel i stap namel long sampela milion man i gat kain kain skin, tasol yu ting dispela inap stretim hevi namel long planti milion man, em Satan i paulim tingting bilong ol na ol i ting lain bilong ol i nambawan? Nogat. Ol man i no inap pinisim pasin birua namel long ol narapela narapela lain. God Jehova tasol inap mekim.
Tasol klostu nau, long rot bilong Kingdom long han bilong Krais Jisas, Jehova bai pinisim ol pasin i no stret. Na em bai pinisim tu pasin bilong ol man long tingim lain bilong ol yet tasol na ol i no sindaun gut wantaim ol man bilong kain kain skin na lain. (Daniel 2:44; Matyu 6:9, 10) Olsem na aninit long gavman bilong Krais ol manmeri bai lain gut long pasin bilong sindaun gut wantaim. Na isi isi ol bai lain long stap wanbel tru na bai ol i no ken tingim tru skin bilong narapela man. Em nau, tok promis bilong God bai kamap tru: “Ol dispela samting bilong bipo ol i pinis olgeta. . . . Harim. Mi mekim olgeta samting i kamap nupela.”—KTH 21:4, 5.
Olsem wanem? Yu laik stap na lukim olgeta lain manmeri i stap brata brata tru na stap bel isi na wanbel tru? Sapos yu laik, yu inap i go long Haus Kingdom long wanem hap yu stap long en. Ol Witnes Bilong Jehova i save bung olgeta taim long en na stadim Baibel. Gutpela tru yu go na bai yu lukim olgeta i kamapim sori Kristen tru—maski ol i narapela narapela skin.
[Piksa long pes 10]
Klostu nau olgeta man long olgeta hap bai sindaun wantaim long pasin sekan