Olgeta Lain Manmeri Bai Stap Brata Brata Tru!
WANPELA misineri em i nupela long Wes Afrika na bihain liklik em i go long wanpela kibung long hap i stap longwe. Taim em i kamap klostu long wanpela famili bilong dispela hap yet, liklik pikinini bilong ol em i gat 2-pela krismas, em i krai nau. Na i olsem i no gat as bilong dispela krai bilong em.
Misineri hia em i traim long mekim gut bel bilong dispela pikinini, tasol pikinini em i mekim save long krai moa yet. Nau misineri i askim mama bilong pikinini, “Olsem wanem?” Mama i sem, tasol em i tokim misineri hia olsem: “Ating em i pret long yu. Skin bilong yu i narapela kain. Em i no bin lukim wanpela waitman bipo.”
Taim yumi liklik yet ating yumi kisim save pinis olsem kala bilong skin bilong ol man i narapela narapela kain. Na taim yumi go bikpela liklik yumi kisim pasin bilong tingim lain o litimapim ples bilong yumi. Na tu, ol pikinini i kisim dispela tingting taim ol i wok long skelim pasin na tingting bilong ol bikpela manmeri olsem papamama bilong ol. Long ples skul ol tisa na ol pren o ol wanskul tu inap givim kainkain tingting long ol long dispela pasin.
Wanpela ripot bilong Amerika i tok, taim pikinini i kisim 12-pela krismas, em i kisim pinis wankain tingting olsem long ol narapela lain man, na long pasin bilong bel nogut long man bilong narapela lain o ples na long narapela lotu samting. Taim ol i kamap bikpela manmeri pinis dispela tingting em i pas pinis long ol.
Ol Witnes Bilong Jehova Ol i Narapela Kain
Long nau pasin bilong bel nogut long narapela lain i kamap bikpela tru, tasol ol Witnes Bilong Jehova i stap narapela kain tru long ol narapela lain. Long olgeta hap ol man i save, ol i wanpela lain i save bung wantaim na ol i no tingim ples bilong ol o kala bilong skin o tok ples bilong ol i narapela narapela, nogat. Na dispela pasin i save kamap ples klia long ol bikpela kibung bilong ol em ol i save mekim long olgeta wan wan yia.
Wanpela nius (States-Item) i tok long wanpela bikpela kibung bilong ol Witnes long hap bilong saut long Yunaitet Stets long Amerika, olsem: “Long wanpela bikpela stedieam (Louisiana Superdome) ol manmeri i stap brata brata tru—ol yangpela na ol lapun na ol blakskin wantaim waitskin, em ol Witnes Bilong Jehova ol i redi long lain . . . na skul . . . na pasin bilong bel nogut long man bilong narapela ples i no kamap liklik namel long ol Witnes.”
Na long wanpela kibung bilong ol Witnes Bilong Jehova i bin kamap long Saut Afrika, wanpela meri Afrika i tok: “Man, mi kirap nogut tru long lukim wanpela lain manmeri ol i bilong narapela narapela lain tasol ol i stap wanbel tru. Na em i narapela kain tru long ol lotu mi save go long en.”
Taim ol Witnes bilong Not na Saut Amerika na bilong sampela hap bilong Yurop ol i kam bung long ol bikpela kibung bilong ol long ol hap bilong Esia na Saut Pasifik, wanpela ripot i tok “ol i no bin mekim olsem ol i no laikim narapela long wanem ol i bilong narapela ples, na ol as ples tu namel long ol i no mekim olsem.”
Nau planti milion Witnes Bilong Jehova long olgeta hap bilong graun ol i stap narapela kain, long wanem ol i givim bel tru long i stap brata brata wantaim, maski ol i bilong narapela narapela hap. Na tu, gutpela sori Kristen i bungim ol wantaim. Jisas i bin tok lain bilong em bai stap olsem. Em i tok, “Sapos yupela wan wan i laikim tru arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
Olsem na long olgeta hap ol Witnes Bilong Jehova ol i gat dispela gutpela pasin bilong i stap brata brata namel long ol. Ol i pilim tru tok Jisas i mekim long Matyu 23:8, em i tok olsem: “Yupela olgeta i stap brata brata.” Na dispela samting i kamap ples klia nau long taim pasin bilong bel nogut long narapela lain na skin na tok ples i wok long brukim olgeta lain manmeri.—Lukim tu 1 Korin 1:10; 1 Jon 3:10-12; 4:20, 21; 5:2, 3.
Olsem Wanem Ol Inap i Stap Wanbel?
As bilong ol Witnes i stap wanbel wantaim, em ol gutpela save ol i kisim long ol Haus Kingdom bilong ol na long rot bilong mekim stadi long Baibel. Ol i olsem ol Kristen bilong Tesalonaika, em aposel Pol i tok long ol olsem: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela.”—1 Tesalonaika 2:13.
Ol Witnes i bilip tru long tok bilong Baibel na ol i wok strong tru long bihainim tingting bilong God. Ol i pilim tru tok aposel Pita i mekim long rot bilong spirit holi, em i tok: “Mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Jisas i wanbel long dispela na em i lainim ol disaipel long mekim “olgeta lain manmeri” i kamap disaipel bilong em. (Matyu 28:19) Olsem na ol Witnes Bilong Jehova long nau tu ol i wok strong long painim ol manmeri i laikim stretpela pasin, maski ol i bilong wanem lain o ples. Na taim ol dispela man bilong narapela narapela kain sindaun na skin i bung wantaim long lotuim God na ol i wok wantaim na amamas wantaim, dispela i kamapim ples klia olsem ol i lusim pinis pasin bilong daunim man bilong narapela ples o narapela kain skin. Ol i save ol i mas tingim narapela na laikim tru em.
Tru tumas, sapos inap longpela taim man i gat dispela tingting long bel nogut long ol man bilong narapela lain o narapela skin, ating em i no inap rausim wantu dispela tingting. Tasol taim em i kamap wanpela Witnes, em i wok long kamap “nupela man” olsem wanpela Kristen tru na em i wok strong long lusim olpela tingting. (Efesus 4:22-24) Em i no tok, ‘Taim mi liklik yet inap long nau ol i bin lainim mi olsem,’ nogat; em i wok strong long senisim tingting bilong em na “givim bel . . . long ol arapela manmeri bilong God.”—1 Pita 2:17.
Truim Bilong Ol Tok Profet Bilong Baibel
Ol samting nau i kamap namel long ol Witnes Bilong Jehova em i wanpela bikpela samting em Baibel i bin tok profet long en.
Lukim Aisaia 2:2-4 em i tok long ol samting bai kamap long “wanpela taim . . . bihain,” em long “las de” bilong dispela pasin nogut bilong nau. (2 Timoti 3:1-5, 13) Tok profet bilong Aisaia i makim olsem trupela lotu bilong Jehova bai i kamap nau long dispela taim na “olgeta lain manmeri bai i kam bung long en. Ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ”
Tok profet bilong Aisaia i kamapim narapela pasin nau i stap namel long ol Witnes Bilong Jehova long olgeta hap bilong graun long taim bilong yumi: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim spia bilong ol i kamap olsem ol naip. Na olgeta lain manmeri bai ol i no ken pait moa, na bai ol i no skul moa long pait.”
Na buk Baibel long Kamapim Tok Hait, em i tok profet long taim bilong yumi long nau, olsem wanpela bikpela lain manmeri “ol i bilong olgeta lain man na bilong olgeta kantri na bilong olgeta kain skin na bilong olgeta tok ples” bai ol i kam bung wantaim olsem brata brata bilong lotuim Jehova.—Kamapim Tok Hait 7:9, 15.
Dispela em i no wanpela stori nating. Em i kamap tru nau long dispela taim. Long wanem ol i wok long bungim dispela bikpela lain manmeri bilong olgeta hap na bilong olgeta kain skin na tok ples. Ol i kamapim pasin bilong i stap brata brata tru long olgeta hap bilong graun! Dispela bikpela lain manmeri em i olsem nambawan lain bilong nupela lain manmeri klostu nau ol bai kisim graun taim God i pinisim ol man nogut na pasin nogut bilong graun, na bai ol i stap wanbel na i stap amamas. Jisas i tok dispela lain manmeri ol i stap wanbel bai ol i “kisim olgeta graun,” na bai ol i stap oltaim long en aninit long nupela gavman, em bilong Kingdom bilong God.—Matyu 5:5; 6:9, 10; Buk Song 37:10, 11, 28, 29, 37, 38.
Olsem wanem? Yu laik stap na lukim dispela samting i kamap? Yu inap i go long Haus Kingdom bilong ol Witnes Bilong Jehova long wanem hap yu i stap long en na bai yu lukim olgeta i stap wanbel tru, maski ol i narapela narapela kain skin. O narapela taim ol Witnes i kam long haus bilong yu, singautim ol long kam insait na sindaun wantaim yu na askim ol long soim ol tok bilong Baibel long yu i toktok long pasin bilong ol long i stap wanbel, na ol tok bilong Baibel long ol gutpela samting bai kamap bihain long graun na ol man bai i stap brata brata tru long olgeta hap bilong graun.
God I Gat Olgeta Strong, em Jehova, em i tok promis olsem laik bilong em long kamapim wanpela lain man na meri i stap brata brata tru bai kamap tru olgeta. Em i tok: “Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:11.
Nau mipela i singautim yu long skelim ol tok profet bilong Baibel na ol samting i wok long kamap nau i truim ol dispela tok profet. Sapos yu mekim olsem, bai yu save olgeta man bilong narapela narapela kantri na tok ples ol inap stap wanbel wantaim, na dispela samting bai kamap tru!
[Rait long pes 9]
Samting i kamap namel long ol Witnes Bilong Jehova long nau olsem Baibel i bin tok profet long en
[Piksa long pes 10]
Ol Witnes Bilong Jehova i narapela kain tru long wanem, maski ol i bilong narapela narapela ples na ol i gat narapela narapela kain tok ples na skin, ol i stap wanbel wantaim