Namba 11 Hap
As Lain Bilong Nupela Taim i Wok Long Kamap
1, 2. Long ai bilong yumi yet yumi lukim wanem samting i kamap, olsem Baibel i tok profet long en?
GUTPELA samting em olsem: As lain bilong nupela taim bilong God i wok long kamap nau. Long ai bilong yumi yet yumi lukim God i bungim sampela manmeri bilong olgeta hap na ol i kamap wanpela lain. Dispela lain tasol bai stap long graun taim ol lain bilong dispela graun bilong Satan, em ol i bruk bruk, ol i pinis klostu nau. Long 2 Pita 3:13, Baibel i kolim dispela lain olsem “nupela graun.”
2 Na tok profet bilong Baibel i tok: “Wanpela taim bai i kamap bihain [em dispela taim nau] na . . . ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela [lotu tru bilong em] . . . bilong em i ken skulim yumi long ol pasin em i laik yumi mekim.’ ”—Aisaia 2:2-3.
3. (a) Truim bilong tok profet bilong Aisaia i kamap long wanem lain long nau? (b) Laspela hap bilong Baibel i tok wanem long dispela samting?
3 Dispela tok profet i kamap tru nau namel long ol manmeri i bihainim ‘ol pasin God i laikim.’ Baibel i tok, ol dispela manmeri i laikim tru pasin bilong i stap wanbel ol i ‘bikpela lain’ bilong ‘olgeta kantri na olgeta kain skin.’ Ol i stap brata brata tru na wok gut wantaim long mekim wok bilong God. Na Baibel i tok, ol i winim taim bilong “bikpela hevi”—bai ol i abrusim bagarap taim dispela pasin nogut bilong nau i pinis.—Kamapim Tok Hait 7:9, 14; Matyu 24:3.
Wanpela Lain Brata Bilong Olgeta Hap
4, 5. Olsem wanem lain Witnes Bilong Jehova inap i stap olsem wanpela lain brata long olgeta hap?
4 Ol Witnes Bilong Jehova, em ol inap sampela milion, ol i wet long kisim laip i stap oltaim long nupela taim God bai kamapim. Ol i wok strong long bihainim ol lo bilong God long olgeta taim, na long dispela rot ol i kamapim klia olsem ol i laik daun long wok bos bilong em long nau na long nupela taim bihain. Maski ol i bilong wanem lain o kain skin, ol i bihainim wankain lo tasol, em ol lo bilong God long Baibel. Olsem na tru tumas, ol i stap wanpela lain brata bilong olgeta hap. God yet i kamapim dispela lain bilong nupela taim.—Aisaia 54:13; Matyu 22:37, 38; Jon 15:9, 14.
5 Ol i pas gut wantaim, tasol ol i no litimapim nem bilong ol yet long dispela. Ol i save, spirit bilong God i wok insait long bel bilong ol man i bihainim ol lo bilong Em. (Aposel 5:29, 32; Galesia 5:22, 23) God yet i mekim na dispela samting i kamap. Olsem Jisas i tok, “samting man i no inap mekim, em God inap mekim.” (Luk 18:27) Olsem na dispela God em i bin kamapim heven na graun bilong i stap oltaim, em i kamapim tu dispela lain bilong nupela taim ol i bilong i stap oltaim.
6. Olsem wanem yumi ken tok, gutpela pasin brata brata bilong ol Witnes Bilong Jehova i olsem wanpela mirakel i kamap long nau?
6 Olsem na wok bos Jehova bai mekim long nupela taim i kamap ples klia long ol samting em i mekim long dispela as lain bilong nupela taim. Na yumi ken tok, ol samting em i bin mekim long lain Witnes bilong em long nau i olsem wanpela mirakel. Long wanem, em i bin mekim ol Witnes Bilong Jehova i kamap wanpela lain brata bilong olgeta hap. Lain o kain skin bilong ol o samting bilong lotu i no inap brukim ol. Ol Witnes ol inap sampela milion na ol i stap long planti kantri, winim 200, tasol ol i pas gut wantaim na ol i no inap bruk. Dispela bikpela lain brata bilong olgeta hap i kamap long nau na i no gat kain samting olsem i bin kamap bipo, olsem na yumi ken tok, em wanpela mirakel—em wanpela strongpela wok bilong God.—Aisaia 43:10, 11, 21; Aposel 10:34, 35; Galesia 3:28.
Bilong Luksave Long Lain Bilong God
7. Jisas i kolim wanem mak bilong ol disaipel tru bilong em?
7 I gat wanem samting moa na yumi ken luksave long dispela lain God i kamapim long nau olsem as lain bilong nupela taim? Orait, husat ol inapim tru mak Jisas i kolim long Jon 13:34, 35? Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” Ol Witnes Bilong Jehova i bilipim tok bilong Jisas na ol i bihainim. Ol i “holim strong” pasin bilong laikim ol brata. (1 Pita 4:8) Dispela i mekim na ol i “wok bung wantaim.” (Kolosi 3:14) Pasin bilong laikim tru ol brata i mekim na ol i pas gut wantaim long olgeta hap bilong graun.
8. Olsem wanem tok bilong 1 Jon 3:10-12 i helpim yumi long luksave long lain bilong God?
8 Na 1 Jon 3:10-12 i tok: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, man i no mekim stretpela pasin, em i no bilong God. Na man i no save laikim tru ol arapela pikinini bilong God, em tu i no bilong God. . . . Yumi wan wan i mas laikim tru ol arapela. Yumi no ken i stap olsem Kein. Em i man bilong Satan, na em i kilim i dai brata bilong en.” Olsem na lain bilong God i stap olsem bikpela lain brata long olgeta hap na ol i no save pait.
Narapela Mak Bilong Ol
9, 10. (a) Wanem wok i helpim yumi long luksave long ol wokboi bilong God nau long las taim? (b) Olsem wanem ol Witnes Bilong Jehova i bin truim tok bilong Matyu 24:14?
9 I gat narapela samting olsem mak na yumi ken luksave long ol manmeri i wokboi bilong God. Jisas i bin mekim tok profet na kolim planti samting i makim dispela taim nau em i taim bilong las de. (Lukim Namba 9 Hap.) Wanpela bikpela samting em i kolim i stap long Matyu 24:14, olsem: “Na bai ol i autim dispela gutnius bilong kingdom bilong God long olgeta hap bilong graun.”
10 Olsem wanem? Yumi lukim truim bilong dispela tok profet? Yumi lukim. Las taim i kirap long yia 1914 na insait long dispela hap taim ol Witnes Bilong Jehova i bin autim gutpela tok bilong Kingdom bilong God long olgeta hap bilong graun. Na olsem Jisas i tok ol i mas mekim, ol i go long haus bilong ol man na autim dispela tok. (Matyu 10:7, 12; Aposel 20:20) Sampela milion Witnes i raun long olgeta hap na tokim ol man long nupela taim. Long dispela rot yu bin kisim dispela liklik buk, long wanem, hap wok bilong ol Witnes Bilong Jehova em ol i save wokim na tilim planti bilion buk na nius i stori long Kingdom bilong God. Yu save long narapela lain ol i go long haus bilong ol man long olgeta hap na autim tok bilong Kingdom bilong God? Mak 13:10 i tok, ol i mas autim dispela tok “pastaim” na bihain bai las de i kamap.
Bilong Stretim Namba Tu Bikpela Tok
11. Taim ol Witnes Bilong Jehova i daun long wok bos bilong God, dispela inapim wanem narapela wok tu?
11 Taim ol Witnes Bilong Jehova i holimpas ol lo bilong God, ol inapim narapela wok tu—ol i kamapim klia olsem Satan i giaman taim em i tok, ol man i no inap sanap strong long traim na stap gut long God. Long dispela rot God inap bekim dispela namba 2 bikpela tok bilong Satan. (Jop 2:1-5) Lain Witnes i bilong olgeta hap na ol i kamapim klia olsem ol i daun long wok bos bilong God. Maski ol i sinman bilong graun na Satan i putim hevi long ol, ol i sanap strong na tokaut olsem God em i nambawan bikpela.
12. Ol Witnes i bilip na long dispela rot ol i bihainim pasin bilong husat husat?
12 Long nau ol dispela planti Witnes Bilong Jehova i stap gut long em olsem ol narapela witnes bilong em long bipo i bin mekim. Sampela em Abel, Noa, Jop, Abraham, Sara, Aisak, Jekop, Debora, Rut, Devit, Daniel, na i gat planti moa. (Hibru, sapta 11) Olgeta i olsem ‘bikpela klaut gutpela witnes.’ (Hibru 12:1) Ol dispela witnes wantaim ol disaipel bilong Jisas ol i bin stap gut long God. Na Jisas em i nambawan man tru bilong mekim olsem.
13. Olsem wanem ol samting i bin kamap i makim olsem tok Jisas i bin mekim long Satan em i stret?
13 Dispela i kamapim klia olsem tok Jisas i bin mekim long Satan i stret. Em i bin tokim ol hetman bilong lotu i laik kilim em i dai: “Yupela i pikinini bilong papa bilong yupela, em Satan. . . . Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman.”—Jon 8:40, 44.
Yu Laik Bihainim Wanem Rot?
14. Olsem wanem long as lain bilong nupela taim long nau?
14 God i wok long kamapim as lain bilong nupela taim long nau, na dispela lain, olsem ol Witnes Bilong Jehova, i wok long kamap strong moa long olgeta taim. Long olgeta yia planti handet tausen manmeri i kisim stretpela save na long laik bilong ol yet ol i daun long wok bos bilong God, em i nambawan bikpela. Long dispela rot ol i kamapim klia olsem Satan em i man bilong giaman.
15. Jisas i mekim wanem wok bilong tilim ol man nau long taim bilong yumi?
15 Ol i daun long God—ol i laik bai em i bosim ol—olsem na ol inap i stap long “han sut” bilong Krais taim em i tilim “ol sipsip” na “ol meme.” Jisas i mekim tok profet i makim taim bilong las de na em i tok: “Olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” Ol sipsip em ol manmeri bilong pasin daun ol i bung wantaim ol brata bilong Krais na helpim ol—ol i daun long wok bos bilong God. Ol meme ol i man bilong bikhet em ol i sakim ol brata bilong Krais na ol i no helpim liklik wok bos bilong God. Olsem na wanem samting bai painim ol? Jisas i tok: “Ol dispela lain [ol meme] bai i go bilong kisim pe nogut, . . . Tasol ol stretpela manmeri [ol sipsip] bai i kisim laip i stap oltaim oltaim.”—Matyu 25:31-46.
16. Yu mas mekim wanem na bai yu inap i stap long Paradais klostu nau bai kamap?
16 Tru tumas, God i save tingim yumi! Klostu nau bai em i kamapim paradais long graun. Yu laik i stap long dispela Paradais? Sapos olsem, orait yu mas kamapim klia olsem yu pilim tru ol samting Jehova i mekim bilong helpim yu—yu mas kisim save long em na bihainim ol tok yu lainim. Baibel i tok: “Nau Bikpela i stap klostu long yupela na i wetim yupela, olsem na nau em i taim bilong yupela i mas beten long em na i go klostu long em. Ol manmeri bilong mekim ol pasin nogut i mas lusim ol pasin nogut bilong ol na . . . kam bek long God, Bikpela bilong yumi. Em i save marimari moa yet long ol manmeri i kam bek long em, na em i save lusim sin bilong [ol].”—Aisaia 55:6, 7.
17. Bilong wanem yumi mas hariap na kamapim klia dispela man yumi laikim em i stap King bilong yumi?
17 Yu no ken lusim taim. Pinis bilong dispela taim nogut i klostu tru. Baibel i tok: “Yupela i no ken laikim ol pasin bilong graun . . . Sapos wanpela man i laikim ol pasin bilong graun, orait em i no save laikim tru Papa. . . . Olgeta pasin bilong dispela graun [bai pinis]. Tasol man i bihainim tok bilong God, em bai i stap oltaim.”—1 Jon 2:15-17.
18. Yu mas mekim wanem na bai yu inap bilip tru olsem yu bai stap long nupela taim God bai kamapim?
18 Ol manmeri bilong God long nau i lain na redi bilong kisim laip oltaim long nupela taim bihain. Ol i lain long mekim ol samting bilong kamapim paradais long graun. Mipela laik kirapim yu na bai yu laikim God i stap King bilong yu, na bai yu helpim wok bilong em long nau, em dispela wok i kamap long olgeta hap na i bringim ol man long rot bilong laip. Stadi long Baibel wantaim ol Witnes Bilong Jehova, na bai yu inap kisim save long dispela God em i save tingim tru yu na em bai pinisim olgeta pen na hevi. Na bai yu tu inap insait long as lain bilong nupela taim. Na yu ken wetim God i orait long yu, na bai yu inap i stap oltaim long dispela gutpela nupela taim.
[Piksa long pes 31]
Ol Witnes Bilong Jehova i stap wanpela lain brata tru long olgeta hap
[Piksa long pes 32]
As lain bilong nupela taim i wok long kamap nau