Mi Amamas Long i Stap Long Lain Brata Tru Bilong Olgeta Hap

EM STORI BILONG WILLIE DAVIS

Long yia 1934 taim bilong bikpela hevi bilong mani i kamap long olgeta hap bilong graun, na long Amerika planti wok bisnis i bagarap na ol man i no gat wok. Long Klivlan, long Ohaio, ausait long wanpela ples bilong helpim ol man long kisim kaikai (Prospek Rilif Stesin) wanpela polis na wanpela strongpela Komyunis i pait. Polis i sutim Komyunis long gan na kilim em i dai na em i kilim i dai tu wanpela meri i sanap klostu, em bubu bilong mi, Vinnie Williams.

OL KOMYUNIS i laik mekim dispela i kamap olsem pait namel long blakskin na waitskin, long wanem, bubu bilong mi i blakskin na polis i waitskin. Ol i tilim ol liklik nius i gat het-tok olsem “Polis Long Klivlan i Birua Long Blakskin,” na “Bekim Dispela Rong Bilong Kilim Man i Dai.” Ol Komyunis i lukautim olgeta wok bilong planim bubu. Mi holim piksa bilong ol man i karim bokis bilong em​—⁠olgeta i waitskin na Komyunis. Ol i brukim han na taitim i go antap; bihain dispela i kamap olsem mak bilong lain bilong helpim ol blakskin.

Taim bubu i dai, mi stap long bel bilong mama, na 4-pela mun bihain mama i karim mi. Taim mi wok long i go bikpela, maus bilong mi i hevi na mi no inap toktok gut. Olsem na taim mi skul, mi skul tu long mekim toktok.

Taim mi gat 5-pela krismas, papa i lusim mama. Mama i mekim bikpela long mitupela susa bilong mi. Taim mi gat 10-pela krismas mi kirap mekim liklik wok mani bihain long skul bilong helpim famili​—⁠mi go bringim kaikai bilong stua long haus bilong ol man. Tupela yia bihain, mi kirap mekim wok paslain na bihain long skul, na mani mi kisim i lukautim famili. Bihain ol dokta i laik katim mama na em i slip long haus sik, olsem na mi lusim skul na wok mani oltaim.

Mi Kisim Save Long Wanpela Lain Brata

Long yia 1944 wanpela Witnes Bilong Jehova i givim wanpela buk (“The Truth Shall Make You Free”) long meri bilong kasen brata bilong mi, na em i kirap lainim em long tok bilong Baibel na mi tu i insait long dispela. Long dispela yia mi kirap long i go long Skul Bilong Wok Autim Tok long Kongrigesen Isait. Albert Cradock i lukautim dispela skul na bipo em i gat wankain hevi long toktok olsem mi, tasol em i winim dispela hevi. Em i strongim mi tru!

Long hap bilong mipela, i gat planti manmeri bilong Itali, na Polan, na Hangari, na bilong lain Juda, na insait long kongrigesen i gat ol dispela lain na sampela lain moa. Mi wantaim meri bilong kasen i namba wan blakskin i bung wantaim dispela kongrigesen waitskin, tasol ol dispela Witnes i no gat tingting nogut long mipela. Planti taim ol i save singautim mi i go kaikai long haus bilong ol.

Long yia 1956 mi go sindaun long hap saut bilong Amerika long ples i no gat planti man bilong autim tok. Taim mi go bek gen long Ohaio bilong lukim kibung distrik, planti brata bilong Klivlan i kam lukim mi na ol i laik save long ol wok mi bin mekim. Dispela i lainim mi olsem: Oltaim yumi mas “lukautim ol samting bilong ol arapela . . . na helpim ol long i stap gut”; yumi no ken tingting long yumi yet tasol.​—⁠Filipai 2:⁠4.

Mekim Wok Bilong God Oltaim

Mi mekim wok painia na autim tok long olgeta de inap 3-pela yia, na long Novemba 1959 ol i singautim mi i go wok long Betel long Bruklin, long Nu Yok, em nambawan ofis bilong ol Witnes Bilong Jehova. Ol i givim wok long mi long dipatmen bilong salim ol buk i go. Wasman bilong dispela dipatmen em Klaus Jensen, na poroman bilong mi long rum slip em William Hannan, em tupela wantaim i waitskin na ol i kamap olsem papa bilong mi long spirit. Taim mi kirap mekim wok long Betel, tupela i bin wok inap 40 yia pinis.

Long 1960 inap 1963 i gat 600 brata sista i wok long Betel na inap 20 tasol ol i blakskin bilong Amerika. Long dispela taim ol blakskin na waitskin bilong Amerika i birua birua na planti kros pait i kamap. Tasol Baibel i tok, “God i save mekim wankain pasin long olgeta manmeri, maski ol i bilong wanem lain,” na yumi tu i mas mekim olsem. (Aposel 10:​34, 35) Samting i strongim mipela long mekim olsem em ol tok bilong God mipela i toktok long en long taim bilong kaikai long moningtaim.​—⁠Song 19:⁠7.

Taim mi wok long Betel long Bruklin mi bungim Lois Ruffin, em wanpela painia i kam long Rismon, long Vejinia, na mitupela i marit long 1964. Mipela i pasim strong tingting long mekim yet wok painia, olsem na taim mitupela i marit pinis, mipela i go bek gen long hap saut bilong Amerika. Pastaim mipela i stap painia salim, na long 1965 ol i singautim mi long mekim wok sekit. Inap 10-pela yia mipela i raun lukim ol kongrigesen long provins Kentaki, Teksas, Luisiana, Alabama, Jojia, Not Karolaina, Misisipi.

Traim i Painim Lain Brata

Insait long ol dispela yia, bikpela senis i kamap. Taim mipela i no i go yet long hap saut, blakskin na waitskin i no ken bung wantaim. I tambu long ol blakskin i skul wantaim ol waitskin, o kaikai long haus kaikai ol i kaikai long en, o slip long haus pasindia ol i slip long en, o go long stua ol i go long en, o dring wara long liklik tap wara em ol waitskin i dring long en. Tasol long 1964 gavman bilong Amerika i putim lo i tok, no ken tambuim man bilong narapela skin long go long ples bung o long bas samting. No gat tambu moa long blakskin na waitskin i bung wantaim.

Orait, olsem wanem long ol brata sista bilong yumi i bruk long kongrigesen blakskin na kongrigesen waitskin? Bai ol i laikim tru ol narapela na amamas long bung wantaim? O bai ol i pret long ol man, o bel nogut yet long ol man bilong narapela skin, na ol i no laik bung wantaim? Traim i painim ol long bihainim tok bilong Baibel, olsem: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.”​—⁠Rom 12:10.

I hatwok long ol i mekim, long wanem, planti blakskin na waitskin i ting ol i no wankain. Long hap bilong saut, longtaim pinis ol man i ting olsem ol waitskin i winim ol blakskin. Dispela tingting i pas strong long bel bilong ol, long wanem, long haus na long skul na long haus lotu tu, ol man i lainim ol olsem. Olsem na traim i painim ol brata bilong yumi​—⁠ol brata blakskin na waitskin.

Tasol gutpela tru, planti ol i amamas long bung wantaim. Inap planti handet yia pinis i gat dispela tingting olsem ol waitskin i winim ol blakskin, olsem na i hatwok long pinisim kwiktaim. Tasol taim ol blakskin na waitskin i kirap long bung wantaim, bikpela hap lain bilong ol brata bilong yumi i amamas ol inap bung wantaim.

Sampela man i no Witnes ol tu i amamas long ol blakskin na waitskin i bung wantaim insait long ol kongrigesen bilong yumi. Olsem: Long biktaun Lanet, long Alabama, ol brata i go toktok wantaim ol man i stap klostu long Haus Kingdom. Ol brata i laik save, ol i gat tok long ol blakskin i kam long ol miting o nogat. Wanpela lapun misis i sekanim brata blakskin na i tok: “Yupela mas kam lotuim God bilong yupela long hap bilong mipela, no gat tok!”

Ol Brata i Stap Gut Long God Long Itiopia

Long 1974 mipela i amamas long go long Skul Gileat long Nu Yok, na inap 5-pela mun na hap mipela i lain long kamap misineri. Bihain ol i salim mipela i go long kantri Itiopia long Afrika. Long dispela taim ol i bin rausim king bilong ol (Haile Selassie) na putim em i stap kalabus long haus. Ol i tambuim wok autim tok bilong yumi, tasol mipela i amamas long ol brata i pas gut wantaim.

Mipela i stap wantaim na wok wantaim planti brata em bihain ol i go kalabus, long wanem, ol i bihainim lotu i tru. Ol i kilim i dai sampela gutpela pren bilong mipela. Wanpela em Adera Teshome na mi bin mekim wok elda wantaim em long wanpela kongrigesen long nambawan biktaun bilong Itiopia, em Adis Ababa.a Em i stap kalabus inap 3-pela yia na ol i kilim em i dai. Bel bilong meri bilong em i bagarap stret. Tasol sampela yia bihain mipela i amamas long lukim em i mekim wok painia na em i stap amamas!

Narapela brata i stap gut long God, em Worku Abebe. Inap 8-pela taim kot i tok em i mas i dai.b Tasol em i no pret! Laspela taim mi lukim em, em i soim yau bilong em long mi, em ol woda long haus kalabus i bin paitim long plang bilong gan na bagarapim. Em i tok pilai olsem em i save kisim plang bilong gan olsem kaikai bilong moningtaim na belo na apinun. Bihain em i dai, tasol ol brata i tingim em yet.

Mi tingim gutpela pasin bilong narapela brata, em Hailu Yemiru.c Em i mekim gutpela pasin sori long meri bilong em. Polis i holim meri, tasol em i gat bel na klostu i laik karim pikinini, olsem na Hailu i tokim ol bos bilong haus kalabus em i laik senisim meri bilong em long kalabus. Bihain, taim em i no laik lusim bilip, ol i kilim em i dai.​—⁠Jon 15:​12, 13; Efesus 5:28.

Wok politik i wok long bagarap long Itiopia, olsem na mipela i go long Kenya long 1976. Inap 7-pela yia mi mekim wok olsem wasman bilong raun na mipela i go lukim ol brata long planti kantri long Is Afrika​—⁠Kenya, Itiopia, Sudan, ol ailan Seisel, Yuganda, Tansania. Sampela taim mi go wantaim ol brata bilong toktok wantaim ol bikman bilong Barundi na Ruanda na kirapim ol long orait long wok bilong mipela long dispela tupela kantri.

Mi amamas long go bek long Itiopia long Janueri 1992 na lukim namba wan kibung distrik i kamap bihain long taim ol i pinisim tambu long wok bilong yumi. Planti tru bilong ol 7,000 samting i kam bung, em narapela i no save long narapela, long wanem, bipo ol i bung olsem ol liklik lain tasol. Long olgeta de bilong kibung, planti ol i kam tupela aua paslain long taim bilong bung, na taim kibung i pinis long apinun, ol i stap longtaim bambai ol inap bung wantaim ol brata bilong ol na toktok wantaim.

Ol i Daunim Pinis Pasin Bilong Birua Long Narapela Lain

Inap planti handet yia pinis, long planti hap bilong Afrika, narapela lain i birua long narapela lain. Olsem: Long Barundi na Ruanda i gat tupela bikpela lain, em ol Hutu na ol Tutsi, na longtaim pinis ol i stap birua. Ol i kisim independens long Beljam long 1962 na bihain, planti taim ol Hutu na ol Tutsi i pait na narapela i kilim i dai narapela, inap planti tausen. Olsem na i gutpela long lukim ol Hutu na Tutsi i kamap Witnes Bilong Jehova ol i pas gut wantaim na wok gut wantaim! Narapela i laikim tru na mekim gut long narapela na dispela i kirapim planti moa long harim ol tok i tru bilong Baibel.

Long Kenya tu sampela lain i bin pait. Tasol narapela kain pasin i stap namel long ol brata Kristen long lain bilong Jehova long Kenya! Long ol Haus Kingdom yu inap lukim ol manmeri bilong narapela narapela lain ol i wanbel na lotu wantaim. Mi amamas long lukim planti ol i lusim pasin bilong birua long ol narapela lain, na nau ol i laikim tru ol brata sista bilong ol bilong ol narapela lain.

Amamas Long Lain Brata

Winim 50 yia pinis mi wok wantaim oganaisesen bilong God na mi tenkyu tru long Jehova na Pikinini bilong em, Krais Jisas. Ol i mekim bikpela wok tru hia long graun! Tru, long lain bilong God long bipo, i gat sampela samting i no stret tumas, na long nau tu. Tasol inap planti handet yia pinis ol man bilong dispela graun bilong Satan i bin skulim ol man long birua long ol man bilong narapela lain o skin, na yumi no ken ting dispela kain tingting inap pinis kwik. Yumi no kamap gutpela olgeta yet.​—⁠Song 51:⁠5.

Mi skelim pasin bilong dispela graun wantaim pasin bilong lain bilong Jehova na mi amamas tru long yumi stap lain brata tru long olgeta hap. Mi tingim yet gutpela pasin ol brata long Klivlan i mekim long mi, em olgeta i waitskin. Ol i lukautim mi na strongim mi long tok i tru. Na bel bilong mi i amamas taim mi lukim ol brata long hap saut bilong Amerika​—⁠waitskin na blakskin​—⁠ol i lusim ol tingting nogut na pas gut wantaim olsem ol brata stret. Na taim mi go long Afrika na mi lukim Tok Bilong Jehova i kirapim ol man long lusim pasin bilong birua long narapela lain, mi pilim moa yet pasin bilong yumi, em yumi stap lain brata tru long olgeta hap.

Tok bilong King Devit long bipo i stret: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas.”​—⁠Song 133:⁠1.

[Ol Futnot]

[Piksa long pes 23]

Ol i planim bubu bilong mi

[Piksa long pes 24]

Ol Witnes bilong lain Tutsi na lain Hutu i wok gut wantaim long pasin wanbel

[Piksa long pes 25]

Mi wantaim meri bilong mi, Lois