Stori Bilong Wanpela Man

I Stap Bilong Mi Long Wok Bilong Jehova

STORI BILONG RUSSELL KURZEN

Mama i karim mi long Septemba 22, 1907, em 7-pela yia paslain long wanpela bikpela taim tru i bin kirap long taim bilong Namba Wan Pait. Famili bilong mi i stap olsem maniman long ol samting bilong spirit​—⁠em nambawan bikpela samting. Taim yu harim sampela stori bilong famili bilong mi, ating bai yu wanbel long dispela tok.

TAIM bubu meri i pikinini yet, em i kirap long painim rot bilong kisim save tru long God. Taim em i no kisim yet 13 krismas, em i bin go long ol narapela narapela lotu i stap long ples bilong em, em naispela taun Spiez, long Swiselan. Long 1887, em sampela yia bihain long taim bubu meri i marit na kisim nem Kurzen, famili Kurzen i lusim ples bilong ol na i kam sindaun olgeta long Amerika, olsem planti lain i bin mekim long dispela taim.

Famili i sindaun long Ohio, na long 1900 samting bubu meri i painim pinis dispela gutpela samting em i bin wok long painim. Dispela gutpela samting i stap insait long wanpela buk bilong Charles Taze Russell, The Time Is at Hand, long tok ples Jeman. Kwiktaim em i luksave olsem ol tok bilong dispela buk em tok tru bilong Baibel. Maski bubu meri i no inap ritim gut tok Inglis, em i kisim sabskripsen bilong nius Wastaua long tok Inglis. Long dispela rot em i lainim sampela tok i tru moa bilong Baibel, na tu, em i lain long tok Inglis. Bubu man i no tingim tumas ol samting bilong spirit olsem meri bilong em i mekim.

Bubu meri Kurzen i gat 11-pela pikinini, na 2-pela pikinini man bilong em, John na Adolph, ol i amamas long dispela gutpela samting bilong spirit em mama bilong ol i painim pinis. John em papa bilong mi, na em i kisim baptais long 1904 long St. Louis, Missouri, long kibung bilong ol Sumatin Bilong Baibel, em nem bilong ol Witnes Bilong Jehova long dispela taim bipo. Klostu olgeta Sumatin Bilong Baibel i no gat planti mani, olsem na oganaisesen i putim kibung long wankain taim olsem wanpela bikpela so bai kamap long St. Louis, long wanem, pe bilong baim tren i daun liklik long dispela taim. Bihain, long 1907, ankol bilong mi, Adolph, i kisim baptais long wanpela kibung long Niagara Falls, New York. Papa na ankol i wok strong long autim ol tok bilong Baibel ol i lainim pinis, na bihain tupela i kirap mekim wok autim tok fultaim (nau ol i kolim painia).

Olsem na taim mama i karim mi long 1907, famili bilong mi i kamap maniman pinis long ol samting bilong spirit. (Sindaun 10:22) Long 1908, taim mi liklik pikinini yet, papamama, em John na Ida, i kisim mi i go long kibung i kamap long Put-in-Bay, Ohio, nem bilong kibung, “Wokabaut i Go Bilong Winim Pait.” Joseph F. Rutherford​—⁠em wanpela wasman bilong raun long dispela taim bipo​—⁠em i siaman bilong kibung. Sampela wik paslain long dispela, em i bin go long Dalton, Ohio, na em i kam long haus bilong mipela na i givim sampela tok long ol Sumatin Bilong Baibel i stap long dispela hap.

Tru, mi no inap tingim ol dispela samting i bin kamap, tasol mi tingim kibung i bin kamap long Mountain Lake Park, Maryland, long 1911. Long dispela kibung, mi wantaim liklik susa bilong mi, Esther, i bungim Charles Taze Russell, em i save lukautim wok bilong ol Sumatin Bilong Baibel long autim tok long olgeta hap.

Long Jun 28, 1914, pait bilong olgeta hap i kirap taim ol birua i kilim i dai Bikman Ferdinand wantaim meri bilong em long Sarajevo, na long dispela taim mi bin go wantaim famili bilong mi long wanpela kibung long Columbus, Ohio. Bihain long dispela taim, mi bin go long planti kibung bilong lain bilong Jehova. Sampela em ol liklik kibung i gat olsem wan handet tasol i bung. Tasol sampela kibung i bikpela moa yet, na ol i wokim long ol traipela haus stediam tru.

Haus Bilong Mipela

Kirap long 1908 na i kam inap long 1918, wanpela liklik kongrigesen bilong ol Sumatin Bilong Baibel i save bung na mekim ol miting long haus bilong mipela long Dalton​—⁠em i stap namel long Pittsburgh, Pennsylvania, na Cleveland, Ohio. Planti man bilong raun na givim tok long ol kongrigesen ol i save kam long haus bilong mipela na kisim kaikai na malolo samting. Ol i save pasim hos na wilka baksait long haus na ol i save givim tok long ol lain i kam bung​—⁠ol i kamapim ol gutpela stori bilong wok ol i mekim, na ol i kamapim sampela gutpela tok i tru, na ol man i amamas tru long harim. Ol dispela kain bung i bin strongim tru bel bilong mipela!

Papa em i wanpela tisa bilong skul, tasol em i givim bel tru long nambawan bikpela wok bilong skulim ol man, em wok Kristen bilong autim tok. Oltaim em i strong long skulim famili bilong em long Jehova, na long olgeta nait mipela i save beten wantaim. Long 1919, papa i salim hos na wilka bilong mipela long $175 na em i baim wanpela ka bilong 1914. Em i mekim olsem na bai em inap autim tok long planti man moa. Long 1919 na 1922, dispela ka yet i karim mipela famili i go long tupela kibung bilong ol Sumatin Bilong Baibel long Cedar Point, Ohio.

Famili olgeta​—⁠em papa, mama, Esther, liklik brata John, na mi​—⁠mipela olgeta i insait long wok bilong autim tok. Mi tingim yet wanpela taim mipela i autim tok na man bilong haus i givim wanpela askim long mi long Baibel. Mi gat olsem 7-pela krismas. Man i askim mi, “Pikinini, Armagedon em wanem samting?” Papa i helpim mi liklik na mi inap kamapim tok bilong Baibel na bekim askim bilong em.

Mi Kirap Autim Tok Fultaim

Long 1931 mi wantaim famili i go long kibung i kamap long Columbus, Ohio, na mipela i amamas long kisim nupela nem, olsem Witnes Bilong Jehova. John i amamas tru na em i tingting pinis olsem mitupela i mas go insait long wok painia.a Mitupela i mekim olsem, na mama, papa, na Esta tu. Em wanpela gutpela samting tru​—⁠mipela famili olgeta i wok wantaim long wok bilong autim gutpela tok bilong Kingdom bilong God! Oltaim mi save tenkyu long Jehova long dispela gutpela blesing. Tasol i gat sampela amamas moa i wetim mipela.

Long Februeri 1934, mi kirap mekim wok long hetkota bilong ol Witnes Bilong Jehova (ol i kolim Betel) long Brooklyn, New York. Sampela wik bihain John tu i kam wok long dispela ples. Mipela i slip long wanpela rum tasol, i go inap long taim em i maritim gutpela meri bilong em, Jessie, long 1953.

Taim mitupela John i kam long Betel, ol i makim papamama long mekim wok painia long ol narapela narapela hap bilong kantri, na Esther wantaim man bilong em George Read i wok wantaim ol. Papamama i wok painia i go inap long taim ol i dai na pinisim wok bilong ol long graun long 1963. Esther wantaim man bilong em i kamapim sampela pikinini na ol i gat gutpela famili, na mi gat planti kandere mi save laikim ol tumas.

Wok na Ol Poroman Long Betel

John i gat save long mekim wok long olkain masin long Betel, na em i wok wantaim ol narapela lain bilong Betel long wokim ol masin pikap na ol narapela masin olsem. Planti tausen Witnes Bilong Jehova ol i bin mekim wok long ol dispela masin pikap taim ol i go long ol haus na autim tok. Na John i helpim sampela long wokim ol masin bilong karamapim pepa long ol nius na putim atres long en bilong postim na salim i go long ol man i bin kisim sabskripsen bilong ol dispela nius.

Taim mi kam nupela long Betel, mi wok long ples bilong pasim skin long ol buk. Long dispela taim i gat sampela yangpela man moa i wok long dispela faktori, na ol i stap yet long Betel. Sampela em Carey Barber na Robert Hatzfeld. Sampela em ol i dai pinis na mi save tingim yet ol, em Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, na John Perry. Ol i stap gut long wok bilong ol i go i go inap planti yia, na ol i no toktok planti long wok ol i mekim, na ol i no ting ol i mas kisim namba long wok bilong ol. Tasol sampela bilong ol dispela Kristen em God i bin makim long spirit holi, ol i kisim sampela bikpela wok moa taim oganaisesen i wok long go bikpela. Sampela i mekim wok insait long Gavening Bodi bilong ol Witnes Bilong Jehova.

Taim mi wok wantaim ol dispela brata i save daunim laik bilong ol yet, dispela i skulim mi long wanpela bikpela samting. Long ol wok bilong graun, ol wokman i save kisim mani olsem pe bilong wok ol i mekim. Tasol ol lain i wok long Betel ol i save kisim planti blesing bilong spirit, na ol manmeri bilong tingim ol samting bilong spirit, ol tasol i amamas long dispela kain pe.​—⁠1 Korin 2:​6-16.

Nathan Knorr i bin kam long Betel long 1923 taim em i gat 18 krismas tasol, na kirap long 1932 em i wasman bilong faktori. Long olgeta de em i save wokabaut insait long faktori na tok gude long olgeta wan wan wokman. Mipela ol nupela man long Betel i pilim tru gutpela pasin bilong em. Long 1936 mipela i kisim wanpela nupela masin bilong prinim ol nius samting i kam long Jemani, na sampela yangpela brata i hatwok tru long skruim ol narapela narapela hap bilong masin wantaim. Olsem na Brata Knorr i putim klos bilong wok na em i wok wantaim ol inap wanpela mun, i go inap long taim masin i wok gut.

Brata Knorr em i man bilong wok strong tru, na planti bilong mipela i no inap wok strong olsem. Tasol em i save tu long pasin bilong kisim amamas. Long Janueri 1942 em i kisim bikpela wok bilong lukautim olgeta wok bilong ol Witnes Bilong Jehova long autim tok long olgeta hap bilong graun, tasol sampela taim em i save pilai kikbal wantaim famili Betel na ol sumatin bilong skul misineri bilong Gileat long banis skul bilong ol long South Lansing, New York.

Long Epril 1950, famili bilong Betel i go sindaun long nupela hap bilong haus ol i bin wokim na i gat 10-pela plua, em i stap long 124 Columbia Heights, Brooklyn, New York. Nupela rum kaikai em inap long mipela olgeta i ken sindaun wantaim na kaikai. Insait long 3-pela yia ol i bin wokim dispela nupela haus, mipela i no inap mekim bung bilong lotu long moningtaim olsem mipela i save mekim. Man! Mipela i amamas tru taim mipela inap kirapim gen dispela bung bilong lotu! Brata Knorr i makim mi bilong sindaun wantaim em long tebol bilong siaman bambai mi ken helpim em long tingim nem bilong ol nupela lain insait long famili bilong mipela. Inap 50 yia pinis mi sindaun long dispela wanpela sia tasol bilong mekim lotu na kisim kaikai bilong moningtaim. Orait long Ogas 4, 2000, ol i pasim dispela rum kaikai, na ol i makim mi bilong sindaun long wanpela bilong ol rum kaikai ol i stretim pinis long haus bipo em Towers Hotel.

Inap liklik taim namel long 1950 na 1959, mi wok long faktori long wanpela masin bilong redim ol samting bilong prinim ol nius samting. Dispela i no wanpela wok mi save laikim tru, tasol William Peterson, em man bilong bosim ol dispela masin, em i save mekim gut tru long mi, olsem na mi amamas long mekim wok long dispela hap. Orait long 1960 ol i singaut long sampela volantia bilong penim nupela haus slip ol i bin wokim long 107 Columbia Heights. Mi amamas long helpim wok bilong redim dispela nupela haus bilong famili bilong Betel em i wok long go bikpela.

Taim wok bilong penim haus long 107 Columbia Heights i pinis, i no longtaim na mi kisim wok bilong tok amamas long ol lain i kam lukim Betel. Inap 40 yia pinis mi mekim dispela kain wok na mi amamas tru long mekim. Maski em ol lain i kam bilong lukim Betel, o ol nupela man bilong kam wok long Betel, mi save amamas tru long tingim bikpela wok em mipela olgeta wantaim i mekim bilong helpim wok bilong Kingdom i go bikpela.

Ol i Givim Bel Long Stadi Long Baibel

Famili Betel bilong mipela i stap strong long ol samting bilong spirit, long wanem, ol wan wan insait long famili ol i laikim tru Baibel. Taim mi kam nupela long Betel, mi bin askim Emma Hamilton, em i mekim wok bilong skelim rait bilong ol buk na nius samting, olsem hamas taim em i bin ritim Baibel. Em i tok, “Inap 35 taim​—⁠na hamas taim moa, em mi no inap tingim.” Anton Koerber, em narapela strongpela Kristen i bin wok long Betel long wankain taim, em i save tok: “Baibel i mas i stap klostu long yumi long olgeta taim.”

Taim Brata Russell i dai long 1916, Joseph F. Rutherford i kisim ples bilong em na lukautim ol wok bilong oganaisesen. Rutherford em i wanpela strongpela man i gat save tru long sanap na givim tok long ol man. Em i wanpela loya na planti taim em i bin sanap long kot na helpim kot bilong ol Witnes Bilong Jehova long Sprim Kot bilong Amerika. Taim Brata Rutherford i dai long 1942, Brata Knorr i kisim ples bilong em na em i wok strong tru long lain gut long pasin bilong sanap na givim tok long ol man. Rum bilong mi i stap klostu long rum bilong em, olsem na planti taim mi save harim em i ritim ritim ol tok em i mas mekim na bai em i ken mekim gut. Em i wok strong olsem, na bihain em i kamap man bilong save gut long sanap na givim tok long ol man.

Long Februeri 1942, Brata Knorr i helpim wok bilong kamapim wanpela skul bilong helpim mipela olgeta brata bilong Betel long save gut long pasin bilong skulim ol man na mekim tok. Bikpela wok bilong skul em bilong kisim gutpela save long ol samting bilong Baibel na long givim tok long ol man. Pastaim mipela wan wan i mas mekim ol sotpela tok long wanpela man em stori bilong em i stap long Baibel. Namba wan tok bilong mi, em mi mas stori long Moses. Long 1943, ol i kirapim wankain skul insait long ol kongrigesen bilong ol Witnes Bilong Jehova, na dispela skul i stap yet long nau. Long Betel ol i strong yet long mipela i mas kisim save long Baibel na kisim save long pasin bilong skulim gut man.

Long Februeri 1943, namba wan klas bilong Skul Gileat i kirap. Na nau tasol, klas namba 111 bilong Gileat i greduet! Dispela skul i bin stap inap 58 yia pinis, na em i bin skulim 7,000 manmeri long mekim wok olsem misineri long olgeta hap bilong graun. Taim skul i kirap long 1943, i gat 100,000 Witnes Bilong Jehova tasol long olgeta hap. Tasol nau i gat 6 milion samting em ol i save autim gutnius bilong Kingdom bilong God!

Gutpela Samting Bilong Spirit Mi Bin Kisim

Paslain liklik long taim ol i kirapim Skul Gileat, ol i makim mipela 3-pela brata bilong Betel long go lukim ol kongrigesen i stap long olgeta hap bilong Yunaitet Stets. Mipela i save stap wanpela o tupela de, o wanpela wik, bilong strongim ol dispela kongrigesen long ol samting bilong spirit. Ol i kolim mipela olsem wokman bilong ol brata, na bihain ol i senisim na kolim olsem wasman sekit. Tasol taim Skul Gileat i kirap pinis, ol i tokim mi long kam bek long Betel na skulim sampela klas. Mi bin stap tisa bilong klas 2 i go inap long klas 5, na mi helpim wanpela tisa bilong dispela skul na mi skulim namba 14 klas. Taim mi skulim ol sumatin na mipela i toktok long ol samting em oganaisesen bilong Jehova long nau i bin mekim taim wok bilong en i nupela yet​—⁠planti bilong ol dispela samting em mi yet mi bin lukim​—⁠dispela i mekim na mi amamas na tenkyu tru long ol gutpela samting bilong spirit mi bin kisim long papamama.

Narapela gutpela samting, em mi bin go long planti kibung intenesenel bilong lain bilong Jehova. Long 1963, mi raun long olgeta hap bilong graun wantaim 500 narapela em ol i go long ol kibung i gat nem olsem “Gutnius Bilong i Stap Oltaim.” Mi bin go long sampela bikpela kibung moa, olsem long Warsaw, Polan, long 1989; Berlin, Jemani, long 1990; na Moscow, Rasia, long 1993. Long ol dispela kibung mi bin bungim sampela gutpela brata sista em ol i bin kisim nogut inap planti yia aninit long gavman bilong Hitler, na gavman Komiunis, o tupela wantaim. Taim mi toktok wantaim ol dispela lain, dispela i strongim tru bilip bilong mi!

Insait long ol dispela yia mi bin mekim wok bilong Jehova, mi bin kisim planti gutpela samting bilong spirit. Mi wok long kisim yet ol blesing bilong spirit. Na ol dispela gutpela samting i no olsem mani kago​—⁠taim yumi givim long ol narapela man, yumi save kisim moa yet. Wan wan taim mi harim sampela i tok, i gutpela sapos ol i no bin go bikpela insait long lain Witnes Bilong Jehova. Ol i tok, sapos ol i bin stap ausait long oganaisesen bilong God, orait nau ol inap pilim moa yet ol tok i tru bilong Baibel.

Mi save bel hevi stret taim mi harim sampela yangpela i tok olsem, long wanem, i olsem ol i tok, i gutpela sapos yumi no save long ol lo bilong Jehova kirap long taim yumi liklik yet. Tasol taim man i bikpela pinis na em i kisim save long ol tok i tru bilong Baibel, em i hatwok tru long lusim ol pasin na tingting nogut bilong em. Oltaim mi save tenkyu tru long papamama i bin skulim 3-pela pikinini bilong ol long bihainim stretpela pasin. John i bin stap gut long wok bilong Jehova i go inap long taim em i dai long Julai 1980, na i kam inap long nau Esther i stap yet olsem wanpela gutpela Witnes.

Mi amamas long tingim ol gutpela pren mi bin kisim insait long lain brata sista Kristen. Mi winim pinis 67 yia long Betel, em ol gutpela yia tru long mi. Mi no bin marit, tasol mi gat planti pikinini man na pikinini meri bilong spirit, na ol liklik bubu bilong spirit tu. Na mi amamas long tingim olgeta nupela manmeri i bin kam insait long famili bilong yumi bilong spirit em ol i stap long olgeta hap bilong graun na mi no bungim ol yet. Olgeta wan wan i gutpela samting tru. Tru tumas, Jehova i save “givim yumi planti gutpela samting.”​—⁠Sindaun 10:⁠22.

[Futnot]

[Piksa long pes 20]

Kirap long han kais na i kam long han sut: papa, na brata bilong mi, John, i sindaun long lek bilong em, Esther, mi, na mama

[Ol Piksa long pes 23]

Mi skulim wanpela klas bilong Gileat long 1945

Han kais antap: Ol tisa bilong Skul Gileat, em Eduardo Keller, Fred Franz, mi, na Albert Schroeder

[Piksa long pes 24]

Mi tingting long ol gutpela blesing mi bin kisim long wok bilong Jehova