‘Em Wok Bilong Mipela na Mipela i Mas Mekim Tasol’
EM STORI BILONG GEORGE COUCH
Bihain long mipela i bin autim tok long ol haus long moningtaim, pren bilong mi i kamautim 2-pela sanwis. Taim mipela i kaikai pinis, mi kamautim wanpela smok. Pren i askim mi: “Hamas yia yu bin stap insait long tok i tru?” Mi tokim em: “Asde nait em namba wan taim mi go long miting.”
MAMA i karim mi long Mas 3, 1917, long wanpela fam i stap longwe inap 50 kilomita long hap is bilong Pitsbek, Pensilvenia, Yunaitet Stets, klostu long liklik taun Evonmor. Long dispela hap papamama bilong mi i bin mekim bikpela long mi wantaim 4-pela brata na wanpela susa bilong mi.
Mipela i no lainim tumas ol tok bilong lotu. Bipo papamama i bin go long lotu, tasol taim mipela pikinini i yangpela yet ol i lusim lotu. Tasol mipela i bilip long Man bilong wokim olgeta samting, na famili bilong mipela i bihainim ol bikpela lo i stap long Baibel.
Nambawan gutpela samting papamama i lainim mi long en, em pasin bilong mekim wok na inapim dispela wok mi kisim. Em i wanpela samting oltaim mipela i mas mekim long fam. Tasol mipela i no wok tasol long olgeta taim. Mipela i mekim ol gutpela samting bilong amamas, olsem pilai basketbal na beisbal, raun long hos, na subim wara. Long dispela taim mipela i sot long mani, tasol i stap bilong mipela long fam i gutpela. Mipela i go long komyuniti skul i gat wanpela klas rum tasol, na mipela i go skul long taun taim mipela i stap long haiskul.
Wanpela nait mi wokabaut wantaim pren bilong mi long taun. Wanpela naispela yangpela meri i lusim haus bilong em na i kam tok gutnait long pren bilong mi. Pren i tok, nem bilong meri em Fern Prugh na mi sekanim em. Haus bilong em i stap long wankain rot haiskul i stap long en. Planti taim mi wokabaut klostu long haus bilong Fern, na em i stap ausait na mekim wok. Mi luksave olsem em i meri bilong wok, na mi laikim dispela pasin. Mipela i kirap pren gut wantaim na bihain narapela i laikim tru narapela, na mipela i marit long Epril, 1936.
Harim Tok i Tru Bilong Baibel
Taim mama i no karim mi yet, lotu bilong wanpela lapun meri i as na ol man long taun i mekim nogut long em. Mama bilong mi i save go lukim em long Sarere, taim em i go long taun bilong baim ol samting. Mama i klinim haus bilong em na mekim ol narapela wok bilong helpim em i go inap long taim dispela lapun meri i dai. Mi bilip olsem Jehova i mekim gut long mama, long wanem, mama i mekim gutpela pasin long dispela meri em i wanpela Sumatin Bilong Baibel, em nem bilong ol Witnes Bilong Jehova long dispela taim.
Bihain yangpela pikinini meri bilong anti bilong mi i dai wantu tasol. Misin i no mekim gut bel bilong anti, tasol wanpela meri i stap klostu i mekim gut long anti. Dispela meri i wanpela Sumatin Bilong Baibel. Dispela Sumatin Bilong Baibel i stori long anti long samting i save painim man i dai pinis. (Jop 14:13-15; Saveman 9:5, 10) Dispela i mekim gut bel bilong anti. Orait, nau anti i stori long mama olsem ol man i dai pinis ol bai kirap bek long matmat. Dispela i kirapim tingting bilong mama, long wanem, papamama bilong em i bin dai taim em i yangpela yet na em i laik save wanem samting i painim man i dai pinis. Dispela i bin helpim mi long save, taim rot i op em i bikpela samting long autim tok long kain kain taim na ples.
Long 1933 samting, mama i harim redio long olgeta Sande bilong harim ol tok bilong Joseph F. Rutherford, em presiden bilong Sosaiti Was Taua long dispela taim. Insait long ol dispela yia, ol Witnes i kirap autim tok tu long ol haus long hap mipela i sindaun long en. Ol i putim pikap long banis bilong mipela aninit long wanpela diwai na putim plet i gat toktok bilong Brata Rutherford long en. Ol dispela tok na nius Wastaua na Golden Age (nau nem bilong en Kirap!) i helpim mama long laikim yet tok i tru.
Sampela yia bihain, long 1938, ol i salim pas long ol man i save ritim nius Wastaua na singautim ol long kam long wanpela bung i kamap long haus bilong wanpela man i stap longwe inap 25 kilomita. Mama i laik i go, olsem na mitupela Fern na tupela brata bilong mi i go wantaim em. John Booth na Charles Hessler, em ol wasman bilong raun bilong ol Witnes Bilong Jehova, ol i mekim tok long mipela 12-pela man. Bihain long miting, ol i kirap stretim rot long sampela i ken go autim tok long de bihain. I no gat wanpela i laik go wantaim ol, olsem na Brata Hessler i makim mi na em i askim mi olsem: “Yu laik go wantaim mipela?” Mi no save tumas long samting ol bai mekim, tasol mi no inap tingting long wanpela samting i pasim mi long helpim ol.
Mipela i raun long ol haus i go inap long belo, na bihain Brata Hessler i kamautim 2-pela sanwis. Mipela i sindaun long lata bilong haus lotu na kirap kaikai. Bihain long mi kamautim smok, Brata Hessler i kisim save olsem mi bin go long wanpela miting tasol. Em i singautim em yet long kam kaikai wantaim mipela long dispela nait yet, na em i tokim mipela long singautim ol man i stap klostu long kam na toktok long Baibel. Bihain long kaikai, em i stadi long Baibel wantaim mipela na mekim wanpela tok long 10-pela man i bin kam. Em i tokim mipela olsem mipela i mas stadi long Baibel long olgeta wik. Ol man i stap klostu ol i no wanbel long dispela, tasol mitupela Fern i stretim rot bilong stadi long Baibel long olgeta wik.
Kamap Strong Long Tok i Tru
I no longtaim na mitupela Fern i go autim tok. Mipela i sindaun long baksait bilong ka, na taim mipela i kirap long smok brata bilong mi i tanim het na lukluk i kam long mipela, em i tok: “Nau tasol mi kisim save olsem ol Witnes i no save smok.” Wantu tasol Fern i tromoi smok bilong em i go ausait—mi pinisim smok bilong mi. Maski mipela i amamas long smok, bihain long dispela mipela i no smok gen.
Mipela i baptais long 1940, na bihain mitupela Fern i stap long wanpela miting na stadi long wanpela stori i kirapim ol man long mekim wok painia, olsem ol i save kolim dispela wok bilong autim tok long olgeta de. Taim mipela i wok long go bek long haus, wanpela brata i askim mipela olsem: “Olsem wanem? Yu na Fern i laik mekim wok painia? I no gat wanpela samting i pasim yupela.” Mipela i wanbel wantaim em, olsem na mipela i redi long mekim dispela wok. Mi toksave long bos long ples wok olsem long 30 de bihain mi bai pinis long wok, na mipela i stretim rot bilong mekim wok painia.
Mipela i toktok wantaim Sosaiti Was Taua long wanem hap i gutpela mipela i go long en bilong mekim wok, na bihain mipela i go long Baltimo, Merilan. Long dispela hap i gat wanpela haus painia, na bilong baim ples slip na kaikai bilong wanpela mun em inap 10 dola long olgeta mun. Mipela i bin bungim sampela mani, na mipela i ting dispela mani bai lukautim mipela i go inap long Armagedon. (KTH 16:14, 16) Mipela i ting olsem, long wanem, oltaim mipela i ting Armagedon i klostu pinis. Olsem na taim mipela i kirap mekim wok painia, mipela i lusim haus bilong mipela na ol narapela samting tu.
Mipela i mekim wok painia long Baltimo kirap long 1942 i go inap long 1947. Insait long ol dispela yia, ol man i strong tru long biruaim wok bilong ol Witnes Bilong Jehova. Sampela taim mipela i no draivim ka bilong mipela yet i go long haus bilong ol Baibel-stadi, nogat; mipela i askim narapela man long kisim mipela i go. Long dispela rot ol man i no inap katim ol taia bilong ka bilong mipela. I no gat wanpela man i laikim dispela kain pasin birua, tasol mi ken tok olsem, oltaim mipela i amamas long mekim wok autim tok. Na mipela i amamas taim sampela samting bilong kirap nogut long en i kamap taim mipela i mekim wok bilong Bikpela.
I no longtaim na mipela i pinisim olgeta mani mipela i bin bungim. Ol taia bilong ka i olpela pinis, na ol klos na su bilong mipela tu. Inap 2-pela o 3-pela taim mipela i sik inap longpela taim. Em i hatwok tru long mekim wok, tasol mipela i no tingting long lusim wok. I no gat wanpela taim mipela i toktok long mekim olsem. Mipela i lusim ol samting i save pulim bikpela mani bambai mipela inap mekim yet wok painia.
Wok Long Narapela Narapela Hap
Long 1947 mipela i go long kibung long Los Enjeles, Kalifonia. Taim mipela i stap long dispela hap, brata bilong mi William na mi, mipela i kisim pas i tok, ol i makim mipela long mekim wok olsem wasman bilong raun na helpim ol kongrigesen. Long dispela taim mipela i no kisim skul bilong mekim dispela wok. Mipela i mekim tasol. Insait long 7-pela yia, mitupela Fern i mekim dispela wok long Ohaio, Misigen, Indiana, Ilinoi, na Nu Yok. Long 1954 ol i singautim mipela long go long namba 24 klas bilong Skul Gileat, em wanpela skul bilong lainim ol misineri. Taim mipela i skul, Fern i kisim sik polio. Tasol gutpela tru, em i kamap orait gen, na ol i salim mipela long mekim wok bilong raun long ol kongrigesen long Nu Yok na Konektikat.
Taim mipela i wok long Stamfot, Konektikat, Nathan H. Knorr—em presiden bilong Sosaiti Was Taua long dispela taim—em i singautim mipela long kam na stap wanpela Sarere Sande wantaim em na meri bilong em, Audrey. Ol i bin redim abus i swit tru wantaim ol narapela gutpela kaikai. Mipela i bin bungim ol bipo, na mi save long Brata Knorr, olsem na mi save em i no tingting tasol long bung wantaim mipela na kaikai, nogat. Long dispela nait em i askim mi olsem: “Yu laik kam long Betel?”
Mi tokim em: “Mi no save; mi no save tumas long wok na i stap bilong ol man long Betel.”
Taim mipela i tingting long dispela inap sampela wik pinis, mipela i tokim Brata Knorr, sapos em i laik mipela bai kam. Long wik antap, mipela i kisim pas i tokim mipela long kam long Betel long Epril 27, 1957. Long dispela de mipela i bin marit inap 21 yia.
Long namba wan de long Betel, Brata Knorr i tokim mi stret long samting mi mas mekim. Em i tok: “Yu no wanpela wasman sekit moa; yu stap long hia bilong wok long Betel. Dispela em i nambawan bikpela wok yu mas mekim, na mipela i laik yu givim taim na strong bilong yu long bihainim dispela save yu kisim hia long Betel. Mipela i laik yu stap long Betel.”
I Stap Bilong Mi Long Betel i Gat As Bilong En
Namba wan wok ol i givim long mi em long dipatmen bilong ol nius na dipatmen bilong salim ol buk samting. Bihain long 3-pela yia, Brata Knorr i salim tok long mi na askim mi long kam long ofis bilong em. Em i tokim mi olsem as tru na ol i bin singautim mi long kam long Betel, em bilong wok long haus Betel. Em i tok stret olsem: “Yu bai lukautim haus Betel.”
Taim mi lukautim haus Betel, mi tingim ol samting papamama bilong mi i bin skulim mi long en taim mi go bikpela long fam. Haus Betel i kain olsem ol narapela famili. I gat wok bilong wasim ol klos, kukim kaikai, wasim ol kap plet samting, stretim ol bet, na kain wok olsem. Wok bilong stretim ol samting long Betel i mekim na Betel i kamap gutpela ples bilong i stap long en bambai man inap tok Betel em i ples tru bilong em.
Mi ting i gat planti samting ol famili inap lain long en taim ol i skelim wok bilong Betel. Mipela i save kirap hariap long moningtaim na skelim wanpela skripsa bilong Baibel bilong dispela de. Mipela i mas wok strong na kisim stretpela tingting long ol samting mipela i mas mekim. Betel i no olsem haus bruder, olsem sampela inap ting. Mipela inap mekim planti wok, long wanem, mipela i bihainim sedyul. Planti i tok, save ol i bin kisim long Betel i bin helpim ol bihain long mekim wok bilong ol long lukautim famili na kongrigesen Kristen.
Ol yangpela man na meri i kam long Betel ol inap kisim wok bilong klinim haus, wasim klos, o wok long faktori. Ating ol man bilong dispela graun i laik mipela i ting kain wok olsem i daunim mipela. Tasol ol yangpela long Betel i kisim save olsem, ol dispela wok i bikpela samting bilong helpim famili bilong mipela long wok gut na stap amamas.
Na ating ol man bilong dispela graun ol i strongim dispela tingting olsem bilong i stap amamas tru, yu mas i gat namba na biknem. Dispela i no stret. Taim yumi mekim wok ol i makim yumi long mekim, orait yumi mekim samting em wok bilong yumi long mekim, na yumi kisim blesing bilong Jehova. (Luk 17:10) Yumi inap kisim bel isi tru na amamas sapos yumi tingim as bilong wok bilong yumi—em bilong mekim laik bilong Jehova na helpim wok bilong Kingdom. Sapos yumi tingim dispela, yumi inap kisim amamas long olgeta kain wok.
Helpim Wok Long Go Bikpela
Long wanpela kibung long Klivlan, Ohaio, long 1942 em 10-pela yia paslain long mipela i kam long Betel, Brata Knorr i mekim pablik-tok “Gutaim Bai Stap o Nogat?” Em i tokaut klia olsem Namba Tu Pait—long dispela taim pait i stap—bai pinis na gutaim bai kamap na dispela bai opim rot long mekim wok autim tok i go bikpela. Long 1943, ol i kamapim Skul Gileat bilong lainim ol misineri na Skul Bilong Wok Autim Tok bilong helpim pasin bilong ol brata long mekim tok long pletfom long kamap gutpela. Ol i wokim ol bikpela kibung tu. Ol bikpela kibung tru i kamap long 1950, 1953, na 1958 long Yanki Stediam, Nu Yok. Taim ol kibung i kamap long 1950 na 1953 long dispela stediam, mi inap helpim wok bilong stretim wanpela bikpela hap ol haus-ka i pulap long en na i olsem biktaun. Planti tausen tausen manmeri i slip long dispela hap inap 8-pela de long taim bilong dispela tupela kibung.
Bihain long ol dispela kibung, na wanpela bikpela kibung tru long 1958, namba bilong ol pablisa bilong Kingdom i go bikpela tru. Dispela i kamapim sampela wok moa long Betel. Long 1969 na 1972 samting, mipela i sot tru long spes na ol rum slip bilong ol wokman. Bilong lukautim famili bilong mipela i wok long i go bikpela, mipela i mas kisim sampela moa rum slip, na ol haus kuk, na ol rum kaikai.
Brata Knorr i askim Brata Max Larson, em wasman bilong faktori, na mi long painim wanpela hap graun i gutpela long wokim nupela haus long en. Taim mi kam long Betel long 1957, inap 500 manmeri i insait long famili bilong mipela long Betel na ol i slip long wanpela bikpela haus slip. Tasol inap sampela yia nau, Sosaiti i bin baim na stretim 3-pela bikpela hotel i stap klostu—em Tauas Hotel, Standis Hotel, na Bosat Hotel—na planti narapela haus. Long 1986, Sosaiti i baim hap graun bipo Magret Hotel i stap long en, na mekim dispela naispela nupela haus i kamap haus slip bilong 250 manmeri. Orait, long 1992 samting, ol i wokim wanpela haus i gat 30 plua bilong 1,000 wokman i ken slip long en. Nau winim 3,300 manmeri long famili bilong mipela inap slip na kaikai long Betel long Bruklin.
Ol i baim tu hap graun long Walkil, Nu Yok, em longwe long Betel long Bruklin inap 160 kilomita. Insait long ol yia i kirap long 1969 samting, ol i bin wokim ol haus slip na bikpela haus faktori bilong wokim ol buk na nius. Nau inap 1,200 manmeri bilong famili Betel bilong mipela ol i sindaun na wok long Walkil. Long 1980, mipela i kirap painim wanpela hap graun bikpela bilong en inap olsem 250 hekta na i stap klostu moa long Nu Yok Siti na klostu long bikrot. Man bilong salim haus samting i lap na em i tok: “Yupela bai painim we wanpela hap graun olsem? Yupela i no inap tru long painim.” Tasol long moningtaim long de bihain em i ring i kam na em i tok: “Mi painim pinis hap graun bilong yupela.” Nau dispela hap em Wastaua Edukesen Senta long Patesen, Nu Yok. Long dispela hap ol i save wokim ol skul na winim 1,300 wokman i stap long Patesen.
Ol Samting Mi Bin Lain Long En
Mi bin kisim save olsem wanpela gutpela wasman em man inap kisim save i kam long ol narapela man. Klostu olgeta samting mi bin mekim olsem wasman bilong Betel, em tingting bilong ol narapela.
Taim mi kam long Betel, planti man i lapun olsem nau mi lapun. Planti bilong ol i dai pinis. Husat i kisim ples bilong ol man i go lapun na i dai? I no olsem ol man i gat bikpela save, nogat. Em ol man i stap hia long Betel na ol i stap gut long wok bilong ol, na ol i amamas long mekim wok.
Narapela bikpela samting bilong tingim em olsem: Gutpela meri marit em i bikpela samting. Helpim mi bin kisim long gutpela meri bilong mi, Fern, i bin helpim mi tru long inapim ol wok God i bin givim long mi. Ol man marit i gat wok long helpim meri bilong ol long amamas long wok bilong ol. Mi traim makim taim long ol samting mitupela Fern i laik mekim. I no olsem mipela i mas tromoi bikpela mani long mekim samting mipela i laik mekim, nogat; mipela i mekim sampela samting mipela i no save mekim long olgeta taim. Em wok bilong man marit long mekim ol samting i save amamasim meri bilong em. Hap taim man i stap wantaim meri bilong em, dispela em i bikpela samting na i save go hariap, olsem na em i mas mekim gutpela wok long dispela hap taim.
Mi amamas long stap long taim bilong las de Jisas i bin toktok long en. Kirap long bipo bipo yet i kam inap nau, i no gat narapela taim i kain olsem dispela taim nau yumi stap long en. Yumi inap lukim na bilip olsem Bikpela i save stiaim oganaisesen bilong em long redi long nupela taim God i bin tok promis long kamapim. Taim mi tingting bek long i stap bilong mi long mekim wok bilong Jehova, mi inap luksave olsem Jehova i save stiaim dispela oganaisesen—ol man, nogat. Yumi ol wokboi bilong em tasol. Olsem na oltaim yumi mas larim em i soim rot long yumi. Taim em i kamapim klia wanem samting yumi mas mekim, orait yumi mas bihainim tok na wok wantaim long mekim.
Givim bel long wok gut wantaim oganaisesen na bai yu stap amamas tru. Maski yu mekim wanem wok—wok painia, wok sekit, wok wantaim kongrigesen olsem pablisa, wok long Betel, o wok misineri—bihainim tok bilong oganaisesen na tingim wok bilong yu i olsem bikpela samting. Wok strong long amamas long olgeta wok ol i givim long yu na long olgeta wan wan de yu mekim wok bilong Jehova. Tru, skin bilong yu bai les na ating sampela taim yu mas mekim planti wok tumas o yu bai bel hevi sampela taim. Long kain taim olsem yu mas tingim as na yu bin dediketim yu yet long Jehova. Em bilong mekim laik bilong em, laik bilong yu nogat.
I no gat wanpela de mi kam long wok na mi no amamas long wok bilong mi. Bilong wanem? Long wanem, taim yumi givim bel tru long Jehova, yumi amamas long save yumi mekim wok yumi mas mekim tasol.
[Piksa long pes 19]
Dipatmen Bilong Ol Nius
[Piksa long pes 19]
Hap bilong ol haus-ka, 1950
[Piksa long pes 19]
Mi mekim wok painia long Baltimo, 1946
[Piksa long pes 19]
Mi wantaim Fern long 1950 long hap bilong ol haus-ka
[Piksa long pes 22]
Mitupela wantaim Audrey na Nathan Knorr
[Piksa long pes 23]
Wastaua Edukesen Senta long Patesen, Nu Yok
[Piksa long pes 24]
Mi wantaim Fern long nau