Yu Ting Dispela Em i Nambawan Gutpela Wok?

SAPOS yu wanpela Kristen i baptais pinis, ating pasin bilong laikim tru God i kirapim yu long bihainim laik bilong em. Na wok autim tok em samting yu save givim bel long mekim. Tru tumas, Jisas Krais i tokim ol disaipel bilong em long kamapim ol disaipel. (Matyu 28:​19, 20) Ating nau yu mekim wok mani bilong lukautim yu yet long ol samting bilong skin. Tasol yu wanpela disaipel bilong Jisas na wanpela Witnes Bilong Jehova, na nambawan bikpela wok bilong yu em olsem: Yu wanpela wokman Kristen, na wok bilong autim tok bilong Kingdom em i nambawan bikpela samting long i stap bilong yu.​—⁠Matyu 24:⁠14.

Ating yu gat 19 i go inap 24 krismas samting. Na ating planti taim yu bin tingting long wanem wok samting bai yu mekim. Taim yu skelim ol wok yu inap mekim, ating yu laikim wanpela wok i givim amamas long yu, a?

Orait tingim tok Jørgen bilong Denmak i mekim long wok bilong em. Jørgen i tok, dispela wok em i “nambawan gutpela rot bilong bihainim, na long dispela wok yu ken putim tingting bilong yu long wanpela wok i bikpela samting tru, winim olgeta narapela wok.” Eva i gat 31 krismas na em i stap long kantri Grik, em i tok: “Taim mi skelim i stap bilong mi wantaim i stap bilong ol wankrismas bilong mi, mi luksave olsem i stap bilong mi i gat as bilong en, na i givim amamas long mi, na i kirapim tru tingting, winim i stap bilong ol.” Wanem wok i givim dispela kain amamas? Olsem wanem yu inap mekim dispela kain wok?

Yu Ting God i Save Stiaim Yu?

Ating i hatwok long makim wok yu laik mekim. Sampela ol i laik bai God i soim stret wok em i laik ol i mas mekim.

Taim Moses i stap long Midian, Jehova i tokim em long go bek long Isip na bringim lain Israel i go lusim wok kalabus. (Kisim Bek 3:​1-10) Ensel bilong God i kamap long ai bilong Gideon, em dispela man God i makim bilong kisim bek lain Israel long han bilong lain i daunim ol. (Hetman 6:​11-14) Devit i wok long lukautim ol sipsip taim God i tokim Samuel long makim Devit long kamap king bilong Israel. (1 Samuel 16:​1-13) God i no save stiaim yumi long kain rot olsem long nau. Nogat. Yumi yet i mas skelim gut ol samting, na makim olsem wanem yumi bai yusim gut ol save God i givim long yumi.

Long nau Jehova i “opim rot pinis” bilong ol yangpela Kristen i ken mekim bikpela wok. (1 Korin 16:⁠9) Olsem wanem em i mekim dispela? Insait long 10-pela yia i go pinis, inap 2,125,000 manmeri moa i autim tok bilong Kingdom, olsem na long nau namba bilong ol i winim 6 milion long olgeta hap. Husat i helpim wok bilong kamapim planti milion Baibel, buk, liklik buk, nius, na liklik nius, i bilong givim kaikai bilong spirit na helpim wok bilong autim gutnius long olgeta hap? Lain bilong famili Betel long olgeta hap ol i mekim dispela gutpela wok.

Stap Amamas

Insait bilong tok Betel em “Haus Bilong God,” na ol Kristen i mekim wok volantia long hetkota na long ol brens-ofis bilong Sosaiti Was Taua, ol i save slip long ol haus Betel. (Stat 28:​19, long sta daunbilo) Yumi ken tok ol famili Betel long nau ol i olsem wanpela gutpela famili i bihainim “gutpela tingting na save” na pasin bilong laikim tru Jehova i as bilong en.​—⁠Sindaun 24:⁠3.

Yumi ken tok wanem long i stap bilong Betel olsem wanpela famili? Wanpela bilong famili Betel long Estonia em i gat 25 krismas, em i tok: “Mi amamas long stap wantaim ol pren bilong Jehova long olgeta taim. Dispela samting i stap yet olsem nambawan bikpela samting long mi.”​—⁠Song 15:​1, 2.

Long olgeta hap inap 19,500 manmeri i wok long Betel. (Song 110:⁠3) Long Amerika, 46 pesen bilong famili Betel i gat 19 i go inap 29 krismas. Olsem Aisaia, ol i bin tok: “Mi stap! Salim mi.” (Aisaia 6:​8, NW ) Aisaia i dediket pinis long Jehova, tasol em i volantia long mekim sampela wok moa. Bilong mekim olsem em i mas daunim sampela laik bilong em yet. Ol brata sista i wok long Betel, ol i lusim haus na ples bilong ol, na mama, papa, brata, susa, na ol pren tu. Ol i amamas long daunim laik bilong ol yet bilong helpim wok bilong autim “gutnius.”​—⁠Mak 10:​29, 30.

Tasol long Betel man inap kisim planti gutpela samting bilong spirit! Wanpela yangpela bilong famili Betel long Rasia, em i tok: “Pasin bilong daunim laik bilong yumi yet i lainim yumi long planti samting em inap helpim yumi long stap gut long nupela taim. Mi ken tok olsem ol blesing Jehova i save givim long mi i winim tru ol samting mi lusim bilong mekim laik bilong em.”​—⁠Malakai 3:⁠10.

I Stap Bilong Ol Man Long Betel

I stap bilong ol man long Betel i wanem kain? Ol brata sista bilong famili Betel i wanbel long tok olsem i stap bilong ol i gutpela na i givim amamas long ol, na i save kirapim tru tingting bilong ol. Jens i gat 43 krismas, na em i amamas long stap long Betel. Bilong wanem? Em i tok: “Long Betel mi pilim olsem mi bilong wanpela lain i wok strong tru long mekim wanpela bikpela wok. Dispela i helpim mi long save olsem wok bilong Jehova i bikpela samting tru na i stap long olgeta hap.”

Kirap long Mande i go inap long Sarere, ol i save mekim bung bilong lotu long moningtaim. Ol i stori long tok bilong Baibel, na wanpela strongpela elda i save lukautim dispela samting. Long olgeta Mande apinun ol i mekim famili-stadi inap wanpela aua na stadi long Wastaua, na sampela taim bihain long dispela ol i save harim wanpela tok bilong Baibel i stret long sindaun bilong famili Betel.

Wanem samting i painim man taim em i kam nupela long Betel? Bilong helpim ol nupela man long save long sindaun bilong Betel, ol strongpela brata i mekim ol tok i stori long narapela narapela samting bilong Betel. Inap hap taim bilong namba wan yia, nupela man bilong famili Betel bai insait long wanpela gutpela skul long olgeta wik. Dispela skul i bilong helpim em long kisim gutpela save moa long Baibel. Ol nupela i save bihainim gutpela sedyul bilong ritim Baibel. Insait long namba wan yia bilong ol long Betel, ol nupela bilong famili Betel ol i save ritim Baibel olgeta.

Dispela skul i mekim wanem long ol? Joshua i gat 33 krismas na em i wanpela bilong famili Betel long Hong Kong, em i tok: “Betel i bin helpim mi long pilim tru ol gutpela pasin bilong Jehova. Mi ken bung wantaim planti strongpela brata em ol i bin lusim bikpela hap taim bilong laip bilong ol long mekim wok bilong Jehova. Mi laikim tru ol samting bilong spirit mipela i save mekim long Betel, olsem bung bilong lotu long moningtaim na Stadi Wastaua bilong famili. Na tu, mi amamas long bihainim pasin bilong mekim ol samting long taim stret na mipela i no gat planti samting bilong skin. Dispela i mekim na i no gat planti samting mi mas tingting planti long en. Na tu, mi lain long bihainim pasin Kristen taim mi mekim ol samting, na dispela i save helpim mi long olgeta taim.”

Famili Betel i save lusim bikpela hap taim na strong bilong ol long mekim wok ol i bin volantia long mekim. Ol i yusim strong bilong skin na tingting bilong mekim ol wok ol i kisim long Betel. I gat planti kain kain wok bilong mekim. Sampela ol i save mekim wok long ol masin bilong prinim buk, o ol i wok long ples bilong wokim ol buk ol bai salim i go long planti kongrigesen long bihain. Sampela ol i wok long haus kuk, rum kaikai, o long ples bilong wasim ol laplap. Sampela narapela wok i bilong klinim haus, wok gaden, wok konstraksen, na kain wok olsem. Sampela ol i gat wok long lukautim ol masin samting bilong ol dispela dipatmen. Sampela ol i mekim wok dokta samting o wok long ofis. Olgeta wok bilong Betel i gat sampela hatwok bilong en, tasol taim man inapim wok, dispela i givim bikpela amamas long em. Wok bilong Betel i save mekim gut bel bilong man, long wanem, wok i helpim wok bilong Kingdom na pasin bilong laikim tru God i kirapim famili Betel long mekim dispela wok.

Ol i makim ol famili Betel long i go long ol narapela narapela kongrigesen, na long kongrigesen ol inap lukim ol gutpela samting wok bilong ol i kamapim. Ol i amamas long go long ol miting bilong kongrigesen na mekim wok autim tok. Olsem na famili Betel i pas gut wantaim ol brata sista long kongrigesen.​—⁠Mak 10:​29, 30.

Rita em i wanpela bilong famili Betel long Briten, em i tok: “Mi amamas tru long kongrigesen! Taim mi stap long ol miting na long wok autim tok, em i strongim tru bilip bilong mi long lukim ol gutpela brata, sista, pikinini, na ol lapun! Maski wanem samting i kamap ol dispela brata i stap long miting na ol i autim tok. Dispela i helpim mi long givim bel moa yet long mekim wok bilong mi long Betel.”

I no olsem famili Betel i save wok, go long ol miting, na autim tok, na em tasol, nogat. Famili Betel i gat taim bilong painim amamas tu. Long wan wan taim ol i save mekim “Bung Bilong Famili” i save amamasim ol na strongim ol long ol samting bilong spirit. Long ol dispela bung ol inap kisim amamas taim sampela bilong famili i pilai musik o singsing, na tu, em gutpela taim long toktok gut wantaim na kisim save long i stap bilong ol narapela i wok long Betel. Na tu, ol i save amamas long bung wantaim ol narapela long rum bilong ol na dispela i save strongim ol. Ating i gat ol hap bilong mekim ol spot na eksasais samting, na ol laibreri bilong ol i ken rit na stadi long en. Na yumi no ken lusim tingting long gutpela toktok i save kamap taim ol i sindaun na kaikai wantaim.

Tom em i wanpela bilong famili Betel long Estonia, na em i tok: “Solwara i no stap longwe long Betel, na wanpela naispela bikbus tu i stap klostu, na mi na meri bilong mi i save go raun long en. Na tu, sampela taim mi save pilai golf, hoki, na tenis wantaim ol pren i stap long kongrigesen na Betel. Na long gutpela taim, mipela i save go raun long wilwil bilong mipela.”

Yu Ken Mekim Wanem Bilong Winim Mak?

Betel em i wanpela ples ol strongpela Kristen i save mekim wok bilong Jehova na helpim ol wanbilip long olgeta hap. Ol man i laik kamap wanpela bilong famili Betel, ol i mas winim sampela mak. Yu ken mekim wanem bilong winim mak bilong wok long Betel?

Olsem Timoti, em i wok wantaim aposel Pol, ol man i wok long Betel ol i mas i gat gutpela nem long kongrigesen. (1 Timoti 1:⁠1) “Ol Kristen long Listra na Aikoniam ol i tok . . . Timoti i gutpela man.” (Aposel 16:⁠2) Maski Timoti i yangpela man, em i save gut long Baibel na em i stap strong long tok i tru. (2 Timoti 3:​14, 15) Na olsem tasol, ol man i laik wok long Betel ol i mas i gat save long tok bilong Baibel.

Ol brata sista bilong famili Betel ol i mas i gat pasin bilong daunim laik bilong ol yet. Pasin bilong Timoti long daunim laik bilong em yet na amamas long tingim ol samting bilong Kingdom pastaim i stap ples klia, olsem na Pol inap tok olsem: “I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela. Olgeta arapela man i save wari long ol samting bilong ol yet, na ol i no save laik tru long mekim wok bilong Jisas Krais i go het. Tasol yupela i save long gutpela pasin bilong Timoti. Yupela i save, em i bin helpim mi long wok bilong gutnius, olsem pikinini i save helpim papa.”​—⁠Filipai 2:​20-22.

Wok bilong Betel i bilong ol man na meri i strong long ol samting bilong spirit. Ol i stretim ol samting bambai famili Betel i ken kamap strong moa long ol samting bilong spirit long rot bilong Baibel-stadi, na pasin bilong go oltaim long ol miting Kristen na autim tok, na bung wantaim ol strongpela Kristen. Olsem na lain i stap long Betel inap bihainim tok bilong Pol: “Yupela i mas wokabaut wantaim [Krais Jisas]. Yupela i mas sanap strong long em, olsem diwai i sanap strong long graun, na olsem haus i sanap strong antap long strongpela pos. Yupela i mas bilip strong long dispela gutnius mipela i bin skulim yupela long en, na oltaim yupela i mas tenkyu long God.”​—⁠Kolosi 2:​6, 7.

Ol i save mekim strongpela wok long Betel, olsem na ol man ol i makim long wok long Betel ol i mas i gat strongpela skin na ol i no ken sik tumas. Sapos yu inapim ol dispela mak mipela i kolim pinis, na krismas bilong yu i 19 na i go antap, na yu bin baptais inap wanpela yia pinis, orait mipela i laik strongim yu long tingim wok bilong Betel.

Yumi Olgeta i Gat Wok Bilong Mekim

Yumi ol Kristen i gat laik tru long putim wok bilong Kingdom i go pas long i stap bilong yumi na givim bel tru long mekim wok bilong Jehova. (Matyu 6:33; Kolosi 3:23) Yumi ken strongim ol brata sista i wok long Betel long mekim yet wok bilong God long dispela hap. Na yumi mas strongim ol yangpela brata i winim mak bilong wok long Betel long wok strong long kisim dispela gutpela wok.

Wok bilong Betel i mekim na man bai amamas long i stap bilong em long ol samting bilong spirit​—⁠em i nambawan gutpela wok yu inap mekim. Nick i tingting olsem, em i bin kirap wok long Betel taim em i gat 20 krismas. Taim em i wok 10-pela yia pinis long Betel, em i tok: “Planti taim mi beten na tok tenkyu long Jehova long gutpela pasin em i mekim long mi. I no gat wanpela narapela samting mi ken askim em long givim long mi. Long Betel yumi stap wantaim ol Kristen i stap gut long God, na ol i save givim bel olgeta long mekim wok bilong Jehova.”

[Blok/Piksa long pes 22]

OL ELDA NA PAPAMAMA I KEN MEKIM WANEM?

Gutpela sapos ol elda na ol wasman bilong raun i kirapim ol yangpela man long putim aplikesen bilong go long Betel. I no longtaim i go pinis na ol i toktok wantaim ol yangpela bilong famili Betel, na ol i kisim save olsem ol wasman Kristen i bin go pas bilong kirapim 34 pesen bilong ol long putim wok bilong Betel olsem mak bilong ol. Tru, ating kongrigesen bilong ol yangpela bai sori long ol i no stap wantaim ol. Tasol i gutpela long tingim olsem taim Timoti i stap olsem gutpela poroman bilong ol yangpela long Listra na Aikoniam, ol elda i no pasim em long wok wantaim Pol. Ol i no ting wok bilong Timoti long raun wantaim dispela aposel bai i givim bikpela hevi long kongrigesen bilong ol.​—⁠1 Timoti 4:⁠14.

Ol papamama Kristen i mas helpim ol pikinini long kisim gutpela tingting long dispela samting. Inap 40 pesen bilong ol dispela yangpela ol i bin toktok wantaim ol, ol i tok papamama bilong ol i bin strongim ol long mekim wok long Betel. Wanpela sista i bin wok long Betel inap sampela yia, em i tok: “Papamama i givim bel long wok bilong Jehova na dispela i bin kirapim mi tru long mekim wok long Betel. Ol i stap olsem gutpela piksa long mekim wok bilong God long olgeta de, olsem na mi save dispela em i nambawan gutpela rot bilong bihainim na i mekim man i stap belgut.”

[Blok long pes 24]

OL I AMAMAS LONG WOK LONG BETEL

“Mi laikim tru wok bilong mi long Betel. Em i mekim gut bel bilong mi long save olsem de olgeta mi bin mekim wok bilong Jehova, na tumora tu bai mi mekim olsem, na long de bihain, na i go olsem. Dispela i mekim na bel bilong mi i no gat tok na ol gutpela samting i pulap long tingting bilong mi.”

“Long Betel yu inap lusim taim na strong olgeta bilong yu long wok bilong Jehova na i no gat ol samting i pulim nabaut tingting. Dispela i mekim na bel bilong yu i stap amamas. Na tu, yu inap kisim sampela nupela tingting long wok bilong oganaisesen bilong Jehova. Yu bai pilim olsem yu stap long hap ol bikpela samting bilong dispela oganaisesen i kamap long en, na dispela i save kirapim tru tingting.”

“Mi kam wok long Betel na dispela em i nambawan gutpela samting i bin painim mi. Long dispela ples, wok bilong kisim save i no save pinis. Na dispela save i no bilong helpim mi long kisim biknem samting, nogat; em bilong mekim wok bilong Jehova. Long Betel wok bilong mi i no save lus nating.”

“Mi yusim save bilong mi long mekim wok bilong Betel na dispela i mekim na mi stap bel isi, long wanem, save bilong mi i helpim wok bilong Jehova na ol brata.”

“Wok bilong mi long bipo i no bin helpim mi long stap belgut na amamas. Inap planti yia, mi gat bikpela laik long wok wantaim ol brata sista na mekim wok i save helpim ol. Long dispela as mi kam long Betel. Mi kisim bikpela amamas long save olsem olgeta hatwok bilong mi bai helpim ol narapela long ol samting bilong spirit na litimapim nem bilong Jehova.”