Wanpela Invatesen i Go Long Olgeta Man!

IVATESEN bilong mekim wanem? Em bilong go lukim wanpela brens ofis bilong ol Witnes Bilong Jehova, em ol i kolim Betel. I gat 118 brens ofis i stap long ol narapela narapela kantri. Planti taim ol visita i save kamapim amamas bilong ol long ol samting ol i lukim i kamap long Betel.

Wanpela yangpela Baibel sumatin i lukim ol wokman i amamas long mekim wok bilong Jehova long brens ofis long Meksiko, na em i askim: “Bai mi mekim wanem bilong kam wok long hia?” Ol i tokim em: “Pastaim yu mas kisim baptais. Na bihain, i gutpela yu kamap wanpela painia​—man bilong autim tok bilong Kingdom fultaim.” Dispela yangpela man i bihainim dispela tok, na tupela yia bihain em i kisim singaut bilong mekim wok long Betel bilong Meksiko, we em i bin mekim wok winim 20 yia pinis.

Betel i Wanem Kain Ples?

Long tok Hibru, “Betel” i makim “ Haus Bilong God.” (Stt. 28:​19, futnot.) Long sampela brens ofis, ol i save prinim ol Baibel na ol nius na buk bilong Baibel bilong helpim ol 100,000 kongrigesen bilong ol Witnes Bilong Jehova long olgeta hap bilong graun. Klostu 20,000 manmeri i wok long Betel​—ol i bilong narapela narapela ples na sindaun​—na ol i wok fultaim long mekim wok bilong Jehova na helpim ol bratasista bilong ol. Ol bratasista i bin mekim dispela wok Kristen inap planti yia pinis ol i wok wantaim ol yangpela em ol i gat bikpela strong. Namel long wik na long wiken, ol lain bilong famili Betel i amamas long bung wantaim ol bratasista long ol miting bilong kongrigesen i stap long hap bilong ol na autim tok wantaim ol. Na tu, ol i save yusim fri taim bilong ol bilong stadi long Baibel, insait long sampela amamas, na mekim sampela wok bilong ol yet.

Ol wan wan bilong famili Betel i save kisim liklik mani long olgeta mun bilong lukautim ol. Ol i kisim gutpela kaikai bilong strongim ol na ples slip bilong ol i gutpela na i stap klin. Betel i no olsem wanpela hotel i gat bikpela pe bilong stap long en, nogat, tasol ol samting long Betel em inap tasol long helpim wok. Ol visita i amamas long ples i stap stret na ol samting i ron gut, tasol i no dispela samting tasol, nogat. Ol i amamas tu long lukim pasin laikim na pasin bilong wok gut wantaim. Olgeta i save wok strong, tasol maski ol i gat planti wok long mekim, ol i save mekim gutpela pasin pren. Insait long Betel i no gat wanpela i ting em i gutpela moa long narapela o ting wok bilong em i winim narapela. Olgeta wok i bikpela samting, maski em wok bilong klinim, wok gaden, kukim kaikai, o wok long faktori o ofis. Ol lain long Betel i save wok gut wantaim bilong sapotim wok autim tok bilong ol Witnes Bilong Jehova.​—Kol 3: ​23.

Bungim Sampela i Wok Long Betel

Orait nau yumi ken kisim sampela moa save long ol bratasista i wok long Betel em ol i bilong narapela narapela kantri. Wanem samting i bin kirapim ol na ol i laik wok long Betel? Tingim stori bilong Mario. Taim em i kamap wanpela Witnes Bilong Jehova, Mario i wok long wanpela kampani bilong ka long Jemani we em i kisim bikpela pe na i gat rot long em i kisim promosen. I no longtaim bihain long em i kisim baptais, em i go wok volantia inap wan wik long Betel. Ol i makim em long mekim wok long faktori. Mario i luksave olsem ol wanwok bilong em long Betel ol i narapela kain tru long ol wanwok bilong em long kampani. Olsem na em i putim aplikesen bilong mekim wok fultaim long Betel. Maski planti wanblut na wanwok bilong em i no kliagut long as bilong dispela disisen bilong em, long nau Mario i amamas long mekim wok long Betel long Jemani.

Planti bratasista husat i go wok long Betel ol i no gat spesel ediukesen o save long mekim wanpela kain wok. Dispela i tru long Abel, em i bin wok 15 yia long Betel long Meksiko. Em i tok: “Betel i bin lainim mi long planti samting. Mi bin lain long yusim masin bilong prinim buk. Mi save olsem dispela save inap helpim mi long kisim wanpela wok we mi inap kisim bikpela mani, tasol dispela i no inap givim amamas long mi olsem mi kisim hia long Betel​—em laip i gutpela na i no gat planti wari tumas na pasin resis olsem i save kamap long planti ples wok. Mi pilim olsem mi bin kisim gutpela ediukesen we i bin helpim mi long kisim save long planti samting na mi kamap strong long ol samting bilong spirit. Em ol samting mi no inap kisim long yunivesiti.”

Visit Long Betel Inap Strongim Yu

Taim man i go long Betel, dispela inap helpim em long go klostu moa long God. Dispela samting i bin kamap tru long Omar, em bilong Meksiko. Mama i bin lainim em long tok bilong Baibel. Tasol taim em i gat 17 krismas, Omar i lusim ol miting Kristen na wok autim tok. Em i insait long ol pasin i no stret na pasin bilong bungim planti samting bilong skin. Bihain, kampani em i wok long en i salim em wantaim sampela narapela i go long Betel long Meksiko bilong soim ol long pasin bilong yusim sampela masin. Omar i tok: “Bihain, ol brata i kisim mipela i raun lukim ol hap bilong Betel. Ol samting mi lukim na gutpela pasin ol i mekim long mi, i kirapim mi long tingim dispela kain laip mi save bihainim we mi stap longwe long Jehova. Wantu mi kirap long go bek long ol miting na stadi long Baibel. Sikspela mun bihain long raun bilong mi long Betel, mi kisim baptais. Mi tenkyu long Jehova long dispela visit long Betel i bin kirapim mi long go bek long em.”

Masahiko, bilong Japan, em tu i bin kamap bikpela insait long wanpela famili Witnes. Tasol em i kirap kisim tingting olsem bilong bihainim pasin Kristen, i gat planti tambu tumas. Em i insait tru long ol wok bilong skul na em i no go moa long ol miting na autim tok. Masahiko i tok: “Wanpela taim famili bilong mi na sampela bratasista i pasim tok long go lukim Betel. Famili bilong mi i strong long mi tu i mas i go. Ol samting mi lukim long Betel i strongim bel bilong mi, winim bipo. Amamas mi kisim long bung wantaim ol Kristen long dispela visit, em wanpela kain amamas mi no bin kisim taim mi raun wantaim ol poroman i no Witness. Mi gat laik long bihainim pasin Kristen, na mi askim wanpela long stadi wantaim mi long Baibel.” Long nau Masahiko i save autim tok fultaim wantaim kongrigesen bilong em.

Wanpela Witness bilong Frans i go sindaun long Moscow, Rasia, bilong mekim wok mani. Long hap em i no bung wantaim lain bilong Jehova na em i go slek long ol samting bilong spirit. Em i insait long sampela pasin i no stret na em i maritim wanpela man i no Witness. Orait nau wanpela sista long Frans i kam lukim em, na tupela i go long St. Petersburg bilong lukim Betel. Em i tok: “Long Betel ol i amamas long mipela i kam na mi pilim tru dispela pasin. Lain bilong Betel i stap bel isi. Mi pilim spirit bilong Jehova i stap long dispela hap. Mi bin popaia tru taim mi lusim oganaisesen bilong Jehova! Bihain long mi visitim Betel, mi beten askim Jehova long helpim mi na mi kirap strong long skulim tupela pikinini bilong mi long Baibel.” Dispela visit long Betel, wantaim sampela narapela helpim em i bin kisim, i bin strongim bel bilong dispela sista em pastaim em i bin slek, na nau em i wok long kamap strong.

Ol manmeri husat i no save gut long ol Witness Bilong Jehova, ol i kisim wanem kain tingting taim ol i raun lukim Betel? Long 1988, Alberto, em i save insait tru long ol wok politik, em i go visitim Betel long Brasil. Em i kirap nogut tru long lukim ol samting i stap klin, na wok i ron gut na i no stap hait. Paslain liklik long Alberto i go visitim Betel, em i bin go visitim wanpela semineri we tambu brata bilong em i stap pris. Alberto i lukim olsem wok ol i mekim long dispela semineri i narapela kain long Betel. Em i tok: “Olgeta wok ol i mekim long dispela semineri, em i stap hait.” I no longtaim bihain long visit bilong em long Betel, em i kirap stadi long Baibel, lusim wok politik, na nau em i wanpela elda long kongrigesen.

Kam Lukim Betel!

Planti bratasista i bin wok strong tru na bai ol inap visitim brens ofis long kantri bilong ol. Long Brasil, Paulo na Eugenia i bin bungim mani inap 4-pela yia bambai ol inap raun long bas inap tupela de, olsem 3000 kilomita, bilong go lukim Betel long dispela kantri. Ol i tok: “Hatwok bilong mipela i no bin lus nating. Nau mipela i kliagut moa long oganaisesen bilong Jehova. Taim mipela i stori long ol Baibel sumatin bilong mipela long ol wok i kamap long Betel, ol i save askim, ‘Yupela i bin go long hap?’ Nau mipela inap tok yes.”

Olsem wanem? I gat wanpela brens ofis i stap long kantri bilong yu? Mipela laik singautim yu long kam lukim Betel. Lain bilong Betel bai amamas long yu kam na dispela visit bai strongim yu long mekim yet wok bilong Jehova.

[Piksa long pes 18]

Mario

[Piksa long pes 18]

Abel

[Piksa long pes 18]

Jemani

[Piksa long pes 18]

Japan

[Piksa long pes 18]

Brasil