“De Bilong Orait Long Ol Narapela Lotu”
HETMASTA bilong wanpela skul long Polan i bin toktok wantaim ol Witnes Bilong Jehova na dispela i kirapim em long makim wanpela “De Bilong Orait Long Ol Narapela Lotu” long skul bilong em. Em i askim sampela sumatin long volantia—ol Katolik, ol Budis na ol Witnes Bilong Jehova—long redim ol sotpela tok bambai ol narapela sumatin i ken save long bilip na pasin bilong lotu bilong ol. Wantu tasol tripela yangpela Witnes Bilong Jehova i bin volantia long mekim olsem.
Orait dispela de i kamap na namba wan sumatin bilong mekim tok em Malwina, em i gat 15 krismas. Em i tok: “Long taim mipela i no kam yet long dispela skul planti bilong yupela i save pinis long mipela, long wanem mipela i bin kam long haus bilong yupela. Ating yupela i tingting planti long dispela pasin bilong mipela. Mipela i mekim olsem, long wanem, mipela i save bihainim pasin bilong Man bilong kirapim lotu Kristen, em Jisas Krais. Em i autim tok long gutnius bilong Kingdom bilong God long olgeta hap ol man i stap long en. Ol aposel na ol narapela Kristen bilong bipo i bin mekim wankain wok. Long planti hap ol bikpela hevi i painim ol Witnes Bilong Jehova na i traim bilip bilong ol, tasol mipela i amamas long wanem yupela olgeta i mekim na pasin wanbel i stap long skul bilong yumi. Tenkyu long dispela!”
Long pinis bilong tok bilong em Malwina i tok: “I gat narapela as tu na mipela i save kam long haus bilong yupela. Mipela i tingim yupela. Baibel i tok, klostu nau ol bikpela senis bai kamap long i stap bilong ol manmeri bilong dispela graun. Olsem na neks taim mipela i kam paitim dua bilong yupela, plis putim yau long ol tok bilong mipela. Mipela i laik stori long wanem rot yumi olgeta i ken stap oltaim oltaim long paradais long graun.”
Mateusz i namba tu sumatin bilong mekim tok, na em tu i gat 15 krismas. Mateusz i tokim ol sumatin olsem ol Witnes Bilong Jehova i bin autim gutnius long ol man long kain kain rot. Olsem, long 1914—long taim i no gat yet toktok long ol piksa wokabaut—ol Witnes i bin soim piksa “Photo-Drama of Creation,” em wanpela piksa wokabaut wantaim ol piksa slait na em i gat toktok na musik tu i stap long en.
Pastaim Mateusz i stori long wok bilong redio long autim gutnius bilong Kingdom na bihain em i stori long wanpela kompiuta program ol Witnes i bin wokim, nem bilong en MEPS (Multilanguage Electronic Phototypesetting System). Em i stori tu long wok ol Witnes Bilong Jehova i bin mekim bilong toksave long ol dokta long ol pasin bilong helpim ol sikman na maski long yusim blut. Em i tok: “Long nau long Polan planti dokta i gat namba i mekim gutpela tok long mipela na ol i tok olsem nau long olgeta yia planti man i no Witnes i save kisim operesen na dokta i no givim blut long ol.”
Long pinis bilong tok bilong em Mateusz i stori long wok bilong sanapim ol Haus Kingdom na em i tok: “Yu laik kam lukim Haus Kingdom bilong mipela? Kam tasol, mipela i no save singaut long mani.” Taim em i toktok long ples kibung long Sosnowiec, Mateusz i tok: “Yupela mas kam lukim dispela bikpela na gutpela haus. Olsem wanem? Yumi go wantaim? Mipela i gat wanpela tingting, na pren bilong yumi Katarzyna bai stori long en.”
Orait nau Katarzyna, em i gat 15 krismas, i tok wantaim amamas: “Yupela olgeta i welkam long kam long Sosnowiec long kibung distrik bilong ol Witnes Bilong Jehova. Ol bai kamapim ol tok i helpim ol yangpela.” Katarzyna i stori tu long nambawan bikpela bung bilong ol Kristen—em bung bilong tingim indai bilong Jisas Krais. Em i tokim ol sumatin: “Long las yia winim 14 milion long olgeta hap bilong graun i bin kam long dispela bung. Ating narapela taim yupela tu bai kam?”
Bihain long tok bilong ol, Malwina, Mateusz na Katarzyna i givim buk Jehovah’s Witnesses—Proclaimers of God’s Kingdom na tupela video-kaset i stori long wok na bilip bilong ol Witnes Bilong Jehova long ol tisa bilong ol.a Ol tisa i amamas tru long kisim ol dispela samting na ol i promis long yusim long sosel saiens klas bilong ol.
Long pinis bilong program, Martyna em i gat 12-pela krismas i mekim wanpela singsing long lain i bung, nem bilong dispela singsing i “Jehova, Mipela Tenkyu Long Yu.” Ol dispela yangpela Witnes i mekim gut wok autim tok, long wanem, ‘God bilong ol i strongim bel bilong ol.’ (1 Tesalonaika 2:2) Ol i stap olsem gutpela piksa tru long ol yangpela Witnes long olgeta hap!
[Futnot]
a Ol Witnes Bilong Jehova i wokim.
[Piksa long pes 26]
Malwina i redim tok bilong em long sampela de paslain long taim em i mekim long skul
[Piksa long pes 26]
Katarzyna i makim ol skripsa em bai kamapim long tok bilong em