Mi Kisim Save Pinis Long God
MI BIN stadi 10-pela yia long ol skul bilong lotu long Saut Amerika. Tripela yia bilong en mi bin kisim bikpela save long ol samting bilong lotu na ol bikpela save bilong graun. Tasol nau wanpela man nating bilong ples i sanap na tokim mi em i laik helpim mi long save long Baibel. Mi harim em, long wanem, mi no amamas tumas long ol samting mi bin lain long en long ol skul bilong lotu.
Wanem samting i kirapim mi na mi laik kamap wanpela pris? Mi bin stadi planti yia long ol skul bilong lotu, tasol olsem wanem mi gat bikpela laik long kisim save long God?
Mi No Gat Gutpela Sindaun
Papamama i mekim bikpela long mipela 7-pela pikinini man long ples Valyegrande, long Bolivia. Mipela i bin stap long ples daun na lukautim ol bulmakau, na gaden kon, pinat, poteto. Ples bilong mipela em Naranjal, na em i no stap klostu long ol narapela ples, olsem na mi no skul gut. Tasol mi bin lain long rit rait.
Long olgeta yia wanpela pris Katolik i save kam long ples taim mipela mekim ol bung bilong lotu. Mi save amamas long harim em i stori long God. Wanpela taim em i kam na tokim mipela ol i bin opim wanpela skul bilong lotu long Bolivia, na ol i laik lainim sampela yangpela man long kamap pris. Mi tokim em mi laik lain long God, olsem na pris i amamas long mi. Em i tokim mi olsem: ‘Yu inap kamap olsem wanpela lata—yu inap helpim ol man long go long heven.’
Mi laik tru long go long skul bilong lotu na kisim save long God. Mi ting dispela skul bai helpim mi, long wanem, mi longlong nabaut long sampela samting. Olsem: Mama i lainim mi olsem ol maunten, plaua, diwai samting i olsem presen God i givim long yumi man, tasol God i save salim sampela man i go long bikpaia bilong kisim bikpela pen. Mi save tingting planti: ‘Olsem wanem God i ken mekim tupela samting olsem?’
Skul Bilong Lotu
Nupela skul bilong lotu i stap long taun Tupisa long wanpela naispela ples daun. Mi kamap long dispela skul long 1958. Taim mi yangpela mi bin amamas tru long go antap long wanpela liklik maunten na lusim hap taim long tingim long bel bilong mi gutpela Man i bin wokim yumi. Tasol nau mi stap long dispela skul na mi no amamas, long wanem, mi no lain tumas long God. Na tu, ol i no gat Baibel olgeta, ol i gat Nupela Testamen tasol. Taim mi askim ol tisa long kisim wanpela Baibel, ol i tokim mi long wet pastaim.
Namba wan yia i pinis na mi wantaim tupela moa tasol i winim mak bilong mipela i ken skul yet. Ol narapela i mas go bek long ples. Mipela i 3-pela tasol, olsem na ol i salim mipela long narapela skul long Buenos Ares, long Ajentina. Mi kirap nogut tru taim mi kamap long Skul San Migel, long wanem, em i traipela haus. Mi ting nau mi inap kam klostu moa long God. Mipela lain long tok ples Latin, Grik, Inglis, Frans. Na mipela kaunim ol stori bilong ol santuman bilong Misin Katolik. Tasol ol dispela samting mi stadi long en i lus nating, long wanem, ol askim bilong mi i stap yet.
Mi askim wanpela tisa olsem: ‘Olsem wanem i gat God Triwan?’ Em i tokim mi, ol bikpela man bilong lotu olsem Tomas Akinas bilong Itali, em i bin stap long yia 1200 samting, ol tu i no inap kamapim insait bilong dispela tok. Inap long dispela taim mi no bin lukim wanpela Baibel olgeta, olsem na mi askim wanpela profesa long Olpela Testamen.
Profesa i tok: “Em bilong ol Talatala tasol.”
Mi tingting planti long tok bilong em, long wanem, mi save, planti taim Jisas i bin kamapim tok bilong Olpela Testamen. Olsem na mi bel hevi.
Bihain ol i makim mipela 6-pela long lain long kamap pris, na mipela mekim ol tok promis long bihainim stretpela pasin, na stap rabis, na bihainim tok. Mipela stadi wanpela yia, na bihain ol i salim mipela long wanpela skul long Kordoba, long Ajentina. Mipela inap pasim ol klos bilong lotu tasol—longpela blakpela laplap na nek bilong en i waitpela, na wanpela korona na wanpela bikpela kruse. Nau mi amamas, long wanem, em namba wan taim mi bai skul long ol samting bilong lotu.
Bel Hevi Yet
Wanpela hap bilong dispela kos bilong lotu i sutim tok long Baibel na tok, Baibel i olsem ol narapela buk i gat nem, em tasol. Mi bel hevi, long wanem, mi no save yet long bekim bilong ol askim bilong mi. Mi kamap gutpela pren bilong wanpela bisop. Mi askim em: ‘Olsem wanem na Baibel i tok Jisas i bin go long hel?’ (Aposel 2:31, Baibel King James) Em i no bekim dispela askim bilong mi.
Na mi tingting planti long ol stretpela lo bilong maritpasin samting. Mi askim wanpela tisa bilong lotu long pasin bilong pilai long sem na long pasin bilong ol singel long mekim maritpasin. Em i no kamapim wanpela tok bilong Baibel. Em i amamas tasol long tokim mi long ol nupela tingting bilong ol man bilong lotu long Paris, em ol man i gat nem. Em i soim wanpela buk bilong ol long mi na tokim mi olsem: ‘Ol i tok ol dispela samting i no gat rong, olsem na yu no ken tingting planti.’ Tasol mi no amamas long bekim bilong em.
Wanpela taim mi stap long rum buk bilong skul bilong lotu na mi opim wanpela buk long tok ples Frans. Buk i kamapim tok bilong Song 42:2: “God, yu God i gat laip, na mi laikim yu tumas, olsem man, nek bilong en i drai.” Mi yet mi ting: ‘Olaman—em mi ya.’ Liklik taim bihain mi go lukim famili bilong mi, na long dispela taim mi go long haus bruder long taun Valyegrande. Long stua buk bilong en mi lukim wanpela Baibel. Em namba wan taim mi lukim Baibel olgeta. Mi ting ol i no ken larim mi long baim dispela Baibel, tasol mi baim. Mi amamas tru long lusim stua na holim Baibel bilong mi yet!
Taim mi wokabaut i go long haus mi singsing na wisil. Taim mi kam pinis long haus mi kaunim Song 42:1: “Wel abus i save dai long wara na i ran i go long liklik wara bilong dring. Na olsem tasol, God, mi laikim tumas bai mi stap klostu long yu.” Nau mi ting bai mi kisim save long God. Tasol i no longtaim na mi save i mas i gat man bilong helpim mi long painim ol bekim long Baibel. Ol samting mi lain long en long skul bilong lotu i lus tru long mekim dispela samting.
Long 1966 ol i tokim mi, klostu long biktaun Kotsabamba, long Bolivia, wanpela bikpela skul bilong lotu i op na ol i laik salim mi i go long en. Dispela skul bai lainim mi gut long ol samting bilong lotu na ol save bilong graun. Ol tisa long dispela skul ol i yangpela pris bilong Spen. Skul i gat gutpela rum buk. Nau mi ting mi bai kisim bekim long ol askim bilong mi.
Planti taim mi gat askim olsem: ‘Olsem wanem Maria em i mama bilong God?’ Ol tisa i no givim bel long ol askim bilong mi, ol i tingim save bilong ol Komyunis tasol. Wanpela taim mi bungim wanpela kadinal, tasol em tu i no bekim ol askim bilong mi, em amamas tasol long tokim mi long ol samting i bin painim em long Namba 2 Pait.
Mi bin lain 10-pela yia long skul na nau mi tokim ol long mi laik lusim inap wanpela yia. Mi laik raun na toktok wantaim ol man long Baibel. Bihain liklik mi save, mi no ken amamas long stap moa long ol haus bruder, olsem na mi askim ol long larim mi i lusim ol tok promis bilong pris mi bin mekim. Bihain mi maritim Porfiria, bipo em i wanpela sister bilong lotu. Mitupela i go sindaun long biktaun Santa Krus, long Bolivia.
Wanpela Man i Kam
Wanpela taim long yia antap, mama bilong haus mipela i stap long en, i kukim bret long aven na mi sindaun klostu long dispela hap. Wanpela man i kam sanap long dua bilong banis. Mi ting em i kam bilong lukim mama bilong haus, olsem na mi singaut: “Kam.” Em i kam insait long banis na sindaun klostu long mi. Em i bilas gut, tasol mi save em i wanpela man nating bilong ples. Mi kirap nogut tru taim em i kirap na stori long Baibel.
Bihain mi save em wanpela Witnes Bilong Jehova na nem bilong em Adrian Guerra. Kwiktaim mi kisim save olsem em i no inap rit gut. Em man bilong narapela lotu, olsem na mi was gut. Tasol mi no pret long em, long wanem, mi gat save long tok Latin na tok Grik. Na mi gat save long ol samting bilong lotu, na planti yia mi bin toktok wantaim ol tisa bilong lotu na bisop long ol save bilong dispela graun. Mi no hambak long dispela Witnes o mekim olsem mi no laikim em, tasol mi ting dispela man i no inap tru lainim mi long wanpela samting.
Em i askim mi: ‘Bilong wanem pasin nogut long nau i wok long i go bikpela tru?’ Mipela i stori long en na bihain em i askim mi long kisim Baibel bilong mi. Mi baim pinis wanpela Baibel Katolik (Jerusalem Bible). Em i askim mi long kaunim Kamapim Tok Hait 12:12: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru.”
Mi tok: ‘Ating dispela i tok long taim sin i kamap namba wan taim long graun, a?’ Adrian i askim mi long kaunim ves 7-10. Dispela ol ves i stori long pait i bin kamap long heven taim Krais i kamap King na em i bin tromoi Satan na ol ensel bilong em i kam daun long graun. Adrian i tok: ‘Ol pasin nogut i save kamap long nau, long wanem, Satan i belhat nogut tru. Tasol yumi ken amamas, long wanem, Krais i stap King pinis na Satan i gat sotpela taim tasol.’
Mi kirap nogut long ol tok mi lainim long Baibel. Tasol pasin bilong dispela man nating i mekim na mi kirap nogut tru. Pes bilong em i lait na long pasin isi em i kamapim ol tok bilong Baibel long mi.
Mi Kisim Save Pinis Long God
Adrian i lusim sampela buk long mi na em i tok promis long kam bek lukim mi. Mi amamas taim em i kam bek na mi askim em long ol samting i bin paulim tingting bilong mi longpela taim. Olsem: ‘I gat God Triwan?’ na ‘Bilong wanem Jisas i go long hel?’ Em i mekim wok long wanpela buk, Tok i Tru i Bringim Man Long Laip Oltaim. Em i askim mi long kaunim long Baibel bilong mi yet ol skripsa dispela buk i kamapim bilong bekim ol askim bilong mi. Man! Mi pilim olsem mi man i no gat save. Mi lain olsem nem bilong God em Yawe o Jehova na em i no God Triwan, na hel em ples matmat na Jisas i bin slip long en inap 3-pela de.—Song 16:10; Saveman 9:10; Aisaia 42:8.
Planti taim long skul bilong lotu mi bin askim ol tisa long ol samting bai painim man bihain long taim em i dai. Ol i tokim mi, heven i olsem wanpela bikpela haus lotu na olgeta man bai sanap long en long pes bilong God na beten. Mi ting—‘Eh! Bai mi les!’ Tasol nau mi lain long tok promis bilong Baibel, olsem ol man inap kisim laip oltaim long Paradais long graun. Dispela i strongim bilip bilong mi olsem God i laikim tru olgeta manmeri.—Song 37:9-11, 39; KTH 21:3, 4.
Adrian i kam lukim mi planti taim, tasol wanpela taim em i bringim narapela Witnes i kam wantaim em, em man bilong narapela kantri, na Adrian i tok em i wasman bilong kongrigesen. Adrian i tokim mi: ‘Yu gat planti askim, olsem na mi ting dispela misineri inap helpim yu gut, winim mi.’ Tasol mi save laikim Adrian, na taim dispela misineri i stap, bel bilong mi i no stap isi. Olsem na mi wok yet long stadim Baibel wantaim Adrian. Mi kirap na go long ol miting long Haus Kingdom, na ol tok long Baibel i bin helpim mi.
Mi Winim Pret
Bihain Adrian i strongim mi long autim tok long ol man long ol samting mi lain pinis long en. Ol miting bilong ol Witnes i strongim ol long go long haus bilong ol man na lainim ol long tok bilong Baibel. Mi kisim save olsem, dispela tok Adrian i bin kamapim taim em i bungim mi namba wan taim, olsem pasin nogut i wok long i go bikpela, em i wanpela stori bilong dispela mun stret long 1970 ol Witnes long Bolivia i bin autim. Na mi kisim save olsem, ol samting Adrian i lain long en i save helpim em long mekim wok bilong God, winim dispela 10-pela yia mi bin stap long ol skul na lain. Tasol mi pret long go long haus bilong ol man. Dispela pasin i narapela kain long autim tok long ol man i kam long haus lotu.
Olsem na bihain, taim Adrian i kam bilong stadi wantaim mi, mi hait. Ating em i save mi hait, long wanem, em i no lusim haus hariap, em i sanap ausait na wet inap 30 minit. Mi kirap nogut, long wanem, em i no lusim mi. Long wik antap em i kam bek gen na lukim mi. Isi isi mi wok long laikim moa yet Jehova na dispela i helpim mi long winim pret. Long 1973 mitupela meri bilong mi i baptais. Porfiria i kamap wanpela painia. Em i autim tok na mekim ol Baibel-stadi long olgeta de, na em i mekim olsem inap long de stret em i dai long 1992.
Adrian i bin lain gut long rit na planti yia nau mi bin mekim wok elda long kongrigesen. Mitupela i mekim yet wok bilong autim tok long Kingdom bilong God long haus bilong ol man. Wanpela taim mi bungim wanpela meri na em i tok: ‘Sapos yu bin stap wantaim misin, yu inap mekim gutpela wok moa.’
Mi askim em long kisim Baibel bilong em. Em i mekim olsem na mi opim Jeremaia 2:13. Dispela ves i tok long taim lain Israel i bin givim baksait long Tok Bilong God olsem: “Ol i givim baksait long mi. Mi olsem hul wara i gat wara bilong givim laip long ol, tasol ol i lusim mi. . . . Ol yet i wokim ol tang bilong holim wara. Na ol dispela tang i bruk nabaut na wara i no inap i stap long ol.”
Mi tokim em, wankain samting i bin kamap long misin. Ol man i laik kisim save long God, ol i no inap kisim long rot bilong ol bilip bilong misin Katolik, em Baibel i no as bilong en. Dispela i olsem man i kisim wara long tang i bruk nabaut na wara i no inap i stap long en. Tru tumas, taim mi kirap na stadim Baibel wantaim ol Witnes Bilong Jehova, em nau, mi kisim save pinis long God. Mi no bin kisim long narapela rot.—Em stori bilong Hugo Durán.
[Piksa long pes 15]
Mitupela Adrian i autim tok bilong Kingdom