Ripot Long Wok Bilong Kingdom
“Mi Laik Mekim Wok Bilong God”
“YUPELA ol manmeri bilong mi, yupela i mas lusim dispela ples na i kam ausait.” Aposel Jon i harim wanpela ensel i singaut olsem long taim bilong ol aposel. Long taim bilong yumi, planti milion manmeri i gat gutpela bel i bihainim dispela tok, na ol i lusim “Bikpela taun Babilon,” em olgeta lotu giaman. (KTH 18:1-4) Wanpela bilong ol em Wilner bilong Haiti, em i kamapim stori bilong em:
“Mama i karim mi long 1956 long St. Marc, wanpela liklik taun long Haiti, na famili bilong mi i givim bel long lotu Katolik. Tingim bikpela amamas bilong famili bilong mi, taim ol i kisim save olsem mi wantaim tupela narapela man long dispela taun bai go long wanpela skul bilong misin long St. Michel de l’Atalaye, Haiti. Long 1980, mipela i go long Stavelot, long Beljam, bilong kisim sampela skul moa. Na long dispela hap mipela i go tu long wanpela yunivesiti bilong ol Katolik.
“Pastaim mi amamas tru long kamap wanpela pater. Wanpela taim mi stap long ples bilong kaikai, na wanpela pater i save lukautim mipela em i tokim mi long stap liklik taim, long wanem, em i laik toktok wantaim mi. Mi kirap nogut tru taim em i tokaut long ples klia olsem em i laik slip wantaim mi! Mi sakim em, tasol dispela i mekim na tingting bilong mi i paul olgeta. Mi raitim pas i go long famili bilong mi na tokim ol long samting i bin kamap, na sampela mun bihain mi lusim dispela skul, maski famili i no amamas. Mi painim ples slip long wanpela liklik ples, na mi kirap skul bilong mekim narapela wok.
“Taim mi go bek long St. Marc, mi no bilip moa long Misin Katolik. Mi laik mekim wok bilong God, tasol mi no save bai mi mekim wanem. Mi go long lotu bilong ol Sevende, na ol Ebenesa, na ol Momon. Mi no stap gut long ol samting bilong spirit.
“Bihain liklik mi tingim olsem taim mi bin stap long skul long Beljam, na mi bin ritim Baibel Crampon, na long dispela Baibel mi bin painimaut olsem God em i gat nem. Olsem na mi mekim wok long dispela nem, na mi beten strong long God long helpim mi long painim trupela lotu.
“I no longtaim na tupela Witnes Bilong Jehova i kam i stap long hap mi stap long en. Ol i save stap isi, rispektim ol narapela man, na ol i gat gutpela pasin. Mi laikim tru ol pasin bilong ol. Wanpela taim, wanpela bilong dispela tupela Witnes i singautim mi long go long Memorial bilong tingim i dai bilong Krais. Mi kisim bikpela amamas tru long dispela miting na mi kirap stadi long Baibel wantaim ol Witnes. Insait long sikspela mun, mi bilip tru olsem mi painim pinis stretpela rot bilong lotuim God. Mi dediketim laip bilong mi long Jehova na mi kisim baptais long Novemba 20, 1988.”
Bihain, Wilner i kirap mekim wok bilong God fultaim. Long nau, em i mekim wok olsem wanpela elda long kongrigesen. Em na meri bilong em, wantaim tupela pikinini bilong ol, ol i amamas long wok wantaim kongrigesen.
[Piksa long pes 9]
Taim Wilner i ritim Baibel, em i kisim save olsem nem bilong God em Jehova