Pas i Kam Long Haiti

“Mi Kisim Bikpela Amamas Tru”

BIHAIN long bikpela guria i kamap long Haiti long Janueri 12, 2010, mi pilim hatwok tru long lukim nius bilong dispela bagarap long TV. Orait long Janueri 20, pren bilong mi Carmen i ringim mi, na em i tok em i laik bai mitupela i go long Haiti bilong mekim wok olsem volantia. Mi bin bungim Carmen sampela yia paslain, long dispela taim mitupela i mekim wok volantia olsem nes long wok konstraksen bilong sanapim wanpela Haus Kingdom. Bihain long dispela, mipela i insait long sampela narapela projek na mipela i kamap gutpela pren tru.

Mi tokim Carmen olsem ating skin na tingting bilong mi bai i no gat strong long mekim wok long Haiti. Em i kirapim gen tingting bilong mi olsem mitupela i bin wok gut wantaim na narapela inap sapotim gut narapela. Tok bilong em i strongim mi na mi ringim hetkota bilong ol Witnes Bilong Jehova long Brooklyn, New York, na mi toktok wantaim man husat i stretim wok bilong helpim ol man i kisim bagarap long Haiti. Mi givim nem bilong mi bambai em i ken putim long lista bilong ol volantia. Mi stori long em long Carmen na tokim em olsem mitupela i laik wok wantaim. Em i tokim mi olsem em i no save ol bai singautim mi o Carmen o mitupela inap wok wantaim.

Olsem na mi mekim ol wok mi save mekim long olgeta de, long wanem, mi ting olsem ol i no inap singautim mi long go. Fopela de bihain, long Mande, Janueri 25, ol lain long Brooklyn i ringim mi na askim sapos mi inap go long Haiti​—ol i laik mi mas lusim hia long de bihain sapos inap! Mi kirap nogut tru long harim dispela. Mi tok bai mi traim bes bilong mi. Pastaim, mi askim bos long kisim holide long wok. Bihain, mi ringim Carmen na mi kisim save olsem ol i no bin singautim em long go, long wanem, em i no save long tokples Frans. Mi amamas na pret wantaim. Long Janueri 28, bihain long mi kisim pinis tiket bilong balus, mi lusim New York na flai i go long Santo Domingo, long Ripablik Dominika, em kantri i serim boda wantaim Haiti.

Wanpela yangpela Witnes i bungim mi long ples balus na i draivim mi i go long brens ofis bilong ol Witnes Bilong Jehova long Ripablik Dominika. Tupela narapela nes i kam long Amerika long dispela de na mipela i slip long wanpela rum long dispela nait. Long neks moning, ol i draivim mipela i go long brens ofis long Port-au-Prince long Haiti, mipela i ron inap 7 na hap aua bilong i go kamap.

Taim mipela i go brukim boda bilong Haiti, mipela i lukim bikpela bagarap. Mipela i no inap bilip olsem insait long 35 seken tasol, guria i bin bagarapim tru dispela naispela ples. Mi bel hevi tru long lukim dispela bikpela bagarap long TV, na mi hatwok moa yet long lukim samting tru long ai. Planti haus, na haus bilong presiden tu i kisim sampela bagarap, na ol narapela haus samting i bagarap olgeta. Ol man i bin hatwok tru long laip olgeta bilong ol long wokim ol dispela haus​—tasol sori tru, olgeta i bagarap insait long sampela seken tasol. Dispela i mekim na mi tingim olsem bikpela samting tru long laip bilong yumi em i no mani kago samting.

Taim mipela i go kamap long brens ofis, risepsenis i lukim mipela na em i ran i kam bilong bungim mipela long dua na em i holimpas mipela na em i gat bikpela smail long pes. Em i tok tenkyu long mipela i lusim wok na famili bilong kam na helpim ol. Bihain long mipela i belo kaikai, mipela i go long Haus Kibung i stap klostu, em ol i mekim wok long en olsem haus sik. Long dispela hap mi bungim sampela narapela Witnes em ol i kam bilong volantia, em tupela marit i kam long Jemani em ol i dokta, wanpela helpim bilong ol, na wanpela meri i kam long Swiselan, em nes bilong helpim ol meri taim ol i laik karim pikinini.

Mi kirap wok long dispela namba wan nait mi kamap. I gat 18 sikman em ol Witnes na ol lain i no Witnes, ol i slip long matres long plua bilong Haus Kibung. Olgeta sikman i kisim wankain helpim na fri marasin samting i kam long ol lain dokta bilong ol Witnes.

Long dispela nait, wanpela sikman husat i gat 80 krismas, em i dai. Meri bilong em i sindaun klostu long em, na mi wantaim meri wanhaus bilong mi, mitupela tu i sindaun wantaim tupela. Bihain long dispela, wanpela yangpela meri nem bilong em Ketly i pilim bikpela pen na em i stat long krai. Ol i bin katim na rausim han sut bilong em, long wanem, em i bin kisim bagarap long guria. Meri i sindaun klostu long Ketly em dispela Witnes husat i bin stadi long Baibel wantaim em. Klostu olgeta nait em i bin slip long sait bilong bet bilong Ketly long Haus Kibung.

Mi go long Ketly, na mi laik tru long mekim gut bel bilong em, tasol em i no pilim pen long skin tasol, nogat, tingting na bel bilong em tu i bagarap. Em i tokim mi olsem em i bin stap long haus bilong wanpela pren bilong em taim guria i kamap. Ol i no save long wanem samting i kamap. Ol i holim han wantaim na ran i go long veranda, na wanpela banis bilong haus i pundaun antap long tupela, na banis i krungutim ol na ol i slip aninit long en. Em i singaut long pren bilong em, tasol pren i no meknais liklik. Em i tok em i save olsem pren bilong em i dai pinis. Bodi bilong pren bilong em i slip antap long hap bodi bilong Ketly, na inap 4-pela aua bihain ol man i kam na rausim ol. Han sut olgeta bilong Ketly i bagarap inap long sol bilong em.

Long namba wan nait bilong mi long hap, taim Ketly i laik slip em i wok long tingim ol samting i bin painim em. Em i krai na i tokim mi olsem: “Mi save long ol tok Baibel i mekim long las de na graun i guria. Mi save yumi gat gutpela samting yumi wetim i kamap bihain. Mi save mi mas amamas olsem mi stap laip. Tasol tingim ol samting i painim mi nau. Olgeta samting long i stap bilong mi i bin gutpela tru, na wantu tasol olgeta samting i senis.” Mi pilim olsem mi no gat rot long helpim em, mi holim em tasol, na mi tu mi kirap long krai. Mitupela wantaim i krai inap long em i slip.

Long olgeta de, ol i salim wanpela dokta na tupela nes i go bilong helpim ol manmeri husat i mas kisim helpim long dokta. Ol i salim mi i go long Petit Goave, em olsem 2-pela aua longwe long Port-au-Prince. Mi go wantaim tupela narapela volantia​—wanpela nes i kam long Florida na wanpela dokta bilong Frans. Mipela i go kamap long 9:30 long moningtaim, na mipela i rausim ol kago na putim i go insait long Haus Kingdom long dispela hap. Ol i bin tokim ol manmeri olsem mipela bai kam, olsem na ol i sindaun na wetim mipela.

Wantu mipela i kirap long wok. Ples i hat, na lain em ol manmeri i sanap long en bilong lukim dokta i wok long i go longpela. Long 3 klok apinun tasol mipela i kisim liklik malolo. Long dispela de, mipela 3-pela i givim 114 sut na i lukim 105 sikman. Mi taiet stret, tasol mi amamas olsem mipela inap helpim ol man i sik.

Mi stap winim tupela wik long Haiti bilong mekim dispela wok. Klostu olgeta nait, mi wok inap 12-pela aua long Haus Kibung. Em wanpela bikpela wok tru, bipo mi no bin mekim kain bikpela wok olsem. Tasol mi pilim amamas olsem mi bin mekim wok long dispela hap. Mi amamas tru olsem mi inap helpim na mekim gut bel bilong ol manmeri long Haiti, em ol i bin kisim bikpela bagarap long guria.

I gat planti samting long ol em yumi inap kisim skul long en. Olsem: Wanpela sikman mi bin lukautim em Eliser, em wanpela mangi i gat 15 krismas, na ol i katim na rausim wanpela lek bilong em. Mi lukim olsem em i save putim sampela hap kaikai i stap bilong givim long Jimmy, husat i save kam slip wantaim em long nait. Em i tokim mi olsem planti taim Jimmy i no save kaikai paslain long em i kam long ol apinun. Gutpela pasin bilong Eliser i skulim mi olsem yumi no mas i gat planti samting, o gutpela helt, bambai yumi ken givim samting long ol narapela.

Ol volantia mipela i wok wantaim, ol tu i gat dispela gutpela pasin. Wanpela volantia i pilim sik, na narapela i gat pen long baksait bilong em. Tasol olgeta i tingim pastaim ol samting em ol sikman i mas kisim, na ol i no tingim ol yet. Dispela i strongim bel bilong mi long mekim yet wok. Sampela taim mipela olgeta i pilim olsem bel na tingting bilong mipela i bagarap na strong i pinis olgeta, tasol narapela i helpim narapela na mipela i wok yet i go. Mipela i no inap lusim tingting long olgeta dispela samting! Mi amamas tru olsem mi stap insait long wanpela oganaisesen i gat ol gutpela Kristen em ol i gat gutpela pasin na pasin sori na ol i no tingim ol yet.

Paslain long mi lusim Haiti, tupela sikman em ol i katim na rausim han sut bilong ol, tupela i raitim pas bilong tok tenkyu long mi na ol i strong olsem mi mas ritim dispela pas taim mi sindaun long balus. Mi mekim olsem tupela i tok. Mi pilim tru ol tok bilong pas, na mi krai nogut tru.

Taim mi kam bek long ples, mi bin raitim pas long sampela nupela pren mi bungim long Haiti. Ol hatwok na bikpela hevi i save strongim na traim gutpela pasin pren. Mi ting gutpela pasin pren bilong mipela bai stap strong yet maski i gat sampela hevi i kamap bihain. Mi kisim bikpela amamas tru.