Wanem Samting Bai Painim Graun Bilong Yumi Long Bihain?
Wanpela ripot (World Military and Social Expenditures 1996) i tok: “No gat narapela wan handet yia yumi save long en i wankain olsem ol yia kirap long 1900 i kam inap nau, i gat ol pait nogut tru i kamap insait long ol kantri yet na planti narapela bikpela pait i kamap na ol pait nogut i mekim na i gat planti refyuji, planti milion manmeri i dai long pait, na bikpela mani moa yet ol kantri i lusim long ‘lukautim ol yet.’ ” Olsem wanem? Dispela kain pasin bai i senis?
Aposel Pita i tokim ol Kristen long wanpela promis God i bin mekim sampela handet yia paslain long dispela taim, olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Ol dispela tok em ol hap tok bilong tok profet bilong Aisaia. (Aisaia 65:17; 66:22) Lain Israel bilong bipo i lukim liklik hap truim bilong dispela tok promis taim God i kisim bek ol na ol i kam bek gen long graun bilong promis bihain long taim ol i bin kalabus long Babilon inap 70 yia. Taim Pita i toktok gen long dispela promis bilong “nupela skai na nupela graun,” em i soim olsem bikpela truim bilong dispela tok profet bai kamap bihain na em bai kamap long olgeta hap bilong graun!
Em laik bilong God long kamapim stretpela pasin long graun olgeta, olsem na em bai kamapim dispela samting long rot bilong Kingdom bilong em i stap long heven na Krais bai stap King bilong en. “Olgeta lain manmeri bai i no ken pait moa, na bai ol i no skul moa long pait.” (Aisaia 2:4) Long dispela beten ol i kolim Beten Bilong Bikpela, Jisas i bin lainim ol disaipel bilong em long wet na beten long kain bel isi na gutpela sindaun olsem i mas kamap long graun. Dispela beten i olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:9, 10.
Bai yu amamas long sindaun long graun i gat stretpela pasin long en na i wankain olsem i stap long heven? Baibel i tok ol manmeri i wok strong long painim God na bihainim ol stretpela lo bilong em bai ol i kisim dispela gutpela sindaun.