I Gat Wanem As na Ol i Lusim Lotu?
INAP 150 yia samting bipo, ating i no gat wanpela man i sindaun long Prasia (nau em hap not bilong Jemani) na i tok em i no insait long wanpela lotu. Sapos man i lusim wanpela bikpela lotu bilong longtaim na i go insait long wanpela liklik lotu i no save bihainim pasin bilong ol bikpela lotu, ating dispela inap mekim na ol polis bai kirap na was long em. Tasol long nau ol samting i narapela kain!
Long nau, planti man bilong Jemani i wok long lusim ol misin. Wanpela ripot i makim olsem, wanpela long olgeta 4-pela 4-pela man ol i tok ol i no insait liklik long wanpela lotu. Wankain samting olsem i kamap long Ostria na Swiselan. Sapos tru strong bilong ol misin em ol lain manmeri bilong en, orait ating “strong bilong ol misin long Yurop i wok long lus olgeta, olsem wanpela man em blut bilong en i wok long lus na bihain em i dai,” olsem Reimer Gronemeyer bilong Jemani i tok, em wanpela man bilong raitim buk.
Bilong Wanem Ol i Sakim Lotu
Bilong wanem planti man i sakim ol bikpela lotu? Planti i save mekim olsem, long wanem, ol i tingim mani bilong ol, na long ol kantri ol i mas baim takis bilong misin, planti man moa yet ol i sakim lotu. Planti man i askim olsem, ‘Mani mi hatwok long kisim, bilong wanem mi mas givim long misin?’ Na sampela i kros long misin i gat planti mani kago na bikpela strong. Ating ol i wanbel long tok bilong Kadinal Joachim Meisner bilong Kolon, Jemani, em i tok, ating bikpela mani kago bilong misin i bin kirapim misin long tingim tumas ol samting bilong skin—ol i no tingim “pasin bilong bilip long Krais em i bikpela samting.”
Na planti ol i lusim misin bilong ol, long wanem, ol i les long ol tok ol i harim—em i no kirapim tingting bilong ol na pinisim hangre bilong ol long ol samting bilong spirit. Ol i hangre long samting profet Amos i tok bai kamap, em i tok, “bai olgeta manmeri i hangre tru, tasol . . . dispela hangre i no bilong kaikai na wara. Ol bai i hangre tumas long harim tok bilong [God].” (Amos 8:11) Lotu bilong ol i givim liklik hap kaikai tasol long ol, olsem na ol i les na lusim lotu bilong ol.
Tru, i gat as na ol i mekim olsem, tasol yu ting i stret ol i lusim lotu olgeta? Long tingting bilong yu, tingim wanpela man i hangre nogut tru na em i lukim samting i luk olsem bret. Tasol taim em i kaikai, em i kisim save olsem em i sodas tasol. Orait, yu ting dispela man bai lusim tingting olgeta long kisim kaikai na inapim hangre bilong em? Nogat, em i no ken mekim olsem. Em bai wok long painim sampela kaikai tru. Na olsem tasol, sapos wanpela lotu i no gat kaikai bilong spirit bilong pinisim hangre bilong lain bilong en, yu ting i gutpela sapos ol i lusim lotu olgeta? O yu ting i gutpela sapos ol i wok long painim wanpela rot bilong inapim hangre bilong ol long ol samting bilong spirit? Planti man i bin mekim olsem, olsem stori i kamap bihain long dispela i soim yumi.