Wanpela Bung Long Frans Ol Man i No Inap Lusim Tingting Long En
“TOK NOGAT LONG TAUN BILONG JEHOVA!” Ol pepa ol i pasim long olgeta hap bilong taun i tokaut olsem. Wanpela lain i birua long ol Witnes i tokaut olsem: “Yumi Olgeta Wantaim i Mas Pasim Dispela Wok Bilong Jehova.” Ol niuspepa i kamapim planti handet stori long dispela samting na ol man i kisim save long ol dispela tok. Ol man i sainim pepa bilong pasim wok bilong ol Witnes, na ol i salim inap olsem 500,000 pepa long ol posofis-boks, em ol pepa i stori long dispela wok. Wanem dispela wok i bin bagarapim bel isi bilong dispela taun Luvia long hap not-wes bilong Frans? Dispela wok em olsem, ol Witnes Bilong Jehova i laik wokim nupela brens-ofis na haus bilong slip.
Jehova i Mekim Wok i Go Bikpela
Wok bilong ol Witnes Bilong Jehova long Frans i bin kamap long 1890 samting. Long yia 1905, ol i bin opim namba wan ples bilong putim ol buk bilong Baibel, long Boven, sauten Frans, na long 1919, i gat liklik ofis long Paris. Long 1930 ol i opim wanpela brens-ofis long dispela taun, na long yia bihain ol lain i mekim wok long ofis ol i kisim ples slip long haus Betel i stap long Angan-le-Ban long hap not bilong Paris. Bihain long Namba Tu Pait, famili bilong Betel i go bek gen long Paris, na long 1959 ol i lusim dispela hap na i go long wanpela haus i gat 5-pela plua long en long Bulon-Biyankur long hap wes bilong dispela biktaun.
Wok bilong autim tok bilong Kingdom i go bikpela, olsem na long 1973 ol i putim ol masin bilong prinim ol buk na haus bilong salim ol buk samting i go long ol narapela hap, long Luvia em inap olsem 100 kilomita long hap wes bilong Paris. Tasol ol ofis i stap yet long Bulon-Biyankur. Tasol namba bilong ol pablisa long Frans i go bikpela olsem na ol haus i stap long Luvia i no inap, maski ol i bin skruim long 1978 na 1985. Orait, ol i pasim tok long wokim ol bikpela haus moa na bungim famili bilong Betel long wanpela hap tasol. Planti manmeri long Luvia i no amamas long dispela wok ol i laik mekim, olsem yumi bin stori long en long kirap bilong dispela stori. Tasol maski ol i birua, ol Witnes i painim wanpela graun i stap longwe inap wan na hap kilomita tasol long ples bilong prinim ol buk. Na nau ol i kirap na mekim bikpela wok inap 6-pela yia. Inap 23 yia famili bilong Betel i bin sindaun long narapela narapela hap, tasol long Ogas 1996 ol i stap wantaim long wanpela ples tasol long Luvia.
Olsem na ol i amamas tru taim bikpela lain inap olsem 1,187 manmeri i bung—300 brata sista bilong famili bilong Betel long Frans, na 329 manmeri bilong 42 narapela narapela brens-ofis ol tu i insait long dispela lain. Ol i bung long Sarere, Novemba 15, 1997, bilong harim tok Brata Lloyd Barry i mekim bilong dediketim dispela brens-ofis. Dispela brata em i wanpela memba bilong Lain Bilong Bosim Ol Witnes. Tasol ol i mekim dispela bung bilong dediketim nupela brens-ofis long taim ol man i birua long ol na inap longtaim long olgeta hap bilong Frans, ol nius i bin kamapim ol stori giaman long ol Witnes Bilong Jehova, olsem na ol i pilim olsem olgeta Witnes long Frans i mas kam bilong amamas long ol i bin win. Olsem na long Sande, Novemba 16, ol Witnes i redim wanpela bikpela miting i gat nem olsem, ‘No Ken Lusim Pasin Sori Bilong Krais.’ Ol i mekim long wanpela ples bung (Villepinte Exhibition Center) long hap not bilong Paris. Ol i singautim olgeta Witnes Bilong Jehova long Frans na ol Witnes i save mekim tok Frans i stap long Beljam na Swiselan, na tu, ol i singautim sampela kongrigesen bilong Briten, Jemani, Laksambek, na Netelan.
Wanpela Bikpela Bung Tru
Ol i kirap redim ol samting bilong dispela bung inap 6-pela mun paslain. Na tupela wik paslain long ol i laik dediketim nupela brens-ofis, ol draiva bilong ol trak long Frans i straik, na ol i pasim ol bikpela rot na ol rot bilong kisim bensin samting. Olsem wanem? Ol inap kisim ol sia na ol narapela samting i go long bung long taim stret? Ol draiva i pasim ol rot olsem na dispela bai pasim ol brata long kam? Gutpela tru, straik i stap wanpela wik tasol na i pinis, na ol ka inap raun gen. Long Fraide apinun paslain long bung bilong dediketim nupela brens-ofis, 38 trak i bringim 84,000 sia i go long 2-pela bikpela haus ol Witnes i baim bilong mekim bung long en. Winim 800 brata na sista i wok long nait olgeta i go inap 9:30 long Sarere long moningtaim bilong putim ol sia, na platfom, na ol samting bilong saun, na 9-pela traipela video.
Long 6 klok long Sande long moningtaim, ol i opim ol dua na ol manmeri i kirap long i go insait. Ol Witnes i bin baim 17 tren na ol i bringim 13,000 Witnes i kam long dispela biktaun. Tu handet brata na sista bilong Paris i bin i stap long ples bilong wetim tren bilong tok amamas long ol man i kam na bilong putim ol long ol grup na go wantaim ol long ples kibung. Wanpela sista i tok olsem dispela gutpela pasin i mekim na ol i “pilim olsem ol i stap gut na bel bilong ol i stap isi.”
Sampela narapela i kam long Paris long balus o long ka. Tasol planti i kam long 953 bas, na ol Witnes long hap bilong Paris ol i kisim PMV samting bilong kam long ples bilong kibung. Planti i bin raun nait olgeta o i bin lusim haus bilong ol long bikmoning tru, tasol amamas bilong ol long kam long dispela miting i bin stap ples klia. Ol i singaut amamas na narapela i holimpas narapela taim ol i bungim gen ol pren em ol i no bin lukim inap sampela yia. Ol i bilas long pasin bilong ples ol i kam long en na dispela i kamapim klia olsem ol man i bung ol i bilong narapela narapela kantri. Yumi save, em narapela kain samting bai kamap.
Taim program i kirap long 10 klok long moningtaim, olgeta sia i pulap, tasol long olgeta wan wan minit planti handet manmeri i wok yet long kam. Maski man i lukluk long wanem wanem hap, em i lukim pes bilong ol man i lait. Planti tausen i sanap tasol o ol i sindaun long plua simen. Olsem as tok bilong kibung i makim, planti yangpela i mekim pasin sori na ol i sanap bambai ol lapun i ken sindaun. Tupela marit i tok: “Mipela i amamas long givim sia bilong mipela long ol brata na sista em mipela i no save long ol tasol mipela i laikim tumas ol!” Planti i no tingim ol yet: “Long taim bilong kibung mipela i sanap klostu long ol sia mipela yet i bin putim long Fraide long nait olgeta. Tasol taim mipela i stap long bung, mipela i amamas tru long ol samting Jehova i givim long mipela.”
Maski skin i les o ol i no gat sia, ol man i kam kibung i putim gut yau long ol ripot bilong ol narapela kantri na long ol tok em Lloyd Barry na Daniel Sydlik i mekim, em tu i wanpela memba bilong Lain Bilong Bosim Ol Witnes. Brata Barry i mekim wanpela tok, nem bilong en “Jehova i Save Strongim Yumi Tru,” na em i kamapim klia olsem wanem Jehova i bin blesim ol manmeri bilong em na ol i kamap planti maski ol kain kain traim i painim ol. Nem bilong tok bilong Brata Sydlik em “Ol Manmeri i Putim Jehova i Stap God Bilong Ol Em Ol i Ken Amamas!” Tupela tok wantaim i stret tru, long wanem, long dispela taim ol man i wok long birua long ol Witnes Bilong Jehova long Frans. Brata Sydlik i kamapim olsem yumi no inap kisim trupela amamas taim yumi mekim ol samting bilong amamasim skin, nogat, yumi inap i stap amamas tru taim yumi pas gut wantaim Jehova na kisim stretpela tingting long i stap bilong yumi. Taim em i askim ol manmeri i bung, “Yupela i amamas?” ol i paitim han bikpela tru.
Wanpela sista em “i no stap amamas moa,” bihain long kibung em i raitim pas olsem: “Wantu mi luksave olsem mi inap long stap amamas. Mi bin wok long painim amamas long ol samting i no inap helpim mi, na long dispela tok Jehova i soim mi olsem mi mas senis.” Narapela brata i tok: “Nau mi laik wok strong long mekim bel bilong Jehova i amamas. Mi no laik larim wanpela samting i tekewe dispela amamas mi kirap long pilim long bel bilong mi.”
Taim miting i laik pinis, siaman i amamas tru long toksave long namba bilong ol manmeri i bung: em 95,888—em namba wan bikpela bung bilong ol Witnes Bilong Jehova long Frans, winim olgeta taim bipo!
Long taim bilong laspela singsing aiwara bilong amamas i kamap long ai bilong planti brata sista, na bihain long beten, taim ol i redi long go bek long ples bilong ol, bel bilong ol i amamas na bel hevi wantaim. Planti man i lukim gutpela pasin bilong ol Witnes long dispela bung. Ol draiva bilong bas i mekim planti gutpela tok long pasin bilong ol Witnes i bin kam long dispela bung. Ol i kirap nogut tu long pasin bilong ol Witnes long stretim gut ol samting na bai olgeta 953 bas i ken lusim dispela ples bung insait long 2-pela aua tasol na narapela i no pasim rot bilong narapela! Na ol wokman bilong ples bilong wetim tren na bilong ol PMV ol i amamas tru long pasin bilong ol man i kam long dispela bung. Ol i toktok gut wantaim na ol Witnes i autim tok long planti man.
‘Olsem Wanpela Hulwara Long Ples Wesan Nating’
Aposel Pol i tokim ol wanwok Kristen: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. . . . Yumi wan wan i mas wok strong moa long strongim bel bilong ol arapela.” (Hibru 10:24, 25) Tru tumas, dispela bikpela miting i bin strongim tru olgeta brata sista. Wanpela sista i tok, em i “olsem wanpela hulwara namel long ples wesan nating.” Sampela brata bilong brens-ofis long Togo i tok: “Dispela bung i bin givim nupela strong long mipela, na kirapim mipela, na strongim mipela, na mipela i tingting strong long mekim yet wok bilong Jehova, winim olgeta taim bipo.” Wanpela wasman sekit i tok: “Ol manmeri i bin bel hevi ol i amamas taim ol i go long ples.” Narapela i tok: “Bung i kirapim na strongim ol brata.” Tupela marit i raitim pas olsem: “No gat wanpela taim bipo mipela i bin pilim olsem mipela i stap klostu long oganaisesen bilong Jehova olsem nau.”
Man bilong raitim Song i tok: “Mi save sanap strong. I no gat wanpela samting i ken bagarapim mi. Bai mi litimapim nem bilong yu, God, namel long ol manmeri i bung bilong lotu.” (Song 26:12) Bung bilong ol Kristen kain olsem dispela bung em i save helpim olgeta long kisim strong gen na sanap strong long taim bilong hevi. Wanpela sista i tok: “Maski i gat wanem wanem hevi, bel bilong mipela i tingim tru dispela gutpela samting tru na mipela inap tingim long olgeta taim bihain bilong mekim gut bel bilong mipela.” Wanpela wasman sekit i mekim wankain tok olsem: “Taim hevi i painim mipela, mipela bai tingim dispela bung i olsem piksa bilong ol samting bai kamap long Paradais na dispela bai helpim mipela long karim ol hevi.”
Song 96:7 i tok: “Yupela olgeta lain manmeri, yupela i mas amamas long Bikpela. Yupela i mas amamas long biknem na strong bilong en.” Tru tumas, nupela brens-ofis long Frans ol i bin dediketim em i makim olsem Jehova i win tru. Em tasol inap mekim na ol brata inap pinisim dispela wok, maski planti man i bin birua nogut tru long dispela wok. Ol Witnes Bilong Jehova long Frans i tingting strong long ol i ‘No Ken Lusim Pasin Sori Bilong Krais’ na larim ‘lait bilong ol’ i kamap klia, winim olgeta taim bipo. (Jon 15:9; Matyu 5:16) Olgeta man i bin i kam long program bilong dediketim nupela brens-ofis ol i pilim wankain olsem man bilong raitim Song, em i tok olsem: “Bikpela yet i mekim dispela samting i kamap, na mipela i lukim em i gutpela tru.”—Song 118:23.
[Piksa long pes 26]
Lloyd Barry
[Piksa long pes 26]
Daniel Sydlik
[Piksa long pes 26]
95,888 i bin kam long dispela bikpela program long haus kibung long “Villepinte Exhibition Center”
[Ol Piksa long pes 28]
Planti tausen i bin kam long bung ol i bin sanap o sindaun long plua na harim tok