‘Gutpela Piksa Bilong Pas Wantaim na i Stap Brata Brata’
Wanpela meri i mekim dispela tok long pasin ol Witnes Bilong Jehova i bin mekim bihain long taim wanpela long famili bilong em i dai na em i bel hevi tru. Em i stori olsem:
“Mi na famili bilong mi i laik tok tenkyu long ol Witnes bilong kongrigesen tok Itali long Fraibek, Jemani. Famili bilong mi ol i no Witnes Bilong Jehova; wanpela brata bilong mi tasol em i Witnes, em Antonio na meri bilong em Anna. Inap longtaim mipela i bin sutim tok long ol long i go insait long dispela lotu, tasol mipela i bin larim ol i bihainim laik bilong ol.
“Tasol nau, mipela i mas senisim tingting bilong mipela. Mipela i pilim gutpela pasin bilong stap brata brata na narapela i sori tru long narapela, em mipela i no ting bai kamap long mipela.
“Sori tru, bagarap i painim Anna long rot na em i dai taim em i stap yangpela yet. Mipela i save sindaun long Itali, olsem na mipela inap stap wantaim brata bilong mi Antonio na ol pikinini bilong em inap liklik taim tasol. Ol brata Witnes bilong em i kam na helpim em. Ol i stap wantaim em, toktok wantaim em, strongim bilip bilong em, lukautim em long ol samting bilong skin, strongim bel bilong em, na helpim em long mani. Mi yet i no inap tok tenkyu long kongrigesen, olsem na long rot bilong nius bilong yupela mi laik tok tenkyu long gutpela piksa bilong ol long pas wantaim na i stap brata brata, em wanpela samting mipela i no inap lusim tingting long en.”
Yumi amamas long gutpela tok dispela meri i mekim. Olsem em i bin lukim, ol Witnes Bilong Jehova i wanpela bikpela lain brata i stap long olgeta hap. (1 Pita 2:17) Ol i wok long kamapim strong pasin bilong narapela i laikim narapela long lain bilong ol, long wanem, ol i save pasin bilong laikim ol narapela “i save mekim ol arapela gutpela pasin i kamap strong na i wok bung wantaim.” (Kolosi 3:14) Long taim bilong bikpela hevi tu—em dispela samting inap painim yumi olgeta—ol Witnes Bilong Jehova i pas gut wantaim God na ol manmeri bilong em.—Sindaun 18:24; Saveman 9:11; Jon 13:34, 35.