Yu Gat “Gutpela Bel Bilong Bihainim Tok”?
TAIM Solomon i kamap king bilong ol Israel bilong bipo, em i pilim olsem em i no inap mekim dispela wok. Olsem na em i askim God long givim gutpela tingting na save long em. (2 Stori 1:10) Na tu Solomon i beten olsem: “Yu mas givim long wokboi bilong yu gutpela bel bilong bihainim tok, bai mi inap bosim gut lain bilong yu.” (1 King 3:9, NW) Sapos Solomon i gat gutpela bel bilong bihainim tok, em bai bihainim ol lo bilong God na Jehova bai mekim gut long em.
Gutpela bel bilong bihainim tok i no wanpela hevi, em i bikpela samting bilong kamapim amamas. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Tru tumas, yumi mas bihainim tok bilong God. Em tasol i Man bilong wokim olgeta samting. Graun na olgeta samting i stap long en i bilong em; na olgeta silva na gol tu. Olsem na yumi no inap givim wanpela samting bilong skin long em, tasol em i orait long yumi mekim wok long mani samting bilong yumi bilong kamapim bel bilong yumi olsem yumi laikim em. (1 Stori 29:14) Jehova i laik yumi givim bel long em na long pasin daun wokabaut wantaim em, na mekim laik bilong em.—Maika 6:8.
Taim wanpela man i askim Jisas, wanem lo i namba wan long Lo Bilong Moses, em i tok: “Yupela i mas laikim God, Bikpela bilong yumi. Yupela i mas laikim em tru . . . Dispela lo em i bikpela, na em i namba wan tru.” (Matyu 22:36-38) Wanpela rot bilong kamapim olsem yumi laikim God, em yumi mas bihainim tok bilong em. Olsem na yumi olgeta wan wan i mas beten long Jehova long givim yumi gutpela bel bilong bihainim tok.
Ol i Gat Gutpela Bel Bilong Bihainim Tok
Long Baibel i gat planti stori bilong ol man i gat gutpela bel bilong bihainim tok. Olsem: Jehova i tokim Noa long wokim wanpela traipela sip bambai ol man na animal i ken abrusim bagarap. Dispela em wanpela bikpela wok tru na ol i bin wok inap 40 o 50 yia samting bilong pinisim dispela wok. Maski i gat kain kain tul i wok long paua na ol narapela samting i stap long nau, man i mas i gat bikpela save tru long wokim kain traipela samting olsem na bai em i ken trip antap long wara. Na Noa i mas toksave long ol manmeri ating ol i tok bilas long em. Tasol em i bihainim tru olgeta tok. Baibel i tok: “Noa i mekim olgeta samting olsem God i tokim em.” (Stat 6:9, 22; 2 Pita 2:5) Noa i kamapim bel bilong em olsem em i laikim Jehova taim em i bihainim gut tok inap planti yia. Em i stap olsem gutpela piksa yumi olgeta i ken bihainim!
Tingim tu papa bilong ol famili, em Abraham. God i tokim em long lusim gutpela ples Ur long hap bilong Kaldia na i go long wanpela ples em i no save long en. Abraham i no sakim tok, em i go tasol. (Hibru 11:8) Abraham na famili bilong em i stap long ol haus sel i go inap long taim em i dai. Inap planti yia em i stap long dispela hap olsem man bilong narapela kantri, na bihain Jehova i mekim gut long em na gutpela meri bilong em Sara na givim wanpela pikinini man long ol, nem bilong em Aisak. Abraham i gat 100 krismas na ating em i laikim tru dispela pikinini bilong em, long wanem, taim em i lapun tru em i kisim dispela pikinini! Sampela yia bihain, Jehova i askim Abraham long givim Aisak long em olsem ofa bilong paia i kukim olgeta. (Stat 22:1, 2) Ating taim em i tingting tasol long mekim olsem Abraham i bel hevi stret. Tasol em i kirap bihainim tok, long wanem, em i laikim Jehova na em i bilip olsem pikinini bilong promis bai kamap long rot bilong Aisak, maski God i mas kirapim bek Aisak long indai. (Hibru 11:17-19) Klostu Abraham i laik kilim pikinini bilong em, tasol Jehova i pasim em na i tok: “Yu gat dispela wanpela pikinini tasol, na yu no pasim em. Nogat. Yu redi tasol long givim em long God. Olsem na mi save, yu man bilong aninit long God.” (Stat 22:12) Abraham i bihainim tok, na aninit long God, olsem na God i kolim em olsem, “Pren bilong mi.”—Jems 2:23.
Krais Jisas i stap olsem nambawan piksa tru long pasin bilong bihainim tok. Taim em i no kam daun yet long graun, em i amamas long bihainim tok na mekim wok bilong Papa bilong em long heven. (Sindaun 8:22-31) Taim em i stap man long graun, Jisas i bihainim tok bilong Jehova long olgeta samting, na long olgeta taim em i amamas long mekim laik bilong Em. (Song 40:8; Hibru 10:9) Olsem na Jisas i tok tru olsem: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi. Papa i bin salim mi na mi kam, em i stap wantaim mi. Em i no lusim mi, na larim mi i stap wanpis. Nogat. Em i no lusim mi, long wanem, oltaim mi save mekim ol samting em i laikim.” (Jon 8:28, 29) Na bilong kamapim klia olsem Jehova em i nambawan King tru bilong heven na graun na bilong kisim bek ol manmeri i save bihainim tok, long laik bilong em yet Jisas i givim laip bilong em, na em i kisim bikpela pen na em i dai olsem wanpela man nogut. Tru tumas, “em i daunim em yet na i bihainim tok bilong God, i go inap long em i dai, yes, inap long em i dai long diwai [pos].” (Filipai 2:8) Em i gutpela piksa tru bilong man i gat gutpela bel bilong bihainim tok!
Bihainim Sampela Tok Tasol, Em i No Inap
Ol man i tok ol i bin bihainim gut tok bilong God, i no olgeta i bin bihainim tru. Tingim King Sol bilong Israel long bipo. God i tokim em long pait long ol Amalek na bagarapim olgeta samting bilong ol. (1 Samuel 15:1-3) Tru Sol i bagarapim olgeta manmeri bilong dispela lain, tasol em i no kilim i dai king bilong ol na em i no kilim olgeta sipsip na bulmakau bilong ol. Samuel i askim Sol olsem: “Bilong wanem yu no bihainim tok bilong Bikpela?” Sol i bekim tok olsem: “Mi bihainim tok bilong Bikpela . . . Ol [Israel] i ting long bringim ol gutpela gutpela abus i kam hia . . . bilong . . . mekim ofa long God.” Tok bilong Samuel i makim olsem man i mas bihainim olgeta tok, em i tok olsem: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol. Pasin bilong sakim tok bilong God i wankain olsem pasin sanguma, na pasin bilong bikhet long God i olsem pasin bilong bihainim ol giaman god. Yu bin givim baksait long tok bilong Bikpela, olsem na em i givim baksait long yu na yu no ken i stap king moa.” (1 Samuel 15:17-23) Sol i lusim planti samting bilong em, long wanem, em i no gat gutpela bel bilong bihainim tok!
Saveman King Solomon tu, maski em i bin beten bilong kisim gutpela bel bilong bihainim tok, bihain em i no bihainim moa tok bilong Jehova. Em i no bihainim laik bilong God na em i maritim ol meri haiden, na ol i kirapim em long mekim sin long God. (Nehemia 13:23, 26) God i no laikim moa Solomon, long wanem, em i no gat gutpela bel moa bilong bihainim tok. Dispela i mas givim tingting long yumi!
Dispela i no makim olsem Jehova i ting ol wokboi bilong em i mas mekim pasin i stret olgeta, nogat. Em ‘i save yumi i olsem das tasol.’ (Song 103:14) Yumi olgeta bai popaia sampela taim, tasol God i save, tru yumi gat laik tru long amamasim em o nogat. (2 Stori 16:9) Sapos yumi popaia long wanem yumi no gutpela olgeta tasol yumi tanim bel, yumi ken askim God long tingim ofa bilong Krais na lusim dispela rong bilong yumi. Na yumi ken bilip tru olsem Jehova bai “marimari moa yet long ol manmeri i kam bek long em.” (Aisaia 55:7; 1 Jon 2:1, 2) Na ating yumi mas kisim helpim long ol elda Kristen inap long yumi ken kamap strong gen long spirit na bai yumi gat strongpela bilip na gutpela bel bilong bihainim tok.—Taitus 2:2; Jems 5:13-15.
Yu Save Bihainim Gut Tok?
Yumi ol wokboi bilong Jehova, olsem na ating planti bilong yumi i ting yumi gat gutpela bel bilong bihainim tok. Ating bai yumi tingting, Mi save mekim wok bilong autim tok bilong Kingdom. Mi save sanap strong taim sampela bikpela samting i kamap, olsem ol Kristen i no insait long ol samting bilong dispela graun. Na mi save go oltaim long ol miting Kristen, olsem aposel Pol i tokim yumi long mekim. (Matyu 24:14; 28:19, 20; Jon 17:16; Hibru 10:24, 25) Tru, ol manmeri bilong Jehova olsem wanpela lain olgeta, ol i save bihainim tok long ol dispela bikpela samting.
Tasol olsem wanem long pasin bilong yumi long ol samting yumi save mekim long wan wan de, maski i olsem ol i liklik samting? Jisas i tok: “Sapos wanpela man i save lukaut gut long ol liklik samting, orait em bai i lukaut gut long ol bikpela samting tu. Na man i save mekim pasin i no stret long ol liklik samting, em bai i mekim pasin i no stret long ol bikpela samting tu.” (Luk 16:10) Olsem na i gutpela yumi wan wan i askim yumi yet olsem, Mi gat gutpela bel bilong bihainim tok long ol liklik samting o long ol samting ol narapela i no save long en?
Man bilong raitim Song i tok, long taim em i stap long haus bilong em na ol man i no inap lukim em, em i “mekim stretpela pasin tasol.” (Song 101:2) Taim yu stap long haus, ating yu bai opim televisen na kirap long lukim wanpela piksa. Long dispela taim stret traim inap kamap long pasin bilong yu long bihainim tok. Ating long piksa ol pasin i no stret i kamap. Olsem wanem? Bai yu lukluk yet long en, na ting em i orait, long wanem, ol i save soim ol dispela kain piksa long nau? O gutpela bel bilong yu bai kirapim yu long bihainim tok bilong Baibel, olsem, ‘yupela i no ken larim tok bilong pasin pamuk na olgeta kain pasin doti i kamap liklik namel long yupela?’ (Efesus 5:3-5) Olsem wanem? Bai yu pasim televisen, maski dispela stori i kirapim tru tingting bilong yu? O sapos piksa nogut i kamap bai yu senis i go long narapela piksa? Man bilong raitim Song i tok: “Bikpela i save skelim ol stretpela man na ol man nogut. Em i no laikim tru ol man i sakim lo bilong em.”—Song 11:5.
Gutpela Bel Bilong Bihainim Tok i Kamapim Blesing
I gat planti samting yumi save mekim long i stap bilong yumi na yumi mas skelim yumi yet bilong save, yumi bihainim tru tok bilong God long bel bilong yumi. Yumi laikim tru Jehova, olsem na dispela i mas kirapim yumi long amamasim em na mekim ol samting em i tokim yumi long en long rot bilong Baibel. Gutpela bel bilong bihainim tok bai helpim yumi long pas gut yet wantaim Jehova. Tru tumas, sapos yumi bihainim gut tok, Jehova i ken orait long ‘tok bilong yumi na tingting bilong yumi.’—Song 19:14.
Jehova i save laikim yumi, olsem na em i skulim yumi long bihainim tok bilong helpim yumi yet. Na taim yumi givim bel tru long bihainim gut ol tok God i skulim yumi long en dispela i save helpim yumi. (Aisaia 48:17, 18) Olsem na yumi mas amamas long kisim helpim i kam long Papa bilong yumi long heven, em dispela helpim em i save givim long yumi long rot bilong Baibel, spirit bilong em, na oganaisesen bilong em. God i save skulim yumi gut tru na i olsem baksait long yumi, yumi harim wanpela nek i ‘tokim yumi long rot yumi mas bihainim.’ (Aisaia 30:21) Jehova i save skulim yumi long rot bilong Baibel, ol buk Kristen, na ol miting bilong kongrigesen, olsem na yumi mas harim gut tok, mekim wok long ol tok yumi lainim, na ‘bihainim tok long olgeta samting.’—2 Korin 2:9.
Gutpela bel bilong bihainim tok inap kamapim bikpela amamas na planti blesing. Em bai helpim yumi long stap bel isi, long wanem, yumi bai save yumi amamasim God Jehova na mekim em i belgut tru. (Sindaun 27:11) Gutpela bel i save bihainim tok bai lukautim yumi taim traim i painim yumi long mekim rong. Olsem na yumi mas bihainim tok bilong Papa bilong yumi long heven na beten olsem: “Yu mas givim long wokboi bilong yu gutpela bel bilong bihainim tok.”
[Piksa Kredit Lain long pes 29]
Ol i kisim long buk Self-Pronouncing Edition of the Holy Bible, i gat Baibel King James na Baibel Revised long en