Jisas i Lainim “Pasin Bilong Bihainim Tok”

Oltaim Jisas i save bihainim tok bilong Jehova. (Jon 8:29) So bilong wanem Baibel i tok: “Ol pen na hevi em i karim i skulim em long pasin bilong bihainim tok”?—Hib. 5:8.

Taim Jisas i stap long graun, em i bungim ol hevi we em i no bungim taim em i stap long heven. Papamama bilong Jisas i no gutpela olgeta, tasol tupela i laikim tru Jehova. (Luk 2:51) Em i karim hevi long han bilong ol hetman nogut bilong lotu na ol ofisa bilong gavman em ol i mekim pasin i no stret long em. (Mat. 26:59; Mak 15:15) Na em i karim bikpela pen tru na em i dai. Baibel i tok: “Em i daunim em yet na i bihainim tok i go inap long em i dai.”—Fili. 2:8.

Ol dispela samting i kamap i skulim Jisas long pasin bilong bihainim tok, em samting em i no bin lainim long heven. Dispela i redim em long kamap King i gutpela olgeta na Hetpris husat inap kliagut long ol hevi yumi karim. (Hib. 4:15; 5:9) Ol pen na hevi Jisas i karim i skulim em long pasin bilong bihainim tok na dispela i mekim em i dia tumas long Jehova. Yumi tu inap stap olsem man o meri i dia tumas long Jehova na larim em i yusim yumi long mekim ol wok bilong em sapos yumi bihainim yet tok bilong em, maski yumi karim ol hevi.—Jem 1:4.